Forlah nuh sin Leum

Ke spring 1998 ah, nga ac Carol srihke in oraclah fahsr se lasr in som muhtwacta us tuhlihk ahkosr nahtuhsr, wi pac ninac se kiyen muhtwacn kiyuck, in som muhtwacta Hawaii ke lwen ekahsr.

Fong se met liki som lasr nuh Hawaii ah, tuhlihk mukul mahlwem ahkosr se nahtuhsr ah, inel pa Jonathon, el sukokyak lah el maskihn kwewana insrwacl, ac fwack nuh sesr muh kuht tiac kuh in orwaclah fahsr se lasr inge sahp ke lwen tolu nuh ke ahkosr. Ma wotlac uh pa Carol elac muhta na lohm ah liyaclwacng Jonathon, suc ma nga ac us mwet luhlah ah som.

Mwe liye se met luhk lah muhtwacta se inge ac tiac fahsr fal nuh ke ma plwacniyuck uh sikyak tukun na kuht ai ah. Ke kuht fani ke inek ma sahk inge an kac, ma inkof ah oan na sikuhti, nga forwacng in fahk kahtoiyacn tuhka sac, ac ke pacl na sun sacn, sahyacn na in liyacl Carol, nga tuh liyacack ninac kiyacn muhtwacn se kiyuck ah—suc, nga kuh in fahk, muh nga luhngse na pwacye. Nga tena pahngon muh ac pa sikyak angwe. Ke Carol el muhta e lohm ah liyacacng tuhlihk mukul mas se nahtuhsr ah.

Ac oasr kuhtuh pacl ke moul lasr uh ma kuht ac tilyang nuh ke soko pacna inek, ma kuht ac puhla ke ma upac yohk oacna nuh ke muhtwacta se lasr ah. Kuht ac topuk fuhkah ke ma uh, kwacna sikyak tiac eke pacl la, ekuhllah ma kuht plwacni kuh finsrak nuh kac?

Ke June 6, 1944, Hyrum Shumway, sie mukul fuhsr yohk wal la ahkluo ke armi  luhn acn Macrike, som nuh ke lihkihnpot Omaha oacna ma ke pacl se emet ma kuhnanuclac luhn acn Normandy ke Mweun Ahk luo ah. El orwaclah wo ke ai se lal ah, tuhsruhktuh ke July 27, ke el tuh wi sie u, el tuh ongaiyac ke sie pam. Ke pacl sacna, moul lal ac orekma lal wi pacna puhlakihn upac. Puhslac laslas, suc ma kahsrwel in kwelac liki ma el puhlakihn, Tamuhlwel Shumway el tiac kuh in sifil pac liye. Elac topuk fuhkah?

Ke yac tolu el muhta in hospital sac, el fohlohk nuh lohm sel in acn Lovell, Wyoming. El etuh lah mwemwe lal in muh sie taktuh tiac kuh in oreklac, tuhsruhk el srihke in fahsr nuh met, macruhtlac, ac oraclah sie sucu.

El sokwack orekma se fin acn Baltimore, Maryland, ekihn sie mwet kahsruh ac mwet orekma ke mwet sulohngohngtwen. Ke liye lal sifacna, el lotwelah lah mwet kun uh kuh in oruh ma puhs ke el liye uh, ke el orekma yac alkosr, el oakiyac mwet kun puhs in orekma liki kuhtwena mwet kahsruh ke acn sac.

Inge ke el luhlahlfongi muh el kuh in sramtweack sie sucu, Hyrum el siyuck in pahyuck sin muhtwacn se el luhngse, “Kom fin riti lwacta se ingacn, srwaclihk sak an, us stosah an, nga fah oruh ma luhlah an.” Elos tuh siliyucki ke Salt Lake Tempuhl ac ahkinsewowoyeyucki ke tuhlihk oalkosr.

Ke 1954 ah elos fohlohk nuh Wyoming, acn suc Tamuhlwel Shumway el orekma yac ekihn Director ke education luhn mwet kun ac sohlohngkahs. Ke pacl sac, el kuhlwacnsap yac 7 ekihn pisap ke Cheyenne Ward se met ac, tohkoh, yac 17 ekihn stek patriarch se. Ke el ac tui ke orekma lal, Tamuhlwel ac Tahmtahel Shumway elos kuhlwacnsap ekihn Couple Missionary fin acn South London misin.

Hyrum Shumway el misac ke March 2011, likiyac sie mwet acsmak ke inel ke el ekihn sie mwet kuh ke luhlahlfongi in Leum, finne nuh ke pacl upac, in liyacacng sucu na luhlahp se.¹

Moul lal Hyrum Shumway el ikihlyucklac ke mweun, tuhsruhk el tiacna tahfuh luo ke ma kunacl. Oacna el, kuht tuhlihk nuhtin God, ac kuht “eis plwacn Lal suc pa e use mahnosr ac eis ma luhn facluh kuht puhlakihn in sang ahkwoye kuhtlac ke moul lasr.”² Wacngihn luhpah in sang ahollah, kuh ekuhllah—sulwaclah lasr muhkwena, ke kuht srihke in sulwaclah.

Ma eklac, ma sikyak ke ma upac, ma kuht puhlakihn ahkkolukye kuht kais sie el siena. Oacna kom, nga mwet loh ke kawuck ac sucu ma puhlakihn ke ma upac:

• Misac luhn sie mwet luhngseyuck.

• Fahsrwelihk na mwen se.

• Tiacna oasr pacl la in macruhtlac.

• Mas ac mwe ongaiyac na upac.

• Finne ma sikyak koluk, oacna ke kuht liye uh.

Ac puhslac mwe srihkasrak. Sahp kais sie “eklac” sacn ac siena liki elyah luhn kais sie sesr, oasr ma se ac sikyak tukun mwe elyah kuh fosrngah nuh kwewa—finsrak ac mihslac ac oasr pacl nuh kwewa ke iwaclah kihsackihnyucklac luhn Jisus Kraist. Iwaclah luhn Jisus Kraist el ahkpwacyeye ac unwelah kihnet ke mwet se, lah kihnet ke nguhn, ac auli luhn insiyac.

El etuh, ke sie inek ma wacngihn mwet ac kahlwem kac, ma se ma enenweyuck, sin kais sie, ma in oraclah eklac sacn. Tiac oacna ke kawuck kuh mwet kuht luhngse uh, mwet Lahngo el tiacna luhngse kuht muhkwena, tuhsruhk El oraclah in wolac mweyen El oasr kac ac kuht oasr we. In weacng ke kuht ac puhlakihn sifacna molin ma koluk kuht oraclah uh, Jisus Kraist el fahsr ke innek nuh kwewa, puhlakihn mwe ongaiyac nuh kwewa, puhla mwe ngal nuh kwewa—ma luhn ikoac, ke mahno, kuh ke nguhn—suc ma kuht ac fah sun ke moul se inge.

Prestuhn Boyd K. Packer el luti: “Pahkotwen ac luhng kuhlwacng luhn Jisus Kraist el tiac srisrilac nuh sin suc orek ma koluk… , tuhsruhk elos fahsrot na nuh ke olwelah ma pahtpaht ke mihslac nuh sin elos suc eisacl ac ukwacl. … Pahkotwen Lal el mwe unweyuck na fokoko se, finne nuh sin mwet wo suc kihneta.”³

Ke moul in srihkasrak se inge, kuht tiac kuh in sruok ma sikyak nuh sesr, tuhsruhk oasr mwe kutongyac ma kuht ke fahk nuh ke ma ac ekuhllac moul lasr uh. Ma se inge tiacna fahk lah mwe elyah ac ma upac kuh puhlakihn uh ac wacngihn mwacta ac fihsrwacsr in kuhtangyucklac. Tiac na kalmac pa kuht ac sukohsohklah liki ngal ac inse toasr lasr uh. Tiacna kalmac pa oasr ma se ac sikyak nuh ke ma kuht finsrak nuh kac ac lah ac sikyak ke Iwaclah luhn Jisus Kraist, kuht kuh in fahsr na nuh met ac liye lwen wo —finne lwen sesseslah ke engan, kahlwem, ac pwacr.

Ke Mosiah kuht riti ke sramsram lal Alma, mwet tol se ma tuh tilac prist lal Tohkohsrah Noah, ac mwet lal, suc, “elos sensenkihnyuck sin Leum… [,] som nuh ke yen mwesis mwet liki mwet mweun lal tohkohsrah Noah.” Tukun lwen alkosr, “elos som nuh…acn na kahto ac wolacna se” yac “elos tulohkohnwack lohm nuknuk selos, ac muhtwacwacack in pihkihn infohk uh, ac muhtwacwacack in muhsah lohm.”⁴

Mwe elyah se inge liyeyuck muh uliyucki. Elos eis wosasuc luhn Jisus Kraist. Elos tuh pacptaislac oacna sie olwelah ma elos ac kuhlwacnsuhpuh Leum ac sruokyacna masap Lal. Ac “elos ahkpuhsye ac muhta insewowo ke acn sac.”⁵

Ne ohinge, mwe elyah laltahl ac fah eklac. “Un mwet mweun se luhn mwet Laman elos oasr ke acn we.”⁶ Alma ac mwet lal elos tuh sruhuh, ac “arulacna upac mwe kweok eltahl puhla ne eltahl muhtwacwacack in pahng nuh sin God.” In weacng, elos sapkihnyuck sin mwet sruokuhltahl ah in tuh tui tilac pruhe, siepac, “elos suc sukokyak pahng nuh sin God ac fah acnwucki. Wacngihn ma.”⁷ Alma ac mwet lal kuh in oruh ke mwe fahkwack sasuc se nuhseltahl ah. Elos ac topuk fuhkah?

Yac elos ac muhltwekihn nuh sin God, elos ngwet nuh Sel ac “okwaclah insiaclos nuh sel.” In topuk ke luhlahlfongi ac pruhe lalos, Leum el topuk: “Ahkkweye kom…. Nga fah…eslah mwe toasr oan finpisowos, oruh tuh kom in tilac puhla fintikum.” Tiac paht tohkoh, “Leum El ahkkweyaclos oruh tuh elos in lain mwe toasr selos neke wacngihnlac, ac elos arulacna engan ac ke muhtweng nuh ke luhngse luhn God nohfohn..”⁸ Elos sonna sruhk ikacklah liki sruhuh lalos, ke elos forwacng nuh sin Leum, ac tiac liki God, elos ahkinsewowoyeyuck fal nuh ke mwe enenuh lalos ac nuh ke lahlmwetmwet luhn Leum.

Elder Dallin H. Oaks el luti ah lah “unweyuck ke mwe insewowo el tuhkuh ke kain ma pucspucs, kais sie tuhkuh na ke mwe enenuh lasr, oacna ke etweyac sel suc luhngse kuht yohk. Kuhtuh pacl uh “unweyacn mas se” unwelah mas se lasr kuh ahkkweyelah ma toasr lasr uh. Tuhsruhk kuhtuh pacl uh kuht ‘unweyucklac’ ke ahkkweyeyuck kuht kuh ke etuh lasr kuh muhtweng ma upac tuhkuh nuh facsr.”⁹

Yohk, “luhlahlfongi ac muhtweng lalos,” Alma ac mwet lal elos utucklac nuh sin Leum, “ac elos sang kuloh,” mweyen elos srohoh, ac wacngihn sie kuh in ahksukohsohkyacltahlah sahyacn Leum God laltahl.”¹⁰

Ma suhpwacr sacn pa, arlac puhs, elos suc forlah liki el suc kuh in kahsrweltahl—suc pa Mwet Lahngo lasr. Jisus Kraist. Ma suhmuhslah na pwengpweng se sihmlac fahk ke “wet soko” luti kuht lah kuht lah oasr sulwaclah lasr ke kuht sun mwe ongaiyac uh. Tukun puhslac tuhlihk nuhtin Israel elos ngalngucl uh ke wet suhlallacl soko,¹¹ sie ma ac tuyak … ac oacna sie suc liye … fah moullac. Ac puhs mwet liye ac moullac.

“… Tuhsruhk puhs mwet kwekwe insiac in ngwetwacng liye, ohinge elos wacngihnlac.”¹²

Oacna ke mwet Israel met, kuht ahkkweyeyuck ac suliyuck pac in ngwet nuh sin Mwet Lahngo ac moul—oacna ke el fihsrwacsr ac mwe toasr Lal muhlahlah, finne toasriyacn ma lasr.

Alma Fuhsr el luti ke mwe luti pwacye se inge ke el fahk, “Nga tiac etuh lah suc ac fah sang luhlahlfongi la nuh sin God ac fah kahsruh ke pacl upac lalos, ke pacl elyah lalos, mwe kweok, ac fah tuh sruhkyuckyak ke lwen sahflah.”¹³

Ke lwen sahflah, Leum El ac use nuh sesr ma puhs, ke mwe mweun lasr, ma nuh kwewa ma ac kahsrwe kuht in ngwet nuh sin Kraist ac sang luhlahlfongi lasr nuh Sel. In kuh in kuhtanglac mwe sruhf ke moul in srihke se tiac ma oruh kuht in tiac lohacng ke ma pwacye tuhsruhk kuht in kuh in sulwaclah in lohacng na nuh ke ma se suc kuht sulwaclah in muhsahi.

Mwe kahsruh inge oasr pac, tuhsruhk tiac oasr limit la:

• Lutlut pacl nuh kwewa ke ma suhmuhslah ac mwe luti luhn mwet pahluh moul.

• Pacl nuh kwewa, pruhe ke insiyac ac lalo.

• Fal in ipeis ke kuhfa luhn Leum.

• Wi som nuh ke tempuhl pacl nuh kwewa.

• Mwe insewowo ke Pristut.

• Mwe kahsruh lahlmwetmwet nuh ke ahkpahye in kuhtaklah.

• Ac oacyacpac ono, ke pacl ahkuhtweyucki in eis fal ac orekmakihn oacna ke utuckot uh.

Oacna sie ma ikihlyucklac ke moul in ahktucktuck ac kuh in tuhkuh nuh sum, ac innek soko kom pahngon kom ac tiac sun an kom ac tilyang nuh kac, ma kuht oruh pa oruh sulwaclah lasr uh. Forwacng nuh sin Mwet Lahngo ac sruokyac pahol pa ma se ma wo emet.

Elder Richard G. Scott el luti ke mwe luti pwacye: “Pwacye muhtwacnglah engan ke toeni uh fokoko, ahkkweye, ac oruh kuht in kuh in muhtwacnglah mwe ongaiyac pucspucs ma tuhkuh nuh ke moul lasr uh lohacng na kacl Jisus Kraist. … Wacngihn ma ahkpwacyeye ma ac sikyak, tuhsruhk oasr ma na kahlwem se lah, ke pacl lal Leum ah, top an ac tuhkuh, mihslac ac sikyak, ac wacngihnlac luhn ma ac fah nwacnwaclah.”¹⁴

Ke ma pwacye inge nga fahkwack luhlahlfongi luhk. Ke inen Jisus Kraist, amen.