Lix yaalalil chixjunil li k’a’aq re ru

Nokochal sa’ li ewu a’in xyo’oninkil ut xpaab’ankil naq sa’ k’a’ruhaq, too’elq chaq chi kawob’resinb’ilaqo ut osob’tesinb’ilaqo xb’aan li Santil Musiq’ej, li naxk’ut li yaal.¹ Nawaj aatinak chirix xsik’b’al li yaal qajunes qib’.

Jo’ saaj winq, naab’aleb’ chaq inpatz’om chirix li Iglees. Maak’a’ xb’alaq’il jun xraqaleb’ lin patz’om. Junjunqeb’ chik maawa’eb’ jo’ a’an ut xe’xk’ut li xe’wiib’an wi’ xch’ooleb’ jalaneb’.

Chi kok’ aj xsa’ xin’aatinak rik’in lin na’. Ninnaw naq a’an xnaw naq naab’al reheb’ inpatz’om maak’a’eb’ xb’alaq’il ut xe’chal chaq sa’ inch’ool. Nink’oxla naq xraho’ b’ayaq xch’ool chirixeb’ li patz’om li xe’raj wech’ok. A’b’anan, maajun wa xinxch’iila xb’aan naq xe’wan inpatz’om. A’an xrab’iheb’ ut xyal xsumenkileb’. Naq xk’e reetal naq xyehom chixjunil li naru ut naq toj wankeb’ inpatz’om, tixye raj jun aatin chi kama’in: “David, chaab’il li patz’om a’an. Naq laa’at yookat chi sik’ok, tzolok, ut tijok re xk’ulb’al xsumenkil, chab’aanu li k’a’ru nakanaw us xb’aanunkil ut maab’aanu li k’a’ru nakanaw naq ink’a’ us xb’aanunkil.” Li na’leb’ a’in x’ok jo’ eetalil choq’ re chanru xsik’b’al li yaal injunes wib’. Rik’in li tzolok, li tijok, ut xpaab’ankileb’ li chaq’rab’, xintaw naq wankeb’ xsumenkil chixjunileb’ inpatz’om aajeleb’ ru. Xintaw ajwi’ naq choq’ re junjunqeb’ li patz’om, neke’ajman ru xnajtil li paab’aal, li kuyum, jo’ ajwi’ li musiq’anb’il na’leb’.²

Lin na’ xk’e sa’ inb’een laa’in li teneb’ahom re xnimob’resinkil lin paab’aal ut xtawb’al insumehom. A’an xnaw naq li sumehom aajeleb’ ru te’chalq rik’in naq tinsik’ li yaal a’ yaal jo’ chanru xaqab’anb’il xb’aan li qaChoxahil Yuwa’. Xnaw naq tento tintaw li yaal. Xnaw naq tento tinpatz’oq chi maak’a’ inb’alaq’il ut naq tento taawanq inch’ool chixb’aanunkil li k’a’ru ak xinnaw naq yaal. Xnaw naq tento tintzoloq ut tintijoq ut naq tento tinnimob’resi inkuyum naq yookin chixsik’b’al li sumehom chalen chaq li Qaawa’. Li qajom re wanq qakuyum a’an jun xraqal li sik’ok yaal ut jun xraqal li na’leb’ chirix chanru li Qaawa’ naxk’utb’esi li yaal.³

Rik’in xnumik li hoonal, xin’ok chixnawb’al naq lin na’ yoo chixk’utb’al we lix na’leb’ li qaChoxahil Yuwa’ chirix chanru xsik’b’al li yaal. Xnima inpaab’aal, xe’chal li sumehom, ut xink’ulub’a jun b’oqok chi k’anjelak choq’ misioneer.

Xwulak li hoonal, sa’ xtiklajik inmision, naq xinnaw naq tento tinnaw ma yaal li Iglees ut ma kiwan laj Jose Smith jo’ xprofeet li Dios. Xweek’a li k’a’ru xye li Awa’b’ej Thomas S. Monson chi ch’olch’o ru sa’ li jolomil ch’utub’aj-ib’ toje’ xnume’: “Wi maak’a’ lix kawil nawom aach’ool chirix li k’a’aq re ru a’in, chab’aanu li na’ajman ru re xk’ulb’al. Jwal aajel ru naq taawanq xnawom aach’ool aajunes awib’ sa’eb’ li ch’a’ajkil q’e kutan a’in, xb’aan naq lix nawomeb’ xch’ool li jun ch’ol chik ink’a’ naru chak’amb’al toj sa’ roso’jik.”⁴ Xinnaw li tento tinb’aanu. Ajb’il ru naq tinwil ru lix Hu laj Mormon chi maak’a’ xb’alaq’il inch’ool, chi tiik li wajom, ut tento tinpatz’ re li Dios ma yaal malaj ink’a’.

Cherab’i li chaq’al ru yeechi’ihom k’eeb’il xb’aan li qaChoxahil Yuwa’ sa’ xtz’uumal re li profeet aj Moroni: “Ut naq teekʼul li kʼaʼaq re ru aʼin, nawaj relajinkil cheru naq chepatzʼ re li Dios, li Junelik Yuwaʼbʼej, saʼ lix kʼabʼaʼ li Kristo, ma inkʼaʼ yaal li kʼaʼaq re ru aʼin; ut wi texpatzʼoq rikʼin xʼanchalil eechʼool, chi tiik eerajom, chi wank eepaabʼaal chirix li Kristo, aʼan tixkʼutbʼesi cheru li yaal chirix, rikʼin lix wankil li Santil Musiqʼej.”⁵

Re xk’ulb’al li k’a’ru wan sa’ lix Hu laj Mormon, tento tinwil ru. Xintikla sa’ xtiklajik li hu ut wulaj wulaj xwil ru. Wankeb’ li neke’xk’ul jun xk’utb’esink li yaal sa’ junpaat. Choq’ reheb’ li jun ch’ol chik, mas li hoonal ut tijok naraj ut wan naq tento te’ril ru li hu junjunqeb’ li sut. Ajb’il ru naq xwil ru chixjunil li hu rub’elaj naq xink’ul li yeechi’inb’il k’utb’esink. A’b’anan, li Dios xk’utb’esi lix yaalalil chiwu rik’in lix wankil li Santil Musiq’ej.

Sa’ lin tz’iib’ahom naq misioneerin chaq, xinch’olob’ xsahilal inch’ool rik’in xnawb’al li yaal jo’ ajwi’ lix k’eek’ookilal inch’ool ut intiikil ajom chi k’anjelak a’ yaal jo’ chanru li yaal xink’ul. Xintz’iib’a: “Xinyeechi’i re inYuwa’ sa’ Choxa ut xinyeechi’i wib’ naq tink’e inch’ool chi anchal inmetz’ew, naq 100 por ciento tink’e chiru chixjunil inyu’am, maak’a’ naxye li patz’b’ilaq we, jo’kan tinb’aanu, a’ut anajwan anajwan toj wan li rela’ lin mision ut tink’anjelaq re naq jwal chaab’ilaq li mision a’an, jun mision ink’a’ taayot’e’q wi’ inch’ool, a’ut moko choq’ we ta tinb’aanu, re b’an li Qaawa’. Ninra li Qaawa’, ut ninra li k’anjel, ut yal nintz’aama naq li eek’ahom a’an maajo’q’e tinixkanab’.”

Xin’ok chixnawb’al naq aajel ru li k’iilasutinb’il ch’olaniik ut xyalb’al inq’e re xjalb’al ink’a’uxl ut xpaab’ankileb’ li chaq’rab’ re naq maajo’q’e tinixkanab’ raj li eek’ahom a’an. Li Awa’b’ej Monson xye, “Jun xnawom ch’oolej tento naq eek’asinb’ilaq ut k’eeb’ilaq xyu’am rik’in xpaab’ankileb’ junelik lix taqlahom li Dios ut rik’in li tijok ut xtzolb’aleb’ li loq’laj hu wulaj wulaj.”⁶

Chiru xnumikeb’ li chihab’, inpatz’om reheb’ li misioneer ut li saaj chiru li ruchich’och’ chanru xe’tikla xyalb’aleb’ xq’e chixsik’b’al li yaal ut chixk’ulb’al xnawomeb’ xch’ool. Haye’ chixjunileb’ neke’xsume naq lix yalb’aleb’ xq’e chixsik’b’al li yaal xtikla rik’in xsik’b’al xjuneseb’ rib’ chirilb’al ru lix Hu laj Mormon chalen chaq lix tiklajik ut xpatz’b’al re li Dios ma yaal a’an. Sa’ xb’aanunkil a’in, neke’xsik’ “k’anjelak” sa’ xna’aj naq “k’anjelanb’ilaqeb’ ”⁷ xb’aan li nawiib’an wi’ xch’ooleb’ li jun ch’ol chik.

Re xnawb’al li yaal, tento taqayu’ami li evangelio ⁸ ut “[taqayal] rix”⁹ li aatin. Tijb’ilo naq ink’a’ taqatz’eqtaana lix Musiq’ li Qaawa’.¹⁰ Li jalb’a-k’a’uxlej, junajinb’il rik’in xk’eek’ookilal qach’ool chixpaab’ankileb’ li chaq’rab’, jwal aajel ru sa’ xsik’b’al li yaal choq’ re li junjunq.¹¹ Relik chi yaal, naru naq tento taawanq qach’ool re “[taqaq’axtesi] chixjunil” li qamaak re xnawb’al li yaal.¹²

Taqlanb’ilo chaq “[chixsik’b’al] xk’ulb’al [qanawom] rik’in li tzolok ut rik’in ajwi’ li paab’aal” ut “[chixsik’b’al] … sa’eb’ li hu q’axal chaab’il li aatin re chaab’il na’leb’.”¹³ Sa’ xsik’b’al li yaal, us taqab’aanu sa’eb’ “li hu q’axal chaab’il” ut sa’eb’ li yo’leb’aal q’axal chaab’il ajwi’. Sa’ xyanqeb’ li hu q’axal chaab’il wankeb’ li loq’laj hu ut li raatineb’ li yo’yookil profeet.

Li Awa’b’ej Monson xpatz’om chaq qe chiqajunil naq “[chiqab’aanu] li na’ajman ru” re xk’ulb’al ut xk’uulankil jun xnawom qach’ool kaw rib’.¹⁴ K’a’ru na’ajman ru re naq taanimanq ut taakawob’resiiq lix nawom eech’ool? Chiqajunjunqal wan qateneb’ahom chixb’aanunkil li na’ajman ru re xk’ulb’al ut xk’uulankil jun xnawom qach’ool kaw rib’.

Xk’uulankileb’ li qasumwank rik’in kuyuk naq “[naqab’aanu] li na’ajman ru” re xk’ulb’al qasumehom chalen chaq li Qaawa’, a’an jun xraqal lix na’leb’ li Dios chirix xtzolb’al li yaal. Q’axal wi’chik sa’ xhoonalil li ch’a’ajkilal, naru naq tento “[taqaq’axtesi qib’] chi [sa sa’ qach’ool] ut rik’in kuyuk chiru chixjunil li rajom li Qaawa’.”¹⁵ Xk’uulankileb’ li qasumwank rik’in kuyuk naxnimob’resi lix tuulanil qach’ool, naxnimob’resi li qajom chixnawb’al li yaal, ut naxkanab’ li Santil Musiq’ej “[chixk’amb’al qab’e] sa’eb’ xb’ehil li chaab’il na’leb’, re naq [too’osob’tesiiq, took’ehe’q] chi usaak, ut taakole’q [qix] .”¹⁶

Li wixaqil, li xMary, ut laa’in wan junaq komon li q’axal naqara a’ut a’an xch’a’ajkilo’ chiru lix yu’am rik’in junjunqeb’ lix na’leb’ li Iglees. A’an naxra li evangelio, ut naxra li Iglees a’ut toj wankeb’ xpatz’om. Tz’apb’il sa’ junajil sa’ li santil ochoch, naxik rajlal sa’ li Iglees, naxtz’aqob’resi ru lix b’oqb’al, ut q’axal chaab’il jo’ na’b’ej ut ixaqilb’ej. Chiru xnumikeb’ li chihab’, xyalom xq’e chixb’aanunkil li k’a’ru naxnaw naq us xb’aanunkil ut xtz’eqtaanankil li k’a’ru naxnaw naq ink’a’ us xb’aanunkil. Naxk’uulaheb’ lix sumwank ut toj nasik’ok. Wankeb’ hoonal naq nab’antioxin naq naru chi tenq’aak xb’aan lix paab’aaleb’ jalaneb’.

Moko junxil ta lix obiisp xraj aatinak rik’in a’an ut lix b’eelom. A’an xpatz’ reheb’ naq te’xk’ulub’a jun b’oqb’al sa’ li santil ochoch chi k’anjelak choq’ reheb’ li ani ak kamenaqeb’ li neke’raj ru li k’ojob’anb’il k’anjel re li santil ochoch. Xe’sach’ xch’ool rik’in li b’oqok a’in, a’ut xe’xk’ulub’a ut xe’ok chi k’anjelak sa’ li rochoch li Qaawa’. Li ralal toje’ xtz’aqon sa’ xtz’ilb’al rix li resilal lix junkab’al ut xtaw jun k’ab’a’ej li maji’ naxk’ul li k’ojob’anb’il k’anjel re li santil ochoch. Chirix a’an xe’xb’aanu li k’ojob’anb’il k’anjel re li santil ochoch choq’ re li kristiaan a’in ut lix junkab’al. Naq xe’wiq’la chiru li artal ut xb’aanuman li k’ojob’anb’il k’anjel re li tz’apok sa’ junajil, li chaab’il ixq aj kuyunel a’in li yoo chi sik’ok chiru k’iila chihab’ xk’ul jun musiq’anb’il na’leb’ li xk’e chixnawb’al naq yaal li santil ochoch ut eb’ li k’ojob’anb’il k’anjel neke’b’aanuman chi sa’. Xb’oq lix na’ ut xye re li k’a’ru xk’ul ut xye naq us ta toj wan xpatz’om, anajwan xnaw naq yaal li santil ochoch, naq yaaleb’ li k’ojob’anb’il k’anjel re li santil ochoch, ut naq yaal li Iglees. Xyaab’ak lix na’ naq xb’antioxi naq wan jun xChoxahil Yuwa’ aj rahonel ut aj kuyunel ut naq wan lix ko’ li toj nasik’ok rik’in kuyum.

Xk’uulankileb’ li sumwank rik’in kuyum naxk’ameb’ chaq li osob’tesink re choxa sa’ li qayu’am.¹⁷

Intawom chaq xnimal lix k’ojob’ankil inch’ool sa’ lix yeechi’ihom li Qaawa’ naq “rik’in lix wankil li Santil Musiq’ej teenaw li yaal chirix chixjunil li k’a’aq re ru.”¹⁸ Us ta ink’a’ naqanaw chixjunil, naru taqanaw li yaal. Naru taqanaw naq yaal lix Hu laj Mormon. Relik chi yaal, li Awa’b’ej Russell M. Nelson kixk’ut sa’ li ewu a’in naq, naru “taqeek’a, sa’ xchamal li qaam [chi’ilmanq Alma 13:27], naq chi maak’a’ nawiib’an qach’ool lix Hu laj Mormon a’an li raatin li Dios.” Ut naru “naq jwal nim xchamal li qeek’ahom naq maajaruj taqaj xyu’aminkil yal ta jun kutan chi maak’a’.”¹⁹

Naru taqanaw naq li Dios a’an li qaYuwa’ li nokoxra; ut naq li Ralal, Jesukristo, a’an aj Kolol qe ut aj Tojol qix. Naru taqanaw naq tento taqoxloq’i li qakomonil sa’ lix Iglees ut naq li tz’aqonk sa’ li loq’laj wa’ak rajlal xamaan tooxtenq’a li junjunq qe ut tixtenq’a li qajunkab’al chi wank sa’ xyaalal. Naru taqanaw naq rik’in li k’ojob’anb’il k’anjel re li santil ochoch, li junkab’al naru chi yaal chi wank chi junelik q’e kutan. Naru taqanaw naq yaal lix tojb’al rix li maak xb’aan li Jesukristo ut yaaleb’ li osob’tesink re li jalb’a-k’a’uxlej ut kuyuk maak. Naru taqanaw naq li qaraarookil profeet, li Awa’b’ej Thomas S. Monson, a’an lix profeet li Qaawa’ ut naq lix tenq’ aj k’ehol na’leb’ ut li komon sa’ lix Molameb’ li Kab’laju a’aneb’ apostol, profeet, aj ilol na’leb’, ut aj k’utb’esinel.

Ninnaw naq yaal chixjunil a’in ut ninch’olob’ xyaalal a’an sa’ xk’ab’a’ li Jesukristo, amen.