Bwanaan te Uea

N te tai are kateaki iai te Ekaretia, ao te Uea e rinea Iotebwa Timiti bwa te burabeti, te tia mamata, ao ana abotoro te Uea ae Iesu Kristo¹ ao e taku nakon te Ekaretia:

“Bwa ana a taeka kam na karekei, n aron ae bon man oin wiiu, ma te taotaonakin nano ao te onimaki ni kabanea.

“Bwa man karaoan bwaai aikai mataroan moone e na aki tokanikai i aomi;… ao te Uea ae te Atua E na kamaenakoa mwaakan te roo mai moami, ao ni ioioa karawa ibukin kabwaiami.”²

Mwiina, ni kabane kaain te Moan Beretitentii ao Aia Kooram Abotoro Ake Tengaun Ma Uoman a kamatoaki ao ni katabuaki bwa burabeti, taan mamata, ao taan kaotioti.³

N te tai aei, ngkai ti botaki i aan ana kairiri Beretitenti Thomas S. Monson, ti kantaninga n ongora “ana kantaninga te Uea, … ana iango te Uea, … bwanaan te Uea, ao mwaakan te Atua nakon te kamaiuaki.”⁴ Ti kakoaua Ana berita: “Tao man oin bwanaau ke man bwanaaia au toro, bon ti te arona.”⁵

Ni kakamwakurin ao kamangaongaon ara aonaaba ae boou, n onimaki ao ni kakoauai ana taeka te Moan Beretitentii ao te Kooram n Tengaun ma Uoman e boongana nakon rikiraken tamneira ao ara kekeiaki.⁶

Ti a tia ni bane n roko ibukin te maungatabu ni kabuta ae tamaroa aei. Mirion Aika Itiaki ni Boong Aika Kaitira ao kaain aaro ake tabeua inanon ae raka nakon 200 aaba, n taetae aika e raka iaon 93 taetae, n irii tetere aikai ke ni wareki rongorongon te maungatabu.

Ti roko n tataro ao ni katauraoi. Bwa e mwaiti iroura, a mwaiti katabetabe ni iango ao taian titiraki. Ti tangiria ni kaboui ara onimaki inanon ara Tia Kamaiu, Iesu Kristo, ao ni kakorakorai ara konabwai n totokoi kariiri ao ni kararoai tian katabetabe. Ti roko bwa ti na reireiaki mai eta.

Ibukin te Moan Beretitentii ao te Tengaun ma Uoman, ake aki toki n taetae n tain te maungatabu, te tabe ae korakora ni katauraoan aia rongorongo bon te uota ae okioki ao te onimaki ae tabu.

Inanon ririki n nako, imwain mwakuriu bwa te Mataniwi ni Kabuta, I butia Unimwane Dallin H. Oaks ngkana e katauraoa te taetae ae kaokoro ibukiia titeiki nako. E kaeka bwa e aki ma e reitia, “Ma au taetae n te maungatabu ni kabuta a kaokoro. I rinanon 15 nakon 20 au beeba ni katauraoi ni kakoaua bwa te bwai are I taekinna bon are tuangai te Uea bwa N na taekinna.”⁷

N ningai ao ni kanga are e na roko iai te kairi mai ieta ibukin te maungatabu ni kabuta?

Ma akean atuun te rongorongo ae ti anganaki, ti noora tikiraoin karawa ni babairei aron bwaai n reirei ao botoniango n te koaua ae akea tokina n tatabeua ao ni kabane maungatabu.

Temanna mai buakoia Tariu e tuangai bwa atuun ana reirei ibukiin te maungatabu aei e anganaki imwiin ana taetae n Eberi ae nako. E taekinaki naba teniua te wiiki n nako are e bon teimatoa n tataro ao n tataninga te Uea. Temanna e kaeka, ngke e titirakinaki bwa maanra are e a tia ni kabanea n otea te taetae ae katekenano, ana kaeka temanna tarira, “Uabwi ma nimaua te ririki.”

N te tai teuana ma teuana a kona ni waekoa n roko te oi ni iango, ma kanoana ao kabwarabwaraana e bon tangira kekeraken te tamnei. Te aki mamatam ao te tataro, te kamatebwai ao te onimaki, bon ngaia n taainako mwakoron te waaki. E aki tangira te bwabwakanikewe te Uea ni karabai Ana taeka nakoia Aika Itiaki.

Kaetieti ibukin te taetae n te maungatabu ni kabuta, a roko n taainako n te bong ke ni moantain te ingabong, ngkana kanoan te taetae anne e raroa man are e iangoaki. N ae waetata, te iango are aki kantaningaki ao, n taai aika bati, taeka ao kibuntaeka a roko kanga te kaotioti ae itiaki.⁸

Ngkai ko ongora, taian rongorongo aika ko karekei a kona ni kabwarabwaraaki n taeka ake a karika te bitaki nakoim.

Ngke I taetae n ririki aika nako n te maungatabu ni kabuta, I tuangaki te mwakoro n taeka are e rin n au iango ngke I titirakinaki ngkana I a tauraoi ni karaoa te mwakuri ni mitinare. Te kibu e kangai “Ko aki atai bwaai ni kabane, ma ko ataa ae tau!”⁷ Te ataeinnaine ae tekateka n te maungatabu ni kabuta n te bong arei e tuangai bwa e tataro ibukin kan karaoan te mare, ao e na kanga ni kinaa raoi te ataeinimwaane. Ngke I taekin taeka “Ko aki atai bwaai ni kabane, ma ko ataa ae tau,” te Tamnei e kamatoa nakon neienne ae e kinaa raoi teuanne. A tia n rangi ni kukurei n aia mare inanon ririki aika mwaiti.

I berita nakoim bwa ngkana ko a tia ni katauraoa tamneim ao n roko ma te kantaninga bwa ko na ongo bwaanan te Uea, iango ao namakin a na roko n am iango ake a kaineti bon tii ibukim. Ko a tia n namakinii n te maungatabu aio, ke ko na kona ngkana ko kamatebwai rongorongo ni wiiki ake mai imwaina.

E taku Beretittenti Monson:

“Anaa te tai ni wareki rongorongon te maungatabu.”¹⁰

“Iango [ia]. … I a tia ni kunea … bwa I karekea riki ae raka man reirei aika roko ngke I kakorakoraai ni kamatebwai.”¹¹

Rongorongo man te maungatabu ni kabuta bon ana iango te Uea ae e anganiira ngkai ao ibukin namwakaina aika imwaira.

E “rimoaia [ana tiibu], te tia kawakin tibu, ao a rimwiina ana tibu: bwa a kina bwanana.”¹²

E aki toki Bwanana ni kaetira bwa ti na bita te bwai teuana inanon maiura. E kaoira bwa ti na rairi nanora. E kaoira bwa ti na Rimwiina.

Iangoi aron rongorongo aikai man te maungatabu aei:

Beretitenti Henry B. Eyring man te ingabong aei: “I kaota au koaua bwa te Atua te Tama e maiu ao e tangiriko bwa ko na Nakoina. Aio ana Ekaretia ae koaua te Uea Iesu Kristo. E kinai ngkami; E tangiri ngkami; ao; E tararuai ngkami;”¹³

Beretitenti Dieter F. Uchtdorf man ngkoananoa: “I kakoaua bwa ngkana ti borauakinna ke n reitanako te mwananga ae moan te nakoraoi are e kaineti nakon te Atua, maiura a na nakoraoi … ao e na kabonganaira te Uea ni kawai aika kamimi ni kakabwaiaia naake irarikira ao ni uota Ana kantaninga ae akea tokina.”¹⁴

Beretitenti Russell M. Nelson: “I berita bwa ngkai kam wareka Ana Boki Moomon n te bong ae koraki, kam kona n tauraoi ni kaitara buakakan te bong, n ikotaki ma ana katikitiki tangirakin tamnei aika buakaka ao tabeua ake a katika te iango.”¹⁵

Unimwaane Dallin H. Oaks ngkoananoa: “I kakoaua bwa te katanoata nakon te utu bon koaua aika akea tokiia, ana kantaninga te Uea ibukiia Natina aika a ukoukora te maiu ae akea tokina.”¹⁶

Ao Unimwaane M. Russell Ballard man ti tabeua miniti n nako: “Ti tangiria ni mwaneia n akoiia natin te Atua ao ni katoka te riribai, n raonaki ma riribakin te reeti, rikin te aomata, ao te aba.”¹⁷

Bukina bwa e reke teutana te miniti, I kan reita te ururing iroun Unimwaane Robert D. Hales. Kaain te Moan Beretitentii a tuanga Unimwaane Hales bwa e na kona n anga ana rongorongo ae kimototo n te tetere ni moaningabongin te Tabati ngkana arona bwa e marurung. Ngkai e aki marurung, e katauraoa ana rongorongo, are e kabanea n te wiiki ae nako ao e tibwaia ma ngai. Banen ana ririki ae anganaki tao teniua te aoa n nako, I tibwauai teniua te rain man ana taeka.

N taekina ana taeka Unimwaane Hales: “Ngkana ti rineia ni karekea te onimaki, ti a tauraoi n tei imatan te Atua. … Imwiin Taurakin te Tia Kamaiu, E kaoti ti nakoia ake ‘a tia ni kakaonimaki ni kakoauan Iesu ngke a maeka n te maiu ae mamate.’ [R&B 138:12.] Naake ‘a kaitaraa ake aki butimwaea aia koaua … ao aia … kauring burabeti ake ngkoa [aki] noora rokon [te Tia Kamaiu], ke n noora ubuna.’ [R&B 138:21.] … Ara onimaki a katauraoira ni mena ni mweengan te Atua.”

Ai akoira te Uea ni kaunga nanon Beretitenti Nelson ni waekoa ni kitana te moan tetere ni maungatabu n te kabane, n aki katawanou, ao ni kawaekoa nako rarikin ana kainiwene Robert D. Hales ike e kona n roko ao ni mena ikekei, ana beretitenti n te kooram ma te anera Mary Hales ngkai e a motirawa man te maiu aei Unimwaane Hales.

I kakoaua bwa n te maungatabu aio ti a tia n ongo bwanaan te Uea.

Ti riai n aki kubanako ngkana bwanaan ana toro te Uea a warekaki n iangoan te aonaaba ao, n ara tai n iango. Anne te bwai ae ririki. I katorobubua n te tembora ma Tariu. I kakoaua aron tamaroan tamneia. Nanoia ae korakora bon kakukureian te Uea ao ni buokiia natin te Atua n Okiria.

Itingaun, Bitiobiriki, Beretitentii ni Kabuta n te Bootaki n Aine, Ataeinnaine, ao te Buraimwari; ao taan kairiri ni botaki n ibuobuoki ake tabeua a tia ni karokoa te namakin ae moan te tamaroa nakon te maungatabu aio, ma te anene ae tangiraoi ao taian tataro.

Iai n te bwaoki ni kaubwai kaetieti mai karawa are a kakantaningaa kuneakiia n rongorongon te maungatabu ni Kabuta. Ukerakira n tatabemaniira nako bwa ti na kanga ni kaeka tera ae ti ongoraeakinna, tera ae ti warekia, ao tera ae ti namakinna.

N na tibwaua aron kaekaan te taetae ni burabeti man maiun Beretitenti Russell M. Nelson:

Inanon 1979, nimaua te ririki imwain weteana bwa te Mataniwi ni Kabuta, te Tari Nelson e ira te maroro imwain te maungatabu ni kabuta. Beretitenti Spencer W. Kimball e kakaewenakoia ni kabane ake a roko bwa a na karaoa ae mwaiti riki ni uotakin te euangkerio nakon te aonaaba ni kabanea. Ibuakoia aaba Beretitenti Kimball e kaonotia ni kaota Tiaina, n taekinna, ‘Ti riai ni mwakuri ibukiia I-Tiaina Ti na reiakina aia taeka. Ti na tataro Ibukiia ao ni buokiia.’”¹⁸

Tamnei

Beretitenti RussellM. Nelson bwa te tia korokoro

N ana ririki ae 54, iai ana namakin te Tari Nelson inanon tain te bowi bwa e na kamatebwaia te taetae ae te Mandarin. E ngae ngke te tia korokoro n te buro ae tatabetabe, e reke te tia reireinna.

N aki maan mwiin moanakin ana kamatebwai, Dr Nelson, e ira te bwabwaro, n te United States mai mainiku n aki kantaningaia bwa e na tekateka irarikin te tia korokoro ae kinaki te I-Tiaina ae Dr Wu Yingkai. … Ibukina bwa te [Tari Nelson] e a tia ni kamatebwaia Mandarin, e moana [ana] maroro ma [Dr. Wu].”¹⁹

Tamnei

Dr. Russell M. Nelson ma Dr. Wu Yingkai

Ana kantaninga Dr Nelson ni ira nanon te burabeti e a karika mwanangan Dr Wu ni kawara Salt Lake City ao Dr Nelson ni mwananga nako Tiaina n anga reirei ao ni karaoi mwakuri ni korokoro.

Ana tangira ibukiia kaain Tiaina, ao aia tangira ao aia karinerine ibukina, e rikirake.

Inanon Beberuare 1985, tebwina namwakaina imwiin weteakina nakon aia Kooram Abotoro ake Tengaun ma Uoman. Unimwane Nelson e a karekea weteana n te tareboon ae karina mai Tiaina ni bubuti ibukin Dr Nelson n roko nako Beijing ni korokoro ni mamaaran buroon te tia anene ae moan te kinaki iaon Tiaina. N ana kaunganano Beretitenti Gordon B. Hinckley, E a oki Unimwane Nelson nako Tiaina. Ana kabanea ni korokoro ae e kakaraoia bon n te People’s Republic of China.

Tamnei

Beretitenti RussellM. Nelson e karineaki

Inanon uoua te ririki n nako, n Okitobwa 2015, Beretitenti Russell M. Nelson e a manga kinaaki riki ma te katanoata ae bwainaki, are e aranaki iai bwa “raoraon Tiaina man Ngkoa.”

Ngkanne ngkoananoa, ti ongo bwa Beretitenti Russell M. Nelson ae 93 ana ririki e taekina ana bubuti Beretitenti Thomas S. Monson nakoira “n tatabemaniira nako [n te maungatabu ni kabuta n Eberi ae nako] n tataro ao ni kamatebwaia Ana Boki Moomon ni katoa bong.”

N aron are taekinna ngkai te tia korokoro n te buroo ae rangin n tatabetabe, ngke e tangoa te tia reirei n te Mandarin, Beretitenti Nelson e waekoa n ira ana reirei Beretitenti Monson ao ni karaoia ni maiuna. E riaon riki ae tii te wareware, e taku bwa e karinanini bwaai man Ana Boki Moomon bwa tera, ae e kamatoa, ae e katautaua, ae e kakoroa nanona, are kamatata, ao are e kaotia.”²⁰

Ao ngkanne, ni kakaongoraana, n te ingabong aei, ngkai te kauoman n tia kakoaua, Beretitenti Henry B. Eyring e taetae naba n ana kaeka nakon ana kauring Beretitenti Monson. Ko uring taeka aikai? “N aroia angiia mai iroumi, I ongo ana taeka te burabeti n riki bwa bwanaan te Uea nakoiu. Ao, n aroia naba angiina ibuakomi, I baireia ni kan ongo taeka akanne.”²¹.

E na riki bwa te katooto inanon maiura.

I berita bwa ngkana kam ongo bwanaan te Uea nakoimi n reirei man te maungatabu ni kabuta aio, ao ngkanne mwakuri iaon kairiri akanne, kam na namakina bain karawa ni kairii ngkami, ao maiumi ao maiua ake i rarikimi bwa a na kakabwaiaki.²²

N tain te maungatabu aei ti reireinaki taekan ara burabeti ae tangiraki. Ti tangiriko, Beretitenti Monson. I kaina ma ana taeka man te tabo n taetae aei. I kakoaua bwa bon te kakabwaia bwa e tangiria n anganiira n tatabemaniira nako n te bong aei, ngkai e mena irarikira. E taku: “Ngkai ti kitana te maungatabu aei, I katoka kakabwaian karawa iaomi n tatabemanii ngkami nako. … I butia Tamara are i Karawa bwa E na kakabwaiai ngkami ao ami utu. Te kantaninga n rongorongo ao tamnein te maungatabu aio a na reke kabwarabwarakiia ni bwaai aika kam karaoi—ni mweengami, n ami mwakuri, n ami botaki, ao n rokomi ao n nakomi ni kabane.”

E kainna: “I tangiri ngkami. I tataro ibukimi. E na kakabwaiai ngkami te Atua. Ana rau are berita iai nakoimi ngkai ao n taainako.”²³

N aran Iesu Kristo, amen.