Klemerang ra Rokui el Tekoi

Kid a mei ra chelechal kebesengei loureng el uase, kede merael el mesisiich e ngeltengat lokiu Chedaol reng, lolisechakl a klemerang.¹ Ng soak el mo mengedecheduch el kirel a dosiik ra klemerang.

Sera ak ngeasek, eng mle betok a kerik el kirel a Ikelesia. Bebil rengii a mlara renguk. A bebil a dimlak ng di mle ultuil ra rraureng ra rebebil.

Ak mle blechoel mesaod a kerik el mora delak. Ak medengei el uase ng mle medengei a betok el kerik el mlara renguk. A kumdasou eng mle telkib el chetil aikal ker el dimlak a kmal belkul e bai olngasechereng. Ngdi, ng dimlak loungeroel er ngak ra ikal kerik. Ng kmal orrenges e melasm longer. Sel lomdasou eng mla kmung a rokui e ngak a dirk ngarngii a kerik, eng kmul uase: “David, tia kmal ungil ker. Sel mosiik e monguiu e moluluuch el kirel a nger, e ngera meng diak moruul aikel tekoi el kirem el meruul e bai lak moruul aikel diak el kirem el meruul?” Tiang a mlo teletael ra kusiik ra klemerang. Ngokiu omesuub, nglunguuch, ma oltirakl a llach, ak mlo metik el uase ngarngii a nger ra rokui el kerik. Ak dirrek el mlo metik el uase a bebil ra ker, a kusbech el melemolem el ngara klaumerang, klou a renguk, e ngmai chedaol ocholt.²

A delak a ngiluu a ngerachel ra klaumerang ma osiik a nger el meskak. Ng mle medengei el uase a meklou a belkul nger a mei sel kusiik ra klemerang er sel teletael el Chedam ra Babeluades a mle ochotii. Ng mle medengei el uase ng kirek el sikii a klemerang. Ng mle medengei el uase ng kirel mo blak a renguk ra kerik e blak a renguk el meruul aikel kudengei el uase ng klemerang. Ng mle medengei el kirek el mesuub e meluluuch meng mo klou a renguk a kusiik a nger ra Rubak. Sel blak a rengud el mo klou a rengud a telengtengil a dosiik ra klemerang e telengtengil a teletelel a Rubak a lolecholt a klemerang.³

Cherengel a taem, ak mlo medengei el delak a mle olisechakl er ngak ra teletelel a Chedam ra Babeluades a dosiik ra klemerang. Ng mlo klou a klaumerang, ma nger a mlorngii, mak kilengei el mora mission.

Ng mlarngii a taem, ra uchelel a mission er ngak, el mle kirek el mo medengei el kmo a Ikelesia klemerang ma Joseph Smith a mle profet ra Dios. Ak mle omelchesiu ra ble lolekoi er ngii a President Thomas S. Monson ra tial mlo merek el klou el ongdibel: “Ng klou a belkul a le borngii a klaumerang er kau ra tial meringel el taem, le klaumerang ra rebebil a di telkib a lengeseuir kau.”⁴ Ak mle medengelii a klou a belkul. Ng mle kirek el menguiu ra Babier ra Mormon el meral ngara renguk, el blak a renguk, e oker ra Dios el uase ng klemrang.

Morrenges ra klebokel el yaksok ra Chedam ra Babeluades el mora profet Moroni: “Sel mngai aikal tekoi, a kulengit er kemiu me moker ra Dios, el Diak a Ulebengelel Chedam, el ngara ngklel a Kristo, el kmo ikal tekoi ng klemrang ng diak; alsekum e kolengit el meral ngara rengum, e blak a rengum, loba klaumerang ra Kristo, e ngii a mo ochotii a klemrang lekor kau, lokiu a klisichel Chedaol Reng.”⁵

Sel mo uchul eng sebeched el ngmai aikel ngara chelsel a Babier ra Mormon, eng kirek el menguiu er ngii. Ak mle omuchel ra uchelel tial buk e menguiu ra bek el sils. A rebebil a mereched el nguu a sioning er tir. A rebebil, a ousbech ra telkib el klou el taem ma klou el nglunguuch e sebechel kirem el menguiu er tial buk el betok el taem. Ng mle kirek el menguiu er tial buk el rokir e nguu a yaksok el sioning. Ng di, a Dios a mle ochotii a klemerang el mer ngak lokiu a klisichel Chedaol Reng.

A journal er ngak rak ngara mission, ak milsaod ra deureng el kudengelii a klemrang ma kuk di tekingek el kirel a blak el reng ma oltirakl ra klemerang el blak nguu. Ak milluches: “Ak mla odersak el mora Chedam ra Babeluades ma ngak el uase ak mo meruul el morsel tkul rebab el sebechek, el msang a dart el basent ra klengar ngak rokir, ngii dil ngerang el kuruul, ak mo meruul, ng di chelechang ak dirk ngara mission e ngak a mo rullii el mo kot el ungil mission, el diak bol chetik, el diak el kirek, ng kirel a Rubak. Ng betik a renguk ra Rubak, e soak tial ureor, mak meluluuch ma ikal kumelchesiu a diak el bo lak rengak.”

Ak mlo medengelii a blechoel omekeroul ma melemolem el blak el reng el ouchel a rengud e oltirakl a llach a meklou a belkul meng diak bol cheroid aikel domelchesiu. A President Monson a millekoi, “A klaumerang a kirel di klou a belkul e mesisiich lokiu a blekongesenges ra llechul a Dios me a nglunguuch ma omengiuel chedaol llechukl ra bek el sils.”⁶

Aikal mla mo merek el rak, ak oker ra remisionari ma rengeasek ra beluulechad el rokir el kmo te milkerang e metik ra klemerang e morngii a klaumerang er tir. Ng kmeed el tir el rokui, a onger el uase te mlorngii a klaumerang er tir ra lomuchel el tibir ra rengrir el mo menguiu ra Babier ra Mormon, ra uchelel, e olengit ra Dios el uase ng klemerang. Sel uasiei, e tem le melilt el mo “meruul,” e bai diak el “morrimel el meruul”⁷ lokiu a rraureng ra rebebil.

Mo medengelii a klemerang, eng kired el oltirakl ra ebangkelio⁸ e “melasm”⁹ ra tekoi. Kede mla muklatk el diak dekotouar ra Reng ra Rubak.¹⁰ A ouchel reng lobengkel a blak el reng el oltirakl a llach, a klou a belkul ra chad el osiik ra klemerang.¹¹ A mera rengii, eng locha kired el mo “cheroid ra rokui” el kngtid el mo medengelii a klemerang.¹²

Kid a mla modurch el mo osiik a llomes, lokiu omesuub ma klaumerang, e osiik a kot el ungil buk ra llomes.¹³ A dosiik a klemerang eng kirel ultuil ra “ungil buk” ma “ungil” rolel e kid a ngmai. A bebil ra kot el ungil a chedaol llechukl ma tekingir a rengar el profet.

A President Monson a mla olengit er kid el mo “meruul [aikel] kirel kedmekill” el mo nguu a mesisiich el klaumerang.¹⁴ Ngera klou a belkul kirel el mo dmolech e mesisiich a klaumerang er kau? A dersta er kid a ngarngii a ngercheled el meruul aikel kirel meruul el mo obang a mesisiich el klaumerang.

Al klou a rengud e doltirakl a telbiil e “doruul [aikel] meklou a belkul” el dengai a nger ra Rubak a telengtengil a moktek ra Dios el kirel a dosuub ra klemerang. Oumesingd sel sekum a tekoi a meringel, eng kired el mo “ngara deureng e klou a rengud ra ikel rokui el soal a Rubak.”¹⁵Al klou a rengud a doltirakl a telbiil eng mengal mo ngariou a rengud, e imis el soad el mo medengelii a klemerang, e a Chedaol Reng a mo “omekrael er [kid] ra llomes me [kid] a mo ngeltengat, ungil besud, e mucheliu.”¹⁶

A bechik, ra Mary, ma ngak a ngarngii a betik ra rengmam el meketeketang el rrau a rengul ra bebil ra teletelel a Ikelesia. Ng betik a rengul ra ebangkelio, e soal a Ikelesia ng ding dirk ngarngii a keril. Ng bechiil ra templo, e blak a rengul ra Ikelesia, meruul a ngerchelel, e kmal ungil chedil e bechiil. Aikal merekong el rak, eng melasm el meruul aikel lodengei el kmo ngungil e mengeroid rengii ra ikel lodengei el uase ng mekngit. Ng mla oltirakl a telbilel e melemolem losiik. Bebil ra taem, eng mui ra omereng a saul el ultuil ra klaumerang ra rebebil.

Diak el sal meketeket ra memong, a bisop a mle soal omes e rengii ma bechil. Ng mle olengit er tir el mo meruul a ureor ra templo el omtechei er tirkel ousbech a chedaol ruoll ra templo. Ng mlo mechas a rengrir er tial ngerachel, ng di te kilengei e omuchel a urerir ra blil a Rubak. A ngeasek el ngelekir el sechal a dirk miruul a reksi ra telungalek e metik ra ngklel a chedal a telungalek el dirkak el mekedmokl a ureor ra templo el kirel. Ng mlo sebechir, el omtechei el remuul a ruoll ra templo el kirel ngkal chad ma telungalek er ngii. A lengar a altar el meruul er tial ruoll, e ngkal klebokel, e klou a rengul redil el meketeketang losiik a miltik ra chedaol teletael el mlo uchul eng mlo medengei el uase a templo ma chedaol ruoll el mekedmokl ra chelsel a klemerang e merang. Ng mle omekedong ra delal e ouchais er tial teletael e uase ng dirk ngarngii a bebil ra keril, ngdi ngmla mo medengei el uase a templo a merang, a chedaol ruoll ra templo a merang, ma Ikelesia a merang. A delal a lilangel el mereng a saul ea oubeltik el reng, e klou a rengul el Chedam ra Babeluades ma ngelekel redil el klou a rengul e melemolem losiik.

Sel klou a rengud e doltirakl a telbiil eng meskid a klengeltengat ra eanged el mei ra klengar kid.¹⁷

Ak mla metik ongelaod ra yaksok ra Rubak el uase “ngokiu a klisichel Chedaol Reng e ko mo mednegei a rokui el tekoi.”¹⁸ A lak dodengei a rokui el tekoi, ng di sebeched el mo medengei a klemrang. Ng sebeched el mo mdengei el uase a Babier ra Mormon a klemrang. Meng merang, a President Russell M. Nelson a ulisechakl er tial ieta sils el kmo, kid a sebeched el mo “omelchesiu er ngii, el meral dmolech el “ngara chelsel” a rengud, [mesa Alma 13:27], el kmo a Babier er a Mormon a meral tekingel a Dios.” Ng kired el melchesuar a delechel meng diak el soad locheueklii a tal sils el cheroid er ngii.”¹⁹

Ng sebeched el medengei el kmo a Dios a Demad, el betik a rengul er kid; ma Ngelekel Sechal, el Jesus Kristo, a Osobeled e Olsobel er kid. Ng sebeched el medengei el uase a dechedal a Ikelesia er Ngii a kirel mekreos er kid ma dolai ra sacrament ra bek el sandei a ngosukid ma telungalek er kid el mo selbechakl. Ng sebeched el mo medengei el uase, ngokiu chedaol ruoll ra templo, a telungalek a meral sebechel mo dmak el mora ulebongel. Ng sebeched el mo medengei el kmo a Tngakireng ra Jesus Kristo ma klengeltengat ra ouchel reng ma klausubes a klemerang e merang. Ng sebeched el mo medengei el uase a profet er kid el, President Thomas S. Monson, a profet ra Rubak ma re counselor rengii ma chedal a Chelechad ra Teruich ma terung a apostol, e profet, e chad ra ues, ma ocholt.

Aikang el rokui a kudengei el klemerang e sioning el kirel el ngara ngklel a Jesus Kristo, amen.