2010–2019
Valiu we I Bitim Praes blong Pem
Oktoba 2017


Valiu we I Bitim Praes blong Pem

Yumi save oltaem enjoem swit smol voes blong Tabu Spirit, we i stap talem tru tok blong valiu blong yumi long saed blong spirit.

Taem mi stap visitim kantri blong Sierra Leon long Wes Afrika, mi tekpat long wan miting we wan stek Praemeri lida i bin kontaktem. Mariama i bin lid wetem lav, gladhat, mo strong tingting we i mekem i isi long kes se hem i bin stap longtaem finis long Jos. Be Mariama i wan niu konvet nomo.

Pikja
Mariama mo gel blong hem

Sista blong hem we i biaen long hem i joenem Jos mo invaetem Mariama blong go long wan klas wetem hem. Mesej blong taem ia i rili tajem hem. Lesen hem i bin long loa blong jastiti. Hem i bin askem ol misinari blong tijim hem mo afta hem i risivim wan testemoni long Profet Josef Smit. Hem i bin baptaes long 2014, mo pikinini gel blong hem i baptaes las manis. Pikjarem, tufala impoten tijing we i lidim Mariama blong jenisim laef. Hemia loa blong jastiti mo Profet Josef Smit, tufala samting we plante taem wol i luk se i no stret gud, i nogat mining, o oli had blong folem. Be Mariama i testifae se hem i bin olsem wan bebet blong laet we i laekem blong stap kolosap long laet. Hem i talem se, “Taem mi faenem gospel mi faenem mi wan.” Hem i faenemaot valiu blong hemwan tru long ol tabu prinsipol. Valiu blong hem olsem wan pikinini gel blong God i klia long hem tru long Tabu Spirit.

Nao yumi mitim ol Sing sista blong India. Renu, hemia laswan long raet, hem i faswan aot long ol faef sista blong joenem Jos. Hem i serem ol tingting ia:

Pikja
Ol Singh Sista

Bifo mi stat blong stadi long Jos, mi no rili filim se mi mi spesel. Mi mi olsem ol nara pipol, mo sosaeti mo kalja blong mi i no rili tijim mi se mi mi gat valiu. Taem mi lanem gospel mo lanem se mi wan pikinini gel blong Papa blong yumi long Heven, i jenisim mi. kwiktaem nomo mi filim se mi spesel—God i bin krietem mi mo i krietem sol blong mi mo laef blong mi wetem valiu mo stamba tingting.

“Bifo mi kam pat blong gospel ia, mi bin stap traem blong pruvum long ol narafala se mi mi spesel. Be taem mi lanem trutok, se mi mi wan pikinini gel blong God, mi no nid blong pruvum eni samting long eniwan. Mi save se mi mi spesel … Neva ting se yu yu nating nomo.

Presiden Thomas S. Monson i talem i stret evriwan taem hem i kwotem ol toktok ia: “Valiu blong wan sol hem i hamas hem i save mekem blong kam olsem God.”1

Pikja
Taiana

Mi bin kasem blesing ia i no longtaem i pas blong mitim wan nara yang woman we i andastanem semmak trutok ia. Nem blong hem Taiana. Mi bin mitim hem long wan hospital blong ol Praemeri Pikinini long Sol Lek Siti. Taiana hem i stap long sekendri skul taem hem i kasem kansa. Hem i bin faetem strong sik ia blong 18 manis bifo hem i lusum laef samfala wik nomo i jes pas. Taiana i fulap wetem laet mo lav. Oli save hem tru long ol smael blong hem we bae i mekem yu tu yu smael mo stael blong hem blong leftemap tugeta bigfala fingga blong hem se, “yes.” Taem ol narawan i askem, “?From wanem yu Taiana?” ansa blong hem i, “?From wanem bae i no mi?” Taiana i wantem blong kam olsem Sevya blong Hem we Hem i lavem tumas. Long taem blong visit blong mifala, mi bin lanem se Taiana i bin andastanem tabu valiu blong hem. Blong save se hem i wan pikinini gel blong God, i givim hem pis mo strong tingting blong fesem ol hadtaem blong hem long wan gud wei.

Mariama, Renu, mo Taiana oli tijim yumi se Spirit bae i konfemem long yumi wanwan tabu valiu blong yumi. Taem yu rili save gud se yu wan pikinini gel blong God bae i tajem evri pat blong laef blong yu mo lidim yu blong lukluk nomo long seves blong yu evri dei. Presiden Spencer W. Kimball i eksplenem long ol naesfala toktok ia:

“God hem i Papa blong yu. Hem i lavem yu. Hem mo mama blong yu bitim mak. … Yu yu spesel. Yu yu defren, we i gat waes tingting we i no save finis we i givim yu raet blong kasem laef we i no save finis.

“Bae i no mas gat kwestin long maen blong yufala abaot valiu blong yufala olsem wan man o woman. Bigfala tingting biaen long plan blong gospel ia i blong givim wan janis long wanwan long yufala i kasem ful paoa we yufala i save kasem, we hem i blong progres i go long taem we i no save finis mo janis ia blong kam olsem wan god.”2

Mi mas talem se i nid blong mi soem wanem i defren bitwin tufala impoten toktok ia: valiu o “worth” long Inglis, mo fasin blong stap klin inaf, o “worthiness” long Inglis. Tufala i no semmak. Blong gat valiu long saed blong spirit i minim blong tekem yuwan i impoten, semmak olsem we Papa long Heven i tekem se yu impoten, be i no olsem we wol i tekem yu i impoten. Valiu blong yumi, oli putum finis bifo yumi kam long wol ia. “Lav blong God i no gat en mo bae i stap blong oltaem.”3

Long nara saed, fasin blong stap klin inaf i kam tru long fasin blong stap obei. Sapos yumi sin, yumi no klin inaf evriwan, !be yu gat valiu i stap! Yumi gohed blong sakem sin mo wokhad blong kam olsem Jisas wetem valiu blong yumi we i stap nomo. Olsem we Presiden Brigham Young i tijim: “Wan spirit we i no strong, we i no gat paoa long wol ia …, valiu blong hem i semmak long olgeta blong wol.”4 Nomata wanem, yumi oltaem gat valiu long ae blong Papa long Heven.

Nomata long naesfala trutok ia, ?hamas long yumi i stap traehad, evri taem, wetem ol nogud tingting o filing abaot yumiwan? Mi, mi wan. Hem i wan isi trap. Setan hem i papa blong evri giaman, speseli taem i mekem giaman toktok abaot huia yumi bifo laef long wol ia mo stamba blong laef blong yumi. Blong yumi tingdaon abaot yumiwan bae i no helpem yumi tumas. Be hem i mekem se yumi no stap gro. Olsem we oli tijim yumi se: “I nogat man i save mekem yu filim se yu no gat valiu sapos yu no letem hem long fas ples.”5 Yumi save stop blong komperem ol wiknes blong yumi wetem ol gudfala saed blong wan narawan. “Fasin blong komperem yumi hem i stilman blong glad.”6

Long nara lukluk, Lod i promesem yumi se taem yumi gat ol tingting we i fulap wetem klin fasin, Hem bae i blesem yumi wetem strong tingting, iven wetem strong tingting blong save huia yumi. I neva bin gat wan taem we i moa impoten blong lisin long ol toktok blong Hem: “Letem klin fasin i flasem ol tingting blong yu oltaem,” Hem i talem. “Afta nao, tras blong yu bae i gro i kam strong long fored blong God; mo … Tabu Spirit bae i fren blong yu we i folem yu oltaem.”7

Lod i soem nara trutok ia long Profet Josef Smit: “Hem we i kasem samting we i kam long God, hem i mas talem se i kam long God; mo hem i mas glad se God i kaontem hem se hem i klin inaf blong kasem.”8 Taem yumi filim Spirit, olsem we ves ia i eksplenem, yumi luksave se wanem yumi filim i kam tru long Papa long Heven we i lavem yumi tumas. Yumi talem tangkyu mo presem Hem from Hem i blesem yumi. Yumi singaot wetem glad se Hem i kaontem yumi klin inaf blong kasem.

Pikjarem se yu stap ridim ol skripja wan moning mo Spirit i toktok long yu long wan smol kwaet voes se wanem we yu stap ridim hem i tru. ?Yu save luksave Spirit mo stap hapi se yu bin filim lav blong Hem mo yu bin klin inaf blong kasem?

Ol mama. Maet yu stap nildaon kolosap long fo yia pikinini blong yu taem hem i stap talem prea blong hem bifo hem i slip. Wan filing i kam kavremap yu taem yu stap lisin. Yu filim gud mo yu filim pis. Filing ia i stap sot taem, be yu luksave yuwan, long tetaem ia, se Hem i kaontem yu se yu klin inaf blong kasem. Yumi maet samtaem, sapos i hapen, kasem ol tingting we oli kam long saed blong spirit long laef blong yumi; be yumi save oltaem filim swit smol voes blong Tabu Spirit, we i kliarem trutok abaot valiu blong yumi long saed blong spirit.

Lod i eksplenem rilesensip bitwin valiu blong yumi mo bigfala sakrifaes blong Hem we i pem praes taem Hem i talem se:

“Tingbaot se valiu blong ol sol i bigwan long ae blong God;

“From luk, Lod Ridima blong yufala, i bin safa long ded blong bodi; taswe, hem i bin safa long sobodi blong evri man, blong mekem se evri man i save sakem sin mo kam long hem.”9

Ol sista. From samting ia we Hem i bin mekem blong yumi, “yumi stap kolosap wetem Hem tru long lav ia we i fasem yumi.”10 Hem i talem se, “Papa blong mi i bin sendem mi blong oli save leftemap mi long kros; mo afta we oli bin leftemap mi long kros, blong mi save pulum evri man i kam long mi.”11

King Benjamin i eksplenem tu koneksen ia we yumi gat wetem Sevya: “Mo luk, bae hem i fesem ol temtesen, mo harem nogud long bodi, hanggri, tosta, mo filim taed, hem i harem nogud bitim we man i save fesem, hemia nomo sapos i no ded from; from luk, blad bae i kamaot long evri hol blong skin blong hem, bae hem i harem i soa plante from ol fasin nogud mo ol rabis sin blong ol pipol blong hem.”12  Elda Pol E. Koelliker i bin tijim: “Taem yumi karemaot ol samting we i pulum yumi go long wol mo praktisim fridom blong joes blong faenem Hem, yumi openem hat blong yumi long wan selestial paoa we i pulum yumi go kolosap long Hem.”13 Sapos lav ia we yumi filim from Sevya blong yumi mo wanem we Hem bae i mekem blong yumi i bigwan tumas bitim paoa we yumi givim long ol wiknes, tu tingting long yuwan, o rabis fasin, Hem bae helpem yumi winim ol samting we i kosem ol safaring long ol laef blong yumi. Hem i sevem yumi long yumiwan.

Bae mi talem tingting ia bakegen: sapos paoa blong wol ia i strong bitim fet mo tras blong yumi long Sevya, bae paoa blong wol ia bae i win oltaem. Sapos yumi jusum blong lukluk nomo long ol nogud tingting mo gat tu tingting long valiu blong yumi, mo no dipen long Sevya, bae i kam moa had blong filim ol toktok Tabu Spirit.

!Ol sista, bae yumi no konfius abaot huia yumi! I tru se, plante taem, i isi nomo blong no stap strong long saed blong Spirit bitim blong wok moa wetem paoa blong spirit blong tingbaot mo holemtaet tabu aedentiti blong yumi, be yumi save letem kaen fasin ia long ol las dei ia. Bae yumi, olsem ol sista, “bae yumi fetful long Kraes; … bae Kraes i leftemap yumi, mo bae ol harem nogud blong hem mo ded, mo sore blong hem, mo fasin blong gotru long hadtaem wetem longfala tingting, mo hop blong glori blong hem, mo blong laef we i no save finis, i stap long maen blong yu blong oltaem.”14  Taem Sevya i stap leftemap yumi i go antap, yumi save luk moa klia huia yumi, mo tu, bae yumi kam kolosap moa long Hem bitim we yumi save pikjarem. Long tabu nem blong Jisas Kraes, amen.