2010–2019
Ia Pupula Atu Lou Malamalama
Oketopa 2017


Ia Pupula Atu Lou Malamalama

O loo valaau mai perofeta ia i tatou, o’u uso e. E mafai ona outou amiotonu? E mafai ona outou faamatalaina lelei lo outou faatuatuaga? Pe o le a e faasusulu atu lou malamalama?

Atonu tou te le silafiaina, ae ma te masaga ma Peresitene Monson. O le aso tonu na ou fanau ai—i le itula lava lea—i Kalefonia i matu, na lagolago ai Thomas Monson e 36 tausaga o se Aposetolo fou. Ou te fiafia i lou sootaga faapitoa ma patino i le perofeta a le Atua, o Peresitene Monson.

O loo saunoa perofeta e uiga i tamaitai.1 O le a outou faafofoga i nisi o a latou upu i lenei sauniga. Mo a’u tusiga ou te toe foi i tua i le toeitiiti 40 tausaga i se valoaga ofoofogia na tusia e Peresitene Spencer W. Kimball. Ia Setema 1979 ua na o le faalua ai lea ona feiloai tamaitai o le Ekalesia atoa i le latou lava sauniga aoao.Na saunia e Peresitene Kimball lana lauga, ae ina ua oo atu i le aso o le konafesi, sa taofia o ia i le falemai. O lea, na ia talosaga ai i lona faletua, o Camilla Eyring Kimball, e faitau atu lana lauga mo ia.2

Ata
Sister Camilla Kimball o loo saunoa atu i le pulelaa

Na faitau e Sister Kimball upu a le perofeta, lea na faamamafa atua le faatosinaga a tamaitai o le Ekalesia i tamaitai lelei o le lalolagi a’o le i oo i le Afio Mai Faalua o le Faaola. E lata i le faaiuga, sa i ai se poloa’i faagaeetia i tamaitai o le Ekalesia lea ua tatou talanoa ai lava talu mai lena taimi.

Se’i o’u sii atua sina upu mai le saunoaga a Peresitene Kimball:

“Ma le mea mulimuli, o’u tuafafine pele, se’i ou fautuaina atu ia te outou se mea e le i ta’ua muamua pe i se auala faapenei.O le tele o le tuputupu ae e oo mai i le Ekalesia i nei aso e gata ai, o le a oo mai ona o le toatele o tamaitai lelei o le lalolagi … o le a tosina mai i le Ekalesia i ni vaega toatele. O le a tupu lenei mea i se tulaga e atagia atu ai i olaga o tamaitai o le Ekalesia le amiotonu ma le atamai e tautatala i upu lelei, ma i le tulaga e vaaia ai tamaitai o le Ekalesia e tuma’oti ma e ese lava—i ni auala faafiafiaina—mai tamaitai o le lalolagi.

“E aofia ai i toa tamaitai moni i le lalolagi o le a o mai i le Ekalesia, o tamaitai o e sili atu ona popole i le amiotonu nai lo le manatu faapito. O nei toa tamaitai moni e lotomaualalo faamaoni, ua tuu ai se faataua maualuga atu i le amiosa’o nai lo le vaaiga [a tagata]. …

“… O lea … o tamaitai o faataitaiga o le Ekalesia o le a avea ma ‘malosiaga maoae e le gata i le faatupulaia faafuainumera ae faapea foi i le faaleagaga o le Ekalesia i aso amuli.”3

E maeu lea faamatalaga faavaloaga. Na o se aotelega:

  • O le mafutaga lelei a tamaitai lea o le a uunaia le tuputupu ae tele o le a oo mai i le Ekalesia i tausaga o i le lumanai.

  • O faauooga o loo fausia e tamaitai o le Aualofa, tamaitai talavou, ma teineiti Peraimeri ma tamaitai ma teineiti faamaoni, faatuatua, amio atua o isi faatuatuaga ma talitonuga o le a avea o se ‘malosiaga maoae i le tuputupuae o le Ekalesia i aso e gata ai.

  • Ua ta’ua e Peresitene Kimball nei tamaitai mai isi talafaasolopito o “toa tamaitai” o e o le a sili atu ona popole i le amiotonu nai lo le manatu faapito, o e o le a faaali mai ia i tatou o le amiosa’o e sili atu le taua nai lo le vaaiga [a tagata].

Ua ou feiloai i le toatele o nei tamaitai lelei a o faataunuuina la’u galuega i le lalolagi. E taua le latou faauooga ia te a’u. E te iloaina foi i latou i totonu o au uo ma tuaoi. Atonu o i latou o ni tagata o le Ekalesia i le taimi nei pe leai foi, ae tatou te fesootai i faauooga lea e taua tele. Ia, e faapefea la ona faia le tatou vaega? O le a se mea e tatau ona tatou faia? Ua ta’ua e Peresitene Kimball mea e lima:

O le mea muamua ia amiotonu. O le amiotonu e le faapea o le atoatoa po o le le faia o ni mea sese. O lona uiga o le atiaeina o se fesootaiga i le loto ma le Atua, salamo ia tatou agasala ma mea sese, ma fesoasoani saoloto atu i isi.

O tamaitai ua salamo e suia le ala o le talafaasolopito. E i ai sa’u uo sa i ai i se faalavelave tau taavale a o laitiiti ma sa oo ina fai ma vaisu ia fualaau o mea tiga. I se taimi mulimuli ane, na tetea ona matua. Sa maitaga o ia mai se mafutaga puupuu, ma faaauau pea ana vaisu. Ae i se tasi po, sa ia tilotilo atu i vevesi ma le gaogaosā o lona olaga ma mafaufau, “Ua lava.”Ma sa ia tagi atu i le Faaola o Iesu Keriso e fesoasoani mai ia te ia. Fai ma a ia sa ia aoaoina e malosi atu Iesu Keriso nai lo ona tulaga ma e mafai ona ia faalagolago atu i Lona malosi a o ia savalia le ala o le salamo.

O le toe foi mai i le Alii ma Ona ala, sa ia suia ai le ala o lona talafaasolopito ma le talafaasolopito a lana tama tama ma lona toalua fou. E amiotonu o ia; ma e alofa tele o ia mo isi o e ua faia ni mea sese ma mananao ia suia. E pei foi o i tatou uma, sa lei atoatoa lona olaga, ae sa ia iloa le ala e salamo ai ma taumafai ai pea.

O le lona lua o le atamai e tautala. O le atamai e tautala o le faaali manino atu lea o ou lagona e uiga i se mea ma le mafuaaga. I le amataga o lenei tausaga, sa i ai se faaupuga i la’u Facebook na faaleagaina ai le Faa-Kerisiano. Sa ou faitaua ma ou te lei fiafia i ai ae sa ou le amanaiaina. Peitai, o se uo e le auai i le tatou faatuatuaga na tali atu ma sana foi faaupuga. Sa ia tusia: “O le faafeagai tonu lava [lenei] o mea sa tu atu ai Iesu—o ia … o se tagata e maoae ona manatu i lona taimi ona sa ia…faatutusaina le lalolagi. … Sa ia [talanoa i] fafine talitane, [taumafa] faatasi ma le au ao lafoga …, faauo i tamaitai ma tamaiti vaivai …, [ma] aumai ia i tatou le tala i le Samaria Agalelei. … O se taunuuga la e faapea … o Kerisiano moni o le a tauivi ia avea ma tagata SILI ona alolofa i le lalolagi.” Ina ua ou faitau i ai, sa ou mafaufau ia te au lava, “Aisea na ou le tusia ai lena mea?”

E manaomia e i tatou taitoatasi ona lelei atili i le faamatalaina o mafuaaga mo lo tatou faatuatuaga. O le a sou lagona e uiga ia Iesu Keriso? Aisea e te tumau ai i le Ekalesia? Aisea e te talitonu ai o le Tusi a Mamona o se tusitusiga paia? O fea e te maua ai lou filemu? Aisea e taua ai o loo i ai se mea e ta’u mai e le perofeta i le 2017? E faapefea ona e iloa o ia o se perofeta moni? Faaaoga lou leo ma lou malosi e faamatala atu ai ou lagona ma mea e te iloa—i ala faasalalau faaagafesootai, i talanoaga filemu ma au uo, i talanoaga ma fanau a au fanau. Ta’u atu ia i latou aisea e te talitonu ai, faapefea ona e iloa, faape’i ia lagona, afai sa e masalosalo, na faapefea ona e faatoilaloina, o ai Iesu Keriso ia te oe. E pei ona fai mai le Aposetolo o Peteru, “Aua foi tou te fefefe … ; a ia paia le Alii le Atua i o outou loto: ia saunia pea lava outou e tali atu ma le agamalu ma le mata’u ia i latou uma o e fesili mai ia te outou i le uiga o le faamoemoe o loo ia te outou.”4

O le lona tolu ia ese. Se’i ou ta’u atu ia te outou se tala na tupu ia Iulai lenei i le Aai o Panama Beach i Florida.5 I le leva o le aoauli, sa vaaia e Roberta Ursrey ona atalii laiti e toalua o fe’ei mai mo se fesoasoani mai le 100 iata (90 m) i totonu o le sami.Na maua i laua e se galu malosi ma sa tafefea atu ai i le moana. Sa taumafai se ulugalii na lata ane e laveai nei tamaiti, ma sa maua foi i laua e le galu. Sa femaulu atu tagata o le aiga o Ursrey i totonu e laveai mai le au aau o loo tauivi, ma na vave ona maua nei tagata e toaiva i le malolosi o galu.

Sa leai ni maea. Sa leai ni leoleo laveai. Sa auina mai e leoleo se vaa faaola, peitai ua 20 minute o tauivi tagata sa i ai i le sami ma ua latou vaivai ma amata ona gogoto ifo i lalo o le sami. Na i ai i le au matamata i luga o le matafaga ia Jessica Mae Simmons. Sa ia i laua ma lona toalua se manatu e fau se filifili i tagata. Sa la feei atu i tagata i luga o le matafaga e fesoasoani ia i laua, ma na felavea’i lima o le toatele o tagata ma savavali atu i le sami.Sa ta’u atu e Jessica i le nusipepa: “O le vaai atu i tagata mai ituaiga ma itupa eseese o o mai e fesoasoani i tagata sa MATUA le masani i ai sa matua ofoofogia lava le vaaiga!!”6 O se filifili o tagata e toa 80 sa oo atu agai i le au aau. Tagai i lenei ata o lena taimi ofoofogia.

Ata
O tagata aau o loo fatuina se filifiliga tagata

O tagata uma sa i ai i le matafaga sa na o vaifofo masani na mafaufauina ma sa meia. Ae e tasi se ulugalii, i se taimi vave, na mafaufau i se vaifofo e ese mai ai. O le fatufatuai ma le sogasoga o ni meaalofa faaleagaga. A tatou tausia a tatou feagaiga, e ono ese i tatou mai isi i le tatou aganuu ma atunuu, ma e aumaia ia i tatou ni musumusuga e mafai ai ona tatou mafaufau i ni vaifofo eseese, faiga eseese, faaaogaaga eseese.O le a tatou le ogatusa lava ma le lalolagi, ae o le avea ma se tagata ese i ni auala lelei e mafai ai ona avea i tatou ma se faaolatotoga i isi o loo tauivi.

O le lona fa ia iloatino. O le iloatino o lona uiga ia iloa lelei ma le manino. Se’i ou toe foi atu i le tala ia Jessica Mae Simmons i le matafaga. O le taimi lava na oo atu ai lena filifili tagata agai i le au aau, sa ia iloa ai na mafai ona ia fesoasoani. Fai mai Jessica Mae, “E mafai ona taofi la’u manava ma faataamilo i se vaitaele o le Olimipeka ma le faigofie! [Sa ou iloa alu ese mai galu malolosi.] Sa ou iloa na mafai ona ou avatua [tagata aau taitasi] i le filifili o tagata.”7 Sa la toso maia ma lona toalua ia laupapa aau ma aau atu agai i le filifili seia oo atu i le au aau ma aumai taitasi i latou i le filifili, o e na pasi atua i latou i le saogalemu o le matafaga. Sa i ai ia Jessica se tomai manino: sa ia iloa le ala e aau atu ai i galu malolosi.

O le talalelei toefuataiina o se mea ua iloa tino lelei. Ae e tatau ona tatou manino i le ala tatou te mulimuli i ai. E pei ona faataitai e Jessica le aau, e manaomia ona tatou faataitai ona ola i le talalelei a o le i oo i faalavelave ina ia, le fefefe, ma lava lo tatou malosi e fesoasoani atu i isi pe a tafiesea e galu aave malolosi.

Ma le mea mulimuli, o le lona lima o le faia o le tasi i le fa o i luga i ni auala fiafia. O le fiafia e le o le i ai o se ataata le mo’i i ou foliga e tusa lava po o a mea o tutupu. Ae o lona uiga o le tausia o tulafono a le Atua ma atiae ma siitia isi.8 A tatou atiae, a tatou siitia ia avega a isi, e faamanuia o tatou olaga i auala e le mafai e o tatou tofotofoga ona aveesea. E i ai sa’u upusii mai ia Peresitene Hinckley e tuu i le mea ou te vaai i ai i aso uma. Na saunoa o ia: “E te le … atiaeina se mea mai le masalosalo ma le le talitonu. E vaavaai atu ma le talitonu o le a lelei mea uma, galue ma le faatuatua, ona tutupu ai lea o mea.”9

O se faataitaiga o lena agaga fiafia ma lelei, ou te iloa se teineitiiti e 13 tausaga e igoa ia Elsa o lona aiga o le a siitia atu i Baton Rouge, Luisiana, e 1,800 maila (2,900 km) le mamao mai ana uo. E le faigofie pe a e 13 ae siitia atu i se nofoaga fou. Sa iloa lelei e Elsa lona le mautonu i le siitia atu o lea sa faia ai e lona tama sona faamanuiaga. I le taimi tonu lava o le faamanuiaga, sa tatagi le telefoni a lona tina i se tesi. Na auina mai e se tamaitai talavou e nofo i le uarota i Luisiana le ata lenei ma se faaupuga “Faamolemole o mai i le matou uarota!”10

Ata
Tamaitai talavou o loo uuina i luga se fua o le susu maia

Sa lagona lelei e nei tamaitai talavou o le a latou fiafia ia Elsa e aunoa ma le feiloai ia te ia. O lo latou naunautai na fatu ai se lagona lelei ia Elsa i le latou siitia atu ma taliina ana tatalo e uiga i le, pe o le a lelei mea uma.

E i ai se naunautaiga lea e oo mai mai le fiafia ma le lagona lelei e le na o le faamanuiaina o i tatou—ae e atiaeina ai tagata uma o siomiaina i tatou. Ma o mea iti e te faia e faamumū ai le fiafia moni i isi e faailoa mai ai o loo e tauaveina le sulu na tutuina e Peresitene Kimball.

Sa 15 ou tausaga i le taimi na tuuina mai ai le lauga a Peresitene Kimball. O i matou o e matutua atu nai lo le 40 o loo tauaveina lenei tiute mai ia Peresitene Kimball talu mai lena aso. Ua ou vaai atu nei i le tai 8 tausaga, 15 tausaga, ma le tai 20 tausaga, ma le tai 35 tausaga, ma o le a ou tuuina atu lenei tiute ia te outou. O outou o taitai o le lumanai o lenei Ekalesia, ma o outou o le a tauaveina atu lenei malamalama agai i luma ma le faataunuuga o lenei valoaga. O i matou ua matutua atu nai lo le 40 ua felavea’i o matou lima ma o outou lima ma lagona lo outou malosi. Matou te manaomia outou.

Faalogo i le mau lenei o loo maua i le MF&F 49:26–28. Atonu na tusia i ni tulaga eseese, ae o lenei po e ala i le Agaga Paia, ou te faamoemoe o le a e aveina o sou valaauga patino i lenei galuega paia.

“Faauta, Ou te fai atu ia te outou, o atu ia e pei ona Ou poloaiina ai outou; ia outou salamo mai ia outou agasala uma; ole mai ma o le a outou maua; tuʼituʼi mai ma o le a tatala atu ia te outou.

“Faauta, o le a Ou alu atu i o outou luma ma avea foi ma o outou muliʼau; ma o le a Ou i ai i lo outou lotolotoi, ma o le a lē faafememeaiina outou.

“Faauta, o Aʼu o Iesu Keriso, ma ua vave ona Ou alu atu.”11

Ou te aioi atu ia te outou taitoatasi ina ia tuu outou i se nofoaga lea e mafai ai ona tou lagona le alofa agalelei o le Atua mo outou. E le mafai ona e tuuina oe i tua atu o lena alofa. A e lagonaina Lona alofa, a e alofa ia te Ia, o le a e salamo ma tausi Ana poloaiga. A tatou tausia Ana poloaiga, e mafai ona Ia faaaogaina i tatou i Lana galuega. O Lana galuega ma le mamalu o le faaeaga ma le ola e faavavau o tamaitai ma alii.

O loo valaau mai perofeta ia i tatou, o’u uso e. E mafai ona outou amiotonu? E mafai ona outou faamatalaina lelei lo outou faatuatuaga? Mata e mafai ona e lavatia le iloatino ma le ese mai ai? Mata o le a tatai atu e lou fiafia e ui i ou tofotofoga isi o e lelei ma malualii ma o e manaomia lau faauooga? Pe o le a e faasusulu atu lou malamalama? Ou te molimau atu o le Alii o Iesu Keriso o le a afio atu i o tatou luma ma i ai i lo tatou lotolotoi.

Ou te faaiu atu ai i upu a lo tatou perofeta pele, o Thomas S. Monson: “O’u tuafafine pele, o le tou aso lenei, o le tou taimi lenei.”12 I le suafa, o Iesu Keriso, amene.

Faamatalaga

  1. Peresitene Polika Iaga: “Tuu atu [i tuafafine] e faatulaga ia Aualofa i uarota taitasi. E toatele o tatou tamaitai talenia o loo i ai, ma e tatou te manaomia la latou fesoasoani i lenei mataupu. Atonu o le a manatu nisi e le o se mea taua lenei, ae e leai; ma o le a outou iloa ai o le a avea tuafafine ma punavai autu o le polokalama” (i le O Afafine i Lo’u Malo: O Le Talafaasolopito ma le Galuega a le Aualofa [2011], 45).

    Peresitene Lorenzo Snow: “Tou te i ai pea i autafa o le Perisitua, ua saunia … ma faia la outou vaega e fesoasoani ai e faalautele mea e manaomia i le malo o le Atua; ma a outou fefaasoaai i nei galuega, o le a le taumateina lo outou maua o faamanuiaga o le galuega ma le faaeaga ma le mamalu o le a tuuina mai e le Alii i Ana fanau faamaoni” (i le O Afafine i Lo’u Malo, 7).

    Peresitene Spencer We. Kimball, “O loo i ai le mana i lenei faalapotopotoga [a le Aualofa] ae lei matuai faaaogaina atoatoa e faamalolosia ai aiga o Siona ma fausia le Malo o le Atua—ma o le a le atoatoa lava vagana ua taufai maua e tuafafine ma le au perisitua le vaaiga mamao a le Aualofa” (i le O Afafine i Lo’u Malo, 153).

    Peresitene Howard W. Hunter: “O loo i ai se tulaga manaomia tele e aumai faatasi ia tamaitai o le Ekalesia ina ia tutu faatasi ma tutu atu mo le Usoga i le taofiga o le tai fana’e o le amioleaga ua siosiomia ai i tatou, ma le tuleia i luma o le galuega a lo tatou Faaola. … O lea matou te augani atu ai ia te outou ina ia auauna atu ma le uunaiga mamana mo le lelei i le faamalolosia o o tatou aiga, la tatou ekalesia, ma o tatou nuu (i le O Afafine i Lo’u Malo, 168).

    Peresitene Gordon B. Hinckley: “E i ai le malosiaga ma le mana tele i tamaitai o lenei Ekalesia. O loo i ai le au taitai ma le taitaiga, o se agaga patino o le tutoatasi, ae e i ai le faamalieina tele i le avea ai o se vaega o lenei galuega, le malo o le Alii, ma le galulue soosoo tauau ai ma le perisitua e tuleia i luma” (i le O Afafine i Lo’u Malo, 153).

    Peresitene Thomas S. Monson: upusii mai ia Belle Smith Spafford, Peresitene Aoao o le Aualofa, lea na tusia: “E le’i i ai muamua ni tamaitai e sili atu ona maoae a latou faataitaiga e pei ona i ai i le lalolagi i ona po nei. E le’i i ai lava muamua se taimi sa matua tatalaina ai faitotoa o avanoa [eseese] mo i latou nai lo le taimi nei. O se vaitau sili lenei ona faatosina, faagaeetia, faigata ma malolosi ona manaoga mo tamaitai. O se taimi ua sili ona tamaoaiga i taui pe afai tatou te ola e tusa ma mataupu faavae moni, aoaoina ia mea moni taua o le olaga, ma fuafuaina ma le atamai mea e tatau ona faamuamua’ [A Woman’s Reach (1974), 21]. O’u tuafafine pele, o le tou aso lenei, o le tou taimi lenei” (“The Mighty Strength of the Relief Society,” Ensign, Nov. 1997, 95).

    Peresitene Russell M. Nelson: “Ou te augani atu ai i o’u tuafafine o Le Ekalesia a Iesu Keriso o le Au Paia o Aso e Gata Ai e laa i luma! Tu i lou tulaga tonu ma le manaomia i lou aiga, i lou nuu, ma i le malo o le Atua—ia sili atu nai lo le mea sa i ai muamua. Ou te augani atu ia outou faataunuuina le valoaga a Peresitene Kimball. Ma, ou te folafola atu ia te outou, i le suafa o Iesu Keriso, a outou faia lena mea, o le a faateleina e le Agaga Paia lau faatosinaga i se ala e matua sili atu nai lo le mea sa i ai!” (“O Se Talosaga i O’u Tuafafine,” Liahona, Nov. 2015, 97).

  2. Tagai i le vitio a Sister Camilla Kimball o loo faitauina le saunoaga a Peresitene Spencer W. Kimball i le lds.org/general-conference/1979/10/the-role-of-righteous-womensee also Spencer W. Kimball, “The Role of Righteous Women,” Ensign, Nov. 1979, 102–4.

  3. Spencer W. Kimball, “The Role of Righteous Women,” 103–4; faaopoopo le faamamafa.

  4. 1 Peteru 3:14–15.

  5. Tagai McKinley Corbley, “80 Beachgoers Form Human Chain to Save Family Being Dragged Out to Sea by Riptide,” July 12, 2017, goodnewsnetwork.org.

  6. Jessica Mae Simmons, in Corbley, “80 Beachgoers Form Human Chain.”

  7. Simmons, in Corbley, “80 Beachgoers Form Human Chain.”

  8. Tagai Alema 41:10; 34:28; Mataupu Faavae ma Feagaiga 38:27; Luka 16:19–25.

  9. Aoaoga a Peresitene o le Ekalesia: Gordon B. Hinckley (2016), 74.

  10. Faamatalaga mai le aiga o Virginia Pearce.

  11. Mataupu Faavae ma Fegaiga 49:26–28.

  12. Thomas S. Monson, “O Le Malosiaga Maoae o le Aualofa,,” 95.