Peb tug Viv Ncaus

Tus viv ncaus thib ib xav tias nws yog ib tug uas raug teeb meem—ib tug uas raug tej yam.¹ Zoo li pheej muaj tej yam uas nws raug uas ua rau nws tu siab heev. Vim nws ua neej zoo li no, nws cia lwm tus kav nws lub siab thiab nws txoj kev coj yam ntxwv. Thaum peb ua li no, txhua tus txoj kev xav yeej zoo li cua hlob uas nplawm peb mus ub mus no—thiab niaj hnub nim no peb muaj social media txhua lub sij hawm, ntshe cov cua no nplawm peb zoo li cua daj cua dub.

Cov muam es, vim li cas nej yuav cia lwm tus, los yog ib pawg neeg, txiav txim txog nej txoj kev zoo siab, cov uas tsis hlub nej—los yog tsis xav li cas txog nej txoj kev zoo siab?

Yog tias nej txhawj tias lwm tus neeg hais li cas txog nej, thov cia kuv qhia nej txog qhov uas pab tau nej no: cia li nco ntsoov tias nej yog leej twg. Cia li nco ntsoov tias nej yog ib tug los ntawm Vajtswv lub nceeg vaj, cov ntxhais ntawm Leej Txiv thiab Leej Niam Nyob Saum Ntuj Ceeb Tsheej, uas kav thoob plaws saum ntuj.

Nej muaj Vajtswv caj ceg ntawm sab ntsuj plig. Nej muaj tej txiaj ntsim uas muaj txij thaum tau tsim nej sab ntsuj plig thiab nej tau kawm thaum lub sij hawm ntev heev nyob hauv lub neej ua ntej yug los hauv lub ntiaj teb. Nej yog ib tug me nyuam los ntawm Leej Txiv Saum Ntuj Ceeb Tsheej uas muaj siab hlub thiab kav ib txhis, Tsoom Tub Rog tus Tswv, tus uas tau tsim qab ntuj khwb, muab cov hnub qub tawm los nyob thoob plaws lub ntuj, thiab tso cov ntiaj teb kom ncig mus raws li tau teem tseg.

Nej nyob hauv Nws txhais tes.

Txhais tes zoo heev.

Txhais tes uas hlub.

Txhais tes uas saib xyuas.

Thiab tib neeg hais dab tsi txog nej los yeej yuav tsis hloov qhov ntawd. Lawv tej lus tsis muaj nqi dab tsi thaum piv txog tej uas Vajtswv tau hais txog nej.

Nej yog Nws cov me nyuam uas muaj nqis heev.

Nws hlub nej.

Txawm yog nej ua yuam kev, txawm yog nej tig mus deb ntawm Nws, Vajtswv hlub nej. Yog nej xav tias nej poob zoo, raug tso tseg, los yog tsis muaj leej twg nco nej—tsis txhob ntshai. Tus Tswv Yug Yaj Zoo yuav nrhiav nej. Nws yuav muab nej tsa saum Nws xub pwg. Thiab Nws yuav nqa nej rov qab mus tsev.²

Kuv cov muam, thov muab tej yam tseeb no cog rau hauv nej lub siab. Ces nej yuav kawm tias muaj ntau yam uas ua rau nej tsis tu siab, vim nej muaj ib txoj kev uas nyob mus ib txhis rau nej taug.

Tus Cawm Seej ntawm lub ntiaj teb twb txo Nws txoj sia kom nej thiaj xaiv tau taug txoj kev ntawd. Nej twb ris Nws lub npe; nej yog Nws cov thwj tim. Thiab vim muaj Nws, nej hnav tau cev thav ntxwv ntawm lub yeeb koob uas nyob mus ib txhis.

Tus viv ncaus thib ob yeej chim siab rau neeg ntiaj teb. Zoo li nws tus viv ncaus uas tu siab, nws xav tias tej teeb meem nyob hauv nws lub neej yog lwm tus tsim xwb. Nws liam nws tsev neeg, nws cov phooj ywg, nws tus thawj thiab cov nrog nws ua hauj lwm, cov tub ceev xwm, cov neeg zej zog, lub Koom Txoos cov thawj coj, tej khaub ncaws uas neeg nyiam niaj hnub nim no, nws twb liam lub hnub ci ntsa iab dhau, thiab hmoov phem. Thiab nws hais lus npau taws rau lawv txhua tus.

Nws tsis tau xav tias nws yog ib tug neeg nyaum. Tsis yog li ntawd, nws tsuas xav tias nws pab nws tus kheej xwb. Nws ntseeg tias txhua leej txhua tus qia dub, siab me, thiab ntxub nws. Tiam sis nws yog tus uas muaj siab xav ua zoo—tus uas ncaj ncees thiab muaj kev hlub.

Tu siab uas muaj neeg coob uas xav zoo li tus viv ncaus chim siab no. Twb kawm li no nyob hauv kev tshawb fawb uas xav kawm txog ob pawg neeg txoj kev tsis sib haum. Ib feem ntawm kev tshawb fawb no, cov kws tshawb nrhiav tau xam phaj nrog cov Palestinians thiab cov Israelis nyob hauv Middle East, thiab cov Republicans thiab Democrats nyob hauv Teb Chaws Amelikas. Lawv kawm hais tias “txhua pawg xav tias lawv pawg ua tej yam los ntawm kev hlub tsis yog los ntawm kev ntxub, tiam sis thaum nug hais tias vim li cas lwm pawg tsis nrog lawv sib haum, [lawv] hais tias [lwm] pawg ua tej yam vim lwm pawg ntawd ntxub neeg.”³

Los yog hais tias, txhua pawg xav tias lawv yog “cov neeg zoo”—ncaj, siab zoo, thiab hais qhov tseeb. Tiam sis, lawv xav tias lwm pawg yog “cov neeg phem”—tsis txawj ntse, tsis ncaj, los yog phem.

Xyoo uas kuv yug los, lub ntiaj teb yeej ua tsov ua rog loj heeV uas ua rau tib neeg nyuaj siab kawg thiab tu siab tas zog. Cov neeg los ntawm kuv lub teb chaws twb pib kev tsov rog no—cov neeg uas xav tias lwm pawg yog neeg phem thiab yaum tib neeg kom ntxub lawv.

Cov uas lawv tsis nyiam lawv yuam kom nyob twj ywm. Lawv ua rau cov neeg no poob ntsej muag thiab hais tias cov neeg no zoo li dab. Lawv xav tias cov neeg poob qab—thiab tsis yog neeg. Thaum twg yus hais tias ib pawg neeg tsis zoo li ntawd, ces ntshe yus haj yam xav tias tsim nyog hais lus thiab ua tej yam kom tsim txom lawv.

Peb tsis nyiam xav txog tej yam uas tshwm sim nyob rau hauv lub teb chaws Yelemees thaum tiam 20.

Thaum twg ib tug neeg tawm tsam peb los yog tsis sib haum nrog peb, yooj yim rau peb xav tias muaj dab tsi tsis zoo txog lawv. Thiab txij thaum ntawd los yeej yooj yim xav tias lawv muaj hom phiaj phem heev thaum lawv hais lus thiab ua tej yam.

Peb yeej yuav tsum sawv khov kho rau tej yam uas zoo, thiab tej lub sij hawm peb yuav tsum tsa peb lub suab txhawb nqa lub hom phiaj ntawd.Tiam sis, thaum peb muaj kev chim siab los yog kev ntxub—thaum peb cem lwm tus kom lawv mob siab, poob ntsej muag, los yog ua rau lawv nyob twj ywm—ntshe peb ua tsis ncaj ncees.

Tus Cawm Seej tau qhia dab tsi?

“Tiam sis nim no kuv qhia rau nej hais tias, hlub nej cov yeeb ncuab thiab thov Vajtswv pab rau cov uas tsim txom nej,

“Yog nej ua li no, nej thiaj yog Leej Txiv tus uas nyob saum ntuj cov me nyuam.”⁴

Nov yog tus Cawm Seej txoj kev. Yog yam thib ib peb yuav tsum ua kom rhuav tej yam uas ua rau tib neeg npau taws, ntxub, tsis sib haum, thiab tsim kev tsim txom nyob hauv lub ntiaj teb.

Tej zaum nej yuav hais tias, “Yog mas, kuv txaus siab hlub kuv cov yeeb ncuab—tsuas yog lawv txaus siab ua ib yam li ntawd thiab.”

Tiam sis qhov ntawd tsis tshua tseem ceeb, puas yog? Peb lav ris peb txoj kev ua ib tug thwj tim, thiab yeej tsis nyob ntawm seb lwm tus ua li cas rau peb hlo li. Peb yeej cia siab hais tias lawv kuj yuav to taub thiab muaj kev siab hlub, tiam sis peb txoj kev hlub lawv yeej tsis nyob ntawm seb lawv xav li cas txog peb.

Tej zaum peb txoj kev siv zog kom hlub peb cov yeeb ncuab yuav ua rau lawv lub siab mos siab muag thiab xav ua zoo. Tej zaum yuav tsis ua li ntawd. Tiam sis txawm li cas los xij peb txoj kev cog lus kom coj raws li Yexus Khetos yuav tsis hloov.

Yog li ntawd, vim peb yog cov mej zeej ntawm Yexus Khetos lub Koom Txoos, peb yuav hlub peb cov yeeb ncuab.

Peb yuav kov yeej kev npau taws los yog kev ntxub ntxaug.

Peb yuav muaj lub siab hlub tag nrho Vajtswv cov me nyuam.

Peb yuav ncav tes foom koob hmoov rau lwm tus thiab txhawb pab lawv—txawm yog cov uas “cem [peb], thiab tsim txom [peb].”⁵

Tus viv ncaus thib peb coj yam ntxwv zoo li Yexus Khetos tus thwj tim tiag tiag. Nws tau ua ib yam uas nyuaj kawg: nws tso siab rau Vajtswv txawm yog nws raug luag thuam nws. Nws ho txhawb nws txoj kev ntseeg thiab kev cia siab, txawm yog lwm tus cem thiab thuam nws ib puag ncig. Nws ua neej xyiv fab heev tsis yog vim nws raug tej yam zoo tiam sis yog vim nws xyiv fab.

Tsis muaj leej twg uas ua neej es tsis muaj dab tsi tawm tsam lawv. Yog tias muaj ntau yam uas sim ua rau peb ua yuam kev, peb yuav ua li cas kom tsom ntsoov rau kev zoo siab loj tshaj plaws uas Vajtswv cog lus cov neeg ncaj ncees yuav muaj?

Kuv ntseeg tias peb txais tau lus teb nyob hauv ib tug yaj saub zaj npau suav ntau txhiab xyoos tas los. Tus yaj saub lub npe hu ua Lihais, thiab nws zaj npau suav los muaj nyob hauv Phau Ntawv Maumoos uas yog ib phau zoo kawg nkaus thiab muaj nqis.

Nyob hauv nws zaj npau suav, Lihais pom ib tshav dav dav thiab, nyob haud, muaj ib tsob ntoo uas zoo nkauj tshaj qhov piav tau. Nws kuj pom tej pawg neeg coob mus kev rau tsob ntoo. Lawv xav saj cov txiv ntoo zoo. Lawv xav thiab tso siab tias cov txiv ntawd yuav ua rau lawv zoo siab kawg thiab nyob kaj siab lug.

Muaj ib txoj kev nqaim uas mus txog tsob ntoo, thiab nyob ntawm ib sab muaj ib tug nqaj hlau uas pab lawv coj nraim txoj kev. Tiam sis kuj muaj kev tsaus ntuj uas muaj huab zig niab uas ua rau lawv tsis pom txoj kev thiab tsob ntoo. Thiab tej zaum qhov uas txaus ntshai tshaj yog tej suab luag thiab thuam los ntawm lub tsev loj thiab dav nyob ze. Xav tsis thoob vim li cas qhov uas luag thuam li ntawd ua rau ib txhia neeg uas twb txog ntua tsob ntoo thiab saj cov txiv ntoo zoo lawm txaj muag thiab tawm mus.⁶

Tej zaum lawv pib ua xyem xyav hais tias tsob ntoo puas zoo nkauj npaum li lawv ib txwm xav. Tej zaum lawv pib tsis paub tseeb qhov uas lawv twb noj lawm puag yog tiag tiag.

Tej zaum lawv xav tias yog lawv tig mus ntawm tsob ntoo mus, ces lawv lub neej yuav yooj yim dua. Tej zaum lawv tsis xav cia lwm tus luag thiab thuam lawv ntxiv.

Thiab tsis tas li ntawd, thaum saib cov neeg uas thuam lawv, cov neeg ntawd zoo siab thiab muaj kev lom zem. Yog li ntawd, tej zaum yog lawv tso tsob ntoo tseg, cov neeg nyob hauv lub tsev loj thiab dav yuav tos txais lawv thiab yuav qhuas lawv txog lawv txoj kev txawj ntse, txoj kev muaj peev xwm, thiab laj lim tswv yim.

Cov muam, cov phooj ywg zoo, yog tias nyuaj rau nej tuav rawv tus nqaj hlau thiab taug kev mus rau txoj kev cawm seej; yog tias lwm tus luag thiab thuam nej ua rau nej ua xyem xyav; yog tias muaj tej lus nug los yog tej lus qhuab qhia uas nej tseem tsis to taub; yog tias nej nyuaj siab vim muaj tej kev poob siab, kuv yaum kom nej nco txog Lihais zaj npau suav.

Raws nraim txoj kev!

Tsis txhob tso tus nqaj hlau tseg—uas yog Vajtswv txoj lus!

Thaum twg ib tug neeg sim ua kom nej txaj muag vim nej txais yuav Vajtswv txoj kev hlub, tsis txhob mloog lawv.

Cia li nco ntsoov, nej yog Vajtswv cov me nyuam; Nws yuav foom koob hmoov rau nej; yog nej kawm txog Nws cov lus qhia, nej yuav rov nyob nrog Nws!⁷

Tej lus cog tseg hais tias neeg ntiaj teb yuav qhuas thiab txais yuav nej yeej tsis muaj tseeb thiab yuav tsis ua rau nej txaus siab. Vajtswv cov lus cog tseg yeej muaj tseeb thiab ua rau nej zoo siab—tam sim no thiab nyob mus ib txhis.

Kuv caw nej xav txog kev teev ntuj thiab kev ntseeg zoo li Vajtswv xav. Tsis muaj dab tsi nyob hauv lub tsev loj thiab dav uas zoo npaum li cov txiv ntoo kev ua neej raws li Yexus Khetos txoj moo zoo.

Muaj tseeb tiag, “tej uas qhov muag tsis tau pom los sis qhov ntsej tsis tau hnov, thiab tej uas neeg lub siab xav tsis txog hais tias yuav muaj los. Vajtswv npaj tej ntawd tseg rau cov neeg uas hlub Vajtswv lawm.”⁸

Kuv tau kawm kuv tus kheej hais tias txoj kev taug ua ib tug thwj tim nyob hauv Yexus Khetos txoj moo zoo yeej yog kev xyiv fab. Yog kev kaj siab lug thiab kev nyab xeeb. Yog kev tseeb.

Kuv ua tim khawv hais tias los ntawm lub txiaj ntsim thiab lub hwj chim ntawm tus Vaj Ntsuj Plig Dawb Huv, nej kawm tau qhov no nej tus kheej.

Txij no mus txog lub sij hawm ntawd, yog tias nyuaj rau nej mus kev, kuv cia siab hais tias nej yuav nrhiav tau lub dag zog thiab kev txhawb nqa nyob hauv cov koom haum ntawm lub Koom Txoos: lub Koom Haum Me Nyuam Yaus, Koom Haum Ntxhais Hluas, thiab Koom Haum Niam Tsev. Tej no yeej zoo li tej qhov chaw nres ntawm txoj kev, uas ua rau nej rov qab muaj kev tso siab thiab kev ntseeg mus tom ntej. Tej no zoo li ib lub tsev uas nyab xeeb, nej thiaj li paub tias nej muaj chaw nyob ntawd thiab nej cov viv ncaus thiab cov uas nrog nej ua thwj tim txhawb nqa nej.

Tej uas nej kawm nyob hauv lub Koom Haum Me Nyuam Yaus npaj nej rau qhov tseeb ntxiv uas nej kawm thaum nej yog cov ntxhais hluas. Txoj kev ua ib tug thwj tim uas nej taug nyob hauv nej lub Koom Haum Ntxhais Hluas hoob kawm pab nej sib raug zoo thiab ua viv ncaus nyob hauv lub Koom Haum Niam Tsev. Txhua zaus nej mus, nej yuav muaj cib fim ntxiv qhia lwm tus tias nej hlub lawv los ntawm tej yam nej ua nrog kev ntseeg, kev khuv leej, kev siab hlub, siab zoo, thiab kev xav pab.

Kev xaiv txoj kev ua thwj tim ua rau yus muaj kev zoo siab thiab kev vam meej ntau kawg.

Yeej yuav tsis yooj yim. Yuav tsum siv tej yam zoo tshaj uas nej muaj—tag nrho nej tej kev txawj ntse, kev txawj tsim, kev ntseeg, kev ncaj, lub dag zog, kev rau siab, thiab kev hlub. Tiam sis muaj ib hnub nej yuav nco txog tej yam uas nej tau ua, thiab auj, nej yuav zoo siab heev vim nej nyob ruaj khov, nej tau rau siab ntseeg, thiab nej tsis tau khiav tawm ntawm txoj kev.

Tej zaum muaj ntau yam hauv nej lub neej uas nej kav tsis taus. Tiam sis thaum kawg, nej muaj hwj chim xaiv qhov chaw uas nej xav mus thiab tej yam uas muaj los rau nej thaum nej ua neej. Tsis yog tej uas nej txawj ua, tiam sis yog tej uas nej xaiv ua uas hloov tau nej lub neej.⁹

Nej yuav tsum tsis txhob cia tej uas nej raug ua rau nej tu siab.

Nej yuav tsum tsis txhob cia lawv ua rau nej chim siab.

Nej yuav tsum xyiv fab vim nej yog Vajtswv cov ntxhais. Nej yuav tsum nrhiav kev xyiv fab thiab kev zoo siab los ntawm Vajtswv txoj kev tshav ntuj thiab Yexus Khetos txoj kev hlub.

Nej yuav tsum zoo siab.

Kuv thov kom nej muaj siab ua Vajtswv tsaug rau Vajtswv txoj kev npluas mias thiab txoj kev zoo tsis tu tsis tseg. Kuv cov muam uas kuv hlub, nej ua tau qhov no! Kuv thov kawg siab kawg ntsws hais tias nej yuav xaiv thawb mus lawm tom hauv ntej mus txog tsob ntoo uas cawm txoj sia. Kuv thov kom nej yuav xaiv tsa nej lub suab thiab ua neej zoo li nej ua zaj suab paj nruas uas qhuas Vajtswv, qhuas txog tej uas Vajtswv txoj kev hlub, tej txuj ci tseem ceeb ntawm Nws lub Koom Txoos, thiab Yexus Khetos txoj moo zoo yuav pub rau neeg ntiaj teb.

Tej zaum ib txhia yuav xav tias zaj nkauj ntawm kev ua thwj tim tiag tiag yeej nrov dhau los yog tsis zoo mloog. Txij thaum ntuj tsim teb raug, yeej zoo li no.

Tiam sis raws li peb Leej Txiv Saum Ntuj Ceeb Tsheej xav, thiab cov uas hlub thiab hwm Nws xav, yeej yog ib zaj nkauj uas muaj nqis thiab zoo nkauj kawg—yog ib zaj nkauj txog kev hlub uas txhiv dim thiab kev pab ua hauj lwm rau Vajtswv thiab cov neeg zej zog uas ua rau yus hloov ua neeg dawb huv.¹⁰

Vim kuv yog tus Tswv ib tug Thwj Tim kuv foom koob hmoov rau nej kom nej yuav muaj dag zog thiab ua siab loj vam meej ua Vajtswv cov ntxhais thaum nej zoo siab taug kev txhua hnub taug txoj kev ua cov thwj tim. Los ntawm Yexus Khetos lub npe dawb ceev, amees.