2010–2019
Te parau mau o te mau mea ato’a.
’Ātopa 2017


Te parau mau o te mau mea ato’a

E hōpoi’a nā tātou tāta’itahi ’ia rave i te mea e tītauhia nō te fāri’i ’e nō te tāpe’a i te hō’ē ’itera’a pāpū pūai.

’Ua haere mai tātou i teie pō mā te ti’aturi ’e te fa’aro’o ē mai te huru rā, e ho’i atu tātou mā te itoito ’e te ha’amaita’ihi’a e te Vārua Maita’i, o te ha’api’i mai i te parau mau.1 Nō ni’a i te ’imira’a tāta’itahi i te parau mau o tā’u e hina’aro ’ia ’āparau atu.

I tō’u ’āpīra’a, e mea rahi tā’u mau uira’a nō ni’a i te ’Ēkālesia. Te tahi o rātou, e mea ateate. Te tahi, ’aita ïa, ’e fa’ahōho’a noa i te mau fē’a’a o vetahi ’ē.

Pinepine au i te ’āparau e tō’u metua vahine i tā’u mau uira’a. ’Ua ’ite pāpū vau ē, ’ua ta’a iāna ē te rahira’a o tā’u mau uira’a e mea ateate ’e nō roto mai i tō’u māfatu. Te mana’o nei au, ’ua ’ino’ino ri’i ’oia nō te mau uira’a ateate ri’i ’e te rāve’a nō te fa’a’amu’amu. Terā rā, ’aita roa ’oia i fa’a’ino noa a’e iā’u nō tā’u mau uira’a. ’Ua fa’aro’o noa ’oia ma te tamata i te pāhono mai. I te taime ’a ’ite ai ’oia ē, ’ua pāhono ’oia i te tā’āto’ara’a e nehenehe iāna, ’e tē vai fa’ahou ra tā’u mau uira’a, e parau mai ’oia i teie huru parau : « Davida, e uira’a maita’i roa te reira. ’A ’imi, ’a tai’o ’e ’a pure ai ’oe nō te pāhonora’a, nō te aha ’aita ’oe e rave i te mau ’ohipa o tā ’oe i ’ite e ti’a ’ia nā reira, ’e ’eiaha ra e rave i te mau ’ohipa tā ’oe i ’ite ’aita e ti’a ’ia nā reira ? » ’Ua riro te reira ’ei hōho’a nō tō’u ’imira’a i te parau mau.Nā roto i te tuatāpapara’a, te pure ’e te ha’apa’ora’a i te mau fa’auera’a, ’ua ’ite au i te mau pāhonora’a i te tā’āto’a o tā’u mau uira’a faufa’a. ’Ua ’ite ato’a vau ē, nō te tahi mau uira’a, e tītauhia te fa’aro’o tāmau, te fa’a’oroma’i, ’e te heheura’a.2

’Ua tu’u tō’u māmā i te hōpoi’a i ni’a iā’u nō te fa’arahi i te fa’aro’o ’e te ’imira’a i te mau pāhonora’a. ’Ua ’ite ’oia ē, e tae mai te mau pāhonora’a faufa’a rahi nā roto i tō’u ’imira’a i te parau mau mai tā te Metua i te Ao ra i fa’a’ite mai. ’Ua ’ite ’oia ē, tītauhia iā’u ’ia ’ite i te parau mau. ’Ua ’ite ’oia ē, tītauhia iā’u ’ia ateate i roto i tā’u mau uira’a ’e e ti’a iā’u ’ia ’ohipa i roto i te mea o tā’u i ’ite a’ena e parau mau. ’Ua ’ite ’oia ē, tītauhia iā’u ’ia ’imi ’e ’ia pure, ’e e tītauhia iā’u ’ia fa’arahi atu ā i te fa’a’oroma’i ’a ’imi ai au i te mau pāhonora’a a te Fatu. Te tītaura’a ’ia fa’a’oroma’i e tuha’a ïa nō tō tātou ’imira’a i te parau mau ’e e tuha’a nō te hōho’a tā te Fatu e heheu mai i te parau mau.3

’A tere ai te tau, ’ua ’ite mai au ē, ’ua ha’api’i mai tō’u māmā iā’u i te hōho’a o te Metua i te Ao ra nō te ’imira’a i te parau mau.E tupu rahi mai te fa’aro’o, e ha’amata te mau pāhonora’a i te tae mai, ’e ’ua fāri’i au i te hō’ē pi’ira’a misiōni.

’Ua tae i te hō’ē taime, i te ’ōmuara’a o tā’u tau misiōni, i tō’u ’itera’a ē tītauhia iā’u ’ia ’ite e parau mau ānei te ’Ēkālesia ’ē e peropheta o Iosepha Semita nā te Atua. ’Ua ’ite au i roto i tō’u ā’au te ’ohipa o tā te peresideni Thoma S Monson i fa’ata’a māramarama mai i tā tātou ’āmuira’a rahi i ma’iri a’e nei : « Mai te peu ē ’aita tō ’outou e ’itera’a pāpū pa’ari nō teie mau mea, ’a rave ïa i te mea e tītauhia e noa’a ai te reira. Mea faufa’a rahi roa nō ’outou ’ia fāri’i i tō ’outou iho ’itera’a pāpū i roto i teie mau tau fifi, nō te mea e ’āfa’i te mau ’itera’a pāpū o vetahi ’ē ia ’outou i te hō’ē noa fāito ».4 ’Ua ’ite au e aha te mea e tītauhia. E ti’a iā’u ’ia tai’o i te buka a Moromona ma te ā’au hina’aro mau, ma te mana’o pāpū, ’e ’ia ui i te Atua ē e parau mau ānei te reira.

’A fa’aro’o mai i te fafaura’a fa’ahiahia a tō tātou Metua i te Ao ra i hōro’ahia mai nā roto i te peropheta Moroni : « E o teie tā’u a’o ia ’outou nā, ’ia ’itea teie nei mau parau ia ’outou, e ui atu i te Atua, i te Metua mure ’ore ra, i te i’oa o Iesu Mesia ē, e parau mau ānei teie mau parau, ’e ’aore ānei ; ’e ’ia ui atu ’outou mā te ’ā’au hina’aro mau, mā te mana’o pāpū, ’e mā te fa’aro’o i te Mesia, nāna ïa e fa’a’ite mai i te parau mau ia ’outou nā roto i te mana o te Vārua Maita’i ».5

Nō te fāri’i e aha tō roto i te buka a Moromona, ’ua tītauhia iā’u ’ia tai’o i te reira. ’Ua ha’amata vau mai te ’ōmuara’a o te buka ’e ’ua tai’o i te mahana tāta’itahi. E fāri’i vitiviti vetahi i te hō’ē ’itera’a. Nō te tahi, e mea maoro ri’i ïa ’e ’ia rahi a’e te pure, ’e ’oia ato’a ’ia tai’o e rave rahi taime i te buka. Nō’u nei, tītauhia ’ia tai’o i te tā’āto’ara’a o te buka hou vau ’a fāri’i ai i te ’itera’a i parauhia. Terā rā, ’ua fa’a’ite mai te Atua i te parau mau nō te reira iā’u mā te mana o te Vārua Maita’i.

I roto i tā’u ve’a ’ā’amu misiōnare, ’ua pāpa’i au i tō’u ’oa’oa nō te ’itera’a i te parau mau, ’oia ato’a tō’u huru fa’aūū ’e te mana’o pāpū ’ia ’ohipa ’ia au i te parau mau o tā’u i fāri’i. ’Ua pāpa’i au : « ’Ua fafau vau i tō’u Metua i te Ao ra ’e iā’u iho, ’ia rave i tō’u maita’i roa a’e, ’ia hōro’a 100 i ni’a i te hanere nō te toe’a o tō’u orara’a, noa atu te huru o te anira’a, e rave au i te reira, nō teie nei rā, te toe fa’ahou ra ’ia fa’aoti au i tā’u misiōni, ’e e rave pūai au i te ’ohipa nō te ha’afa’ahiahia tā’u misiōni, ’ia ore au e ino’ino, ’eiaha rā nō’u nei, nō te Fatu rā. ’Ua here au i te Fatu, ’e ’ua here au i te ’ohipa, ’e tē pure nei au ’ia ’ore roa te reira mau mana’o e fa’aru’e iā’u ».

’Ua ha’api’i mai au ē, tītauhia te fa’a’amura’a tāmau ’e te tauto’ora’a tu’utu’u ’ore nō te tātarahapa ’e nō te ha’apa’o i te mau fa’auera’a e tītauhia, ’eiaha roa teie mau mana’o e fa’aru’e ia tātou. ’Ua parau te peresideni Monson, « e ti’a i te hō’ē ’itera’a pāpū ’ia tāpe’a-ora-hia ’e ’ia pūai noa nā roto i te ha’apa’o-tāmau-ra’a i te mau fa’auera’a a te Atua ’e nā roto i te purera’a ’e te tai’ora’a i te mau pāpa’ira’a mo’a i te mau mahana ato’a ».6

Nā roto i te mau matahiti, ’ua uiui au i te mau misiōnare ’e i te feiā ’āpī nā te ao nei, nāhea tō rātou ha’amatara’a i tō rātou iho tauto’ora’a i te ’imira’a i te parau mau ’e ’ia fāri’i i te hō’ē ’itera’a pāpū. Fātata te tā’ato’ara’a o rātou tei pāhono mai ē, ’ua ha’amata tō rātou iho tūtavara’a ’ia fāri’i i te hō’ē ’itera’a pāpū, nā roto i te fa’aotira’a rātou iho ’ia tai’o i te buka a Moromona, mai te ’ōmuara’a ’e ’ia ani i te Atua e parau mau ānei te reira. I tō rātou nā-reira-ra’a, ’ua mā’iti rātou ’ia « ’ohipa » ’eiaha rā ’ia « fa’a’ohipahia » e te mau fē’a’ara’a o vetahi ’ē.7

Nō te ’ite i te parau mau, tītauhia tātou ’ia ora i te ’evanelia8 ’e ’ia « tāmata »9 i te parau. Te tāparuhia nei tātou ’eiaha e fa’aru’e i te Vārua o te Fatu ra.10 E tuha’a faufa’a nō te ta’ata tāta’itahi ’ia ’āmuihia te tātarahapa i te hō’ē hina’aro pūai ’ia ha’apa’o i te mau fa’auera’a, nō te ’imira’a o te ta’ata ’iho i te parau mau.11 Nō te reira, tītauhia ’ia « ha’apae atu » tā tātou mau hara ato’a nō te ’ite mai i te parau mau.12

’Ua fa’auehia tātou ’ia « ’imi ho’i i te ’ite, ’oia ïa nā roto ho’i i te ha’api’i ’e nā roto ato’a i te fa’aroo » ’e ’ia ’imi… i roto i te mau buka maita’i a’e i te mau parau nō te pa’ari ».13 ’Ia fa’atumu tātou i tā tātou ’imira’a i te parau mau i roto « i te mau buka maita’i a’e » ’e te mau ha’api’ira’a maita’i a’e. I roto i te mau mea maita’i a’e, o te mau pāpa’ira’a mo’a ïa ’e te mau parau a te mau peropheta ora.

’Ua ani mai te peresideni Monson ia tātou tāta’itahi ’ia « rave i te mea e tītauhia » ’ia noa’a ’e ’ia tāpe’a i te hō’ē ’itera’a pāpū pūai.14 E aha te tītauhia nō te fa’ahōhonu ’e nō te ha’apūai i tō ’outou ’itera’a pāpū ? E hōpoi’a nā tātou tāta’itahi iho ’ia rave i te mea e tītauhia nō te fāri’i ’e nō te tāpe’a i te hō’ē ’itera’a pāpū pūai.

Ha’apa’o mā te fa’a’oroma’i i tā tātou mau fafaura’a ’a « rave ai i te mea e tītauhia » nō te fāri’i i te mau pāhonora’a nō ’ō mai i te Fatu ra, e tuha’a ïa nō te hōho’a a te Fatu nō te ha’api’ira’a mai i te parau mau. ’Ia fifi ana’e ihoa ra te mau mea ato’a, e nehenehe e anihia ia tātou ’ia auraro « ma te ’ā’au tae ’e te fa’a’oroma’i i te hina’aro ato’a o te Fatu ».15 E mara’a te ha’apa’ora’a i te mau fafaura’a ma te fa’a’oroma’i i tō tātou ha’eha’a, ’e e fa’ahōhonu i tō tātou hina’aro ’ia ’ite i te parau mau, ’e e fa’ati’ahia te Vārua Maita’i ’ia « arata’i [ia tātou] nā te mau ’ē’a o te pa’ari ra, e ha’amaita’ihia ai, ’e e ha’amanuiahia ai, ’e e fa’aorahia ai ».16

Tā’u vahine, ’o Mary, ’e ’o vau, tē vai ra tō māua hō’ē ta’ata tei here rahihia, o tei ’aro i te rahira’a taime o tōna orara’a i te tahi mau parau tumu nō te ’Ēkālesia. ’Ua here ’oia i te ’evanelia, ’e ’ua here i te ’Ēkālesia, te vai nei rā tāna mau uira’a. ’Ua ta’atihia ’oia i te hiero, e melo itoito i roto i te ’Ēkālesia, tē rave itoito nei i tōna mau pi’ira’a, ’e e metua vahine ’e e hoa fa’aipoipo fa’ahiahia. I roto i te roara’a o te mau matahiti, ’ua tamata i te rave i te mau ’ohipa tāna i ’ite e mea tano, ’e ’ua ha’apae i te rave i te mau ’ohipa tāna i ’ite e mea hape. ’Ua ha’apa’o noa ’oia i tāna mau fafaura’a ’e ’ua tāmau i te ’imi. Te tahi mau taime, e māuruuru ’oia i te turu’ira’a i ni’a i te fa’aro’o o vetahi ’ē.

’Aita i maoro a’e nei, ’ua tītau tōna ’episekōpo ’ia fārerei iāna ’e tāna tāne fa’aipoipo. ’Ua ani atu te ’episekōpo ia rāua ’ia fāri’i i te hō’ē pi’ira’a i roto i te hiero, ’ia riro ’ei mono nō te feiā e hina’aro i te mau ’ōro’a nō te hiero. ’Ua hitima’ue rāua nō teie pi’ira’a, ’ua fāri’i rā rāua e ’ua ha’amata i tā rāua tāvinira’a i roto i te fare a te Fatu. ’Aita i maoro roa, ’ua ’āmui atu tā rāua tamaiti taure’are’a i roto i te ’ohipa tuatāpapara’a ’utuāfare ’e ’ua ’itehia iāna i te i’oa o te hō’ē ’utuāfare ’aita ā te mau ’ōro’a hiero i ravehia atu ra. I te taime tano, ’ua mono rāua ia rātou ’e ’ua rave i te ’ōro’a hiero nō te reira ta’ata ’e nō tōna ’utuāfare. ’A tūturi ai rāua i te fata ’e ’a ravehia ai te ’ōro’a ta’atira’a, ’ua fāri’i teie vahine fa’ahiahia, te fa’a’oroma’i ’e o tei ’imi maoro i te hō’ē ’itera’a pae vārua unuma [privé], ’e nā te reira i fa’a’ite iāna ē, e mea mau ’e e parau mau te mau ’ōro’a e ravehia nei i roto i te hiero. ’Ua tāniuniu atu ’oia i tōna metua vahine e ’ua fa’a’ite atu i te ’ohipa i tupu, ’e ’ua parau ē noa atu tē vai noa nei te tahi mau uira’a tāna, ’ua ’ite ’oia ē e mea mau te hiero, e mea mau te mau ’ōro’a hiero, ’e e mea mau te ’Ēkālesia. ’Ua ta’i tōna metua vahine ma te māuururu nō te hō’ē Metua Here i te ao ra, te fa’aoroma’i ’e nō te hō’ē tamāhine tei tāmau noa i te ’imi ma te fa’a’oroma’i.

E ’āfa’i mai te tāpe’ara’a i te fafaura’a ma te fa’a’oroma’i i te mau ha’amaita’ira’a i roto i tō tātou orara’a.17

’Ua ’ite au i te tāmahanaha rahi i roto i te fafaura’a a te Fatu « nā roto i te mana o te Vārua Maita’i e ’ite ai ’outou i te parau mau i te mau mea ato’a ra ».18 Ma te ’ite ’ore i te mau mea ato’a, e nehenehe ia tātou ’ia ’ite i te parau mau. E nehenehe au e ’ite ē e parau mau te buka a Moromona. Nō reira, mai tā te peresideni Russell M. Nelson i ha’api’i mai i teie avatea e nehenehe tātou e « fāri’i i roto i te hōhonura’a o tō tātou ’ā’au [hi’o Alama 13:27], ē mā te fē’a’a ’ore te buka a Moromona ote parau a te Atua. ’E nehenehe tātou « e ’ite hōhonu maita’i i te reira ē e’ita roa tātou e hina’aro e ora hō’ē noa a’e mahana ’aita te reira ».19

E nehenehe tātou e ’ite ē, ’o te Atua tō tātou Metua, tei here ia tātou ; ’e ’o Iesu Mesia, tāna Tamaiti, tō tātou Fa’aora ’e te Ora. E nehenehe tātou e ’ite ē, e fa’ahereherehia te ti’ara’a melo o tāna ’Ēkālesia ’e te ravera’a i te ’ōro’a mo’a i te hepetoma ato’a, e tauturu te reira ia tātou ’e tō tātou ’utuāfare ’ia pāruruhia. E nehenehe tātou ’ia ’ite ē nā roto i te mau ’ōro’a hiero, e riro mau tō tātou mau ’utuāfare ’ei mea mure ’ore. E nehenehe ia tātou ’ia ’ite ē te tāraehara a Iesu Mesia ’e te mau ha’amaita’ira’a o te tātarahapa ’e te fa’aorera’a hara e mea mau ’e te pāpū. E nehenehe ia tātou ’ia ’ite ē, tō tātou peropheta here, ’o te peresideni Thomas S. Monson o te peropheta ïa a te Fatu, e tōna nā tauturu ’e te mau melo nō te pupu nō te Tino ’Ahuru ma Piti ’Āpōsetolo, e mau ’āpōtoselo, e mau ’ite ’e e mau heheu parau ïa.

Te tā’ato’ara’a o te reira, ’ua ’ite au e mea mau, ’e te fa’a’ite nei au i tō’u ’itera’a pāpū nā roto i te i’oa o Iesu Mesia, ’āmene.