Muab Siab Npuab tus Tswv

Nyob hauv lub caij nplooj ntoo hlav thaum xyoo 1998, Carol thiab kuv wb yuav muab kev ua lag luam thiab tsev neeg txoj kev mus ua si koom ua ke thiab coj wb plaub tug me nyuam, nrog rau kuv tus niam tais uas nyuam qhuav yog ib tug poj ntsuam, mus rau Hawaii tau ob peb hnub.

Hmo ua ntej peb yuav caij nyab hoom mus rau Hawaii, wb tus tub uas muaj plaub lub hlis, Jonathon, mob qhov ntsej, thiab tus kws kho mob hais tias nws mus tsis tau qhov twg tau peb plaub hnub. Peb txiav txim hais tias Carol yuav nrog Jonathon nyob hauv tsev, es kuv yuav coj cov tsis mob hauv peb tsev neeg mus.

Qhov xub thawj uas qhia kuv tias kev ua si no yuav tsis zoo li kuv xav twb tshwm sim tsis ntev tom qab peb tuaj txog Hawaii. Peb taug kev ntawm ib txoj kev uas qaim hli, cov ntoo kuj yem nyob txhua sab, es muaj cov dej ua ntej ntawm peb, kuv tig los yuav hais lus txog qhov uas lub pov txwv no zoo nkauj heev, es thaum lub sij hawm ntxim muaj kev hlub ntawd, kuv tsis pom Carol, kuv tsuas ntsia kuv tus niam tais qhov muag—ib tug uas kuv kuj hlub thiab. Tsis yog raws li kuv xav tau xwb. Thiab tsis yog raws li Carol xav kom siv nws lub sij hawm ua si nyob hauv tsev nrog wb tus me tub uas mob.

Yeej yuav muaj tej lub sij hawm thaum peb taug tej kev uas tsis yog raws li peb xav, raug tej xwm txheej uas phem tshaj qhov uas yus txoj kev muaj kev lom zem raug cuam tshuam. Peb ua li cas thaum tej xwm txheej, feem ntau yog tej uas peb kav tsis taus, hloov lub neej uas peb tau npaj los yog cia siab yuav muaj?

Thaum Rau Hli Ntuj 6, 1944, Hyrum Shumway, ib tug nom tub rog thib ob hluas nyob hauv Amelikas pawg tub rog, mus txog tim ntug dej Omaha Beach uas yog ib feem ntawm kev txeeb teb chaws hu ua D-day. Nws twb txog qhov tsaws tsis muaj teeb meem, tiam sis thaum Xya Hli Ntuj 27, thaum Sab Koom Ua Ke Allied mus tom ntej, ib lub foob pob uas ua rau lub tsheb tua rog tawg tas ua rau nws mob sab heev. Tam sim ntawd, nws lub neej thiab kev xav ua ib tug kws kho mob twb hloov hlo. Tom qab phais mob ob peb zaug, uas pab nws tej yam mob feem ntau rov zoo, Tij Laug Shumway tseem pom tsis taus kev tas nws lub neej. Nws tau ua li cas?

Nws nyob hauv ib lub tsev kho mob kom pab rov zoo tau peb xyoos, ces nws rov qab mus tsev rau Lovell, Wyoming. Nws paub tias nws ua tsis taus ib tug kws kho mob lawm ntxiv, tiam sis nws txiav txim siab tias nws yuav mus tom ntej, yuav poj niam, thiab muaj ib tsev neeg.

Nws twb nrhiav hauj lwm nyob hauv Baltimore, Maryland, ua ib tug kws ntuas neeg txog kev peem tsheej thiab nrhiav hauj lwm rau cov neeg dig muag. Thaum nws ua tus txheej txheem peem tsheej, nws twb kawm hais tias cov dig muag ua tau ntau tshaj nws xav, thiab thaum nws ua hauj lwm li no tau yim xyoo, nws tau nrhiav hauj lwm rau neeg dig muag ua ntau tshaj lwm tus kws ntuas neeg nyob thoob plaws lub teb chaws.

Vim nws tso siab hais tias nws yuav txawj nrhiav noj nrhiav haus rau ib tsev neeg, Hyrum thov nws tus hlub yuav nws thaum nws hais tias, “Yog koj yuav nyeem cov ntawv uas xa tuaj, faib cov thom khwm, thiab tsav tsheb, ces kuv ua tau txhua yam ntxiv.” Nkawd twb ua kev sib khi hauv lub Tuam Tsev Salt Lake thiab muaj yim tus me nyuam.

Thaum xyoo 1954 tsev neeg Shumway rov qab mus rau Wyoming, nyob ntawd Tij Laug Shumway tau ua hauj lwm tau 32 xyoos ua tus Coj Kev Kawm Ntawv rau cov Lag Ntseg thiab Dig Muag. Thaum lub sij hawm ntawd, nws ua tus npisov rau pawg ntseeg Cheyenne First Ward tau xya xyoo thiab tom qab ntawd yog ceg txheem ntseeg tus yawg suab tau 17 xyoo. Tom qab nws ua hauj lwm tiav, Tij Laug thiab Muam Shumway kuj ua tub txib nyob hauv Qhov Chaw Tshaj Tawm txoj Moo Zoo London England South.

Thaum Hyrum Shumway tso lub ntiaj teb no tseg thaum lub Peb Hlis Ntuj xyoo 2011, nws ua rau nws cov me nyuam thiab cov xeeb leej xeeb ntxwv nco ntsoov txog nws txoj kev ntseeg thiab kev tso siab rau tus Tswv, txawm yog muaj kev sim siab ntau.¹

Tej zaum kev ua tsov rog twb ua rau Hyrum Shumway lub neej hloov, tiam sis nws tsis tau ua xyem xyav txog nws tus cwj pwm uas los saum ntuj los thiab nws txoj kev muaj peev xwm hloov los ua neeg uas nyob mus ib txhis. Ib yam li nws, peb yog Vajtswv cov tub thiab cov ntxhais, thiab peb “tau txais yuav Nws lub tswv yim uas npaj tseg hais tias [peb] yuav tau ib lub cev nqaij daim tawv thiab yuav tau ib lub sij hawm saum ntiaj teb no kom thiaj xyaum tau ua neeg zoo tag nrho thiab thaum kawg ncav tau [peb] txoj hmoov los saum ntuj los ua cov uas txais txoj sia nyob mus ib txhis ua lawv tug.”² Tsis muaj kev hloov, kev sim siab, los yog kev tawm tsam uas hloov tau txoj kev mus ib txhis no—tsuas yog tej uas peb xaiv, thaum peb siv peb txoj kev ywj siab xaiv xwb.

Tej yam uas hloov, thiab tej teeb meem uas peb raug nyob hauv lub ntiaj teb no yeej muaj ntau hom thiab ua rau nyias muaj nyias tej xwm txheej. Ib yam li nej, kuv twb saib cov phooj ywg thiab tsev neeg raug tej teeb meem xws li:

• Ib tug uas lawv hlub tuag.

• Kev sib nrauj.

• Tej zaum tsis tau muaj cib fim sib yuav.

• Kab mob los yog raug mob heev.

• Thiab tsis hais tej yam puas tsuaj, zoo li peb tau pom tsis ntev tas los.

Thiab muaj li ntawd. Thiab txawm txhua tus nyias muaj nyias tej xwm txheej raws li tej yam uas tau “hloov,” muaj ib qho uas zoo ib yam los ntawm tej kev sim siab los yog tej teeb meem—peb txais tau kev cia siab thiab kev kaj siab lug los ntawm Yexus Khetos txoj kev txi theej txhoj. Yexus Khetos txoj Kev Theej Txhoj muab tej yam uas rau peb kom kho txhua tus uas lawv lub cev, tus ntsuj plig, thiab lub siab raug mob.

Nws paub, ntau tshaj qhov uas lwm tus txawj to taub, hais tias peb yuav tsum ua li cas kom mus tom ntej txawm yog txhua yam hloov tas. Tsis zoo li cov phooj ywg thiab cov uas peb hlub, tus Cawm Seej pab peb tu siab, tiam sis Nws yeej txawj paub peb xav li cas, vim Nws twb raug tej yam uas peb raug. Tsis yog nws tau them nqi rau peb thiab raug txom nyem ntawm peb tej kev txhaum xwb, Yexus Khetos kuj tau taug txhua txoj kev, raug txhua teeb meem, raug txhua yam kev mob—ntawm sab cev nqaij daim tawv, lub siab, los yog sab ntsuj plig—uas peb yuav raug nyob hauv lub neej no.

Thawj Tswj Hwm Boyd K. Packer qhia hais tias: “Yexus Khetos txoj kev hlub tshua thiab kev tshav ntuj tsis muab pub rau cov uas ua txhaum xwb, tiam sis nws kuj muab kev thaj yeeb nyab xeeb nyob tas mus li rau txhua tus uas yuav txais Nws thiab ua raws li Nws tej lus qhuab qhia. … Nws txoj kev hlub tshua yeej muab pub rau cov neeg muaj mob uas tsis tau txhaum lawm thiab.”³

Nyob hauv lub neej no, peb tsis muaj peev xwm kav txhua yam uas peb raug, tiam sis peb yeej kav tau tag nrho tej uas peb ua thaum peb lub neej hloov. Qhov no tsis txhais hais tias tej kev sim siab thiab tej teeb meem ua peb raug yeej tsis ua li cas los sis yooj yim rau peb kho. Tsis txhais hais tias peb yuav tsis muaj kev mob los yog kev nyuaj siab. Tiam sis qhov no txhais hais tias peb muaj tau kev cia siab thiab vim muaj Yexus Khetos txoj Kev Theej Txhoj, peb mus tau tom ntej thiab yav tom ntej yuav zoo dua—yuav muaj kev xyiv fab, txoj kev kaj, thiab kev zoo siab.

Nyob hauv phau Mauxiyas peb nyeem txog Amas zaj, tus uas yog tus Vaj Ntxwv Nau-as tus pov thawj, thiab nws cov neeg uas “tus Tswv tau ceeb toom [lawv] … [kom] khiav mus rau hauv hav zoov ua ntej vaj ntxwv Nau-as cov tub rog.” Tom qab yim hnub, “lawv tuaj rau … ib thaj av uas zoo nkauj heev thiab xis nyob heev” es nyob ntawd “lawv rub lawv tej tsev pheeb suab ntaub, thiab pib mus ncaws teb, thiab pib ua vaj ua tsev.”⁴

Lawv twb muaj kev cia siab. Lawv tau txais Yexus Khetos txoj moo zoo. Lawv tau ua kev cai raus dej kom khi lus tias lawv yuav ua hauj lwm rau tus Tswv thiab ua raws li Nws cov lus txib. Thiab “ lawv tau huaj vam thiab vam meej heev nyob hauv thaj av.”⁵

Tiam sis, tsis ntev ces lawv lub neej yuav hloov. “Cov Neeg Lamas ib pab tub rog nyob rau ntawm thaj av tej ciaj ciam.”⁶ Amas thiab nws cov neeg raug ua qhev, thiab “lawv tej kev txom nyem hnyav heev li uas lawv tau pib sib sib zog thov Vajtswv.” Tsis tas li ntawd, cov neeg uas txhom lawv twb txib kom lawv tsis txhob thov Vatjswv, yog tsis mloog ces, “tus uas lawv pom thov Vajtswv ces tus ntawd yuav raug muab tua.”⁷ Amas thiab nws cov neeg tsis tau ua dab tsi kom tsim nyog raug tej xwm txheej no. Lawv yuav ua li cas?

Lawv tsis taus liam Vajtswv, tiam sis lawv tau tig mus rau Nws thiab “lawv tau thov nws kawg siab kawg ntsws.” Tus Tswv tau teb lawv txoj kev ntseeg thiab kev thov Vajtswv ntsiag to, hais tias: “Cia li zoo siab. … Kuv … yuav ua rau tej nra uas nyob saum nej xub pwg kom sib, xwv kom nej tsis nco tias muaj tej nra ntawd nyob saum nej nraub qaum.” Tsis ntev ces, “tus Tswv tau txhawb lawv lub dag lub zog es lawv thiaj ris tau lawv tej nra hnyav yam yooj yim, thiab lawv thiaj zoo siab hlo thiab ua siab ntev ywj rau tus Tswv lub siab nyiam tag nrho.”⁸ Txawm yog lawv tsis tau dim kev ua cev qhev, vim lawv muab siab npuab tus Tswv, thiab tsis tau ntxeev siab rau tus Tswv, lawv thiaj tau koob hmoov raws li tus Tswv lub tswv yim thiab raws li lawv xav tau.

Txwj Laug Dallin H. Oaks tau qhia tias: “muaj ntau txoj kev uas tej koob hmoov kho mob los rau peb, raws li txhua tus xav tau kev pab, raws li tus uas hlub peb tshaj paub. Tej lub sij hawm ‘kev kho kom zoo’ tshem peb qhov mob mus los sis tshem lub nra hnyav. Tiam sis tej lub sij hawm ‘kev kho kom zoo’ txhawb nqa peb lub dag zog los yog txoj kev to taub los yog kev ua siab ntev kom ris tau tej nra hnyav uas tau tso rau peb.”⁹

Thaum kawg, “lawv txoj kev ua siab ntev thiab lawv txoj kev ntseeg yeej loj kawg nkaus,” tus Tswv thiaj tau pab Amas thiab nws cov neeg dim, ib yam li Nws yuav pab peb dim, “thiab lawv ua tsaug rau Vajtswv … , vim lawv twb ua qhev, thiab twb tsis muaj leej twg muaj peev xwm tso lawv dim tsuas yog tus Tswv lawv tus Vajtswv xwb.”¹⁰

Qhov tu siab yog qhov uas, feem ntau, cov uas xav tau kev pab heev tig ntawm tus uas pab tau lawv mus—peb tus Cawm Seej, Yexus Khetos. Ib zaj hauv vaj lug kub hais txog tus nab tooj qhia peb tias peb muaj kev ywj siab xaiv thaum peb raug tej teeb meem. Tom qab “cov nab ya uas tsiv tsaim,”¹¹ tom cov neeg Ixayees, “Mauxes tsa ib lub cim nyob hauv hav zoov, xwv kom txhua tus uas ntsia lub cim ntawd yuav ciaj. [Tiam sis yog ib qho lawv xaiv tau.] Thiab coob leej tau ntsia thiab ciaj.

“Tiam sis muaj coob leej uas tawv heev es lawv tsis kam ntsia, yog li ntawd lawv thiaj piam sij.”¹²

Ib yam li cov Neeg Ixayees puag thaum ub, tus yaj saub kuj caw thiab yaum peb ntsia tus Cawm Seej kom peb ciaj—vim Nws tus quab yooj yim thiab Nws lub nra tsis hnyav, txawm yog peb lub nra hnyav heev.

Amas tus Hluas qhia qhov tseeb dawb ceev no thaum nws hais tias, “Kuv paub tias txhua tus uas yuav tso siab rau Vajtswv yuav tau txais kev pab thaum lawv muaj kev sim siab, thiab thaum lawv muaj teeb meem, thiab thaum lawv raug txom nyem, thiab Vajtswv yuav muab lawv tsa sawv thaum txog hnub kawg.”¹³

Nyob hauv hnub nyoog kawg no, tus Tswv tau muab tej kev pab ntau rau peb, peb tej “nab tooj,” txhua yam uas Nws tau tsim kom pab peb ntsia tus Khetos thiab tso siab rau Nws. Qhov uas peb kov yeej tej teeb meem ntawm lub neej no tsis yog kev tsis xav txog yus lub neej tiag tiag tiam sis yog qhov uas peb xaiv kom tsom ntsoov rau tus twg thiab lub hauv paus twg uas peb yuav siv kom txhim tsa peb tus kheej.

Kuv tsis hais tag nrho tej kev pab no, tiam sis muaj xws li:

• Kev kawm vaj lug kub thiab cov yaj saub uas muaj txoj sia nyob tej lus qhia.

• Kev thov Vajtswv thiab yoo mov tsis tu tsis tseg.

• Kev tsim nyog txais lub cim nco txog.

• Kev mus rau lub tuam tsev.

• Cov koob hmoov pov thawj hwj.

• Cov kws muab tswv yim tej lus ntuas.

• Thiab tshuaj, thaum sau ntawv yuav tshuaj thiab siv raws li tau tso cai ua.

Txawm yog peb lub neej hloov li cas los, thiab txawm peb yuav tsum taug txoj kev twg los, peb yeej xaiv tau tej yam peb yuav ua. Kev muab siab npuab tus Cawm Seej thiab tuav Nws tev uas nws ncav cuag peb yeej yog qhov zoo tshaj plaws uas peb xaiv tau.

Txwj LaugRichard G. Scott tau qhia qhov tseeb no: “Kev zoo siab tseeb uas kav ib txhis nrog rau kev dag zog, kev ua siab loj, thiab kev txawj kov yeej tej yam nyuaj tshaj plaws yeej los ntawm ib lub neej uas tsom ntsoov rau Yexus Khetos. … Tsis muaj kev cog lus tias yuav tsum tib hmo xwb, tiam sis yeej muaj kev cog lus hais tias, raws li tus Tswv teem sij hawm, nej yuav txais tau kev kho teeb meem, kev kaj siab lug yuav kov yeej, thiab kev nyuaj siab yuav ploj mus.”¹⁴

Kuv ua tim khawv txog tej yam tseeb no. Los ntawm Yexus Khetos lub npe, amees.