Oxib’ li ixq riitz’ineb’ rib’
Tento sa’ qab’een laa’o wank choq’ tzolom, ut maak’a’ naxye k’a’ru neke’xb’aanu qe li jun ch’ol chik.
Ex was wiitz’in ixq, ex inkomon, chaq’al ru ut nim xwankil xtikib’ankil li jolomil ch’utub’aj-ib’ rik’in lix ch’utameb’ li ixq sa’ chixjunil li ruchich’och’. K’oxlahomaq li ixq, jalan jalanq xchihab’eb’, xna’leb’eb’, xtenamiteb’, ut raatinob’aaleb’, chi junajinb’ileb’ rik’in paab’aal ut rahok choq’ re li Qaawa’ Jesukristo.
Naq xooch’utla rik’in li qaraarookil profeet, li Awa’b’ej Thomas S. Monson, a’an xye qe chanru naq naxra li Qaawa’. Ut ninnaw naq li Awa’b’ej Monson naxb’antioxi lee rahom, lee tij, ut naq k’eek’o eech’ool chixtaaqenkil li Qaawa’.
Sa’ najter kutan sa’ jun najtil ch’och’ ke’wan oxib’ ixq, li riitz’ineb’ rib’.
Li xb’een reheb’ a’an ra xch’ool. Chixjunil li k’a’ru re, chalen li ru’uj ut lix mach toj lix tz’uumal, toj li ru’uj roq naxk’oxla naq ink’a’ tz’aqal us. Naq na’aatinak, wan naq ink’a’ us na’el li aatin, ut neke’se’ek li kristiaan. Naq wan ani naq’usuk re, malaj ink’a’ naxb’oq chi chalk sa’ junaq ninq’e, a’an ra nareek’a, na’el chaq, ut naxsik’ jun muqmuukil na’ajej b’ar wi’ taaruuq chi tz’uynak rik’in rahil ch’oolejil ut chixk’oxlankil k’a’ut naq mas ra ut maak’a’ xsahil lix yu’am.
Li xkab’ ixq a’an kaq xch’ool. Seeb’ xch’ool jo’ naxk’oxla rib’, a’b’anan junelik wan ani mas us wi’chik na’el sa’ li examen sa’ lix tzoleb’aal. Naxk’oxla naq sa li raatin, naq sa li rilob’aal, naq sa li raq’, ut naq sa lix na’leb’. A’b’anan chanchan junelik wan ani mas sa wi’chik li raatin, li rilob’aal, li raq’, ut lix na’leb’ chiru a’an.
Maajun wa wan choq’ xb’een sa’ k’a’ruhaq, ut a’in ink’a’ naru chixkuyb’al. Moko jo’kan ta naq tento taawanq li yu’am!
Wan naq naxye kawil aatin reheb’ li ras riitz’in, ut chanchan junelik ok re chi lochk xjosq’il chirix k’a’ruhaq, malaj chirix k’a’ruhaq chik.
Rik’in a’an, ink’a’ mas raab’il, chi moko mas sik’b’il. Wan naq naxk’uxuxi li ruuch re, naxmoch’ob’ li ruq’, ut naxye, “Ink’a’ tiik li yu’am!”
Ut kiwan li rox ixq. Jalan rik’ineb’ li ras, li jun ra xch’ool ut li jun chik li kaq xch’ool. A’an, pues, sa xch’ool. Ut a’in moko xb’aan ta naq mas wi’chik xna’leb, malaj naq mas ch’ina us wi’chik, malaj naq mas seeb’ wi’chik xch’ool chiruheb’ li ras. Ink’a’, wan naq tz’eqt’aananb’il ut ink’a’ ab’inb’il ajwi’ a’an. Wan naq neke’xse’e lix t’ikr, malaj li k’a’ru naxye. Wankeb’ li neke’xye xik’ aj aatin chirix. A’ut a’an ink’a’ mas nak’oxlak chirix a’an.
Li ixq a’in nawulak chiru b’ichank. Ink’a’ nab’ichan chi us, ut wankeb’ li neke’se’enk re, a’ut ink’a’ naxkanab’ b’ichank. A’an naxye, “Ink’a’ tinkanab’ naq li k’a’ru neke’xk’oxla li jun ch’ol chik tinixram chi b’ichank!”
Yal rik’in naq yoo chi b’ichank, kiraho’ xch’ool li xb’een ranab’ ut kichal xjosq’il li xkab’.
Ke’nume’ k’iila chihab’, ut ke’tz’aqlo’ xkutankileb’ li oxib’ chi ixq sa’ li ruchich’och’.
Li xb’een ixq, li kixtaw k’iila sut naq ink’a’ naraqe’ li rahil ch’oolejil sa’ li yu’am a’in, kikam chi ra xch’ool.
Li xkab’, li wulaj wulaj naxtaw chik li k’a’ru ink’a’ nawulak chiru, kikam chi kaq xch’ool.
Ut li rox ixq, li kixnumsi lix kutan rik’in b’ichank chi anchal lix ch’ool ut chi sa li rilob’aal, kikam chi sa xch’ool.
Yaal ajwi’ naq li yu’am a’in moko jo’ ta li seraq’ a’in, ut maajun kristiaan wan jo’eb’ li oxib’ chi ixq sa’ li seraq’, a’b’an li na’leb’ chirixeb’ a’an naru chiqatzolb’al b’ayaq chiqix laa’o. Maare laa’at, jo’ chiqajunilo, nakak’e reetal sa’ li seraq’ a’in naq chanchanat jun, malaj wiib’, malaj li oxib’ chi ixq a’in. Chiqatz’il rix li junjunq reheb’.
Li rahob’tesinb’il
Li xb’een ixq kiril rib’ jo’ rahob’tesinb’il—jo’ li ani k’anjelanb’il xb’aan jalan.1 Chanchan naq junelik wan k’a’ru yoo chixk’ulb’al, li nakana wi’ chi rahob’tesinb’il xch’ool. Rik’in rilb’al chi jo’kan lix yu’am, yoo chixk’eeb’al reheb’ li jun ch’ol chik li wankilal sa’ xb’een li k’a’ru nareek’a ut li k’a’ru naxb’aanu. Naq naqab’aanu a’in, chanchan apusinb’ilo jo’ iq’ xb’aan li k’a’ru neke’xk’oxla li jun ch’ol chik—ut sa’ li kutan a’in wan wi’ li aatin chiru li redes sociales, k’a’jo’ xkawil li iq’ na’apusink.
Ex inkomon ixq, k’a’ut naq teeq’axtesi lix sahil eech’ool chiru anihaq chik, malaj chiru jun ch’uut chi anihaq chik, li ink’a’ neke’k’oxlank re lix sahil eech’ool?
Wi nakataw naq junelik yookat chi k’oxlak chirix k’a’ru neke’xye li jun ch’ol chik chawix, k’oxla li na’leb’ a’in: chijultiko’q aawe anihat laa’at. Chijultiko’q aawe naq laa’at wankat sa’ rochochil lix awa’b’ejihom li Dios, laa’at xrab’in li choxahil na’b’ej yuwa’b’ej, li neke’awa’b’ejin sa’ xb’een chixjunil li k’a’ru wan.
Laa’at xaweechani li diosilal. Wankeb’ aawik’in li jar maatan li xe’tikla naq xatyo’ob’tesiik sa’ li musiq’ej, ut li xe’niman chiru li k’iila chihab’ katwan wi’ sa’ li yu’am naq maji’ nakatyo’la. Laa’at ralal li qaChoxahil Yuwa’ aj uxtaan ut li junelik nawan, a’an li Qaawa’ reheb’ li Teepal, laj yo’ob’tesihom re li choxa ch’och’, li kihelok reheb’ li chahim li neke’xt’orori rib’ chiru xnimal li choxa, ut kixk’eheb’ li kok’ t’orol sa’atqeb’ xna’aj.
Laa’at wankat sa’ ruq’.
Q’axal chaab’ileb’ li uq’ej a’an.
A’aneb’ uq’ej aj rahonel.
Uq’ej li neke’k’oxlank aawe.
Ut maajun raatin anihaq chik naru chixjalb’al a’an. Li raatineb’ a’an maak’a’ xwankil chiru li k’a’ru naxye li Dios chawix.
Laa’at jun xrab’in, raaro xb’aan.
A’an nakatxra.
Us ta nakattichk’ok, us ta nakanajtob’resi aawib’ rik’in, li Dios toj nakatxra. Wi nakaweek’a naq wankat chi sachso, chi kanab’anb’il, chi ink’a’ jultikanb’il—matxuwak. Li Chaab’il aj K’aak’alenel tatxtaw. Tatxtaqsi sa’ xb’een lix tel, ut tatxk’am sa’ kab’l.2
Ex was wiitz’in ixq, chi’ok li choxahil yaal a’in toj sa’ xchamal eech’ool. Chi jo’kan teetaw naq wan chik k’iila rajb’al naq ink’a’ taaraho’q eech’ool, xb’aan naq wan jun eena’aj sa’ li junelik q’e kutan.
Li raab’il aj Kolol re li ruchich’och’ kixk’e lix yu’am re naq laa’ex texruuq chixsik’b’al ru li junelik q’e kutan a’an. Laa’ex xek’ul lix k’ab’a’ a’an sa’ eeb’een; laa’ex lix tzolom. Ut sa’ xk’ab’a’ a’an, texruuq chixtiqib’ankil eerib’ rik’in b’aatal re loq’alil li taawanq chi junelik.
Laj xik’ ilonel
Li xkab’ ixq yoo xjosq’il rik’in li ruchich’och’. Jo’ li ras li ra xch’ool, a’an kireek’a naq sa’ xk’ab’a’ jalan chik naq wan ch’a’ajkilal sa’ lix yu’am. Naxk’oxla naq a’an xmaak lix junkab’al, eb’ li ramiiw, lix patron, li rech aj trab’aaj, li policia, eb’ li rech kab’al, eb’ laj b’eresinel sa’ li Iglees, li k’a’ru aq’unb’il anajwan, li kutan, ut yal xchahimal. Ut kijosq’o’ rik’in chixjunileb’.
Ink’a’ kixk’oxla rib’ jo’ josq’ aj kristiaan. Kixk’oxla b’an naq ka’ajwi’ a’an yoo chixtenq’ankil rib’. Chixjunileb’ li jun ch’ol chik, jo’ naxk’oxla, a’aneb’ aj b’ach’b’ach’, aj q’etq’et, ut aj xik’ ilonel. A’an b’an chaab’il li na’leb’ wan wi’—wan xtiikilal, x’anchalil xch’ool, ut xrahom.
Toq’ob’aal ru naq yalaq b’ar natawman xna’leb’ li ixq josq’. A’in xk’ehe’ reetal naq xb’aanuman jun tzolok chirixeb’ junjunq li ch’uut li wankeb’ chixwechb’al rib’. Qayehaq, sa’ li santil ch’och’ xe’patz’ok rik’ineb’ laj Palestina ut laj Israel, ut sa’ li tenamit Estados Unidos xe’patz’ok rik’ineb’ laj Republicano ut laj Demócrata. Xe’xtaw naq “chi ka’pak’al neke’xk’oxla naq eb’ a’an eek’anb’ileb’ xb’aan li rahok ut ink’a’ xb’aan li xik’ ilok, a’b’an naq xpatz’e’ reheb’ k’a’ru na’eek’asink reheb’ li wankeb’ chi junpak’al sa’ li wech’ok-ib’, xe’xye naq a’ li xik’ ilok li na’eek’asink reheb’.”3
Sa’ jalan chik aatin, chi ka’pak’al neke’xk’oxla naq a’aneb’ li “chaab’il kristiaan”—naq tiikeb’, chaab’ileb’ xch’ool, ut yaal neke’xye. A’b’anan neke’xk’oxlaheb’ li wankeb’ chi junpak’al chik jo’ li “ink’a’ useb’”—jo’ maak’a’eb’ xna’leb’, aj tik’ti’eb’, ut ink’a’ useb’ xch’ool.
Sa’ li chihab’ kinyo’la wi’, li ruchich’och’ kisub’e’ sa’ jun nimla pleet li kik’amok re naab’al li rahilal ut rahil ch’oolejil sa’ li ruchich’och’. Li pleet a’in kitikib’aak xb’aan intenamit laa’in—xb’aan jun ch’uuteb’ li winq li xe’ril jun ch’uut chik chi kristiaan jo’ ink’a’ useb’, ut ke’xk’e naq xik’ te’ile’q.
Eb’ a’an ke’xch’anab’eb’ li ani ink’a’ sa neke’ril. Ke’xk’eheb’ chi xutaanak ut q’ab’eb’ re chirixeb’. Ke’xk’oxla naq maak’a’eb’ xwankil, naq moko winqeb’ ta. Naq nakat-ok chixkub’sinkil xwankileb’ jun ch’uut chi tenamit, mas wi’chik naq taawoksi li kawil aatin ut li pleetik rik’ineb’.
Nasach inch’ool naq nink’oxla li k’a’ru kik’ulman sa’ Alemania sa’eb’ li chihab’ a’an.
Naq wan ani li nawech’ok qe malaj li ink’a’ wan sa’ aatin qik’in, wan naq naqaj xk’oxlankil naq wan k’a’ru ink’a’ us rik’ineb’ a’an. Ut rik’in a’in, tikto naqak’oxla naq sa’ xk’ab’a’ naq ink’a’ useb’ xch’ool naq neke’xye ut neke’xb’aanu chi jo’kan.
Yaal ajwi’ naq junelik tento taqapaab’ li k’a’ru tiik, ut wan naq tento taqataqsi lix yaab’ qakux re xkolb’al rix li tiikilal. A’b’anan naq naqab’aanu a’in rik’in josq’il, malaj rik’in xik’ ilok sa’ li qach’ool—naq noko’ok chiraatinankil li qas qiitz’in re xrahob’tesinkil, re xk’eeb’al xutaan, malaj re xch’anab’ankil—naraj naxye naq ink’a’ yooko chixb’aanunkil sa’ tiikilal.
K’a’ru kixk’ut li Kolonel?
“Laa’in ninye eere, Cherahaqeb’ li xik’ neke’ilok eere, cherosob’tesi li neke’majewank eere, cheb’aanu li us reheb’ li xik’ neke’ilok eere, ut chextijoq choq’ reheb’ li neke’b’aanunk maa’usilal eere ut neke’rahob’tesink eere,
“Re naq laa’aqex ralal xk’ajol lee Yuwa’ li wan sa’ choxa.”4
A’in lix b’e li Kolonel. A’an li xb’een yokb’ sa’ xt’anb’aleb’ li jachleb’aal li natikla wi’ xnaab’alil li josq’il, li xik’ ilok, li jachok-ib’ ut li pleetik sa’ li ruchich’och’.
“Us,” chaqat tana’, “Laa’in wan inch’ool chixraab’aleb’ li xik’ neke’ilok we—wi eb’ a’an te’xb’aanu chi jo’kan wik’in.”
A’b’anan a’in maak’a’ xyaalalil, pe’ yaal? Tento sa’ qab’een laa’o wank choq’ tzolom, ut maak’a’ naxye k’a’ru neke’xb’aanu qe li jun ch’ol chik. Naqaj raj naq toohe’xk’ul rik’in chaab’ilal ut rik’in rahok, a’b’an re naq laa’o taqaraheb’ a’an, maak’a’ naxye k’a’ru neke’reek’a chiqix laa’o.
Naq naqayal qaq’e chixraab’aleb’ li xik’ neke’ilok qe, maare te’q’unb’esiik xch’ool ut te’xsik’ li chaab’ilal, maare ink’a’. A’b’anan a’in ink’a’ naxjal li qajom chixtaaqenkil li Jesukristo.
Chi jo’kan, jo’ komon sa’ lix Iglees li Jesukristo, taqaraheb’ li xik’ neke’ilok qe.
Taqaq’ax ru li josq’il, ut li xik’ ilok.
Taqanujob’resi li qach’ool rik’in rahok choq’ re chixjunileb’ li ralal xk’ajol li Dios.
Taqayal qaq’e chirosob’tesinkileb’ li jun ch’ol chik ut chi k’anjelak chiruheb’—ut jo’kaneb’ ajwi’ li ani “neke’b’aanunk maa’usilal [qe] ut neke’rahob’tesink [qe].” 5
Li tz’aqal tzolom
Li rox ixq, a’an reetalil lix tz’aqal tzolom li Jesukristo. A’an kixb’aanu li k’a’ru q’axal ch’a’aj xb’aanunkil: kixkanab’ rib’ chiru li Dios, us ta yoo chixk’ulb’al li rahob’tesink. A’an ink’a’ kixkanab’ lix paab’aal ut lix yo’onihom, us ta yoo chi uxmank li hob’ok ut li eetz’unk sa’ xsutam. A’an kiwan sa’ sahil ch’oolejil, moko rik’in ta naq sa li wan wi’, rik’in b’an naq sahilal wan sa’ xch’ool a’an.
Maajun qe naru chixb’eeninkil li yu’am a’in chi maak’a’ li ch’a’ajkilal. Naq wan k’iila ch’a’ajkilal li yookeb’ chi jalb’ehink qe, chan ru naq naqab’eresi li qilob’aal sa’ li loq’laj sahil ch’oolejil li yeechi’inb’il choq’ reheb’ li tiikeb’ chi paab’ank?
Laa’in nink’oxla naq lix sumenkil li patz’om a’in natawman sa’ jun li matk’ kixk’ul jun profeet k’iila mil chihab’ chaq. Lix k’ab’a’ li profeet, a’an laj Lehi, ut lix matk’ tz’iib’anb’il sa’ li chaq’al ru ut sachb’a-ch’oolejil hu, lix Hu laj Mormon.
Sa’ lix matk’, laj Lehi kiril jun li nimla ch’och’, ut sa’ a’an kiril jun toon li che’, maak’a’jo’ xch’ina usal. Kiril ajwi’ k’iila ch’uut chi tenamit li yookeb’ chixtiikisinkil rib’ chi uub’ej re te’xtaw li che’. Ke’raj xyalb’al li ru q’axal chaab’il. Ke’reek’a ut ke’xnaw naq tixk’am chaq xsahileb’ xch’ool ut li tuqtuukilal li ink’a’ na’oso’.
Kiwan jun li ka’ch’in ruhil b’e li nawulak wan wi’ li che’, ut chixk’atq a’an wan jun li b’arb’ookil ch’iich’ li naxtenq’aheb’ chi kanaak sa’ li b’e. A’b’an kiwan ajwi’ jun li q’ojyinal choql li kixmutz’ob’resiheb’ ru re ink’a’ ke’ril li b’e chi moko li che’. Ut xiwxiw wi’chik tana’ chiru a’an, ki’ab’iman li se’ek ut li eetz’unk li yoo chaq chi chalk sa’ jun li kab’l nim ut paapo xsa’. Ut sa’ xk’ab’a’ li eetz’unk, wankeb’ li ak ke’wulak sa’ li che’ ut ke’xyal li ru li q’axal chaab’il, li ke’xuutanak ut ke’xsach xb’e.6
Maare ke’ok chixk’oxlankil naq maak’a’ ajwi’ xch’ina-usal li toon che’ jo’ li ke’xk’oxla chaq. Maare ke’ok chixpatz’b’al ma tz’aqal yaal li k’a’ru ak xe’xk’ul.
Maare ke’xk’oxla naq wi te’elq chaq rik’in li toon che’, ink’a’ chik ch’a’ajaq lix yu’ameb’. Maare ink’a’ chik te’wanq chi eetz’unb’il ut chi se’enb’il.
Ut yaal naq eb’ li yookeb’ chi eetz’unk reheb’ chanchan naq saheb’ ajwi’ xch’ool, ut yookeb’ chixsahilankil rib’. Chi jo’kan, maare wi te’xkanab’ li toon che’, taaruuq te’k’ulub’aaq sa’ xch’utameb’ li ani wankeb’ sa’ li kab’l nim ut paapo xsa’, ut te’nimaaq ru xb’aan xchaab’ilal lix k’a’uxleb’, xb’aan xseeb’aleb’ xch’ool, ut xb’aan xnimaleb’ xna’leb’.
Kananqex chiru li b’e
Ex was wiitz’in ixq, ex inkomon, wi neketaw naq ch’a’aj li kanaak chi chapcho chiru li b’arb’ookil ch’iich’ ut li b’eek chi uub’ej sa’ xjayal li kolb’a-ib’, wi li se’ek ut li eetz’unk xb’aaneb’ li chanchan naq kaweb’ xch’ool najalb’ehink eere, wi wan eek’a’uxl chirix li patz’om li ink’a’ sumenb’il, malaj li tzol’leb’ li maji’ neketaw ru, wi nekereek’a xrahil eech’ool xb’aan li chaab’ilal li ink’a’ xek’ul, nintz’aama cheru naq chijultiko’q eere lix matk’ laj Lehi.
Chatkanaaq sa’ li b’e!
Maajun wa chawach’ab’ li b’arb’ookil ch’iich’—li raatin li Dios!
Ut wi wan ani taa’ajoq re naq tatxutaanaq xb’aan naq xayal lix rahom li Dios, maak’eheb’ reetal.
Misach sa’ aach’ool, laa’at jun ralal li Dios; sa’ chaab’ilal wankat; wi taab’aanu rajom a’an, tatwanq wi’chik rik’in!7
Li nimaak-u ut li k’ule’k li yeechi’inb’il xb’aan li ruchich’och’ moko ch’olch’o ta, moko yaal ta, ut ink’a’ nak’ehok sahil ch’oolejil. Li yeechi’inb’il xb’aan li Dios ch’olch’o, yaal, ut naxk’e li sahil ch’oolejil—anajwan ut chi junelik.
Nekexinb’oq chixk’oxlankil li paab’aal ut li paab’ank chi taqenaq chik b’ayaq eena’leb’. Maak’a’ k’a’ru yeechi’inb’il sa’ li kab’l nim ut paapo xsa’ li naru xjuntaq’eetankil rik’in li na’uchink rik’in xyu’aminkil lix evangelio li Jesukristo.
Relik chi yaal, “moko ilb’il ta xb’aan xnaq’ uhej, chi moko ab’inb’il sa’ xxikej, chi moko okenaq sa’ xch’ool li winq li k’a’ru xkawresi li Dios choq’ reheb’ li neke’rahok re.”8
Laa’in ak xintzol injunes naq li b’e re wank choq’ tzolom sa’ lix evangelio li Jesukristo a’an xb’ehil li sahil ch’oolejil. A’an li b’e naxk’am sa’ li kole’k ut li tuqtuukilal. Naxk’am sa’ li yaal.
Laa’in ninch’olob’ rik’in lix maatan ut lix wankil li Santil Musiq’ej naq laa’at nakatru chixtzolb’al ajwi’ a’in.
Ut naq toj yookat chi tzolok, wi nach’a’ajko’ li b’e chawu, nawaj raj naq taataw aatenq’ankil ut aametz’ew rik’ineb’ li chaab’il ch’utam li neke’tawman sa’ li Iglees: li Tzoleb’aal reheb’ li Kok’al, xch’utameb’ li Saaj Ixq, ut li Komonil re Tenq’ank. Wankeb’ choq’ eetalil chiru li b’e, li taataw wi’ xkawilal aach’ool ut aapaab’aal naq toj yookat chi b’eek. A’aneb’ jun kolb’a-ib’ ochoch, b’ar wi’ naru taataw aana’aj ut taak’ul aatenq’ankil rik’ineb’ laa komon ut eb’ laa wech aj paab’anel.
Li k’a’ru nakatzol sa’ li Tzoleb’aal reheb’ li Kok’al nakatxkawresi choq’ reheb’ chik li yaal li taatzol jo’ saaj ixq. Lix b’ehil laj paab’anel li nakatb’eek wi’ sa’ laa tzoleb’aal reheb’ li saaj ixq naxk’am sa’ li komonil ut li sahil wank li natawman sa’ li Komonil re Tenq’ank. Sa’ li junjunq yokb’ sa’ li b’e, nak’utman chawu chanru naq taak’ut laa rahom choq’ reheb’ laa was aawiitz’in rik’in b’aanuhom re paab’aal, uxtaan, rahok, tiikilal, ut chaab’il k’anjel.
Wi taasik’ ru li b’e a’in re wank choq’ tzolom, tatxk’am sa’ li sahil ch’oolejil q’axal nim, ut taataw aadiosilal.
Ink’a’ taawanq chi maak’a’ xch’a’ajkil. Na’ajman chixjunil li k’a’ru wan aawe—chixjunil laa na’leb’, laa seeb’al, laa paab’aal, lix anchalil aach’ool, laa metz’ew, laa kawilal, ut laa rahom. A’b’anan, sa’ junaq kutan taawil chi ixej li k’a’ru xab’aanu, ut maak’a’jo’ naq tatb’antioxinq naq xatkana chi kaw aach’ool, naq xatpaab’an, naq ink’a’ xat-el sa’ li b’e.
Tiikisi aawib’ chi uub’ej
Wan naab’al tana’ sa’ laa yu’am li ink’a’ xawaj ut li maak’a’ xjalenkil. A’b’anan sa’ xraqik wan aawankil chixsik’b’al ru b’ar tatwulaq chaq, ut naab’al li k’a’ru taak’ul sa’ li b’e. Ink’a’ mas rik’in aaseeb’al, rik’in b’an li k’a’ru nakasik’ ru xb’aanunkil, naq taatawmanq li chaab’il sa’ li yu’am a’in.9
Maakanab’ naq taaraho’q aach’ool xb’aan li wankat wi’.
Maakanab’ naq taachalq aajosq’il xb’aan.
Naru taab’antioxi naq laa’at jun xrab’in li Dios. Naru taataw xsahil aach’ool rik’in li rusilal li Dios, ut rik’in lix rahom li Jesukristo.
Naru naq sahaq aach’ool.
Nintz’aama cheru naq teenujob’resi eech’ool rik’in b’antioxink xb’aan xnimal lix chaab’ilal li Dios. Ex inkomon ixq raarookex inb’aan, naru teeb’aanu a’in. Nintz’aama chi anchal lix rahom li waam naq teesik’ ru xtiikisinkil eerib’ chi uub’ej toj sa’ li che’ re li yu’am. Nintz’aama naq teesik’ ru xtaqsinkil lix yaab’ eekux, ut naq taawanq eeyu’am choq’ jun nimla b’ich re b’antioxink, naq taasaho’q eech’ool rik’in li k’a’ru naru naxk’am lix rahom li Dios ut lix chaab’ilal lix Iglees ut lix evangelio li Jesukristo sa’ li ruchich’och’.
Maare wankeb’ li te’k’oxlanq re naq li b’ich reheb’ li tz’aqal tzolom ink’a’ sa rab’inkil, malaj naq mas kaw na’eek’an. Chalen chaq sa’ xtiklajik wanjenaq chi jo’kan.
A’b’an chiru li qaChoxahil Yuwa’ ut chiruheb’ li neke’rahok re ut neke’nimank ru, a’an jun li b’ich q’axal chaq’al ru, li chaab’il ut santil b’ich re rahok li natojok ix, li b’ich re k’anjelak chiru li Dios ut chiruheb’ li qas qiitz’in.10
Ninkanab’ sa’ eeb’een li wosob’tesihom jo’ x’apostol li Qaawa’ naq teetaw eemetz’ew ut xkawil eech’ool chi usaak sa’ sahil ch’oolejil jo’ xrab’in li Dios naq wulaj wulaj yookex chi b’eek sa’ li chaq’al ru b’e re li wank choq’ tzolom. Sa’ lix santil k’ab’a’ li Jesukristo, amen.