En Romaak Ami Meram
Rikanaan ro rej kūr n̄an kōj, kōrā ro jeiū im jatū. Kwonaaj ke wāppen? Kwonaaj ke kōm̧anm̧an tōmak eo am? Kwonaaj ke kwaļo̧k meram eo ippām̧?
Komaron̄ jab jeļā menin, ak Būreejtōn Monson im n̄a kōm̧ro ej po. Ilo raan eo ikar lōtak— ilo ejja awa eo—ilo Turōk in California, 36 iiō dettan Thomas Monson kar rejtake āinwōt Rijilōk eo ekāāl. Ilukkuun iakwe ekkejeļo̧k in aō ejenolo̧k n̄an rikanaan eo an Anij, Būreejtōn Monson.
Rikanaan ro rej kōnono kōn kōrā ro.1 Kwonaaj ron̄jake jet iaan naan ko aer ilo kweilo̧k in. Ilo katak in aō inej wanlikļo̧k bōlen 40 iiō likļo̧k n̄an juon kanaan eo ekabwilōn̄lōn̄ kar je jān Būreejtōn Spencer W. Kimball. Jeptōm̧ba 1979 ekar iiō eo kein karuo in an kōrā ro ilo Kabun̄ kōm̧m̧ane kweilo̧k eo aer make. Būreejtōn Kimball ekar kōpooje kōnono in an, bōtaab ke raan in kweilo̧k eo ekar itok, ekar pād ilo aujipitōļ. Kōn menin, ekar kajjitōk ippān kōrā eo pāleen, Camilla Eyring Kimball, n̄an riiti kōnono eo an.2
Sister Kimball ekar riiti naan ko an rikanaan eo, eo ekar kwaļo̧k kajoor eo an kōrā in LDS kōn kōrā ro rem̧m̧an an laļ in m̧okta jān Itok eo Kein Karuo an Rilo̧mo̧o̧r eo. Turinļo̧k jem̧ļo̧kin, ekar wōr juon en̄jake eo ekajoor n̄an kōrā ro an Kabun̄ in me jekar kōnono kake er.
Ij kwaļo̧k jidik in ta eo Būreejtōn Kimball ekar ba:
“Āliktata, ro jeiū im jatū, ij ļōmake waj juon men n̄an kom̧ juon men kom̧ij jan̄in kar bōke m̧okta ak ilo wāween in. Elōn̄ iaan wōnmanļo̧k ko reļļap rej waļo̧k ilo Kabun̄ in ilo raan ko āliktata kōnke elōn̄ kōrā ro rem̧m̧an ilo laļ in … renaaj kobatok ilo Kabun̄ in kōn oran bōnbōn eo eļap. Menin enaaj bōk jikin n̄an jon̄an eo me kōrā ro ilo Kabun̄ in renaaj romak kōn wāppen im bōk koņaer ilo mour ko aer n̄an jon̄an eo me kōrā ro jet ilo Kabun̄ in rej loe er āinwōt rejeņoļo̧k im oktak—ilo wāween ko rekam̧ōņōņō—jān kōrā ro jet ilo laļ in.”
Ilubwilijin rein reļļōn̄ ilo laļ in ro renaaj itok n̄an Kabun̄ in rej kōrā ro eļapļo̧k aer inepata kōn aer wāppen jān ļōmņak kōn er make. Rein rellōn̄ elukkuun ettā būruweer, eo me ej likūt juon jon̄ak eo eutiejļo̧k kōn m̧ool jān jon̄an eo maron̄ loe. …
“… Enaaj … waanjon̄ak ko an kōrā ro an Kabun̄ in [ro] renaaj erom̧ juon kareel eo ekajoor ilo jim̧or oran im eddōkļo̧k in jetōb an Kabun̄ in ilo raan ko āliktata.”3
Ej juon kanaan eo em̧m̧an. N̄an baj kakaduki:
-
Enej juon jem̧jerā ilo kōrā ro im rej kappukot n̄an kaddōkļo̧k Kabun̄ in ilo iiō kane m̧aan.
-
Jem̧jerā ko me kōrā ro ilo Doulul eo an Kōrā ro, jiron̄ ro, im Būraimere leddik ro rej ekkal kōn m̧ool, tōmak, kōrā in anij im leddik ro jān tōmak ko jet im tōmak ko renaaj erom̧ juon kareel eo em̧m̧an ilo wāween an Kabun̄ in eddōkļo̧k ilo raan ko āliktata. kareel eo em̧m̧an ilo wāween an Kabun̄ in eddōkļo̧k ilo raan ko āliktata.
-
Būreejtōn Kimball ekar ņaetan kōrā rein jān en̄jake “rein rellōn̄” ro renaaj ļapļo̧k aer inepata kōn wāppen jān ļōmņak kōn er make, ro renaaj kwaļo̧k bwe m̧ool eaorōkļo̧k jān jon̄ak eo jej loe.
Ikar ioon elōn̄ iaan kōrā rein rem̧m̧an ilo aō kōm̧m̧ane jerbal eo aō ipeļaakin laļ in. Jem̧jerā ko aer raiboojoj n̄an eō. Kom̧ jeļā kaki barāinwōt ilubwilijin ro m̧ōttami im riturimi. Remaron̄ ak remaron̄ jab membōr in Kabun̄ in kiiō, ak jej ekkejelļo̧k ippāer ilo jem̧jerā ej men eo eaorōktata. Ekwe, ewi wāween ad kōm̧m̧ane ijo koņaad? Ta eo jej aikuj kōm̧m̧ane? Būreejtōn Kimball ej kōnono kōn ļalem men ko:
Eo kein Kajuon ej wānōk. Ad wāppen ejjab meļeļein ej wāppen ak jāmin kōm̧m̧an bōd. Meļeļein ejaake juon ekkejelļo̧k ibūrwōd ippān Anij, ukweļo̧k jān jerawiwi ko ad im bōd ko, im jipan̄ ro jet.
Kōrā ro rekar ukweļo̧k rej ukōt iaļ in juon bwebwenato. Ewōr juon m̧ōtta eo ekar kūrāāj ke ekar dik im jen kar men in, ekar erom̧ juon eo ej an̄ūr uno ko rej joļo̧k metak. Tokālik, jinen im jemān rekar jepel. Ekar ļap lo̧jeen jān juon jem̧jerā eo ekadu, im an an̄ūrlep ekar wōnm̧aanļo̧k wōt. Ak juon bon̄, ekar kalimjek pok im ettonoon eo ilo mour eo an im ļōmņak, “Em̧ōj.” Ekar jan̄ n̄an Rilo̧mo̧o̧r Jisōs Kraist bwen jipan̄ e. Ej ba ekar katak ke Jisōs Kraist ekar kajoor lo̧k jen un ko rinana an im bwe emāron pedped ioon kajoor eo An n̄e enaj etetal ilo ial in ukweļo̧k.
Jān an kar ro̧o̧ltok n̄an Irooj im iaļ ko An, ekar ukōt iaļ in bwebwenato eo an im bwebwenato in ļaddrik eo nejin edrik im likao eo ippen ekāāl. E ewāppen, ej juon eo eppeļo̧k būruwōn n̄an ro jet ro rekar kōm̧m̧an bōd im rej kōņaan in oktak. Im āinwōt kōj aolep, ekar jab wāppen, ak ejeļā wāween ukweļo̧k im kajjieon̄.
Kein karuo ej maron̄ kwaļo̧k ilo pidodo im alikkar. Ad maron̄ kwaļo̧k ilo pidodo im alikkar meļeļein ej kwaļo̧k ilo alikkar wāween an en̄jake kōn juon men im etke. Ilo jinoin iiō in, ekar wōr juon post ilo Facebook page eo ej kōnanaik Rikūrijin ro. Ikar riiti im ikar jidik illu ak ikar eļļo̧k jen e. Bōtaab, juon armej ijeļā kajjeen eo ejjab membōr in tōmak in ad ekar uwaak kōn juon an make kakobaba. Liin ekar jeje: “[Enin] ej jejjet in oktak eo ta eo Jisōs ej jutak kake—ekar … obrak kōn meļeļe [ilo] tōre eo An kōnke E … ekar bōktok juon men n̄an laļ in. … Ekar [kōnono n̄an] kokan̄ ro, [ekar m̧ōn̄ā] ippān ritōltōl owōj ro … , m̧ōttāiki kōrā ro im ajri ro ejjeļo̧k aer kajoor … , [im] kar letok bwebwenato in Rijameria eo Em̧m̧an. … Menin ej itok bwe … Rikūrijin ro rem̧ool renej kajjieon̄ bwe ren armej ro rejouj TATA ilo laļ in.” Ke ij riiti menin, ij ļōmņak ippa make, “Etke ikar jab je menin?”
Kajjojo iaar ej aikuj em̧m̧an ļo̧k aer kwaļo̧k un ko kōn tōmak eo aer. Ejet am en̄jake kōn Jisos Kraist? Etke kwoj pād ilo Kabun̄ in? Etke kwoj tōmak ke Bok in Mormon ej jeje ko rekwojarjar? Kwoj pukote ia aenōm̧m̧an? Etke ej aorōk ta ko rikanaan ro rej ba ilo iiō in, ilo 2017? Ewi wāween am̧ jeļa bwe e ej juon rikanaan em̧ool? Kōjerbale ainikiōm̧ im kajoor eo am kōn ta eo kwōjeļā im enjake—ilo am kōjerbal online, ilo am kōnono kadikdik ippān ro m̧ōttam̧, im ilo iien ko koj kōnono ippān ro jibūm̧. Ba n̄an er etke kwoj tōmak, elmen en̄jake ko am, eļan̄n̄e elōn̄ iien kwar ebweer, elmen am kar jo̧o̧r jāne, im ta meļeļein Jisōs Kraist n̄an eok. Āinwōt an kar Rijilōk Piter ba “Kom̧win jab mijak… ; A kom̧win kokwōjarjar Kraist āinwot Irooj ilo būruemi: im kom̧win pojak iien otemjej bwe kom̧win uwaak n̄an jabdewōt armej ej kajjitōk ippemi kōn unin kōjatdikdik eo ej ilowami.”4
Eo kein kajilu ej n̄an oktak. In ba waj juon bwebwenato kōn ta eo ekar waļo̧k ilo Juļae eo ilo Panama City Beach ilo Florida.5 Juon alikin rāelep, Roberta Ursrey ekar loe ļaddik ro ruo nejin rej lam̧ōj kōn jipan̄ jibukwi yard ettoļo̧k ilo lo̧jet. Aaet eo ilo lo̧jet ekar maron̄ bok ļaddik rein n̄an juon jikin ettoļo̧k ilo lo̧jet. Ruo ritto rekar kajjieon̄ in jipan̄ ļaddik rein ak aeet ekar barāinwōt bōk erro. Ineem uwaan baam̧le eo an Ursrey rekar kajjieon̄ in jipan̄ ak ratum̧juon bar armej rekar barāinwōt rōļo̧k ilo aeet eo.
Ekar ejjeļo̧k to. Ekar ejjeļo̧k rijerbal n̄an jipan̄. Būlijmāān ro jilkinļo̧k juon waan lo̧mo̧o̧r ak armej ro rekar to aer en̄taan ekebaak ron̄oul minit in aer pukot kilen mour im rekar lukkuun mōk im peier ekar jino an pād ium̧win dān. Juon iaan armej ro im rej lale ļo̧k jorrāān in ej Jessica Mae Simmons. Em̧m̧aan eo pāleen rekar ļōmņak in kōm̧m̧ane juon ļain in armej. Rōkar ikur nan armej ro ioon tarkijet nan jipan̄ er, im eļo̧n̄ armej ro rokar dāpijek pein do̧o̧n im maaj nan lojet. Jessica ekar jeki “Ilo aō kar lale an aolep armej jān joko jabdewōt ilo laļ in, kōrā im em̧m̧aan ro, itok im jipan̄ mekarta JŌB jeļā wōn armej ro [ekar] juon men eo eļap an kabwilōn̄lōn̄ ilo aer lale!!”6 80 armej rekar jibwe pein doon n̄an ro rekar peļo̧k. Lale pija in iien in ekabwilōn̄lōn̄.
Aolep rekar maron̄ ļōmņak wot kōn jipan̄ ko ekkā ad kōjerbali. Bōtaab rūtto rein ruo, ilo ejjeļo̧k ļōmņak im aolep kain, rekar ļōmņak kōn juon jipan̄ eo eoktak. Ļōmņak im kōm̧m̧an ko ad rej mennin letok jān jetōb. N̄e jej kōparok bujen ko ad, ej kōm̧m̧an bwe jen oktak jān ro ilo m̧anit ko im ilo jukjukin pād ko jikūd, ak ej leļo̧k n̄an kōj jet im̧we ko jemaron̄ ļōmņak kaki n̄e ej itok n̄an oktak in uwaak, oktak in elolo, im oktak in kōm̧m̧ane juon men. Ejjab aolep iien jemaron̄ jim̧we n̄an laļ in, ak n̄e kwoj oktak ilo jim̧we innām emaron̄ in jipan̄ ro im rej pād ilo aer en̄taan.
Eo kein kāmen ej n̄an en̄jake. En̄jake meļeļein ej n̄e kwo keememej. Jen bar reilikļo̧k n̄an bwebwenato eo kōn Jessica Mae Simmons ioon beach eo. iien eo armej ro rekar jibwe pein doon n̄an jipan̄ ro rekar jorrāān, ekar jeļā ke emaron̄ kar jipan̄. Jessica Mae ekar ba, “Imaron̄ dāpij kūtwō … im aōō ilowaan juon Olympic pool ilo ejjeļo̧k pen! [Ijela ta eo ij aikuj kōm̧m̧ane n̄e ej itok nan ļap ņo̧.] Ijeļā imaron̄ [juon ilo̧k juon] bōk rein rej pād ilo jorrāān n̄an ijo armej ro rej jibwe pein doon im ļain ie.”7 Kōrā eo im em̧m̧aan eo pāleen rekar bōk jet iaan kein epāpe ko im aōō ļo̧k ippen bar ro jet im rej jiban n̄an ro rej aikuj jipan̄ im kotak er n̄an armej ro rej jibwe pein doon bwe ren maron̄ leļo̧k er āneļo̧k. Jessica ekar wōr an kapāāl: ekar jeļā kilen aōō ilo iien ej ļap ņo̧.
Jepļaaktok eo an gospel in ej juon kakeememej eo eaorōk. Ak ej aikuj wōr ad en̄jake n̄an ewi wāween ad ļoor e. Āinwōt Jessica, jej aikuj katak mour kōn gospel eo m̧okta jān an lōn̄ jabdewōt bwe kōnke, jen jab mijak, ak jen kajoor n̄an jipan̄ ro jet im rej jōbwābwe ilo aeet eo.
Im āliktata, eo kein kōļalem ej n̄an kōm̧m̧ane aolep men ko jen juon n̄an emān ilo wāween eo ekam̧ōņōņō. Ejjab meļeļein n̄e jej ettōn̄ dikdik jej ettōn̄ bajjōk jekdo̧o̧n ta eo ej waļo̧k. Ak m̧ōņōņō ej n̄e kwoj pokake aolep kien ko an Jemedwōj Ilan̄ im kalōk im kōketak ro jet.8 N̄e jej kalōk, n̄e jej kōketak eddo ko an ro jet, ej kōjeraam̧m̧an mour ko ilo wāween eo mālijjon̄ ko ad reban bōke. Emōj aō likūt juon naan jān Būreejtōn Gordon B. Hinckley ilo juon jikin imaron̄ loe aolep raan. Ekar ba “Kwoj jab … ekkāl jān marok ak ebbeer. Kwoj reilo̧k n̄an meram, jerbal ilo tōmak, im men otemjej renej waļo̧k.”9
Juon waanjon̄ak kōn m̧ōņōņō im meram in jetōb, kōn juon leddik 13 an iiō ņaetan Elsa eo im baam̧le eo an rej em̧m̧akūt n̄an Baton Rouge, Louisiana, juon taujin ruwalitōk bukwi m̧aeļ ettoļo̧k jān ro m̧ōttan. Ejjab pidodo n̄e kwoj 13 iiō dettam̧ n̄e kwoj em̧m̧akūt n̄an juon jikin ekāāl. Elsa ekar jab lukkuun meļeļe etke rej em̧m̧akūt, innām jemān ekar wōnm̧aanļo̧k wōt im leļo̧k juon kōjeraam̧m̧an n̄an e. Iien eo jemān ej kōjeraam̧m̧ane leddik eo nejin, ekar maron̄ jan̄ taļboon eo an mama eo an leddik in. Leddik eo em̧m̧an dettan eo ej jokwe Louisiana ekar jilkinļo̧k pija in n̄an e eo ej ba “Jouj im itok n̄an ward e amim!”10
Leddik rein rekar wōr meram im m̧ōņōņō ippāer rekar kōņaan Elsa men̄e rekar jan̄in ioon e. Em̧ōņōņō im meram eo aer ekar kōm̧m̧an bwe en uwaak jar eo an Elsa, eo ekar kajjitōk eļan̄n̄e enej em̧m̧an aolep men.
Juon lem̧ōņōņō eo me ej itok jān bōktok m̧ōņōņō im meram eo ejjab kōjeraam̧m̧an kōj wōt—ej barāinwōt kalōk ro ipeļaakid. Jabdewōt men eo kwoj kōm̧m̧an n̄an kōmeram m̧ōņōņō ilo ro jet ej kwaļo̧k bwe kwoj kotak tūl eo Būreejtōn Kimball ekar kōmeram e.
Ekar 15 aō iiō ke Būreejtōn Kimball ekar kōnono kōn menin. Ro me rej 40 iiō ak rūttoļo̧k rej kotake wōt tūl in jān Būreejtōn Kimball jān jinoin raan eo kein kajuon. Kiiō ij rewaj n̄an ro 8 aer iiō, ro rej 14 aer iiō, ro rej 20 aer iiō, im ro rej 35 aer iiō, ij lewaj naan kein an Būreejtōn Kimball n̄an kom̧. Kom̧ij ritōl ro an Kabun̄ in ilju im jekļaj, im ej ami pepe eļan̄n̄e kom̧ naaj wōnm̧aanļo̧k kōn kanaan in. Kōm ro me 40 aer iiō im rūttoļo̧k, kōmij elļo̧ke peim n̄an kom̧ im en̄jake kajoor in ilo kom̧. Kōmij aikuj kom̧.
Ron̄jake eoon in ej pād ilo Katak im Bujen ko 49:26–28. Eoon in emaron̄ kar jeje n̄an bar juon wāween ak joteen in kōn Jetōb Kwojarjar, ij kōjatdikdik kom̧ naaj bōke ippemi make ilo jerbal in ekwojarjar.
“Lo, Ij ba n̄an kom̧ijel, kom̧in ilo̧k āinwōt em̧ōj Aō kar jiron̄ kom̧ijel; ukeļo̧k jān aolep jero̧wiwi ko ami; kajjitōk im kom̧ naaj bōk; kaļļaļļaļ im enaaj peļļo̧k n̄an kom̧.
“Lo, Inaaj etal im̧aamiļo̧k am naaj pād ilikimi; im Inaaj pād ilubwiljimi, im kom̧ jamin naaj pok.
“Lo, N̄aij Jisōs Kraist, im em̧ōkaj Aō itok.”11
Ij rōjan̄ kom̧ kajjojo bwe kom̧in likūt kom̧ make n̄an juon jikin eo kom̧ maron̄ en̄jake iakwe eo an Anij n̄an kom̧. Kom̧ ban maron̄ likūt kom̧ make eļapļo̧k jān iakwe in. N̄e kom̧ij en̄jake iakwe eo An, n̄e kom̧ij iakwe E, kom̧ naaj ukweļo̧k im kōjparok kien ko An. N̄e komij pokake kien ko An, emaron̄ kōjerbal kwe ilo jerbal in An. Jerbal im aiboojoj eo An ej mour ippān Anij im mour indeeo eo an kōrā ro im em̧m̧aan ro.
Rikanaan ro rej kūr n̄an kōj, kōrā ro jeiū im jatū. Kwonaaj ke wāppen? Kwonaaj k kōm̧anm̧an tōmak eo am̧? Komaron̄ ke jenolo̧k im oktak? Ami m̧ōņōņō men̄e mālijjon̄ ko renej kepaaktok ro jet ro rem̧m̧an im utiej im ro rej aikuji jem̧jerā eo ami? Kwonaaj ke kappōl meram eo am? Ij kam̧ool bwe Irooj Jisōs Kraist enaaj etal im̧aad im pād ilubwilijid.
Ij kilōke ilo naan ko an rikanaan eo ad ejitōn bōroThomas S. Monson: “Kōrā ro jeiū im jatū, en̄in ej raan eo am̧, en̄in ej iien eo ami.”13 Ilo etan Jisōs Kraist, amen.