2010–2019
Muaj Nqi Tshaj Qhov Ntsuas Tau
Kaum Hli Ntuj 2017


Muaj Nqi Tshaj Qhov Ntsuas Tau

Peb hnov tau tus Vaj Ntsuj Plig Dawb Huv tej kev ntxhi lus tsis tu tsis tseg uas ua pov thawj txog qhov tseeb uas qhia tias peb muaj nqis.

Thaum kuv mus xyuas lub teb chaws Sierra Leone nyob hauv Afikas Sab Hnub Poob, kuv koom ib txoj kev sib ntsib uas ib tug thawj coj hauv ceg txheem ntseeg ntawm lub Koom Haum Me Nyuam Yaus coj. Mariama muaj kev hlub, kev tshav ntuj, thiab kev ntseeg loj heev thaum nws coj kev ua yooj yim rau yus xav tias nws yog ib tug mej zeej ntawm lub Koom Txoos ntev lawm. Tiam sis, Mariama yog ib tug uas tau hloov siab los ntseeg tsis ntev tas los lawm.

Daim Duab
Mariama thiab nws tus ntxhais

Nws tus niam hluas tau koom lub koom Txoos thiab caw Mariama nrog nws mus koom ib hoob kawm hauv lub Koom Txoos. Zaj lus qhia ntawd twb tshoov Mariama lub siab heev. Zaj ntawd tau qhia txog kev cai coj dawb huv. Nws tau thov kom cov tub txib qhia nws ntxiv thiab tsis ntev nws tau txais ib zaj lus tim khawv txog tus Yaj Saub Yauxej Xamiv. Nws tau ua kev cai raus dej thaum xyoo 2014, thiab nws tus ntxhais ua kev cai raus dej lub hlis tas los xwb. Cia li xav txog qhov no, ob lub ntsiab cai tseem ceeb uas ua rau Mariama hloov siab los ntseeg yog kev cai coj dawb huv thiab tus Yaj Saub Yauxej Xamiv, yeej yog tej yam uas neeg ntiaj teb xav tias tsis tseem ceeb, qub heev, los sis yog tej yam tsis muaj nqi. Tiam sis Mariama ua tim khawv tias nws zoo li ib tug kab npauj uas xav mus rau qhov kaj. Nws hais tias, “Thaum kuv nrhiav tau txoj moo zoo lawm, kuv twb nrhiav kuv tus kheej.” Nws kawm hais tias nws muaj nqi npaum li cas dhau los ntawm Vajtswv tej ntsiab cai. Tus Vaj Ntsuj Plig Dawb Huv tau qhia nws tias nws yog Vajtswv ib tug ntxhais uas muaj nqi.

Nim no cia peb ntsib tsib tug viv ncaus Singh los ntawm India. Renu, nyob ntawm sab xis, yog thawj tug ntawm tsib tug viv ncaus uas tau koom lub Koom Txoos, es nws hais li no:Ts

Daim Duab
Tsis tug viv ncaus Singh

“Ua ntej kuv pib kawm txog lub Koom Txoos, kuv tsis tshua xav tias kuv tshwj xeeb heev. Kuv yog ib tug neeg xwb, thiab kuv haiv neeg thiab lub sawm fem tsis tau qhia kuv tias kuv muaj nqi ntau. Thaum kuv tau kawm txog txoj moo zoo thiab kawm tias kuv yog peb Leej Txiv Saum Ntuj Ceeb Tsheej ib tug ntxhais, qhov no tau hloov kuv. Kuv xav tias kuv tshwj xeeb heev—Vajtswv twb tsim kuv thiab tsim kuv sab ntsuj plig thiab kuv lub neej kom muaj nqi thiab muaj ib lub hom phiaj.

“Ua ntej kuv muaj txoj moo zoo no hauv kuv lub neej, kuv twb xav kom lwm tus paub tias kuv yog ib tug tshwj xeeb. Tiam sis thaum kuv kawm qhov tseeb lawm, hais tias kuv yog Vajtswv ib tug ntxhais, kuv tsis tas qhia dab tsi rau lwm tus. Kuv twb paub tias kuv tshwj xeeb heev. … Tsis txhob xav hais tias nej tsis muaj nqi.”

Thawj Tswj Hwm Thomas S. Monson twb hais zoo thaum nws hais tias: “Qhov uas ua rau ib tug neeg muaj nqi yog qhov uas nws muaj peev xwm hloov los ua neeg zoo li Vajtswv.”1

Daim Duab
Taiana

Tsis ntev tas los kuv tau koob hmoov thaum kuv ntsib ib tug ntxhais hluas ntxiv uas to taub qhov tseeb no. Nws lub npe hu ua Taiana. Kuv ntsib nws nyob hauv lub Tsev Kho Mob Primary Children’s nyob hauv Salt Lake City. Taiana yog ib tug junior kawm high school thaum nws kawm tias nws muaj mob cancer. Nws twb ua siab loj txais kev kho mob tau 18 hli ua ntej nws tas sim neej no ob peb lim tiam tas los no. Taiana yeej muaj txoj kev kaj thiab kev hlub. Tib neeg paub nws zoo vim nws pheej luag nyav thiab tsa nws ob tug ntxiv tes xoo. Thaum lwm tus nug tias, “Vim li cas koj raug li no, Taiana?” nws teb hais tias, “Vim li cas kuv yuav tsis raug nev?” Taiana xav ua neeg zoo li nws tus Cawm Seej, tus uas nws hlub tiag tiag. Thaum wb sib tham, kuv kawm tias Taiana to taub Vajtswv saib nws rau nqi. Qhov uas nws paub tias nws yog Vajtswv ib tug ntxhais ua rau nws nyob kaj siab lug thiab ua siab loj thaum nws zoo siab nyiaj nws txoj kev txom nyem uas loj heev.

Mariama, Renu, thiab Taiana qhia peb tias tus Ntsuj Plig yuav qhia rau peb txhua tus hais tias Vajtswv saib peb rau nqi. Qhov uas nej paub tias nej yog Vajtswv ib tug ntxhais yuav hloov nej lub neej thiab coj nej thaum nej pab lwm tus txhua hnub. Thawj Tswj Hwm Spencer W. Kimball siv tej lus zoo kawg no piav hais tias:

“Vajtswv yog nej Leej Txiv. Nws hlub nej. Nws thiab nej leej niam saum ntuj ceeb tsheej saib nej rau nqi tshaj txhua yam. … Nej yeej tshwj xeeb heev. Tsis muaj leej twg zoo li nej, nej muaj ib tug ntsuj plig uas nyob mus ib txhis nej thiaj muaj cai txais tau txoj sia nyob mus ib txhis.

“Xav kom nej paub tseeb hais tias nej txhua tus muaj nqi npaum li cas. Lub ntsiab ntawm txoj moo zoo yog kom nej txhua tus muaj cib fim ua zoo npaum li nej ua tau, uas yog kev vam meej mus ib txhis thiab kev ua ib tug vaj tswv.”2

Cia kuv qhia tias peb yuav tsum paub ob lo lus sib txawv li cas: kev muaj nqi thiab kev tsim nyog. Ob lo lus no tsis zoo ib yam. Qhov uas peb sab ntsuj plig muaj nqi txhais hais tias peb yuav tsum saib peb tus kheej rau nqi ib yam li Leej Txiv Saum Ntuj Ceeb Tsheej saib peb, tsis yog zoo li neeg ntiaj teb saib peb. Twb pom zoo rau peb txoj kev muaj nqi ua ntej peb tau los rau hauv lub ntiaj teb no. “Vajtswv txoj kev hlub yeej nyob mus ib txhis thiab yuav kav ntev mus ib txhis.”3

Tiam sis, kev tsim nyog yeej yog los ntawm kev mloog lus. Qhov uas peb ua txhaum ua rau peb tsis tshua tsim nyog, tiam sis peb tseem muaj nqis! Peb tseem muaj nqi heev thaum peb hloov siab lees txim thiab siv zog ua neeg zoo li Yexus. Ib yam li Thawj Tswj Hwm Brigham Young qhia hais tias: “Tus tsis tseem ceeb, tus qis tshaj plaws nyob hauv lub ntiaj teb tam sim no … yeej muaj nqis tshaj tag nrho lub ntiaj teb.”4 Txawm yog li cas los xij, peb Leej Txiv Saum Ntuj Ceeb Tsheej yeej saib peb rau nqi.

Txawm yog peb paub qhov tseeb no, muaj pes tsawg tus uas tej lub sij hawm peb xav phem txog peb tus kheej? Kuv yeej xav li ntawd Yeej yooj yim xav li ntawd. Dab Ntxwg Nyoog yog leej txiv ntawm kev dag, feem ntau nws dag kom peb tsis ntseeg tias peb yog los ntawm Vajtswv los. Qhov uas peb xav tias peb tsis zoo yeej tsis pab peb. Qhov ntawd tab kaum peb xwb. Ib yam li lwm tus tau qhia peb hais tias, “Yog tias nej tsis pom zoo ces tsis muaj leej twg uas yuam tau nej xav tias nej tsis zoo.”5 Peb yuav tsum tsis txhob muab tej uas peb ua tsis zoo piv rau tej uas lwm tus ua zoo tshaj plaws. “Kev sib piv yeej tsis yog kev xyiv fab.”6

Tiam sis, tus Tswv qhia peb tias thaum peb xav zoo, Nws yuav foom koob hmoov rau peb kom muaj siab ntseeg, tsis hais muaj siab ntseeg hais tias peb yog leej twg tiag tiag. Yog lub sij hawm tseem ceeb tshaj plaws ua raws li Nws tej lus. Nws hais kom peb cia kev tsim txiaj txhawb peb tej kev xav kom tsis tu ncua. Thaum ntawd nej txoj kev tso siab yuav muaj zog tuaj nyob ntawm Vajtswv xub ntiag thiab tus Vaj Ntsuj Plig Dawb Huv yuav ua nej tus khub tsis tu tsis tseg.7

Tus Tswv qhia qhov tseeb ntxiv rau tus Yaj Saub Yauxej Xamiv hais tias, tus uas txais los ntawm Vajtswv los, cia nws suav hais tias yog Vajtswv li; thiab cia nws xyiv fab hais tias Vajtswv suav nws tsim nyog los txais.8 Thaum peb hnov tus Ntsuj Plig, ib yam li nqe vaj lug kub no hais, peb paub tias tej uas peb hnov yog los ntawm peb Leej Txiv Saum Ntuj Ceeb Tsheej. Peb lees paub thiab qhuas Nws vim Nws foom koob hmoov rau peb. Ces peb xyiv fab vim Nws suav tias peb tsim nyog txais tej ntawd.

Cia li xav seb yuav muaj li cas yog nej nyeem vaj lug kub thiab tus Ntsuj Plig hais lus ntxhi rau nej tias qhov uas nej nyeem muaj tseeb. Nej puas txawj hnov tus Ntsuj Plig thiab zoo siab hais tias nej hnov tau Vajtswv txoj kev hlub thiab nej tsim nyog txais tej ntawd?

Cov niam tsev, tej zaum nej yuav txhos caug ntawm nej tus me nyuam uas muaj plaub xyoo ib sab thaum nws thov Vajtswv ua ntej yuav pw. Nej txais kev tshoov siab thaum nej mloog. Nej muaj kev kaj siab lug. Nej xav li ntawd ib me pliag xwb, tiam sis nej paub hais tias thaum lub sij hawm ntawd, Vajtswv suav tias nej tsim nyog txais Nws tej koob hmoov. Tej zaum peb yuav tsis tshua txais kev tshoov siab loj heev hauv peb lub neej; tiam sis peb hnov tau tus Vaj Ntsuj Plig Dawb Huv tej kev ntxhi lus tsis tu tsis tseg, uas ua pov thawj txog qhov tseeb uas qhia tias peb muaj nqis.

Tus Tswv piav txog qhov uas peb muaj nqi heev thiab Nws txoj kev txi uas theej peb lub txhoj thaum Nws hais tias:

“Nco ntsoov tias tib neeg muaj nqis heev rau Vajtswv;

“Vim, saib seb, tus Tswv [nej] tus Txhiv Dim tau raug kev tuag ntawm sab cev nqaij daim tawv; yog li ntawd nws tau raug tag nrho tib neeg tej kev mob, xwv kom tag nrho tib neeg yuav hloov siab lees txim thiab los cuag nws.”9

Cov viv ncaus, vim los ntawm tej uas Nws ua rau peb, “txoj kev hlub muab peb sib khi ua ke.”10 Nws hais tias, “Kuv Txiv txib kuv los xwv kom kuv yuav raug coj mus ntsia saum tus ntoo khaub lig; thiab tom qab uas kuv raug ntsia saum tus ntoo khaub lig lawm, kuv thiaj coj tau txhua leej txhua tus los cuag kuv.”11

Tus Vaj Ntxwv Npeyamis kuj piav txog peb txoj kev sib raug zoo nrog peb tus Cawm Seej: “Thiab xyuas seb, nws yuav raug tej kev ntxias, thiab kev mob ntawm cev nqaij daim tawv, kev tshaib, kev nqhis, thiab kev sab, ntau tshaj li neeg nyiaj taus, tsuas yog raug kev tuag xwb; vim saib seb, ntshav tawm hauv txhua lub qhov hws los, vim nws txoj kev ntxhov siab.”12 Kev raug txom nyem thiab tej uas muaj los ntawm kev raug txom nyem ntawd ua rau peb ris Nws txiaj thiab muaj siab hlub Nws. Txwj Laug Paul E. Koelliker qhia hais tias, “Thaum peb tshem tej yam ntawm lub ntiaj teb uas nqus peb mus rau lub ntiaj teb thiab siv zog nrhiav kom tau Vajtswv, peb qhib peb tej siab tej ntsws rau ib lub hwj chim uas coj peb los mus cuag Nws.”13 Yog tias peb xav txog tus Cawm Seej thiab tej uas Nws ua rau peb ntau tshaj li peb xav txog peb tej kev qaug zog, kev ua xyem xyav, los sis tej yam peb ua tsis zoo, ces Nws yuav pab peb kov yeej tej yam uas ua rau peb raug txom nyem hauv peb lub neej. Nws cawm peb dim peb tus kheej.

Cia kuv rov qab hais dua: yog tias neeg ntiaj teb tej kev xav muaj zog tshaj peb txoj kev ntseeg thiab kev tso siab rau tus Cawm Seej, ces ntshe neeg ntiaj teb yuav kov yeej txhua zau. Yog tias peb tsom ntsoov rau tej kev xav phem thiab kev ua xyem xyav txog qhov uas peb muaj nqi, tsis muab siab npuab tus Cawm Seej, ces ntshe haj yam nyuaj rau peb txais tau tus Vaj Ntsuj Plig Dawb Huv tej kev tshoov siab.

Cov viv ncaus, thov kom peb tsis txhob ua xyem xyav hais tias peb yog leej twg! Txawm yog qhov uas peb cia peb sab ntsuj plig nyob dawb nyob do yeej yooj yim tshaj qhov uas peb siv dag zog nco ntsoov thiab cia siab tias peb yog los ntawm Vajtswv los, peb yuav tsum tsis txhob cia muaj li ntawd nyob hauv hnub nyoog kawg no. Thov kom peb, cov viv ncaus, “cia siab ntsoov rau Khetos; … thov kom Khetos tsa [peb] sawv, thiab thov kom nws tej kev txom nyem thiab kev tuag, … thiab nws txoj kev hlub tshua thiab txoj kev ua siab ntev nyiaj, thiab txoj kev cia siab ntawm nws lub yeeb koob thiab ntawm txoj sia nyob mus ib txhis, nyob rawv hauv [peb] lub siab mus ib txhis.”14 Thaum tus Cawm Seej tsa peb kom nyob siab dua, peb yuav pom meej dua ntxiv hais tias peb yog leej twg thiab peb nyob ze Nws tshaj qhov peb tau xav. Los ntawm Yexus Khetos lub npe dawb ceev, amees.