Sohpeilahng Kauno

Nan pahr 1998 [kid duwepwiki duweisek waluh] Mwurin sinoh eh uhdier, Ngehi oh Carol se wia aht seiloak en doadoahk kapatahiengete aht seiloak en peneinei se wa nait kisin seri pahmeno, iangahki ahn ahi pwoud nohnohu, kohla mihmihki Hawaii rahnekei.

Ni pwohng mwohn aht pahn mwesella Hawaii, nait seri sounpwung 4, Jonathan, soumwahukihda soumwahu en saleng medek, toahkte nda me e sohte kak seiloak lao mwurin rahn siluh de pahieu. Se pwungkipene me Carol pahn mihmi rehn Jonathan, a kiht pahn samwalah.

Mwurinte aht peidi, me tepin sansalda rehi me seiloak wet sohte pahn pweida ninduwen me I kasik. Aht alialu pahn marain en maram, ireklahn nih ni keilen ahl, nimwahn sehd, I pirekekla pwe ien nda ia uwen lingan en dekehu, ahnsou me konehng nan pwungen pwopwoud, ahi sohte kilang Carol, apw I tehkada me I kilikilang nan mesen en ahi pwoud nohno-me I pahn nda me I poakpoake. Ahpw kaidehkin ihme I kasik. Carol pil sohte kasik en wia ah ahnsou en mwomweit nan ihmw kelehpw rehn nait seri me soumwahu.

E pahn mie ahnsou nan atail mour me kitail pahn kin loiong soangen irair me kitail sohte kin kasik, sohpai ih irair me apwalsang aht mwomweit me sohte pweida. Dahme kitail kin wia ni soahngko kin wiawi ong kitail, ah kin wekidala koasoandi en atail mour?

Nan June 6, 1944, Hyrum Shumway, emen lietenant nan sounpei en U.S., peidi ni oaroahr en Omaha ni ahnsou me U.S. mahweniong mehn Sehmen nan Normandy France. E sohte lellong kapwal ni eh peidio, ahpw ni Sulai 27, ni ahnsou me karis en wehi kan mwekimwekid mwowe, paliwere ohkihla pospeseng en pakudang. Ni ahnsoutehkis eh koasoandi en wiahla toahkte wekidala. Mwurin pwal kei, palilaud en eh ohla doar kan mwahula, ahpw Brother Shumway solahr kak kilang wasa. Dahme e pahn wia mwurin met?

Mwurin sounpar siluh nan imwen wini en rihap, e pwurala nihmwehu nan Lovell, Wyoming. E ese me ah men wiahla emen toahkte solahr pahn pweida, apw e medewedahr en doulahte nan ah mour, pwopwoudida, oh apwalih pein ah peneinei.

E apw diarada doadoahk nan Baltimore, Maryland, wiahla soun kaweid ong me nantieng powedi ar soumwahu kan oh emen saman en repen doadoahk ong me maskun kan. Nan pein ah doadoahk, e diarada me maskun kan koahieksang dahme e kin medemedewe, oh nan erein sounpar waluh nan doadoahko, e kapdelong diren aramas maskun nan doadoahk sang soun kaweid teikan nan wehio pwon.

Pwehki ah kamehlele me e kakehr apwalih peneinei, Hyrum pekihda ah pwoud ndahieng, “Ma ke pahn wadek kisinlikou, lim sdakin, oh katange sdohsa, I kak wia me luhwe koaros.” Mwuri ira apw katengtengpene nan tehnpas sarawi oh kapahikihda seri welimen.

Nan 1954 [pahr kid duwepwiki limeisek paiou] peneinei en Shumway pwurala Wyoming, oh Brother Shumway wie doadoahk en Kaun en Wehi nan Palien Education ong me Salengepwon oh Maskun erein sounpar 32. Ahnsowo e iang pwukoahn pisop en Ward Keieun Cheyenne erein sounpahr isuh, ah mwuhr en uhd wia pwukoahn steik patriark erein sounpahr 17. Mwurin eh kommoaldi sang doadoahk, Brother oh Sister Shumway wia doadoahk en misineri nan Misin en Palieir en London England.

Hyrum Shumway mehla nan Mahs 2011. E pwilikidiong  ong nah seri kan, nein nah seri kan oh neirail kan, eh karasaras duwen aramas pwoson oh aramas me kin liki Kauno. ¹

Mahweno wekidala mour en Hyrum Shumway, ahpw e sohte peikasalki ieias en Koht me mih reh oh eh koahiek ni mour soutuk. Kitail pil sapwellimen Koht seri ngehn kan, oh “kitail pwungkihda Sapwellime kosoandio me kitail pahn alehda paliwar oh kehn mour en sampah pwe kitail en kak kekeirda pwehn unsekla oh esehla imwilahn mouratail rehn Koht ni atail sohsohki mour soutuk.” ² Sohte wekideklahn mour, kasongosong, de pingiping kak wekidala ahl soutuko—ihte atail pilipil kan, ni atail kin wie nsenatail.

Wekidalah kan, oh kahpwal kan me wiawidahsang, me kitail kin lellahng nan mour wet kin wekpeseng en mwohmw oh sais ong emenemen. Duwehte kumwail, I dehdehkier kempoakepahi kei oh peineiei sohpai ih kahpwal kan pwehki:

• Mehlahn peneinei de kempoakepatail

• Medek en mweipeseng en pwopwoud

• Sohte ahnsou mwahu en pwopwoudida

• Soumwahu doar de ohla laud

• De pil kahpwal en melmel de rerrer en sahpw ape, duwehte me apwte wiawi

Oh pil mie soangsoang kei. Mendahte en emenemen “kahpwal” kan kin wekpeseng, apw dahme kak wiawihsang kin duwepenehte-iei en ahniki koapwoaropwoar oh popohl sang tohnmetei en Sises Krais. Tomw en Sises Krais me kin kamwahuwiala kahpwal koaros ong ohlahn paliwar oh pali ngehn oh mohngiong pahtou.

Kauno ketin mwahngih, nin duwen me sohte emen kak wewehki, dahme emenemen kitail anahne, kitail en wenlahte mwowe mendahte kahpwal. Sounkomouro weksang kempoakepahtail oh peneinei ni koaloalomwahu pwehki E ketin wewehki ni unsek pwehki e ketier oh kehnehr dahme kitail miher loale. Sises Krais pwainlahr oh lokolongkier dipetailkan oh pil ketier nan ahl koaros oh kehnehr kahpwal koaros oh medek ni paliwar, loaletail de ngenitail me pahn wiawi ong kitail nan mour wet.

Preseden Boyd K. Packer padahngki: “Kupwurkalahngan oh mahk en Sises Krais kaidehn ongete me dipan …  ahpw e pil kieng aramas koaruhsie me pahn idawehn Ih koapwoaropwoar en inou en popohl kokohlahte. … Sapwellime mahk kin kamwahuwiala koaros, mendahte sohte diperail.” ³

Kitail sohte kakkaundamehkoaros me pahn wiawieng kitail nan mour wet, ahpw kitail kak pilada en powehdikahpwal kan nan atail mour. Met sohte wewehki me kahpwal kan me mengei, sohte katepe oh me kitail kakehng. Kaidehn me kitail sohte pahn kehn medek de mohngiong weirek. Ahpw e sohte wewehki me mie koapwoaropwoar oh pwehki tomwpen Sises Krais, kitail kak doula oh diar rahn mwahu kan -iei rahn me diren popohl, marain, oh peren.

Kitail wadek nan Mosaia duwen Alma, me wia samworo ong Noah, oh me nah aramas ako, me, “Kauno ketin kehkehlingkiong irail …  mweselahng nanwelo tangasang nein Noha sounpeiko.” Mwurin rahn waluh, “Re lella … sahpw kaselel oh lingan” wasa “re kawada ie imwerail impwal kan, oh tepda koadoahke sahpwo, oh tepda kawada ihmw.”⁴

Arail kahpwal kan met kamwahulahr. Re pwungkidahr alehda rongamwahu en Sises Krais. Re pepdaislahr ni inou me re pahn papah Kauno oh kapwaiada Sapwellime kosened akan. Oh “irail kaparaparal oh inenen pweida nan sahpwo.” ⁵

Apw, arail insenemwahu nektehn pahn wekila. “Sounpei en mehn Leiman kan miher nan sapwerail.”⁶ Alma oh nah aramas ako nektehn pahn wiahla lidu, oh “kahpwal laud me re mihla loalle karehieng ar kapakap ni ngidingid ong Koht.” Oh pil Irail kainapwiasang en kapakap pahn arail soun kaluduwih irail, ma soh, “mehmem me pahn dierekda nan e wie kapakap ong Koht pahn kamakamala.”⁷ Alma oh nah aramas ako sohte wia mehkot pwehn alehdi soangen lokolok wet. Eri dahme mwomwerailiehng?

Re sohte kaulimiong Koht ahpw re sohpeilahng Ih oh “kapakapiong Ih sang nan mohngiongerail.” Pwehki arail kapakap kan oh arail pwoson, Kauno ketin mahsanih: “Kumwail en nsenamwahula. …I pahn … kamarahrahda amwail wisik toutou kan, pwe kumwail en dehr kehn toutou.” Mwurin mwo, “Kauno eri kakehlailihirailda pwe ren sohla kehn wisik toutou, oh re kapwaiada kupwur en Kauno⁸ni peren oh kanengemah.” Mehndahte arail saik pitsang arail kaliduh, arail kin kapakap ong Kauno, apw sohte sohpei sang Kauno, re alehdi kapahi ong dahme arail anahn oh ninduwen kupwurukong en Kauno.

Kapokonlap en Oakotohpe 2006 [riekid weneu] o, Elder Dallin H. Oaks padahngki me “kapahi en kamwahula kin kohdo ni wiepe tohto, ehu ehu kin ong atail anahn kan, Ih me keiou poakohng kitail me ketin mwahngih. Ekei pak ‘soun kamwahula’ kin kamwahuwiala soumwahu de kansenemwahuwiala atail katoutou kan. A ekei pak, kitail kin ‘mwahula’ sang ni kakehlail kan de wewehki de kanengemahiong mehn wisik toutou kan me kin kodahng pohtail.”⁹

“Uwen kehlail en arail pwoson oh kanegamah,” Kauno ketin kapitala Alma oh nah aramas akan, pwehki arail wia lidu, “oh irail ahpw kapingkalahngan ong Kauno … , oh sohte me kak kapitirailla ihte Kauno arail Koht.”¹⁰

E kansensuwed pwehki, irail akan me anahn kin kalapw soupeisang arail mehn sawas unseko—iei atail Sounkomour, Sises Krais. E duwehte soai pwoat sang Pwuhk Sarawi pid duwen “sineik prons,” me kin padahkiong kitail me atail pilipil ni ahnsou me kitail soupahi ih kapwal kan. “Sineik kan me wie pipihr oh luhluhl,”¹¹ ngalispene kid en seri en Israel, eri mie sineik mete me kolkolda … pwe mehmen me pahn kilengdahng … pahn mourla. Oh aramas tohto kilengdahng oh mourla. … Ahpw kid en irail keptakai kahrehda irail sohte kilang, irail ahpw mehla.

“ … Ahpw me tohto irail me mohngiong kekeluwak me karehda arail sohte men kilang, eri irail ale lokolok.”¹²

Duwehte mehn Israilko mahso, kitail pil alehier luhk oh kaweid wet en kilenglahng Sounkomouro oh mourki-pwe Sapwellime mehn wisik me mengei oh audepeh kan me marahra.

Amla me pwulopwulo padahngki padahk sarawiet ni eh nda, “Dahme I ese me mehmen me pahn likih Koht pahn kin poadoandoarla nan arail kahpwal kan, oh arail kapwunod kan, katoutou kan, oh pahn pwokpwokdahla ni imwilahn rahn. ¹³

Rahn pwukat, Kauno ketin kaunopadahr diren mehn sawas kan, neitail sineik prons, koaros koasoandier pwehn sewesei kitail en kilangalahng oh liki Krais. Kaidehn kitail pahn ponsehse atail songosong kan ahpw kitail pahn kainenehiong kapedatail kan ong poahsono me kitail pilada en kawada powe.

Iangahkiong mepwukat koaros, apw kaidehn ihte:

• Poaden onohnepki pwuhk sarawih kan oh padahk kan en atail soukohp kan

• Poaden kapakap sang mohngiong unsek oh kaisihsol

• Warohng alehda kamadipw sarawi

• Kin wie pwarpwarek tehnpas sarawi

• Kapahi en priesthood

• Kaweid mwahu sang rehn aramas sehmen kan.

• Wini, ni ahnsou me e mweidada sang rehn toahkte

Sohte lipilipil dahme koasoandi sapwung nan mour me kitail kin lelohng, oh ahl me kitail sohte kin kasik me kitail anahne alu loalle, ia mwomwen atail kin sohpai ih me pein ahmw pilipil. Sohpeilahng Kauno oh koledi Sapwellime rekenleng me kin song en kapahdohng kitail me keiou pilipil mwahu.

Elder Richard G. Scott padahngki padahk mehlel wet masahnih: “Peren mehlel iangahki kehl, eimah, oh koahiek en powehdi palilaud en kahpwal kan kin pwilisang mour me poahsonki Sises Krais. … Sohte inou me dene soahng koaros pahn mwadang en mwahula, ahpw e inenen sansal, me pahn Kupwur en Kauno, e pahn mwahula ni ahnsawi, meleilei pahn powehdi, oh wasa kan me souitar pahn audaudla.” ¹⁴

I kapatahiong ahi kadehde ong mehlel pwukat. Ni mwaren Sises Krais, ahmen.