O Le Moni o Mea Uma

Ua tatou o mai i lenei po ma le faamoemoe ma le faatuatua o le a tatou o ese atu ua faamalolosia ma faamanuiaina i nisi o auala, e le Agaga Paia, o le e aoao mai le upumoni.¹ E faatatau i lo tatou sailiga faaletagata lava ia mo le upumoni lea ou te manao e talanoa atu ai.

A’o avea ma se tama talavou, sa ia te au ni fesili se tele e uiga i le Ekalesia. O nisi o au fesili sa faamaoni. O isi sa le faamaoni ma sa fatuina ona o masalosaloga a isi.

E masani lava ona ou talatalanoa i a’u fesili ma lo’u tina. Ou te mautinoa lava sa ia lagona o le tele o au fesili sa faamaoni ma e mai i lo’u loto. Ou te manatu sa fai si ona le fiafia laitiiti i fesili ia e le faamaoni ma sili ona finauvale. Peitai, na te lei faia ia leaga ou lagona mo le i ai o fesili. Na te faalogo ma taumafai e taliina i latou. A ia lagona ua ia fai mai mea uma na ia mafaia ma o loo i ai pea ni a’u fesili, na te fai mai se mea faapea: “David, o se fesili lelei lena. A o e saili ma faitau ma tatalo mo le tali, aisea e te le faia ai ni mea e te iloa e ao ona e faia ma aua le faia ni mea e te iloa e le tatau ona e faia?” O lenei mea sa avea ma mamanu mo la’u sailiga mo le upumoni. E ala i le suesue, tatalo, ma le tausia o poloaiga, sa ou iloa ai o loo i ai tali i au fesili uma e taua. Sa ou iloa foi mo nisi o fesili, e manaomia le faatuatua faifai pea, onosai, ma faaaliga.²

Sa tuu maia e tina ia te au le tiutetauave o le atiinaeina o le faatuatua ma saili ia tali. Sa ia silafia o tali taua o le a oo mai mai i lou sailia o le upumoni i le ala na faatulagaina e le Tama Faalelagi. Sa ia silafia ou te manaomia ona maua le upumoni. Sa ia silafia ou te manaomia ona faamaoni i au fesili ma ia naunau e faatino i luga o mea ua uma ona ou iloaina e moni. Sa ia silafia ou te manaomia ona suesue ma tatalo ma ou te manaomia ona atiae le onosai atili a o ou sailia tali mai le Alii. O le naunau ina ia onosai o se vaega o la tatou sailiga mo le upumoni ma o se vaega o le mamanu a le Alii o le faaalia mai o le upumoni.³

Mulimuli ane, sa oo ina ou iloa sa aoao mai e lou tina ia te au le mamanu a le Tama Faalelagi mo le sailiga o le upumoni.Sa faateleina le faatuatua, sa amata ona oo mai tali, ma sa ou taliaina se valaauga o le misiona.

Sa i ai se taimi, i le amataga o la’u misiona, na ou iloa ai e tatau ona ou iloa pe moni le Ekalesia ma o Iosefa Samita o se perofeta a le Atua. Sa ou lagona le mea na matuai manino le faailoa mai e Peresitene Thomas S. Monson i la tatou konafesi aoao ua tuanai atu: “Afai e te lei mauaina lava se molimau mausali o nei mea, ia e faia mea e tatau ai ina ia maua se molimau. E taua mo oe le i ai o sau lava molimau i nei taimi faigata, aua o molimau a isi e faatapulaa lona aoga mo oe.”⁴ Sa ou iloa le mea sa manaomia. Sa ou manaomia le faitauina o le Tusi a Mamona ma se loto faamaoni, ma se faamoemoega moni, ma ole atu i le Atua pe moni.

Faalogo i le folafolaga matagofie a lo tatou Tama Faalelagi na tuuina mai e ala i le perofeta o Moronae: “Ma pe a outou maua nei mea, ou te apoapoai atu ia te outou ia outou ole atu i le Atua, le Tamā Faavavau, i le suafa o Iesu Keriso, pe ua le moni ea nei mea; ma afai tou ole atu ma le loto faamaoni, ma le manatu moni i ai, ma le faatuatua ia Keriso, o le a ia faaali mai le moni o ia mea ia te outou, i le mana o le Agaga Paia.”⁵

Ina ia maua mea sa i totonu o le Tusi a Mamona, sa manaomia ona ou faitau i ai. Sa ou amata i le amataga o le tusi ma faitau i aso uma. O nisi e vave ona mauaina se molimau. Mo isi, e alu ai le isi taimi ma isi tatalo ma e ono aofia ai le faitauina o le tusi i le tele o taimi. Sa ou manaomia le faitauina o le tusi atoa ae ou te lei mauaina le molimau folafolaina. Ae peitai, na faaali mai e le Atua le upumoni o ia mea ia te au e ala i le mana o le Agaga Paia.

I lau api talaaga faafaifeautalai, sa ou faamatala ai lou olioli i le iloaina o le upumoni faapena foi ma lou tautinoga o le faailoaga patino ma le faamoemoega moni e galue i luga o le upumoni na ou mauaina. Sa ou tusia: “Ua ou tautino atu i lou Tama oi le Lagi ma ia te au lava ou te faia le mea silisili, e tuu atu le 100 pasene mo le vaega o totoe o lou olaga, po a mea o le a talosaga ai au, ou te faia, ae mo le taimi nei ua ia te au le vaega o totoe o lau misiona ma o le a ou faia o se misiona maoae, se tasi e le lelei ou lagona e uiga i ai, ae e le mo au, e mo le Alii. Ou te alofa i le Alii, ma ou te fiafia i le galuega, ma ou te tatalo ia le aluese lava lena lagona mai ia te au.”

Na oo ina ou iloa o le tausiga faifai pea ma le faaauauina pea o taumafaiga ina ia salamo ma tausi poloaiga e manaomia ina ia le aluese ai lena lagona. Na saunoa mai Peresitene Monson, “E manaomia e se molimau ona faatumauina le taūa ma le ola e ala i le usitai faifai pea i poloaiga a le Atua faapea ma le tatalo e le aunoa ma le suesueina o tusitusiga paia i aso uma.”⁶

I le aluga o tausaga, sa ou fesili atu i faifeautalai ma tagata talavou i le lalolagi atoa pe faapefea ona latou amata i o latou taumafaiga patino e saili le upumoni ma maua se molimau. E toetoe o tagata uma na ou fesili i ai, sa latou tali mai o o latou lava taumafaiga ia maua se molimau patino na amata i le faaiuga faaletagata lava ia e faitau le Tusi a Mamona mai le amataga ma fesili atu i le Atua pe ua moni. I le faia o lea mea, sa latou filifili ai e “gaoioi” nai lo le “faagaoioi”⁷ e masalosaloga a isi.

Ina ia iloa le upumoni, e tatau ona tatou ola i le talalelei⁸ ma “tofotofo”⁹ i le upu. Ua lapataia i tatou ia aua nei teena le Agaga o le Alii.¹⁰ O le salamo, a tuufaatasia ma se naunautaiga e tausi poloaiga, o se vaega taua o saili taitasi faaletagata lava ia mo le upumoni.¹¹ O le mea moni, atonu tatou te manaomia ona naunau e “lafoai ese [a tatou agasala] uma” ina ia tatou iloa le upumoni.¹²

Ua poloaiina i tatou e “saili i le aoaoina, e ala lava lea i le suesue ma le faatuatua foi” ma ia “saili … mai totonu o tusi sili ona lelei upu o le poto.”¹³ O la tatou sailiga mo le upumoni e tatau ona taulai atu i “tusi sili ona lelei” ma punavai sili ona lelei. I tusi silisili, o loo i ai tusitusiga paia ma upu a perofeta soifua.

Ua talosagaina i tatou taitoatasi e Peresitene Monson e “faia [mea] e tatau ai” ina ia maua ma tausia se molimau malosi.¹⁴ O le a se mea e manaomia e faaloloto ai ma faamalosia ai lau molimau? Ua tofu i tatou taitoatasi ma se tiutetauave patino e fai mea e tatau ai ina ia maua ai ma tausia se molimau malosi.

O le tausia ma le onosai o a tatou feagaiga a o tatou “faia [mea] e tatau ai” ina ia maua tali mai le Alii o se vaega o le mamanu a le Atua mo le aoaoina o le upumoni. Aemaise lava pe a faigata ni mea, tatou te ono manaomia ia “gauai atu ma le fiafia ma le onosai i le finagalo atoa o le Alii.”¹⁵ O le onosai e tausi feagaiga e faateleina ai lo tatou lotomaualalo, faaloloto ai lo tatou naunau e iloa le upumoni, ma faataga ai le Agaga Paia e “taitai [tatou] i ala o le poto ina ia mafai ona [tatou] manuia ai, ma uluola, ma faasaoina.”¹⁶

E ia i maua ma lou toalua o Mary, se tasi ma te alolofa faapelepele i ai sa tauivi mo le tele o lona olaga i ni vaega faapitoa o le Ekalesia. E alofa o ia i le talalelei, ma e alofa o ia i le Ekalesia ae o loo i ai pea ni fesili. Ua faamauina o ia i le malumalu, malosi i le Ekalesia, faataunuu ana valaauga, ma o se tina ma se ava lelei. I le aluga o tausaga, sa ia taumafai e fai mea na sa ia iloa e sao ma aloese mai le faia o na mea sa ia iloa e sese. Sa ia tausia ana feagaiga ma faaauau pea ina saili. E i ai taimi e na te faafetai ai i le pipii mau i le faatuatua o isi tagata.

E lei leva atu sa talosaga ai lona epikopo e fia vaai ia te ia ma lona toalua. Sa ia fai atu ia i laua e talia se tofiga faalemalumalu e galulue o ni sui mo i latou o e manaomia sauniga o le malumalu. Sa faateia i laua i lenei valaauga, ae sa la taliaina ma amata le la auaunaga i le maota o le Alii. Sa auai talu ai nei lo la atalii talavou i le sailiga o talafaasolopito o aiga ma maua ai se tasi o le aiga o le e lei faia ni sauniga o le malumalu. I se taimi, sa la fai ma sui ma faia sauniga o le malumalu mo lenei tagata ma lona aiga. A o la tootutuli i le fata faitaulaga ma faatino le sauniga o le faamauga, sa maua e lenei fafine agalelei, onosai, o le sa saili mo se taimi umi se aafiaga faaleagaga lea na ia iloa ai e moni ma faamaoni le malumalu ma sauniga o loo faia i totonu. Sa valaau atu i lona tina ma tau ia te ia lona aafiaga ma faapea atu a o ia te ia pea ni fesili, ua ia iloa e moni le malumalu, e moni sauniga o le malumalu, ma e moni le Ekalesia. Sa tutulu lona tina ma le loto faafetai mo se Tama Faalelagi agaalofa, onosai ma mo se tama teine o le sa faaauau pea le onosai e saili.

O le onosai e tausia feagaiga e aumaia ai faamanuiaga o le lagi i totonu o o tatou olaga.¹⁷

Ua ou maua le mafanafana sili i le folafolaga a le Alii e faapea “o le mana o le Agaga Paia e mafai ona outou iloa ai le moni o mea uma lava.”¹⁸ E aunoa ma le iloaina o mea uma, e mafai ona tatou iloa le upumoni. E mafai ona tatou iloa e moni le Tusi a Mamona. O le mea moni, e pei ona aoao mai e Peresitene Russell M. Nelson i lenei aoauli, e mafai ona tatou maua se lagona loloto i le ‘vaega totonugalemu’ o o tatou loto [tagai Alema 13:27], o le Tusi a Mamona e manino lava o le afioga a le Atua.” Ma e mafai ona tatou “lagonaina le o’oo’o lea tatou te le mananao ai lava e ola i se aso e aunoa ma le tusi.”¹⁹

E mafai ona tatou iloa o le Atua o lo tatou Tama, e alofa ia i tatou, ma o Lona Alo, o Iesu Keriso, o lo tatou Faaola ma le Togiola. E mafai ona tatou iloa o le auai ai i Lana Ekalesia e tatau ona faatauaina ma o le a fesoasoani le aai ma le feinu i le faamanatuga i vaiaso uma ia i tatou ma o tatou aiga ina ia saogalemu. E mafai ona tatou iloa e ala i sauniga o le malumlau, e mafai moni ona faatasia aiga e faavavau. E mafai ona tatou iloa o le Togiola a Iesu Keriso ma faamanuiaga o le salamo ma le faamagaloga e moni ma faamaoni. E mafai ona tatou iloa o lo tatou perofeta pele, o Peresitene Thomas S. Monson, o le perofeta a le Alii ma o ona fesoasoani ma uso o le Korama a le Toasefululua o ni aposetolo, perofeta, tagatavaai, ma tali faaaliga.

O nei mea uma ou te iloa e moni ma ou te molimau atu ai i le suafa o Iesu Keriso, amene.