Raiburari
Kaoti Ami Ota

Kaoti Ami Ota

Iroun Sharon Eubank

Te Moan Kauntira n te Beretitentii ni Kabuta n te Botaki n Aine.

Burabeti a weweteira, tariu. Kam raoiroi? Kam matata n ami onimaki? Kam na kona ni kaoti ami ota?

Kam bae n aki ataa aio, ma Beretitenti Monson ao ngai bon bwebweuta. N te bong are I bungiaki iai —in te aoa raoi anne—i Meangin California, Thomas Monson are 36 ana ririki e kamatoaki bwa te Abotoro ae boou. I tangira reitakiu, ae onoti nakon ana burabeti te Atua, Beretitenti Monson.

Taian burabeti a taetae iaoia aine.1 Kam na ongo tabeua aia maroro n te boowi aei.Ibukin au koroboki N na oki rikaaki nakon 40 te ririki nakon ana taetae ni burabeti Beretitenti Spencer W. Kimball. Tebetembwa 1979 ai bon tibwa te kauatai are a ikotaki iai aine n te aonaaba n te Ekaretia ni kaitibo n oin aia boowi ni kabuta. Beretitenti Kimball e a tia ni katauraoa ana maroro, ma n te bong are e roko iai te maungatabu, e a rin n te onaoraki.Ngaia are n onean mwiina, e butiia kainnabana, Camilla Eyring Kimball, bwa e na wareka ana maroro ibukina.2

Tamnei
Titita Camilla Kimball e taetae n te bwabete.

Titita Kimball e wareki ana taeka te burabeti, are e kabwarabwara aia anainano aine n te LDS iaon tamaroaia aine imwain Manga Okin te Tia Kamaiu.Ni uakaan ma te toki, iai te iti ae mwaaka nakoia ainen n te Ekaretia are e kaman taekinaki imwiin anne.

N na taekina ana taeka teutana Beretitenti Kimball are e taku:

“N tokina, tariu aika kam tangiraki, I kona ni kaotiiango n te bwai ae tuai taetaekinaki mai imwaina ke tao ni karaurau ni kangai.Mwaitin te rikirake ae korakora are e roko nakon te Ekaretia n te kabanea ni bong e na roko bukina mwaitia aine aika raraoi n te aonaaba … a na katikaki nakon te Ekaretia n te mwaiti ae korakora. E na riki aei bwa kaotan ae ainen te Ekaretia a kakaraoa te raoiroi ao te konabwai inanon maiuia ao kaotakiia bwa ainen te Ekareia a nooraki bwa a onoti ao a kaokoro—ni kawai aika kakukurei—mairouia ainen te aonaaba.

“Ibuakoia aine aika kinaaki n te aonaaba ake a na roko n te Ekaretia bon aine ake a tabeaianga ma aroia ae raoiroi nakon aroia n tiorobeke.Aine aikai iai irouia te nanorinano ni koaua, are e karietata te etieti bwa e na nonoraki.…

“… E na riki … aine bwa banna ni katoto n te Ekaretia [ake] a na riki bwa tekorakora ae tamaroa inanon te ware ao te rikirake n tamnei n te Ekaretia n te kabanea ni bong.”3

Ai tamaroara te taetae ni burabeti aei. Tii ni kauareekea:

  • E na riki bwa te reitaki ae tamaroa irouia aine are a na kariki mwaitin te rikirake nakon te Ekaretia n ririki aika imwaira.

  • Aia iraorao te Bootaki n Aine, kairake n ataeinnaine, ao ataeinnaine n te Moanrinan are e kateaki ma te karinerine, kakaonimaki, aro n atua irouia aine ao n ataeinnaine irouia kain aro ake tabeua ao koaua a na riki bwa te korakora ae tamaroa n aron rikiraken te Ekaretia n te kabanea ni bong.

  • Beretitenti Kimball e araniia aine aikai man rongorongoia “aika kinaaki” ake a na tabeaianga riki ma aroia n raoiroi nakon te tiorobeke, ake a na kaotia nakoira bwa te etieti e kakaawaki riki nakon taraakiia.

I a tia ni kaitibo ma angiia aine aika raraoi aikai ngkai I karaoi au mwakuri ni katobibia te aonaaba.Aroia n iraorao a rang kakaawaki irou. Ko kinaia ibuakoia raraom ao kain rarikim.a kona ni kaina ke tiaki kain te Ekaretia n te tai aei, ma ti reitaki ma ngaia n te iraorao ao anne ae rang kakaawaki.Eng, ti na kanga ni karaoa tibwangara? Tera ae Ti na Riai ni Karoaia? Beretitenti Kimball e kananonai bwai aika nimaua:

Te moan bon karaoan te raoiroi. Karaoan ae raoiroi e aki nanonaki bwa te kororaoi ke aki kakaraoan ae bure.E nanonaki karikirakean te reitaki ae korakora ma te Atua, n rairannano man te bure ao kairua, ao ni buokiia tabeman n aki kabooaki.

Aine aika a tia n rairannano a bita birin te rongorongo ni kawai.Iai raoraou aekabuanibwai n te kaa ngke e kairake ao ea reke n te anua ae kareke ni kabonganaan bwainaoraki ibukin te maraki.Imwiina riki, a raure ana karo. E a bikoukou n ana iraorao ae aki teimaan, ao anuana are e a reke iai e reitinako.Ma te tairiki teuana, e tara maiuna ae biriuanena n aki barongaaki man iango, “E a bati n tau.” Ao e tataro nakon te Tia Kamaiu Iesu Kristo bwa e na buokia.E taku bwa e reiakinna bwa Iesu Kristo e korakora riki nakon arona ae kakamaaku are e mena inanona ao e kona ni katan n Korakorana ngkai e toua kawain te rairannano.

Man okina rikaaki nakon te Uea ao Ana kawai, e bita birin maiuna rimoa aron naba natina ao buuna ae boou.E a riki n tamaroa; ao e a uki-nanona nakoia tabeman ake a tia ni karaoa te kairua ao n tangiria ni bitaki.N ai arora ni kabane, maiuna e aki kororaoi, ma e ata arona n rairannano ao n teimatoa ni kataia.

Te kauoua bwa kona rang matata raoi. Arom ae matata nanona ko kamatata raoi am namakin ibukin te bwai teuana ao bukin tera.Ni moan te ririki aei, iai ae katoka te rongorongo iaon au Facebook are e kabuakakaia Kiritian. I warekia ao kaanga e maraki nanou iai ma I aki mutiakinna.Ma, au irekereke ae tiaki kain ara ekaretia e kaeka nakon ana tamnei are e katoka. E koreia: “[Aio bon] kaitaraan raoi are e tei ibukina Iesu bwa—e karaoa te bitaki ae korakora …n ana iango [n] ana tai ibukina bwa e … katitebooa te aonaaba. … E [taetae nakoia] [aika] kabekaau, [e amwaraka] ma taan rikoi roon rabwata … , e iraorao ma aine aika akea korakoraia ao ataei … , [ao] n anganiira rongorongon te Itamaria ae Raoiroi. … N rimwiiana bwa … Kiritian ni koaua a na kataia n riki bwa aomata aika RANG tatangira n te aonaaba.” Ngke I wareka anne, I iango inanou, “Bukin tera I korea anne?”

Ngaira n tatabemaniira nako ti riai n nakoraoi riki ni kamatata bukin ara onimaki.Tera am namakin ibukin Iesu Kristo? Bukin tera ko tiku n te Ekaretia? Bukin tera ko kakoaua Ana Boki Moomon bwa te boki ae tabu?E reke ia te rau iroum? Bukin tera e kakaawaki bwa te burabeti iai te bwai ae e na taekinna n 2017? Ko kanga n ataia bwa bon te burabeti ni koaua? Kabongana bwanaam ao mwaakam ni kamatata te bwai are ko namakinna ao ae ko ataia—iaon bwaai ni kanakobwana, n te maroro ae rau ma raraom, n te maroro ma tibum. TTuangiia bwa bukin tera, ko kanga n ataia, tera aron namakinana, ngkana ko nanououa, ko kanga n rinanona, tera ae e kananona Iesu Kristo nakoim. N aron are e taku te Abotoro are Betero, “Kam na tai maaku … ; ma kam na tabua Kristo i nanomi bwa te Uea: ao e na tae nangimi n te bong ae koraki bwa kam aonga ni kona ni kaeka te aomata ae titirakini ngkami bukin te kantaninga ae mena i nanomi.”4

Te kateniua bon te riki n okoro. N na kaongoi ngkami rongorongon te bwai ae riki n te Turai aei iaon Panama n te aba ae Florida.5 N te bwakantaai, Roberta Ursrey e nooria natina mwaane n takarua buokaia man te raroa ae 100 te iaati (90 m) inanon marawa. A reke n te aira ae korakora ao a uotaki nako marawa.Taanga aika a uakaan a kataia ni buokiia ataeinimwaane, ao a manga katikakinako naba n te aira.Kain te utu ae Ursrey a tebo n nako ni kamaiuia taan uaua, ao n te tai ae waekoa ruaman aomata ake a reke n te nimwamwano.

Akea te roobu. Akea taan kamaiu. Bureitiman a kawaekoaia booti ni kamaiu, ma aomata ake i taari a inimaki inanon 20 te miniti ao a kua ao a tebonako atuia ni mooi n taari.Ibuakoia taan mataku iaon te bike bon Jessica Mae Simmons. Neienne ma kainnabana e reke aia iango bwa a na karaoa te tien n taubai.A takaruaia aomata ake iaon te bike bwa a na buokiia, ao tengaun tabun aomata ake a reiti baia ni mwaati nako taari.Jessica e tuanga te nutibebwa: “N tarakiia aomata man reeti aika a kakaokoro ao aroia ni mwaane ke n aine ni kaai ni buoka te iruwa [bon] moanibaan te kamimi noorakina!!”6 Ai 80-aomata n te tiein are e tiki nakoia taan uaua.Noora te tamnei aei n te tai ae kamimi anne.

Tamnei
Taan uaua a karaoa te tiein n aomata.

Ni kabane ake iaon te bike a iangoi kawai ake a kakaraoaki, ao a bane n aki mwakuri.Ma te taangana, n te tai ae tawe, a iangoa te kawai ae kaokoro.Kukune ao kakauiango bon bwaintangira n tamnei.Ngkana ti kawakin ara berita, e kona ni kaokoroira n ara katei ao n te botannaomata, ma e anganiira te kona ni kaungaaki bwa ti na kona n iango n ae kaokoro, te tetere ae kaokoro, angana aika kaokoro.Ti aki kona ni bootau raoi ma te aonaaba, ma arora ni kakaokoro n te aro ae tamaroa e kona n riki bwa te rain ni kamaiu nakoia tabeman ake a ininimaki.

Te kaaua bon te tei onoti. N tei onoti nanona ni kona ni kinaaki ao ni matata . N na oki rikaaki nakon rongorongon Jessica Mae Simmons iaon te bike. N te tai are e a tei iai te tein n aomata ni kaineti nakoia taan uaua, e a ataia neiei bwa e a kona n ibuobuoki.Jessica Mae e taku, “I kona n taua ikeu … ao n ririaki n akea au kaangaanga n te ran n te Orimbiki![I ataa arou n otinako man te nimwamwano.] I ataia ae I kona n anaia [taan uaua] nakon te tiein n aomata.”7 Neiei ma kainnabana a anai taian baba n uaua ao a uaua rikaaki n te tiein ni karokoa a roko irouia taan uaua ao imwiina a katoka iaona temanna imwiin temanna n oki nakon te tiein, are a nikiraki ni kamanoaki iaon te bike. Jessica iai ana konabwai ae onoti: e ataa arona n uaua ni kaitara te nimwamwano.

Te euangkerio are e kaokaki e kinaaki ao e matata.Ma ti riai n onoti n arora n iriria.N aron Jessica, ti riai ni kataneiai ni maiuakina te euangkerio imwain te tai ae karina bwa ti aonga, n aki maaku, e na tau korakorara ni buokiia tabeman ake a katikaki nako n te aira.

Ao te kabane, te kanimaua bon karaoan teuana nakon aua ni kawaki aika a kakukurei. Aro ni kukurei tiaki nanona bwa ti na katoka te moangare ae bibitaki iaon ubura n aki tabe bwa tera are e riki.Ma e aki nanonaki ni kawakinan ana tua te Atua ao katean aroia ao tabekakirakeaia tabeman.8 Ngkana ti katei, ngkana ti tabeki rawawataia tabeman, e kakabwaiai maiura ni kawai ake aki kona n anaaki nako man kataakira.Iai ana taeka Beretitenti Hinckley are I katikua n te tabo are I kona n nooria ni katoabong.E taku: “Ko aki kona … ni katea arom man te aki onimaki ke n tii iaiangoiia i bon irouia. Ko taratara ma te onimaki, mwakuri ma te onimaki, ao a na iai bwaai aika a na riki.”9

Te katoto n te kukurei anne, tamnein te anua ni bwaai aika a kona ni karaoaki, I ataa te ataeinnaine ae 13 ana ririki ae arana Elsa are a mwaing ana utu nako Baton Rouge, Louisiana, 1,800 te maire (2,900 km) raroa mai irouia raoraona.E aki bebete ngkana ai 13 ao ko na mwaing nakon te tabo ae boou.Elsa e aki ota ao e aki koaua ibukin te mwaing ngaia are tamana e anganna te kakabwaia.N te tai are e kakabwaiaki iai, e tang ana tareboon tinana ni kaotia iai te rongorongo ae roko.Ataeinnaine aika a maeka n te uoote i Louisiana a kanakoa te tamnei aei ma taekana iaona “Taiaoka mwaing nakon ara uoote”10

Tamnei
Ataeinnaine a taua te baana ni butimwaai.

Ataeinnaine aikai a taratara n ae tamaroa a tauraoi n tangira Elsa ae a tuai ni kaitibo ma ngaia.Nanoia ae tamaroa e karika te kukurei iroun Elsa ibukin te mwaing ao e kaeka ana tataro ibukin ataakina bwa a na nakoraoi bwaai.

Iai te korakora ae e roko man te kukurei ao te nano ae tamaroa are e aki tii kakabwaiaira ma e katea aroia aomata nako ake a katobibiira.Bwaai nako aika uarereke ake ko karaoi a kaura otan te kukurei irouia tabeman ni kaotia bwa koa kaman uota te tooti are e kaura Beretitenti Kimball.

Ai 15 au ririki n te tai are e anga iai ana maroro Beretitenti Kimball. Ngaira ake ti a ikawai riki nakon 40 ti a tia n uouota te kairi mairoun Beretitenti Kimball man te bong anne.Ngkai, I taraia ake 8-aia ririki, 14-te ririki, ao 20-te ririki, ao 35-te ririki, ao N na bwaatina te tooti aei nakoimi.Ngkami taan kairiiri n taai aika a na roko n te Ekaretia aei, ao e na nakoimi aron uotakin te ota aei ni waakinako ao ni kakoroa bukin te taetae ni burabeti aei.Ngaira ake ti a ikawai riki nakon 40 kabaei baira ao ti na namakina aintoami ao korakorami. Ti kainnanoi ngkami.

Ongora n te kibu aei are e reke n Reirei ao Berita aika a tabu 49:26–28. E kona ni koreaki iaan aro aika kakaokoro, ma n te tairiki aei man te Tamnei ae Tabu, au kantaninga bwa kam na butimwaia bwa weteakimi nakon te mwakuri ae tabu aei.

“Nooria, I tuangkami, waaki nako n aron ae I a tia n tuangkami; raira nanomi man ami bure ni kabane; bubuti ao kam na anganaki; karebwerebwe ao e na kaukaki nakoimi.

“Nooria, N na ri moami ao n riki bwa te tia tararuaa akumi; ao N na bon mena i buakomi, ao kam na bon aki kamangaoaki.

“Nooria, Ngai Iesu Kristo, ao e tawe rokou.”11

I kaotia nakoimi n tatabemani ngkami bwa kam na tiku n te tabo are kam na kona n namakina iai ana tangira te Atua nakoimi. Kam aki kona ni kararoai ngkami man te tangira anne. Ngkana kam namakina Ana tangira, ngkana kam tangiria, kam na rairi nanomi ao ni kawakin Ana tua.Ngkana ti kawakin Ana tua, E na kona ni kabonganako n Ana mwakuri.Ana mwakuri ao mimitongina e karietataki ao te maiu are akea tokina irouia aine ao mwaane.

Burabeti a weweteira, tariu. Kam raoiroi? Kam matata n ami onimaki? Kam kona n tei n onoti ao n okoro? E kona kukureimi n aki tarai kataakimi ni katikiia tabeman aika raoiroi ao ni karineaki ao antai are e na kainnanoa ami iraorao?Kam na kona ni kaoti ami ota? I kakoaua bwa te Uea Iesu Kristo e na rimoara ao e na mena ibuakora

I kainna ma ana taeka ara burabeti ae tangiraki, Thomas S. Monson: “Tariu aika tangiraki, aio ami bong, aio ami tai.”12 N aran Iesu Kristo, amen.

Bwaai aika a na taraaki

  1. Beretitenti Brigham Young: “Anganiia [aine] bwa a na katea te Bootaki n Aine ni uoote nako.A mwaiti aine ibuakora aika a tarena, ao ti tangira aia ibuobuoki n te waaki aei.Tabeman a iangoia bwa aio te bwai ae aki kakaawaki, ma bon tiaki, ao kona kunea bwa aine a na riki bwa boton te kakamwakuri ” (in Daughters in My Kingdom: The History and Work of Relief Society [2011], 41).

    Beretitenti Lorenzo Snow: “Ko a tia ni karekea nem irarikin te Nakoanibonga, tauraoi … ni karaoi ami itera ni buoka karakaan tangiran abanuean te Atua; ao ngkai ko tibwatibwa ni mwakuri aikai, ko na kona naba n tibwatibwa n tokabetin te mwakuri ao inanon karietata ao mimitongin are e na anga te uea nakoia natina aika a Kakaonimaki” (in Daughters in My Kingdom, 7).

    Beretienti W. Kimball: “Iai te mwaaka n te bootaki aei[n te Bootaki n Aine] are e tuai ni kabonganaaki n ae bwanin ni kakorakorai mweengan Tion ao ni katea Abanuean te Atua—are e na kona ni karokoa aine ao te nakoanibonga [taari] noora aia taratara te Bootaki n Aine” (in Daughters in My Kingdom, 142).

    Beretitenti Howard W. Hunter: “Iai kainnanoan bobotaia aine ae korakora n te Ekaretia bwa a na tei n raoniia Taari ni katoka butin te buakaka are e katobibira ao ni kabirimwakaan ana mwakuri te Tia Kamaiu. … ngaia are ti kaungai ngkami bwa kam na reirei ma mwaakami ni kakorakoraia ara utu, ara ekaretia, ao ara komiuniti” (in Daughters in My Kingdom, 157).

    Beretitenti Gordon B. Hinckley: “Iai korakoraia ao aia kobwai aine n te Ekaretia aei.Iai te aro ni kairiiri ao te kaetieti, aekakin tamnei n inaomata nako, ao riki te karaunano ae korakora ni kainakin aei, abanuean te Uea, ao te mwakuri n ikarebai ma te nakoanibonga ni waakinna nako” (in Daughters in My Kingdom, 143).

    Beretitenti Thomas S. Monson, e tibwa ana taeka Belle Smith Spafford, Te Beretitenti ni Kabuta n te Bootaki n Aine, are e koreia: “‘E tuai man reke te bitaki mairouia aine nakon te aonaaba n te bong aei nakon are mai imwaina. E tuai man kauki mataroan tibwanga n tangaina riki ibukiiaAio ae kakao, kaingainga, kakaewenako, a te tai ae kairoro ibukiia aine. Bon te tai ae mwaiti iai te kanuanga ngkana ti kawakina ara baeranti, reiakina anua ni maiu aika kakaawaki, ao ni iangoraoi ni bairei aika moanibwai’ [A Woman’s Reach (1974), 21]. Mwaaneu aika kam tangiraki, aio ami bong, aio ami tai” (“The Mighty Strength of the Relief Society,” Ensign, Nobembwa. 1997, 95).

    Beretitenti Russell M. Nelson: “Ngaia ae n te bong aei, I bubutia mwaaneu n Ana Ekaretia Iesu Kristo ibukiia Aika Itiaki ni Boong Aika Kaitira bwa a na keerake! Anaa am tabo ae eti ao ae kainnanoaki, n oin mweengam, n am kaawa, ao n abanuean te Atua—ae raka riki nakon ae ko tuai kakarekea mai imwaina. I bubutiko bwa ti na kakoroi nanon ana taeka ni burabeti Beretitenti Kimball. Ao I berita nakoim n aran Iesu Kristo, ae ngkana ko karaoia, ao e na kakorakorai am kairoro te Tamnei ae Raoiroi n te kawai aika akea kabotauana! (“A Plea to My Sisters,” Riaona, Nobembwa 2015, 97).

  2. Taraa tamnein Titita Camilla Kimball n te witeo ni wareka ana maroro Beretitenti Spencer W. Kimball’s n lds.org/general-conference/1979/10/the-role-of-righteous-womensee also Spencer W. Kimball, “The Role of Righteous WomenEnsign, Nobembwa 1979, 102–4.

  3. Spencer W. Kimball, “The Role of Righteous Women,” 103–4; kairaki katuruturuana.

  4. 1 Betero 3:14–15.

  5. Taraa McKinley Corbley, “80 Beachgoers Form Human Chain to Save Family Being Dragged Out to Sea by Riptide,” July 12, 2017, goodnewsnetwork.org.

  6. Jessica Mae Simmons, in Corbley, “80 Beachgoers Form Human Chain.”

  7. Simmons, in Corbley, “80 Beachgoers Form Human Chain.”

  8. Taraa Aramwa 41:10; 34:28; Reirei ao Berita 38:27; Ruka 16:19–25.

  9. Teachings of Presidents of the Church: Gordon B. Hinckley (2016), 71.

  10. Bwaai aika a na taraaki man ana utu Virginia Pearce.

  11. Reirei ao Berita 49:26–28.

  12. Thomas S. Monson, “The Mighty Strength of the Relief Society,” 95.