Tede el Odos
Kid a ngercheled el kirel otirekled, e tiang a kmal kekerei—a le ngarngii—er a blekerdelir a rebebil ra rechad el mei er kid.
Rodos, sechelik, tial mocha chomuchel er a ongdibel lobengterir a rodos liueklii a beluulechad a klou a belkul e kmal ungil. Ka di momdasu: rodos el kakerous a rekrir, omerellir, belurir, me a tekingir el dmak el ngara klaumerang ma beltikelreng el mora Rubak el Jesus Kristo.
Aki dirk ke mlo omes er a profet, President Thomas S. Monson, nguluu chias er kemam er a beltkil a renugl er mora Rubak. E medengei el kmo a President Monson a mui er a saul er a belkil a rengmiu, nglunguchiu, me a blakelreng er kemiu el mora Rubak.
A ngaramong el taem ra cheroid el beluu eng mlarngii a tedei el odos.
A kot el odos a mle mekngit a rengul. A rokui el tekoi er ngii ra medal el mora ochil a dimlak el ungil ra rengul. Sel longedecheduch, e a bebil ra tekingel a kora ngodech, ma rechad a ocherechur ngii. Sel sekum a chad a melaes er ngii malechub e te “ulbes” el siotai er ngii el mo meruul a kmo ngerang, e ng masech a rengul, e merael, e sikii a basio el borngii e lmangel e rrau a rengul el uase ngera ma klengar ngii a di mekngit.
A ongerung el odos a mle kesib a rengul. Ng mle omdasou el uase ng kmal mellomes a rengul, eng di ngarngii a mle blechoel ngarbab a teng er ngii ra skuul er ngii. Ng omdasou el uase ngii a oltobedechur, ungil a kse er ngii, klebokel e ungil. E ng ng blechoel, ngarngi a kmo ng techang el muut el kmal oltobedechur, muut lungil, muut el klebokel, e lmuut el ungil a kse er ngii.
Ng dimlak el kot ra rokui el tekoi, e kmal mlo diak el sebechel outekangel. Ng diak el kirel a klengar el uaisei!
Bebil ra taem eng di mesuched el mora rechad, e kmal di mle bechecherd a rengul ra ngii di el tekoi el duubech.
Tiang a dimlak, el rellii el mo sorir a rechad malechub e bo lorael chisel. Bebil ra taem eng olsiu a ungelel, e chimetemt a chimal, e omdasou, el kmo a “Klengar a kmal diak lungil!”
E ngarngii ngkel ongedei el odos. Ng diak el uaia tar ngii ra klengitlreng ma ngasechereng, ngii a kmal, mle ungil a rengul. E dimlak el mellomes a rengul ma dimlak el klebokel malechub el meduch el uai tirkal odos er ngii. Ng diak, le bebil ra taem e te chemiis malechub e te diak el kmo ngii. Bebil e te ocherchur ra teletelel a loubail malechub a tekoi el lolekoi. Bebil ra taem e te melekoi a mekngit el kirel. Ng di ngii a dimlak el bechei aikal tekoi me longesang er ngii.
Ngkal odos a mle soal mengitakl. Ng dimlak el ungil a chiklel, ma rechad ocherchur ngii, eng dimlak el terbengii. Ng melekoi el kmo, “Ng diak bechiteterir a rechad ma uldesuir mel terbengak el mengitakl!”
Tial teletelel el di melemolem el mengitakl a rirellii a kot el odos er ngii el mo mekngit a rengul ma ongeru el odos er ngii el mo kesib a rengul.
Betok el rak a mlo cheuekl, e tirkal odos a merekong a klengar tir ra beluulechad.
Ngkel kot el odos, el mle betook el bo lodengei el uase ng diak a mekngit ra klengar, a mlad el ngara klengitelreng.
A ongerung el odos, el mle blechoel di osiik a kmo ngera el chetil, a mlad el kesib a rengul.
A ongerung el odos, el mle blechoel di osiik a kmo ngera el chetil, a mlad el kesib a rengul.
Ng merang, a klengar a diak el beot, e a rechad a diak el di losisiu el uai tirkal tedei el odos er tial cheldecheduch. Ng di a okesiu el uai tiang a sebechel osischeklid ra kmo ngerang el kired. Alsekum e kau a uaia rebetok er kid, e ke locha mla metebengar a telkib er kau el uaia ngkel kot, ongerung, malechub a tir el tedei el odos. Msall e deluut el mo ungil lomes ra dersta er tir.
Ngkel Metemall
Ngkel kot el odos a milsang el telemall lomekesiu er ngii ra rebebil.1 A bek el ngera el duubech el morngii a rirelli el mo mekngit a rengul. Tial teletael ra klengar, e ngii a milsterir a rechad a techall el mengedereder a lomelchesiu ma blekerdelel. Sel bo deuaisei, e kid a ultuil ra bek el bedengel omelekoi e chelechal beluulechad el betook a bek el bedengel a media, e a ikal omelekoi a uaia klisichel a eolt.
Rodos, ngera me kongei ra deureng er kau el mora rechad, malechub a cheldebechel ra rechad, el tir a diak el sal omekerreu er kau ma deureng er kau?
Alsekum e kau a kmal suebek a rengum el kirel a tekingir a rechad el kirem, e msall e kuchais er tiakid el tekoi: molatk el kmo ke techang. Molatk el kmo kau a ngalek ra ngarbab el rengedel a Dios, el redil ngelekel a chedam ma chedil ra babeluades, el mengedereder ra beluulechad el rokir.
Kau olab a DNA ra reng ra Dios. Ngarngii a tokubets el sengk el molab el dilubech er sera mobeob e mukeroul ra oechell el mei ra beluulechad. Kau a ngelekel a chubechub e diak a ulebengelel Chedam ra Babeluades, el ngii a Rubak ra Rokui, Ngii el milebii a beluulechad el rokir, e milerk a btuch ra beluulecahd, e ngilai a planets locha ra ikel kirel ngarngii.
Kau a ngara chereuel a Chimal.
Kmal ungil chim.
Oubeltik el reng el chim.
Omekerreu el chim.
E diak a ngii dil ngerang el dung a chad el kirem a sebechel ngodechii tiang. A tekingir a diak a belkul a domeksiu el mora tekingel a Dios el kirem.
Kau a mekreos el Ngelekel.
Ngii a betik a rengul er kau.
A om mesibas, ma sel bom cheroid er Ngii, a Dios a di betik a rengul er kau. A omomelchesiu el mla remiid, cheloit, malechub eng diak a kmo kau e lak ko medakt. A Ungil Mengkar a Sib a mo osiik er kau. Ngii oturau ra Ongelngelel. E Ngii a mo ngoikau el mo remei.2
Rodos er ngak, a kulengit ma ikal chedaol klemerang lesiseb ra chelsel a rengmiu. E kau amo metik el uase ngkmal betook a uchul e ng diak el kirem el mekngit a rengum, le ngarngii a diak a ulebengelel ngerchelem el bom kedemeklii.
A oubeltik el reng el Osobel ra beluulechad a mle odersii a klengar Ngii mel sebechem el melilt el rultii omerollem el mo meral tekoi. Kau a mla nguu a Ngklel; kau a oltirakl er Ngii. E Ngii a uchul, e kau a sebechem el milau ra diak a ulebengelel klebkall.
Kesib a rengul
Ngkel ongeru el odos a mle kesib a rengul ra beluulechad. Ng di uaia mekngit a rengul odos, eng mle omelchesiu el uase a ikel mondai ra klengar ngii a rebebil ra rechad a uchul. Ng oltelechakl ra telungalek er ngii, resechelil, merredel er ngii ra ureor ma rechad el dak loureor, rebulis, ma retonari, roungerachel ra Ikelesia, beches el teletael ra chelechal taem, klsichel a solar, ma kuk di kerior ngii. E di kesib a rengul erngii rokui.
Ng dimlak lomdasou er ngii el mekngit el chad. Ng bai mle, omdasou el uase ng kuk di meruul el kirel. A rokui el chad, ngii a oumerang, a di bechechelingaol, mekngit, e kesib a rengrir. E ngii, a kuk bai, ungil a moktek er ngii ra—llemalt, klemerang, ma beltikelreng.
Ng mekngit, ele a uldesuel ngka el kesib a rengul odos a blechoel deues. Tia lilsang er a dirk ke mlarngii el omesuub lulemes er a klautot er a delongelir a re kautok el chelechad. Meng tebedechel a omesuub, e te milngedecheduch er a Palestinians me a re Isralis er a middle East, me a Republicans me a Democrats era Merikel. Te miltik er ngii el derta er ngii el chelechad a omdasu el kmo tir a [mle] ultuil er a beltikelreng el klou er a otuub, e uleker el kmo ngera me tirkal le kautok a [mle] ulsiseb er a ultok, [te] millutk er a otuub el ngii a mokter er sel kuk [tara chelechad].”3
A dolekoi er ngi a uase, tirka el chelechad a ulumdasu er tir el “ungil chad”—ungil, bekekouii, e merang a teletelir. E bai, milsterir tirkal le kautok el “mekngit el chad”—diak lodenge ngerang, cheblad, e dirrek el mekngit el chad.
Sel rak ra kmechell, e a beluulechad a mlara meringel el mekemad el mlo uchul a chelebuul ma klengit el reng. Tial mekemad a ulemuchel ra rechad ra beluak—rechad el ulemdasou ra rebebil el mekngit e milchelii a ngasechereng el kirir.
Ng dimlak lorrenges er tirkel dimlak el sorir el chad. Te oltuub e melenguul er tir. Te omes er tir el ngariou el chad—kuk ngariou ra rechad. Sel tal metengel osengem ra rechad, eng sebechem el omuchel losiik a uchul eng soam loldechelakl er tir.
Ak omritel lomdasou el kirel a dilubech ra Germany ra 20th-century el ikal blekeradel a uchul.
A chad sel omtok malechub eng diak el kengei a uldesued, e ked emereched lomdasou el kmo ngarngii a ngodech er tir. E seikid eng uchelel a mekngit el moktek el kirel a tekingir ma omerellir.
Ng uaisei el kired el mesebechakl ra llemalt, e ngarngii a taem ng kired lodersii a ngered el kirel tiang. Eng di, sel bod obang a ngasechereng ra rengud—e domtok ra rebebil el melemall er tir, omekrur tir, malechub e domutek a ngerir—eng locha diak doruul ngii el ngara lemeltel.
Ngera ng mle olisechakl a Osobel?
“A kmal dmung er kemiu, Bol betik a rengum ra cherreuem, momekngeltengat er tirkel oltuub er kau, e moruul a ungil el mo er tirkel chetirir kau, e moluluuch el kirir tirkel mekngit lousbech er kau, e oldechelakl er kau;
“Me bom ngelekel a Chedam el ngara babeluades.”4
Tiaikid a teletelel Osobel. Ng kot el dauch el choroid a klekakerous el ngii a uchul a klsib el reng, ngasechereng, uldikel, me a odechelakl ra beluulechad.
“Oi,” kolocha melekoi, “Ng sebechek el betik a renguk ra cherreuek—omko ng sebechir el meruul osisiu.”
Ng di tia diak a belkul, uaisei? Kid a ngercheled el kirel otirekled, e tiang a kmal kekerei—a le ngarngii—a blekerdelir a rebebil ra rechad el mei er kid. Kid oureng el mo sebechir el mededaes a rengrir e bol oubeltik el reng, ng di a beltik el reng er kid el mortir a kuk ileakl ra ikel tir omelchesiu el kired.
A blakel reng er kid el mo oubeltik el reng el mora recherreued a mo domdemk a rengrir e rulterir el mo meruul a ungil. Malechub e ng diak. Ng di tiang a diak el ngedechii a blak el reng er kid el oltirakl ra Jesus Kristo.
A leuaisei, e kid el chedal a Ikelesia ra Jesus Kristo, a mo oubeltik el reng el mora recherreued.
Kid a mo mesisiich ra ngasechereng ma klsib el reng.
Kid a mekeek a rengud ra beltik el reng el mora rokui el ngelekel a Dios.
Kid a mo olngeseu ra rebebil e mesiou er tir—luldimukl er tirkel mo “melemall er [kid] malechub e te oldechelakl er [kid].”5
Ngkel Meral Oltirakl
A ongedei el odos a ochoti a meral oltirakl ra Jesus Kristo. Ng mle meruul ra tekoi el sebechel ng kmal meringel a doruul er ngii: ng mle oumerang ra Dios ra taem ra ringel. Ng mle meduch, el orkedii a klaumerang ma urungulel, el diak el iior ra mekngit el omelekoi ma otuub el iliuekl er ngii. Ng mle kiei el ngara deureng, ngdiak el belkul a teletael a mle ungil ng bai ngii a mle ungil a rengul.
Ng diak a tara kid ra tial klengar el diak omtok er ngii. Ng kal betook el tekoi a mesisiich el mengeroid er kid, eng mekera a dolemolem a moktek er kid ra deureng ma blakelreng?
A kumerang el uase a nger a ngara chelsel a berrusel a profet, ra telael rak ra memong. A ngklel ngkal profet a Lehi, ea berrusel a llechukl ra chelsel a mekreos e ungil Babier er a Mormon.
Chelsel tial berrous, a Lehi a milsang oberberk el ked, el betok a kerrekar er ngii, el kmal imis el klebokel. Ng dirrek el milsterir a betok el chad el merael bedul tial kerrekar. Ng mle sorir el mo mengarm a klebokel el redechel. Te mle omelchesiu e oumerang el uase ng mo mesterir a deureng ma budech ra rengrir.
E mlarngii a chibutek el rael el mor tial kerrekar, e mlarngii a deel el sintsyu el ngosuterir er tial rael. Ng di dirrek el mlarngii a okrokr el illkolk el milngesang osengir er tial rael ma dirrek el kerrekar. E sel dirrek el kmal kengaol a klou el dereuakl ma otuub ra rechad el mla rsel klou e meteteu el blai el di kmeed. Ng mechas a rengud, le otuub a rirterir a rebebil ra rechad el mla mor tial kerrekar e ormii a klebokel el redechel a ulemuchel mocha merur e tiluchakl el remiid.6
Altang e te mle oumededenger el uase a kerrekar a diak el sal ungil el uaisei blel omdasou er ngii ra kot. Altang e te mocha omuchel el rraua rengrir ra klemerang el tir a mlarngii.
Tem le locha omdasou el kmo a bol cheroid ra kerrekar, eng bai mo beot a klengar tir. Ng bai mo diak a otuub ma dereuakl el kirir.
A mera rngii, a rechad el mle oltuub er tir a teletelir a rechad el mle ngara deureng e kmal ungil a rengrir. Malsekum e tir a mo cheroid ra kerrekar, e tirkel kldibel ra klou e meteteu el blai a ngoiteterir e omrotech el kirel a uldesuir, lemesir, ma duch er tir.
Molemolem el ngara rael
Rodos, sechelik, a obetik er ngii el meringel a morreked ra deel el sintsyu e mesisiich omerollem el bedul a diak a ulebengelel klengar; alsekum a dereuakl ma otuub ra rebebil a rullau el mo oumededenger; al rau a rengum ra betok el ker ma osisechakl el diak msal medengei; a bol mekngit a rengum, ea kulengit er kau el mo melbedebek ra berrusel a Lehi.
Molemolem el ngara rael!
Lak mchitii sel deel el sintsyu—el ngii a tekingel a Dios!
Ea ngii dil chad el melasm lomekrur rkau el kirel a beltikelreng ra Dios, e lak morrenges er ngii.
Lak mobes, el kmo kau a ngelekel a Dios; el kldmokl a betook el klengeltengat el kirem; alsekum e kemesuub loltirakl er Ngii, e ke lmuut el mo kiei lobengkel!7
A yaksok ra chetengakl ma kengei ra beluulechad a diak dultuil er ngii, diak el merang, diak lodeuir a rengud. A yaksok ra Dios a bleketakl, merang, e odeuir a rengud—er chelechang ma ulebongel.
Ak siotai er kemiu el mo omdasou ra klechelid ma klaumerang el telkib el ngarbab osengiu el kirel. Ng diak a ngerang er sel klou e meteteu el blai el sebeched lomekesiu er ngii ra rdechel a ngar el ebangkelio ra Jesus Kristo.
Ng merang el, “mad a dirkak el ues, ma ding a dirkak el renges, ma dirkak el siseb ra rengrir a rechad, aikel tekoi el Dios a mla kudmokl el kirir tirkel betik a rengrir er ngii.”8
Ak mla mo medengei el uase a rael ra roltirakl ra chelsel a ebangkelio ra Jesus Kristo a rael el mora klemerang. Ng rael el mora budech ma selbechakl. Ng rael el mora klemerang.
A kuchais el uase ngokiu a sengk ra Chedaol Reng, e kau a sebechem el di kau el subii.
Ng di chelechal taem, alsekum eng mo meringel er kau tial rael, a kureng meng sebechem el metik a ngeso ma klisiich ra ungil chelechad ra chelsel a Ikelesia: Primary, Young Women, ma Relief Society. Tir a domes er tir ra tial rael, el sebechel smisichii a rengum ma klaumerang er kau ra ngarmedam. Te luuk, el sebechem el omelchesiu el tar tir e ngmai a melisiich el tekoi ra rodos ma rebebil ra roltirakl.
A suobel el msuub ra chelsel a Primary a kudmeklau el kirel a lmuut el klemerang el bo mosuub ra young women. A rael ra roltirakl el bo morael er ngii ra Young Women a mekrolau el kirel a klodos ra Relief Society. Aika el bek el dauch, a meskau a dechelel a techall lochotii a beltik el reng el mora rebebil lokiu a klaumerang, chubechub, beltik el reng, kldung, ma omesiou.
Omngiltii tial rael ra roltirakl eng mekrolau el mora diak a smodii el deureng ma klungiaol el otutii a chedaol teletelem.
Ng diak el beot. Ng mo ultuil er sel kot el ngarbab el duch er kau—rokui el llemesem, duch er kau, klaumerang, kldung, klisiich, blakelreng, ma beltik el reng. Ng di a tara taem eke mo omes el bedul uriul ra blak el reng er kau, e kmal, mo mereng a saul el kau a mle melemolem el mesisiich, el mla oumerang, e dimlak bom cheroid ra rael.
Moutekangel
Ng mo betook a teletael ra klengar el diak el sebechem el mekerang el kirel. Ng di a ulebongel, e kau a ngarngii a klisichem el melilt er sel borngii ma betook el teletael ra chelsel. Ng diak el sal ultuil ra duch er kau ng bai ultuil ra omelilt a ngodechii osengem ra klengar.9
Ng diak el sebechem el mecherei a teletael me rellau el mo mekngit a rengum.
Ng diak el sebechem el mechiteterir me rellau el mo kesib a rengum.
Ng sebechem el mo ngara deureng el uase kau a redil ngelekel a Dios. Ng sebechem el metik ra deureng ra krazia ra Dios ma beltik elreng ra Jesus Kristo.
Ng sebechem el mo ngara deureng.
Ak melekoi er kemiu el mo mekeek a rengmiu ra omereng el saul ra betook el diak el mochur el klungiaol ra Dios. Kemiu el odos er ngak, tiang a sebechiu el rullii! Nglunguchek loba renguk el rokir me bo molilt el melemolem el merael bedul a kerrekar ra klengar. Nglunguchek me molilt e mrellii a klengar kemiu el mo klebokel el hu ra chelitakl, el ngara odanges ra beltik el reng ra Dios, mengasireng el tekoi ra Ikelesia er Ngii, ma ebangkelio ra Jesus Kristo a sebechel msa beluulechad.
A cheliteklel a meral oltirakl a locha diak el chatter malechub e ng telkib el klou a oto er ngjj. Sera uchelel a rokui el tekoi e tiang a dimla uaisei.
Ng di a denguu ra Chedam ra Babeluades, me tirkel oubeltik el reng e mengull er Ngii, eng kot el mekreos e klebokel el chelitakl—el melisiich e mengikiid el chelitakl ra beltik el reng ma omesiou el mora Dios me a rebebil.10
Ak meskemiu a klengeltengat er ngak el Apostol ra Rubak me bo betik a klisiich e bekeu el ngara deureng el redil ngelekel a Dios e morael ngara deureng ra bek el sils el rolel a oltirakl. El ngara chedaol ngklel a Jesus Kristo, amen.