Ngerel a Rubak
Ak kuuchais el kmo kede mla rongesii a ngerel a Rubak er tial ongdibel. Sel skeng el mer kid a kmo meng mekera donger el kirel.
A kot, a ungil tekoi el mora rengalek. Oi, tiang a ulebongel el ongdibel, e oi, ngak e a ulebongel el mengedecheduch.
A dirk, mle oldingel ra Provo City Center Temple, Ng kmal soak sel sunga er a Kot el Ues el mlara Afar. Tial sunga a olecholt er a llomes ma klisiich el ngara babeluades er sera Chedam me a Ngelekel le be loldingel er a Joseph Smith.
Ng diak kumekesiu er ngii mesel chedaol milkedmokl er a bocha lomuchel a Oluut, ng sebechek el ua kisa osisiu el ues el ngii a ochotii a llomes me a chedaol klisiich er a Dios el metengelang er tial klou el ongdibel e, ngii el klisiich a merael el mora rokui el beluu.
Ak meskau a sioning er ngak el kmo a Jesus a Kristo, e Ngii a omtebechel er a teletelel tial chedaol lureor, e tial klou el ongdibel a tara kot el klou a belkul el taem el Ngii a omekrael er a Ikelesia er Ngii me a kid el dirrek.
Mosisechakl er a Ngarbab
Sel sils er a lemeteketek a Ikelesia, ea Rubak a tiltkii a Joseph Smith el profet, chad ra ues, e apostol er a Rubak el Jesus Kristo1 e millekoi el mora Ikelesia:
“El kmo ng kirir el ngmai a tekingel a profet el ngii a ua le mlara ngerel a Rubak, lobang a kellou el reng ma klaumerang.
“Me sel mrelii tiang e a tungelel a beluu ra ngau a diak el bol mesisiich er tir, ea Rubak el Dios a mo oridii a klisichel a ilkolk er kemiu, e a babeluades a mo mengitengtik el kirel a klungiolir.”2
Uriul, ea Kot el Presidency me a Chelechad er a Teruich me a terung el Apostol a mlo modars e mechedaol el profet, chad ra ues, me a ocholt.3
Chelechang, el de ngar tiang el lomekrael er kid a President Thomas S. Monson, e kid a mengiil el mo orenges er sel urungulel a Rubak, uldesuel a Rubak, ngerel a Rubak, me a klisichel a Dios er a osobelir a rechad.4 Kede oumerang sel yaksok er Ngii el kmo ngoeak a ngerel malechub a ngerel a mesiugnel, eng kmal diosisiu.5
Chelsel a kaukeangel tekoi ma rrau el reng er chelechal taem, e a klaumerang er kid er a tekingir a re Kot el Presidency me a Chelechad er a Teruich me a terung el Apostol a klou a ultutelel er a chedaol klengar er kid ma dechal a rengud.6
Kid a mle dmak el keldibel el ngar tia lungil el ongdibel. Betok el million el Uriul-klebesei el Santo ma rechad ra bebil ra klechelid el ngara betok er a eru el dart el beluu, el melekoi a oketiu ma edei el bedengel a tekoi, a mora ikal longdibel malechub e te menguiu a klemechel el ngii longdibel.
Kid a mei el mla meluluuch e kldmokl. E a rebetok er kid, a ngarngii a meringel lomdasu ma ngara rengrir el ker. Kede rokui el soad lomekbeches ra klaumerang er kid er a Osobel, Jesus Kristo, e mo melisiich er kid el mo otngakl a ngibesereng ma olibesongel. Kede mei el mosisechakl er a ngar bab.
Uldesuel me a Moktek a Rubak
Kot el Presidency me a re Teruich ma terung, el blechoel mengedecheduch er a bek el ongdibel, tial klou el ngerachel er a omengedmeklel a klengechir a mekdekudem el ngarngii el chellungel e chedaol el ngerachel lobang.
Bebil rak ra mla memong, ruchei er a bo ak General Authority, e a kuleker ra Elder Dallin H. Oaks el kmong meluches a kakerous el cheldechedechal sel bek el ongdibel sel ngarngii a ongdibel ra stake. Ngulenger el kmo ng diak e dilechelir, “Eng di a cheldechedechak er a klou el longdibel a ngodech. Ng sebechel mo kmeed el 12 el mo 15 el kuluches er ngii me a kmal mo medengei el kmo a ikel bok dung a ikel ngii a soal a Rubak a bo kulekoi.”7
Ng oingerang e ua ngera ulekrael el cheldecheduch er a klou longdibel a le mei?
Meng diak el beskemam dai er a cheldechedemam, e a ki mesa babeluades el klebokel loureor lobengkel a ikal ki bomosaod el klemerang er a bek el ongdibel.
A tara Odam a dilu el kmo a bo losaod er tial ongdibel a di blel mereched el nguu er a uriul er a cheldechedechal er tial mlo merek el April. E a tang a uluuchais er a ikal merko el edei el sandel, el kmo ng dirk meluluuch e mengiil ra Rubak. Ea kuk tang ra kuker er ngii el kmo ng mle ua ngera klemengetel a taem el loluches er a okedeldaol el cheldechedechal, eng ulenger. “Lluich ma eim el rak.”
A le bebil ra taem e a cherrengelel a uldasu a mereched el mei, eng di a mo teletelel me a ikel mo komakai a kiram el lemuut el ngoriakl er a chedaol tekoi. Olsengerenger ma nglunguuch, omesuub ma klaumerang, a blechoel luldimukl er ngii. A Rubak a diak el soal a delibech leng kekeringii a Ngerel el mora re Santo er Ngii.
A ulekrael el kirel a cheldecheduch er a klou el ongdibel a blechoel mei sel klebesei malechub eng mochu tutau, el sel taem el diak domdsu aikel mo cheldechedechad. Eng di kiul, merkid a uldasu e, sel bebil ra taem, eng mei a tekoi malechub a cheldecheduch el omaoch el ngii a mechelins el ocholt.8
Sel morrenges, ea ikal tekoi el omngai a sebechel cherrengelel malechub eng mla mekedmokl el kmal di ekor kau.
Ak milengedecheduch er a klou el ongdibel er a betok el rak ra mla memong, ea kuluchais er a tekoi el mlei ra uldesuek sera kumdasu el kmo ngak ak kol locha kldmokl el mora mission. Tial tekoi a kmo, “Kau a diak modengei a rokui, engdi kemedengei a bebil!”9 A ngeasek el dilengchokl el ngara klou el longdibel er sel sils a ulechais er ngak el kmo ng miluluuch leng ngiluu a ongit el mo bechiil, e dirrek el ulemdasu el kmo ngii ng kol locha ungil medengelii ng kal ngeasek el buik. Sera kdu “Kau a diak modengei a rokui, engdi klemedengei a ungiang!” Ea Chedaol Reng a uluchais er ngii el el kmo able lodengei a ungiang. Te mla bechiil el ungil a rengrir el betok el rak.
Ak yaksok er kau el kmo sel mkedmeklii a rengum, e mei el kirem el rongesii a ngerel a Rubak, e a uldasu ma omomelchesiu a mei er a uldesuem el ngii a rruul el kmal di kirem. Ke mla omelchesiu er ngii er tial longdibel, malechub e ke mo nguu sel bo mosuub a ikal klumech er a ikal sandei el merael mei.
Kirel Chelechang me a Ngarmedad el Buil
A President Monson a millekoi:
“Le borngii a temem el menguiu a klumech er a ongdibel.”10
“Momdasu el[ kirel]. … ak mlo medengei … el ngak a ngmai a lmuut el betok el ulekrael era ikal osisechakl sel bol dolech a omesubek er ngii.”11
A klumech er a klou el ongdibel a soal a Rubak a bo domdasu el kirel er a ikal merael mei el buil.
A mengkerngel a sib “a oeak uchei er a [chermel sib], e a sib a oltirakl er ngii: e le te medengelii a choto ra ngerel.”12
Ng blechoel, el ngerel a omekrael er kid el mo melodech er a kmong ngerang ra klengar er kid. Ngii a olengit er kid el mouchel a rengud ra kngtid. Ngii a olengit er kid el mo oltirakl er Ngii.
Momdasu aika el tekoi el mlengai er tial ongdibel:
A President Henry B. Eyring er chelechal tutau: “Ak ouchais er a sioning er ngak el kmo a Dios el Chedam a kiei e soal kau a omluut el mo remei el mo er Ngii. Tiang a klemerang el Ikelesia er a Rubak el Jesus Kristo. Ngii a medengelkau, Ngii a betik a rengul er kau; Ngii a omekkrreu er kua.”13
President Dieter F. Uchtdorf er a chelii: “A kuchais el kmo sel domuchel e dolemolem er tial meang lomerael el bedul a Dios, e a klengar kid a mo kebekakl … ea Rubak a mo ousbech er kid lokiu a ngodech el teletael el mo omekngeltengat er tirkel ngar bita er kid loltaut er a diak el ngemed el moktek er Ngii.”14
President Russell M. Nelson er a chelii: “Ak yaksok el kmo sel bol dolech omesubem er a Babier er a Mormon, eng sebechem el mo mesisiich er a mekikiongel er chelechal taem, uldimukl a rektel a deleboes el tekoi me a lmuut el bebil ra olsecher a uldesued el duleksau er ngii.”15
Elder Dallin H. Oaks er a chelii: “A kuuchais el kmo tial chais el mora telungalek a klemerang el tekoi, el lurungulel a Rubak el mora Rengelekel el tir osiik er a diak a ulebengelel el klengar.”16
Me a Elder M. Russell Ballard er a ikal merko el sesel bung: “Ng kired lodersii a klechubechub el mo er a rengelekel a Dios e choroid a bekelekiakl el reng, luldimukl e dekakerous el chad, sechal me a redil, me a beluad.”17
E le uchul eng ngarngii a sesel bung el medechel, eng soak el mo dochelir a di kedeb el uldasu el kirel a Elder Robert D. Hales. A Kot el Presidency a dilu er a Elder Hales el kmo ng sebechel mo kmu sesei el tekoi er a ongdibel er a tutau er a Sandei alsekum meng mesisiich a bedengel. Meng dimlak el mesisiich a bedengel, engdi ng kildmeklii a tekingel, e rirekir er tial mlo merek el sandei e ulechotii er ngak. Meng kmal dirk mlo smecher er a a ikal merko ledei el sikang, ak mo chouchais a di kldei el kerbai el llechukl el cheldechedechal.
Me a tekingel a Elder Hales: “Sel dolilt el mo oba a klaumerang, e kid a kldmokl el mo dechor er medal a Dios. … Uriul er a le Mekerus a Osobel, eng mlo duum er tirkel tir a mle blak a rengrir er a klaumerang er tir er [Ngii] er sera le dirk le ngara beluulechad. [mesa D&C 138:12.] Tirkel tir a mo imikr a klaumerang er a reprofet a diak el sebechir el mora bitar a Osobel, malechub e lomes er a medal. [mesa D&C 138:21.] … A klaumera er kid a mengedmokl er kid el mora le ngarngii a Rubak.”
Ng meral chubechub a Rubak el milsa uldasu a President Russell M. Nelson er a bochal merek ongdibel er a tutau meng di mle mereched el merael tuobed er tial basio, e diak lomengur, e orreched el mor bitara dukkellel a Elder Hales, meng sebechel ngarsei, el quorum president er ngii, lobengkel a Mary Hales er a le bocha ra ulebong er a klengar er a Elder Hales er tial belluulechad.
Onger er a Ngerel a Rubak
A kuchais el kmo a chelsel tial ongdibel, e kede mla rongesii a ngerel a Rubak.
Ng diak el kired el bekikl a sel sekum a tekingir tirkal a re mesiungel a Rubak b lengodech er a uldesuel a beluulechad me a sel bebil, a ulesued. Tiang a di mla blechoel uaisei. Ak ku tibaruach er a chelsel a templo lobengterir a Rodam er ngak. Ak medengei el kmo te mekedung el chad. Sel soal a rengrir a mo meruul a soal a Rubak e olngeseu er a rengelkel a Dios meluut el mo er Ngii.
A Rokeud, Bishopric, sel Cherrengelel a Roungerachel er a Relief Society, Young Women, me a Primary; ma lmuut el bebil ra roungerachel ra auxiliary a mla dochel a betok el ulekrael el me er tial longdibel, ma dirrek a klebokel chelitakl ma dmolech el nglunguuch.
Ngarngii a mekreos el ulekrael el mlara babeluades el mengiil er kau el mo osiik er a chelsel aikal klumech er a klou el ongdibel. A skeng el mera derta er kid a kmo ngera kede mo meruul el kirel aikel bla derenges, me a donguiu, me a domelchesiu.
Msall e kuuchais er a dilubech er a klengar er a President Russell M. Nelson er a ulaoch el mlara profet:
Sera 1979, eim el rak ruchei er sera le mokedong el General Authority, ea Brother Nelson a mlora miting ruchei er a klou el Ongdibel. A “President Spencer W. Kimball a milsterir omelasem el mortir el rokui el mla rsei el mo meruul a betok er aikel loruul er chelechang el moba ebangkelio el mora rokir el beluulechad. A bebil ra beluu el lullekoi a President Kimball a mlar ngii a Sina, meng melekoi el kmo, ‘Ng kired el mo olngeseu er a rechad ra Sina Ng kired el mo meduch el melekoi a tekingir. Ng kired el meluluuch el kirir e olngeseu er tir.’”18
Sera le okeim me a eua rekil ea Brother Nelson a mlo er ngii ra bedengel er a le ngara miting el kirel mo mesuub a Mandarin. Meng mle mechesang el toktang ra chaidireng, eng ding mle mereched el siekii a mo olsisechakl er ngii.
Ng dimlak el meketeket ra lomuchel ra omesubel, e a Dr. Nelson a mlora ongdibel e mle keberuul el mo dengchokl ra bita ra “meduch el chad ra bokt el chad ra Sina el, Dr. Wu Yingkai. … E le uchul a [Brother Nelson] a milsuub a Mandarin, eng mo [a] kadecheduch ngii [me a Dr. Wu].”19
Sel mle soal a Dr. Nelson loltirakl er a profet a mlo uchul ea Dr. Wu a mlo oldingel er a Salt Lake City me a Dr. Nelson a mlo ra Sina el mo mengedecheduch e mlo omotk.
A beltkil a rengul el mora rechad ra Sina, me a beltkil a rengrir ma omengull el mo er ngii a, mlukeroul.
Sera February 1985, teruich el buil er a le mokedong el mora Chelechad er a Teruich ma terung, e a Elder Nelson a ngiluu a di mle kiul okedong el mlara Sina lolengit er a Dr. Nelson mel bora Beijing el mo omotk ra chaidirengul a merael chisel mengitakl a opera er a Sina. Ma President Gordon B. Hinckley a urremelii, me a Elder Nelson a liluut el mora Sina. Sel kot el mlo ulebongel el botk el rirelii a milkedmokl er a beluu er a People’s Republic of China.
Dirk eru el rak ra mla memong, er a October 2015, ea President Russell M. Nelson a liluut el nguu a chetengakl el milkedmokl er tial beluu, e mlo mengeklii el “meketeketa el sechelil a Sina.”
E sera chelii e kede rirengesii a mla mo okai ma edei a rekil el President Russell M. Nelson el melekoi er a ongtil a President Thomas S. Monson el “derta er kid [er tial mlo merek el ongdibel ra April] el mo oba nglunguuch e mesuub e omdasu er tial Babier er a Mormon er a bek el sils.”
El kmal di uai sera le sal mechesang el chad ra botk, e lenguu a chad el molsisechakl er ngii a Mandarin, e a President Nelson a di mle mereched el nguu a ongtil a President Monson e mo oltirakl er ngii. Ng dimlak el di longuiu, ng dilu el kmo “ng liluches a beldukl el tekoi louchais el kmo ngera a Babier er a Mormon, ngerang le kengei, ngera ngomtok, ngera ngoltaut, ngerangomeketakl, e ngera ngolecholt.”20
E okor, e ser chelechal tutau, el ongeru el sioning, el President Henry B. Eyring a dirrek el milsaod er a nger er ngii el kirel sel omellach er a President Monson. Kom dobedebek aikal tekoi? “El kmal di uai a betok er kemiu, ak rirengesii a tekingel a profet el uai a lengor el mlara Rubak el merngak. E, dirrek el uai a betok er kemiu, ak millilt el mo oltirakl ngii el tekoi.”21
Mei e de ues aikang me lokesiu er a klengar er kid.
Telbiil me a Klengeltengat
Ak yaksok er kau el sel bom rengesii a ngerel a Rubak el mer kau ra ikal osisechakl er tial klou el longdibel, e bo motirakl aikel odubech, e kau a mo melchesuar a chimal a babeluades el ngar kau, e a klengar er kau me a klengar er a ngar bita er kau a mo mukngeltengat.22
Ngar tial ongdibel, e kede millatk er a profet er kid. Betik a rengmam er kau, e President Monson. A kmo mengesimer loba tekingel el mildung er tial omengedechedechaol. A kuumerang el kmo ng klengeltengat el ngii a soal lomeskid er chelechang, omkong sebechel me obengked. Ng dilu el kmo: “Me chelechal dorolang er tial longdibel, e ak meskemiu a klengeltengat er a babeluades el mora derta er kemiu. … Ak meluluuch me a Demad er a Babeluades bo lomekngeltengat er kemiu me a telungalek er kemiu. Mei ma klumech me a reng er tial ongdibel bo lulecholt ra rokui el moruul—er a re ke blimiu, ureriu, miting er kemiu, ma omeroliu el mong e mei.”
Ng mlo mengesimer: “Ak betik a renguk er kemiu. Ak meluluuch el kiriu. A Dios lomekngeltengat er kemiu. Mei mesel yaksok er ngii ra budech lekor kemiu er chelechang el di blechoel.”23
Ngara ngkel a Jesus Kristo, amen.