Aorōk jān jabdewōt Jon̄ok
Jemaron̄ bōk unoojdikdik ko rem̧m̧antata an Jetōb Kwojarjar kam̧ool aorōk eo ad ilo jetōb.
Ke iaar loļo̧k laļ en ilo Sierra Leone ilo West Africa, iaar bōk kūņaō ilo juon kweilo̧k kar tōl jān juon ritōl an stake Būraimere. Mariama eaar tōl kweilo̧k eo ilo iakwe, jouj, im peran āinwōt n̄e eto an membōr in Kabun̄ in. Ijoke, Mariama, eaar juon rioktak eo ekāāl.
Leddik eo jatin eaar kobatok ilo Kabun̄ in im kar karuwaineneik tok Mariama bwe en pād ilo juon iaan kūlaaj an Kabun̄ ippān. Mariama eaar lukkuun ito limoin kōn katak eo. Katak eo eaar kōn kien erreeo. Eaar kajjitōk bwe mijinede ro ren katakin e eļapļo̧k im ejjab etto eaar bōk juon naan in kam̧ool kōn Rikanaan Josep Smith. Liin eaar peptaij ilo 2014 eo, im leddik eo nejin eaar peptaij allōn̄ eo ļo̧k. Baj ļōmņak, ruo pedped in katak ko raar tōl tok Mariama n̄an oktak rej kien erreeo im Rikanaan Josep Smith, ruo un ko ekkā an laļ in loi ke rejōkkar, rem̧ōr, ak ejej tokjāer. Ak Mariama eaar kam̧ool bwe eaar āinwōt juon urur ilo meram in. Liin eaar ba, “Ke iaar lo gospel in, iaar lo eō make.” Liin eaar lo aorōk eo an ilo pedped in katak ko rekwojarjar. Aorōk eo an āinwōt juon jiron̄ nejin Anij kar kwaļo̧k n̄an e kōn Jetōb Kwojarjar.
Kiiō inaaj kōnono kōn Singh sister ro jān India. Renu, epād jabōn tuanbwijmaron̄, sister eo kein kajuon iaan sister ro ļalem raar kobatok ilo Kabun̄ in, kar kwaļo̧k ļōmņak kein:
“Mokta jān aō kar etale Kabun̄ in, iaar jab lukkuun jeļā ke elukkuun wōr tokja. Iaar baj juon iaan armej ro rellōn̄, ilo jukjukinpād eo aō im m̧anit eo rekar jab lukkuun katakin eō bwe wōr ippa jabdewōt aorōk āinwōt juon armej. Ke iaar ekkatak kōn gospel in im kar jeļā bwe ij juon leddik nejin Jemedwōj Ilan̄, eaar ukōt eō. Āliktata iaar lukkuun en̄jake aō jeno̧lo̧k—Anij eaar lukkuun kōm̧anm̧an eō im kar kōm̧anm̧an aō im aō mour kōn aorōk im kōttōbar.
“Mokta jān aō bōk gospel in ilo mour eo aō, iaar aolep iien kajjieon̄ kwaļo̧k n̄an ro jet ke iaar juon eo ewōr tokjen. Ak ke iaar jeļā m̧ool eo, bwe ij juon leddik nejin Anij, iaar jab kōņaan kwaļo̧k n̄an jabdewōt. Iaar jeļā bwe ewōr tokja. … Jab ļōmņak bwe ejjeļo̧k tokjam̧.”
Būreejtōn Thomas S. Monson eaar ba juon ennaan ejjejet ilo naan kein: “Aorōk eo an jetōb ej ļap tokjen n̄an erom̧ āinwōt Anij.”1
Iaar maron̄ in jeraam̧m̧an jem̧aanļo̧k n̄an ioon bar juon jiron̄ eo emeļeļe ejja m̧ool in wōt. Etan in Taiana. Iaar ioon e ilo Aujpitōl eo an Ajri ilo Salt Lake City. Taiana eaar 11 kūlaaj ilo high school ke eaar bōk nan̄inmej in kāānjōr. Eaar tariņaeik nan̄inmej in ium̧win 18 allōn̄ ko m̧okta jān an mej jet wiik rem̧ootļo̧k. Taiana eaar obrak kōn meram im iakwe. Eaar juon eo armej rejeļā kajjien kōn ettōn̄ dikdik im “m̧ōņōņō eo ilo e.” N̄e ro jet rej ba, “Etke kwe, Taiana?” uwaak eo kar an, “Etke ejjab n̄a?” Taiana eaar kappukot n̄an erom̧ļo̧k āinwōt an Rilo̧mo̧o̧r, eo me eaar lukkuun iakwe. Ilo loļo̧k eo am, iaar jeļā bwe Taiana eaar meļeļe aorōk eo an ekwojarjar. Jeļā bwe eaar juon jiron̄ eo nejin Anij eo eaar leļo̧k n̄an e aenōm̧m̧an im peran n̄an jelm̧ae apan̄ ko an rōtōr jān jon̄an ilo wāween eo ekar kōm̧m̧ane.
Mariama, Renu, im Taiana rej katakin kōj bwe Jetōb enaaj kam̧ool n̄an kajjojo iaad aorōk eo ad make ekwojarjar. Lukkuun jeļā bwe kwoj juon jiron̄ eo nejin Anij eo enaaj jelet kajjojo m̧ōttan ko ilo aolepān mour eo am̧ im tōl eok ilo jerbal in jipan̄ eo kwonaaj kōm̧m̧ane kajjojo raan. Būreejtōn Spencer W. Kimball eaar kōmeļeļe naan kein rem̧m̧an:
“Anij ej Jemāmi. Ej iakwe kom̧. E im jinemi ilo lan̄ rej kaorōk eok jān jabdewōt jon̄ok. … Kom̧ em̧m̧an. Juon eo ejej uwaan, kar ejaake jen jeļāļo̧kjeņ eo indeeo eo kar lewaj n̄an eok n̄an bōk mour indeeo.
“Kōm̧m̧an bwe en ejjeļo̧k kajjitōk ilo kōļmenļo̧kjeņ eo am̧ kōn aorōk eo an juon make. Karōk in jibadbad eo an gospel in ej n̄an letok iien em̧m̧an n̄an kajjojo iami n̄an tōpar aorōk eo am̧ eļap, eo ej eddōk ļo̧k eo am̧ indeeo im n̄an āinwōt anij raņ.”2
In m̧ōk kwaļo̧k aikuj eo n̄an lo oktak eo kōtaan naan kein ruo: aorōk im erreeo. Rejjab juon wōt. Jetōb aorōk meļeļe n̄an kaorōk kōj make ilo wāween eo Jemedwōj Ilan̄ ej kaorōk kōj, ejjab āinwōt an laļ in kaorōk kōj. Aorōk eo ad eaar pād m̧okta jen ad kar itok n̄an laļ in. “Iakwe eo an Anij ejjeļo̧k jem̧ļo̧kin im enaaj n̄an indeeo.”3
Ilo bar juon wāween, erreeo ej tōprakin pokake. Eļan̄n̄e jej jero̧wiwi, edik ad erreeo, ak jeban jaorōk! Jej wōnm̧aanļo̧k wōt in ukweļo̧k im kajjieon̄ in āinwōt Jisōs kōn aorōk eo ad. Āinwōt Būreejtōn Brigham Young eaar kwaļo̧k: “Eo diktata, im eļaptata jetōb eo kiiō ioon laļ in … ej aorōkin laļ in.”4 Jekdo̧o̧n ta, jej iien otemjej bōk aorōk eo ilo māj ko mejān Jemedwōj Ilan̄.
Kōjekdo̧o̧n m̧ool in ekabwilōn̄lōn̄, ewōr jete iaad epen auiaa, jān iien n̄an iien, kōn kōļmenļo̧kjeņ ko renana ak en̄jake ko kōn kōj make? Ij kōm̧m̧ane. Ej juon aujiid epidodo. Setan ej jemen aolep riab, eļaptata n̄e ej itok n̄an kapok mour kwojarjar eo ad make ilo jibadbad. Ļōmņak jidik kōn kōj make ejjab jipan̄ kōj. Ijoke ej kōbāāklikļo̧k kōj. Ilo ad emakijkij in ekkatak, “Ejjeļo̧k juon emaron̄ kōm̧m̧an bwe kwon en̄jake pok ijjeļo̧kin n̄e kwonaaj kōtļo̧k.”5 Jejjab maron̄ keidi nana eo ad n̄an em̧manļo̧k eo an ro jet. “Keidi eok make n̄an ro jet emaron̄ kunōōrļo̧k m̧ōņōņō eo am̧.”6
N̄an keidi, Irooj ej kallim̧uri kōj bwe n̄e jej bōk ļōmņak ko rem̧m̧an, Enaaj kōjeraam̧m̧an kōj kōn lōke, em̧ool lōke eo n̄an jeļā wōn lukkuun kōj. Ejjan̄in kar wōr iien em̧m̧an ļo̧k n̄an kōm̧ōkajļo̧k naan ko An. Eaar ba, “Erreo en kainōknōk ļōmņak ko am̧ ilo ejjeļo̧k m̧wijkōk.” “Innām am peran enaaj kanooj kajoor ilo im̧aan Anij; im … Jetōb Kwojarjar eo enaaj m̧ōttam iien otemjeļo̧k.”7
Irooj eaar kwaļo̧k bar m̧ool in n̄an Rikanaan Josep Smith: “E eo ej bōk jān Anij, e en watōke men in jān Anij; im e en lan̄lōn̄ bwe Anij eaar watōk e juon etōllo̧ke n̄an bōk.”8 N̄e jej en̄jake Jetōb, ilo an eoon in kōmeļeļeiki, jej kile ta eo jej en̄jake ej itok jen Jemedwōj Ilan̄. Jej kile im kam̧m̧oolol E kōn an kōjeraam̧m̧an kōj. Innām jej lan̄lōn̄ bwe jej erreeo n̄an bōke.
Baj ļōmņak n̄e kwoj riiti jeje ko rekwojarjar juon jibbon̄ im Jetōb ej unojdikdik n̄an eok bwe ta eo kwoj riiti ej m̧ool. Kwomaron̄ ke kile Jetōb eo im m̧ōņōņō bwe kwaar en̄jake iakwe eo An im kar erreeo n̄an bōke?
Mam̧a ro, kwomaron̄ in bukwelōlō ippān ajri eo nejum̧ emān an iiō ilo an jar m̧okta jen an kiki. Juon m̧ōņōņō enaaj kam̧weer eok ilo am̧ ron̄jake. Kwonaaj en̄jake m̧ōņōņō im aenōm̧m̧an. En̄jake in ekadu kitien, ak kwonaaj kile bwe kwe, ilo tōre eo, kwaar erreeo n̄an bōke. Emaron̄ jeja ad, eļan̄n̄e jenan̄in, bōk menin letok ko an jetōb ilo mour ko ad; ak emaron̄ kar emakijkij ad en̄jake im̧we ko rem̧m̧an an Jetōb Kwojarjar kam̧ool aorōk eo ad ilo jetōb.
Irooj eaar kōmeļeļeik jem̧jerā eo ikōtaan aorōk eo ad im en̄taan in pinmuur eo An ke Eaar ba:
“Keememej bwe aorōk in jetōb ko ekanooj ļap ilo mejān Anij;
“Bwe, lo, Irooj ami Ripinmuur eaar en̄taan kōn mej ilo kanniōk; kōn menin Eaar en̄taan kōn metak an aolep armej, bwe aolep armej ren maron̄ ukeļo̧k im itok n̄an E.”9
Sister ro, kōn ta eo Eaar kōm̧m̧ane n̄an kōj, “jej loklok Ippān kōn koran ko an iakwe.”10 Ekar ba, “Im Jema eaar jilkintok Eō bwe In maron̄ toto ioon debāāl; im ālkin kar kotak Eō ioon debāāl, bwe In maron̄ kan̄ōltok armej otemjej n̄aneō.”11
Kiin̄ Benjamin eaar bar kōmeļeļeik ekkejelļo̧k in ad n̄an ad Rilo̧mo̧o̧r: “Im lo, Enaaj en̄taan kōn kapo ko, im metak in ānbwin, kwōle, maro, im kijeļo̧k, em̧ool eļapļo̧k jān armej emaron̄ en̄taan, ijello̧kun wōt n̄e n̄an mej; bwe lo, bōtōtōk enaaj itok jān aolep ābwinnin, āindein naaj ļap in An en̄taan kōn jero̧wiwi ko im mennin jōjō ko an armej ro an.”12 En̄taan im tōprakin en̄taan in ekobrak būruwōd kōn iakwe im kam̧m̧oolol. Elder Paul E. Koelliker eaar kwaļo̧k, “Ilo ad etal jen m̧ad ko me rej kanōklaļtak kōj n̄an laļ in im kōjerbal anemkwoj eo ad n̄an pukot E, jej kōpeļļo̧k būruwōd n̄an juon celestial eo ej kepaakļo̧k kōj n̄an E.”13 Eļan̄n̄e jej en̄jake iakwe n̄an Rilo̧mo̧o̧r kōn ta eo Eaar kōm̧m̧ane n̄an kōj eļapļo̧k jān ad maron̄ leļo̧k ilo m̧ōjņo̧ ko, pere ko, ak iminene ko renana, innām Enaaj jipan̄ kōj anjo̧ jen men ko me rej kōmetak mour ko ad. Eaar lo̧mo̧o̧ren kōj jān m̧ōjņo̧ ko ad make.
In bar kwaļo̧k: Eļan̄n̄e kareel eo an laļ in ekajoor jān tōmak im lōke eo ewōr ippād ilo Rilo̧mo̧o̧r, innām kareel eo an laļ in enaaj anjo̧ kajjojo iien. Eļan̄n̄e jej kālet n̄an mije ļōmņak ko ad renana im pere aorōk eo ad ijeļo̧kin jirōk likattōtōt ippān Rilo̧mo̧o̧r, enaaj jino lukkuun pen n̄an en̄jake im̧we ko an Jetōb Kwojarjar.
Sister ro, jen jab pok kōn wōn kōj! Ilo an jab pidodo n̄an bōk jetōb ijelo̧kin n̄an likūt men eo an jetōb n̄an keememej im dāpij ekwojarjar eo ad make, jejjab maron̄ bōk menin ilo raan kein āliktata. Kōm̧m̧an bwe jen, āinwōt sister ro, “retiljek ilo Kraist; … a Kraist en lōn̄aj [kōj], im en̄taan ko im mej eo An; … im An tūriam̧okake im lōjokmen, im kōjatdikdik in An aiboojoj im mour indeeo, ren pād ilo [ļōmņak ko ad] indeeo.”15 Ilo an Rilo̧mo̧o̧r eo kotak kōj jān laļ, emaron̄ alikarļo̧k ad loe ejjab wōt wōn kōj ak barāinwōt bwe jān epaakeļo̧k E jān ad baj ļōmņake. Ilo āt eo ekwojarjar etan Jisōs Kraist, amen.