Mongungun ewe Samon
Ua pwarata pwe non ei mwichenap sia rong neouan ewe Samon. Nge ewe tes a nom non napanapan ach penueni.
Akkom, ew murinon kapas fan iten kewe kukkun semirit. Ewer, iei ewe saingon mwich me ngang saingon chon afanafan.
Kanoto chok, nupwen uwa feinno ren ewe Provo City Center Tempel, Uwa sani ew chunga itenapan Ewe Aewin Nemesepwi, si Ori me Towaw. Masowen non ewe chunga ewe saram me ewe manaman seni nang nupwen ewe Sam me Noun we ra churi ewe anuon Joseph Smith.
Nupwen ai use mo awora ew minen anonno ngeni met ewe mi fis mi fokkun pin ren ewe poputan ewe Niwinsefaniton ewe kapas annim, uwa tongeni anchangei ew nios mi nonno ngeni ewe epwe pwano ewe saram me ewe manaman an Kot non pekin ngun a feittiw won ei mwichenapen mwichefen me met a pwano pwe ena manaman me saram a feinno non unusen fonufan.
Ua ngenikemi ai kapasen pwarata pwe Jises I ewe Kraist, me I a emweni mokutukuten ei angang mi pin, me pwe mwichenapen mwichefel ew me nein ekkewe auchean fansoun I a awora kapasen emwen ngeni an Mwichefen me ngeni kich pwisin.
Kaeo me Asan
Non ewe ran ewe Mwichefen a poputa, ewe Samon a finata Joseph Smith emon soufos, chon osini, me chon kunon ewe Samon Jises Kaist1 me apasa ngeni ewe Mwichefen:
Pwe repwe rongorongo an ewe soufos kapas ussun nge seni pusin awen ewe Samon, non nikitu me nuku.
“Nupwen repwe fori ekkei mettoch, ekkewe titin hell resap nemenikemi; … me ewe Samon Kot epwe awesano ewe pochokunen rochopwak sonuk, me fori an ewe nang epwe chech ren om angangoch.”2
Mwirin, meinsin chon ewe Aewin Presetensi me ewe Mwichen Engon me Ruemon Aposel ra pwan etiwa me seikata an epwe soufos, chon osini, me chon pwarata.3
Iei, sia mwich fengen fan emwenien Preseten Thomas S. Monson, sia mochen pwe sipwe rongorongo “mochenin ewe Samon, … ekiekin ewe Samon, … mongungun ewe Samon, me manamanen ewe Kot ngeni manau.”4 Sia nuku non An pwon: “pwe ika mwo seni pusin mongungun ika seni mongungun noun kewe chon angang, mi chok nonnopok.”5
Non ewe kokotongawen me osukosuken ach ei fonufan ikenai, nukunuk non ekkewe kapasen ewe Aewin Presetensi me Mwichen ekkewe Engon me Ruemon a fokkun auchea ngeni ach marita me nikitu non pekin ngun.6
Sia chu fengen ren ei amwararan mwichenap. Minionun Aramas mi Pin non Fansoun Soponon me pwan chon ekkcoh sokkun namanam non nap seni 200 fonu, ra kapas non nap seni 93 kapas, ra fiti ekkei mwich ika anneani ekkewe afanafanen mwichenap.
Sia etto nge sia fen iotek me amonata. Ren chommong me neich, mi wor ach osukosuk mi atapwan me menin kapas eis. Sia mochen sipwe asofosefani ach nuku non ach ewe Samon, Jises Kraist, me apochokuna ach tufich ach sipwe pochokun ngeni sosot me suseni osukosuk. Sia feitto pwe sipwe kaeo seni asan.
Ewe Netipan me Mochenin ewe Samon
Ren ekkewe non ewe Aewin Presetensi me ekkewe Engon me Ruemon, ekkewe ra kan afanafan non ekkewe mwichenap, ewe wateian sekeningen amwonatan ar a fanafan mi ekkeweires me pwan ew sokun nukunuk mi pin.
Chommong ier me nom, mwen ua wisen emon Meinapen Unusan, ua tingorei Elter Dallin H. Oaks ika a amonata ew afanafan fan iten ew me ew ekkewe mwichen steik. A ponueni pwe ese nge a apachata, “Nge ai kewe afanafanen mwichenapen mwichefen mi sokono. Uwa makei 12 ngeni 15 afanafan ren ai upwe sineochu pwe uwa apasa met ewe Samon a mochen upwe apasa.”7
Inet me ifa ussun ewe amwasangasangen afanafan ren ew mwichenapen mwichefen epwe feitto?
Pun ese fen afata ngenikem itenapan, sia kuna pwe nang mi etetenneochu itenap me napanapan ekkewe ennet ese much non iteitan mwichenap.
Emon me nein pwi kewe a ureniei pwe itenapen ei mwich a fen chok angei me inet mwirin an ewe afanafan non ewe April. Pwan emon a pwan apasa pwe non unungat wik a no pwe i mi chok chiwen iotek me uti tipan ewe Samon. Pwan emon, nupwen uwa eis ika ifa ukukun tamen an makkei ew afanafan mi kan weires, a penueni, “Rue me nimu year.”
Fan ekkoch itenapan epwe mwitir ne pwa, nge masouan me tichikin mi pwan anamwota epwe wor wachemukun totan non ngun. Echikefen me iotek, kaeo me nuku, iteitan ir kinikini ewe angang. Ewe Samon ese mochen epwe wor popun mi apwangapwangano mongungun ngeni Noun kewe Souneng.
Kapasen emwen ren ew afanafanen mwichenap a kan waroto nepwin ika nesosorusich, nupwen ewe afanafan mi towaw seni ekiekin ewe tup. Fichinon, anononun weweiti mettoch sise tepereni me non fansoun, ekkewe foufoun fos me kapas ra puputo non unusochun pwarata mi kurufatafat. 8
Nupwen ka ousening, ekkewe afanafan ka angei meni epwe fokkun fatoch ika epwe tetenoch fan itom chok.
Atun ua afanafan non mwichenapen mwichefen chommong ier a no, uwa apasa ussun ew porous a tonong non mokurei nupwen ua ekieki ika uwa moneta ai upwe fori angangen misineri. Ewe kukun fos a ura “Kose sinei mettoch meinisin, nge a naf om sinei!”9Emon fopun a momot non ena mwichenapen mwichefen non ena ran a ureniei pwe a ioteki ew tingoren pupunu a fis ngeni, non chok pwan ewe fansoun a ekieki ifa ukukun a sinei ewe onuwon. Nupwen uwa apasa ekkewe kapas, “Kose sinei mettoch meinisin, nge a naf om sinei”, ewe Ngun mi Fel a afata pwe neminewe a naf an sinei atewe. Ra fen pwapwa non ar pupunu ren chommong ier.
Ua pwon ngonuk pwe nupwen kopwe amonata ngunum, me feitto fiti ewe mochen pwe kopwe rongorongo mongungun ewe Samon, ekiek me memef repwe tonong non ekiekum ekkewe ra tetenoch akaewin fan itom. Ka fen mefir non ei mwich, ika kopwe mefi nupwen ka kaeo ekkewe afanafan non ekkewe wik mwom.
Ren Iei me ekkewe Maram Akkomwach
Preseten Monson a apasa:
“Aucheani fansoun pwe oupwe anneani ekkewe afanafanen mwichenap.”10
“Ekieki kewe afanafan. … Ua kuna … pwe uwa fen anapano seni ekkei mwasangasangen afanafan nupwen ua aneanir non anononun ekieki.”11
Ekkewe afanafanen mwichenapen mwichefen ikana ekkewe mettoch ewe Samon a mochen sipwe ekieki iei me non ekkan maram mwach.
Ewe chon masa siip a “akkomono mwen [noun kewe siip], nge ekkewe siip ra tapweno mwirin; pun ir mi sinei neuwan.”12
Fan chommong, Mongungun a emwenikich ach sipwe siwini mettoch non manauach. I a tingor ngeni kich sipwe aier. I a tingorekich pwe sipwe tapweno mwirin I.
Ekieki ussun ekkei prorous seni ei mwich:
Preseten Henry B. Eyring me nesosorewe: “Ua apasa ai kapasen pwarata pwe Kot ewe Sam mi manau me a mochen oupwe niwin ren I. Iei ewe ennetin Mwichefenin ewe Samon Jises Kraist. A sinekemi; A tongeikemi; A mamasakemi.”13
Preseten Dieter F. Uchtdorf seni nanew: “Ua pwarata pwe nupwen sia poputa are sopweino won ach amwararen sai ngeni Kot, manauach repwe feochuno … me ewe Samon epwe aea manauach non napanap mi amwarar ne efeiochu kkewe chon unukuch ne awora an kewe popun ese much.”14
Preseten Russell M. Nelson seni nekunionun nanew: “Ua pwon pwe ika ka anneani ewe Puken Mormon iteiten ran, kopwe tumun seni ekkewe osukosuken ewe ran, pachenong mwo nge ekkewe sokkun osukosuken oreni ne katon kewe kachito me sasing mi ngaw me ekkoch sokkun kik mi ngau.”15
Elter Dallin H. Oaks me nanew: “Ua pwarata pwe ewe esinesinen ewe famini ew porousen ennet ese much, ewe mochenin ewe Samon fan iten Noun kewe.”16
Me Elder M. Russell Ballard me ekkiseno chok: “Mi namwot sipwe kamwochu noun Kot semerit non tong me etineno koput, fiti koput nein sokonon chon fonu, nein mwan me fefin, me koputen muu.”17
Pun a wor pwan ew minich nusun, upwe pwan pachenong ei kukkun memef usun Elter Robert D. Hales. Ewe Aewin presetensi a ereni Elter Hales pwe i mi tongeni ani ew kukun afanafan non mwichen nesesorun raninifen ika mi pechekun ngeni. Ikamwo inisin ese mutata, a amonata ew afanafan, minne a awesino non ewe wik o a apworausa ngneiei. Fiti an a mano me unungat owa a no, upwe apasata ekkoch kapasan an afanafan.
Non an Elter Hales kapas: “Nupwen sia fini pwe sipwe nuku, sia moneta ne uta fan mesan Kot. … Mwirin an ewe Chon Amanau ewe irapengesino, A pwa ngeni chok ekkewe ra nukuchar non ewe kapasen pwarata fan iten I nupwen ar manau iei [D&C 138:12.] Ekkewe rese etiwa ekkewe kapasen pwarata fan iten ekkewe soufos rese tongeni kuna an ewe Chon Amanau nonnom rer, me rese tongeni kuna mesan. [D&C 138:21.] Ach nuku a amonakicheta ach sipwe nom fan mesen ewe Samon.”
Ifan umoumochun ewe Samon ne auroura netipan Preseten Russell M. Nelson nesopononun ewe mwich nesesorewe ne kaiou seni e imw, nikiti an mongo, me sano ngeni nepekin an Elter Hales fitong, ikkeweia a tongeni nom, i noun presetenin mwichen pristut, ren ningochun Mary Hales nupwen Elter hales a sochingio seni ei manau.
Penueni Mongungun ewe Samon
Ua pwarata pwe non ei mwich, sia rong mongungun ewe Samon.
Sisap osukosuk nupwen kapasen noun ewe Samon chon angang mi sokono seni ekkiekin fonufan me, fan ekkoch, pwisien ach ekiek. Mi chok iei usun seni nom. Ngang mi fotupuku non ewe tempel ren Pwi kewe. Ua pwarata usun murinnon ngunur. Mochenir mi nap pwe repwe apwapwaiti ewe Samon me anisi noun Kot pwe repwe niwin ren I.
Ekkewe Fik, ekkewe Mwichen Pisop, ewe Mwichen Fin Anisi, Fopun, Kinter, me ekkoch mwichen souemwen ra apachata wachimuken mwasangasang ngeni ei mwich, pwan ussun chok ekkewe murinon kon me iotek.
Mei wor ew tuken pisek auchea a ur ren emwenin nang oua tongeni kuta me non afanafanen mwichenapen mwichefen. A nongonong won ifa usun sipwe penueni met sia ausening, anneani, me mefi!
Mut ngeniei upwe aporousa ussun penueni an ewe sofos kapas seni manauen Preseten Russell M. Nelson:
Non 1979, nimu ier me mwen epwe kokko ngeni an epwe emon Meinapen Unusan, Brother Nelson a fiti ew mwich me mwen chok ewe mwichenapen mwichefen. Preseten Spencer W. Kimball a tesini meinisin “ar repwe anapano met repwe fori nap seni me akkom ar repwe uwei fetanei ewe kapas annim ngeni unusen fonufan. Ew me nein ekkei fonu Preseten Kimball a founi pwe China, a affata pwe, ʻSipwe anisi ekkewe chon China. Sipwe kaeo kapasen fonuwer ewe. Sipwe iotek fan iter me anisir.’” 18
Nupwen a 54 ierin, a wor ew an Brother Nelson memef atun ewe mwich pwe epwe kaeo ewe fosun Mandarin. Inamo ika emon tokterin ngasangas mi osukosuk, nge a mwitir ne kuna emon epwe anisi ren ewe fosun Mandarin.
Ese pwan mang me mwirin an a poputani an ewe kaeo, Dr. Nelson a fiti ew mwich, nge mairun a kuna pwe a mot unukun “emon auchean tokterin China, Dr. Wu Yingkai. … Pokiten [Brother Nelson] a fen kaeo fosun Mandarin, a poputani [ew] oporous [ngeni Dr. Wu].” 19
An Dr. Nelson mochen epwe fiti ewe soufos a emweni Dr. Wu ne katon fetan Salt Lake City me Dr. Nelson a sai ngeni China an epwe awora ew porous me fori angangen reirei.
An tong ngeni ekkewe aramasen China, me ar tong me osufonu a marino.
Non February 1985, engon maram mwirin an ewe a kokko ngeni ewe Mwichen Engon me Ruemon, Elter Nelson a angei ew kokko mi amairu seni China tingorun an Dr. Nelson epwe etino Beijing an epwe angang won ngasangasen emon noun chon China chon kon mi itefouno. Fiti ewe kapas pesepes seni Preseten Gordon B. Hinckley, Elter Nelson a niwiniti China. Ina an ewe omuchunon angangen reirei a fori me non Republic of China.
Mwirin chok ruu ier a no, non October 2015, Preseten Russell M. Nelson a pwan angei ing fiti ew esinesinen mumutan ar repwe eita ngeni emon “minenomun chienen chon China.”
Iwe nanew, sia rong pwe ewe iei a 93 ierin Preseten Russell M. Nelson a afanafan ussun an Preseten Thomas S. Monson ewe tingor ngeni “emon me emon kich [non ewe mwichenap fan ewe eiprin] ach sipwe kaeo fiti iotek me ekieki ewe Puken Mormon iteiten ran.”
Ussun chok met a fori nupwen i a emon tokterin ngasangas mi chok okkosukosuk, nupwen a kuna emon epwe aiti fosun Mandarin, Preseten Nelson a mwitir angei ewe aurour seni Preseten Monson me a fori non manauan. Esap chok ren anneani, a apasa pwe a “fori tetenin ussunmet ewe Puken mormon, met aaffata, met a amwani, met a onusochuno, met a aweweochu, me met a pwarano.”20
Me, mairun, nesesorewe, pwe pwan emon chon pwarata, Preseten Henry B. Eyring a pwan kapas usun penuan ngeni an Preseten Monson we tingor. Oua chechemeni ekkei kapas? “Usun chommong neimi, ua rong kapasan ewe soufos usun neuwan ewe Samon ngeniei. Me, usun chommong me neimi, ua fini upwe anneasochisi ekkan kapas.” 21
Amo sipwe kuna ei pwe epwe ew minen apirun non pusin manauach.
Ew Pwon me ew Efeioch
Ua pwon pwe ren ami oupwe ausening ngeni mongungun ewe Samon ngenikemi non ekkewe afanafanen ei mwichenapen mwichefen, me mwirin oua pwan apwoneta ekkan aurour, oupwe mefi poun nang womi, me manauemi me manauen chon unukumi epwe pwan feioch. 22
Non ei mwichenap. Sia ekkieki usun nouch soufos achengichen, Preseten Monson. Sia tongek, Preseten Monson. Ua amuchano ei ren an kapas me won ei nenian afanafan. Ua nuku pwe pwe mi ew efeioch minne pwe i epwe fen mochen ngenikich ikkenei, ika i mi kofichin nom rech. A apasa: “Nupwen sia tou seni ei mwich, ua efeiochu ngeni emon me emon ami ekkewe feiochun nang. … Ua iotek pwe Samach won Nang epwe efeiochukemi me ami famini. Amo ekkewe afanafan me ngunun ei mwich epwe kuna non ami ekkewe memef ouwa mefi non mettoch meinisin ouwa fori—non imwemi, non ami angang, non ami mwich me non mettoch meinisin epwe tori kemi me suseni kemi.
A awesano ren: “Ua tongekemi, ua iotek fan itemi, Amo Kot epwe efeiochukemi. Amo An pwonen kinamwe epwe nonnom remi iei me feinfeino chok.” 23
Non iten Jises Kraist, amen.