Kmal klou a Ututelem

Sera kuldingel er sel beluu er a Sierra Leone el ngara West Africa, eak mlo er a miting el mlara chederdellel a meredel er a stake primary. A Mariama a ulungerachl er til miting loba beltik er reng, krasia, ma klaumerang meng kora beot el uldasu el kmo locha kmal mla mo meketekt el chad er a Ikelesia. Engdi, a Mariama a kmal dirk mlo beches el chad er a ikelesia.

A merengel a mlo chad er a Ikelesia e mle siotai er a Mariama el mo obengkel el mo er a Ikelesia. A Mariama a kmal mlo mechas a rengul er a tekoi el mildung. A olisechakl a mla er sel llach er a klikiid er a teletael er a deleboes. Ngulengit er a remissionari me bol losisechakl er ngii a lemuut el bebil meng mlo er ngii a klaumerang er ngii er a Profet Joseph Smith. Ng mlo metecholb sera 2014, ea ngelekel redil a miltecholb er tial mlo merek el buil. Ka momdasu, aikel erul meklou a ututelel el olisechakl el milngetikaik er a beltel a Mariama el llach er a klikiid er a teletael er a deleboes me a Profet Joseph Smith, el ngii a erul tekoi el beluulechad a mes el oumengai, diak a belkul, malechub eng komatter. Engdi a Mariama a ulechais el kmo ngii a uai a bangikoi el soal a llomes. Ng dilu, “Serak betik er a ebangkelio, Eak miltik er ngak.” Ng miltik er a belkul lokiu a chedaol el olisechakl. Sel belkul el ngelekel a Dios el redil e mlo cholt el mo er ngii lokiu a Chedaol Reng.

Chelecha ak mo mesaod er tirkel Singh el odos el chad er a India. Renu, ngkel ngara klisichem, a mle kot er tirkel teim el odos el mlo chad er a Ikelesia, e uluchais aikel uldesuel:

“Sera kumuchel el mesuub el kirel a Ikelesia, ea kul melchesuar el kmo ngdiak kora tokubets. Ngak a di uai tirkal betok el chad, ea bouai ma siukang a dimlak lolisechakl er ngak el kmo ngak a ngar ngii a belkuk. Serak subii a ebangkelio eak mlo medengei el ko ngak a ngelekel a Demad er a Babeluades, meng ngiledechak. Ak mlo omelchsuar el kmo ak tokubets—a Dios a meral milebak engak a milebii a renguk ma klengar er ngak el ngar ngii a belkul me a moktel.

“Uchei er a ebangkelio sisb er a klengar er ngak, eak mle blechoel melasm lolecholt er a rebebil el kmo ngak a tokubets el chad. Engdi serak subii a klemerang, el kmo ngak a ngelekel a Dios eng mlo diak belkul kulecholt ngidil ngerang el mo er a ngidil chad. Ak mlo medengei el kmo ngak a tokubets el chad. … Lak momedasu el kmo kau a diak kom ngerang.”

A President Thomas S. Monson a kmal mle ungil melekoi ser a louchais aikal tekoi: “A belkul a chad a klou a ultikillel el mo uai a Dios.”¹

Ak mle ngaltengat el milsang a tara ngeasek el dil el mle medengelii tia klemerang. A ngklel a Taiana. Ak milsang er sel Primary Children’s Hospital el ngara Salt Lake City. A Taiana a mle junior er a high school sera lebetik er ngii el kasinoma. Ng mle mesisiich a reng el lomekungil er ngii el 18 months [teruich ma eiai el buil] er a uchei er a lemad er aikal mlo merek el sesei el sandei. A Taiana a mle mui er a ungil reng me a beltik el reng. Te mle medengelii el blechoel klikmechur e “oldars a aikel teblo el bechos er a chimal.” Sel bebil er a rechad oker, “Ngera uchul meng kau e Taiana?” meng ngonger, “Ngera uchul meng diak el ngak?” A Taiana a soal el mo uai a Osobel, el ngii a kmal betik a rengul er Ngii. Mesera kuldingel er ngii, eak mlo medengei el kmo a Taiana a medengelii sel chedaol el belkul. Sel lodengei el kmo ngii a ngelekel a Dios el redi a milsa budech ma duch el reng el mo chemau a ringel loba ungil omeruul el uai ngii.

A Mariama, Renu, me a Taiana a olisechakl er kid el kmo a Chedaol Reng a melisiich er kid raikel chedaol el belkud. Mesel meral modengei el kmo kau a ngelekel a Dios el redil a ngar ngii a relii er a klengar er kau e mo mengetikaik er kau sel mosiou er a bek el sils. A President Spencer W. Kimball a uluchais lolab aikal klebokel el tekoi:

“A Dios a Demad. Ng betik a rengul er kau. Ngii me a delam el ngara babeluades a kmal medengei el kmo kau a klou a ututelem. … Kau a ngodech. Di chimong, el milruul er a diak ulebengelel llomes el reng el meskau a klisichem el kirel a diak a ulebengelel a klengar.

“Lak bol ngar ngii a ker er a uldesuem el kirem el kmo kau klou a belkum. Sel moktek er a ebangkelio a ocholt a techall el mo er a ta ma ta er kemiu meng sebechem el mo er sel bkul rebab el sebechem, el ngii a diak a ulbebengelel omesuub e mo sebechem el mo rebladk.”²

Soak louchais er a klekakerous er a teblo el meklou a belkul tekoi: worth ma worthiness. Aikang a diak el di losisiu. Sel chedaol worth a belkul a kmo kid a kired lolmadsu el kmo meklou a belkud el di uai a uldesuel a Demad er a Babeluades, el diak el uai a beluulechad lesekid. A worth er kid a mlo er ngii er a uchei er a demei er a beluulechad. “A betkil a rengul a Dios a diak a ulebengelel e melemolm el mo cherechar.”³

Ea kuk bitang, a worthiness a mo er ngii lokiu a keldung. Asekum ke remuul a klengit, e kede diak de klikiid, eng di kid a diak lak a belkud! Kid a melemolm el ouchel a kengtid e melasm elm o uai a Jesus el ngar ngii a belkud. A President Brigham Young a ulisechakl: “Sel kesengik, el ngii a mekngit el reng el ngara a beluulechad … a diuai a omerelolel a beluulechad.”⁴ Meng blechoel uaisei, kid a blechoel el ngar ngii a belkud er sel luldesuel a Demad er a Babeluades.

Malta ngar ngii tial ongasireng el klemerang, ngtela er kid a ngara ringel, ra cherengel a taem, el diak doba ungil luldasu malechub eng nguldasu el kired? Ngak a uaisei. Tiang a beot el cheleuid. A Diablong a demal a rokui el blulak, tokuni sel diak lungil a olechoted el kirel a chedaol teleteled ma mokted. Sel lak dungil lomedasu el kired a diak a ngeral relii el merkid. Ng bai oreked er kid. Mesel bla dosuub, “Ng diak a chad el sebechel rulau el mo mekngit alsekum eng diak kom kongei er tir.”⁵ Kid a sebeched el tomer er kid meng diak dongaisisiu er aikel diak de dungil er ngii el mo tirkel ngar ngii a ungil er tir. “Omongaisisiu er kau el mo er a rebebil a rulau el mo diak lungil a rengum.”⁶

Mesel kuk kle kakerous, ea Rubak a menglou a rengud el kmo sel ngar ngii a klikiid el uldesued, e Ngii a omekengeltengat er kid loba klaumerang, sel klaumerang el mo medengei el kmo kid kede meral techang. Tiang a kmal lungil taem el doltirakel aikel Tekingel: Alsekum ma keldung remuul a uldesued el mo ungil, ea klaumerang er kid a merael mo mesisiich er a rengedel a Dios ea … Chedaol Reng a mo blechoel el keldemed.⁷

A Rubak a uluchais er tial dechellel a klemerang el mo er a Profet Joseph Smith. Ngkel ngmai er a Dios, moureng a sulel a Dios; e becherei mel ngara deureng el kmo a Dios a milsa el klikiid el mo ngmai aikal klengaltengat.⁸ Sel do melchesuar er a Chedaol Reng, el tial bades a mesaod er ngii, e kede mo medengei el kmo aikal do melchesuar a mlara betik ra rengud el Demad er a Babeluades. Kid a oureng a sulel e oldanges er Ngii sel lomekngeltengat er kid. Me kid a oldeu ra rengud el kmo kid a klikiid el mlo ngmai a klengaltengat.

Ka momdasu el kmo ke menguiu a chedaol llechukl er a tal tutau e a Chedaol Reng a mekokokil mengelulau er kau el kmo aikal monguiu a klemerang. Ng sebechem el metebengii a Chedaol Reng e mo ungil a rengul el kmo ke milchesuar er a beltkil a rengul a Rubak e mle klikiid el mo nguu?

Rechedil, alta ek mle outibaruach el ngara bita er a eua rekil ngelekem sera lolekoi a nglunguchel er a lebol mechiuaiu. Ma reng a molchesuar er ngii sel morenges. Ke omelchsiu ra ungil reng ma budech. Sel reng a mle kekedeb, engdi kemle omtab er ngii, er sel taem, el klikiid el mo nguu. Kid a dersta el taem, e kede nguu a klou el chedaol locholt er a klengar er kid; engdi sebeched el loutkeu er sel lungil oto er a ngerel a Chedaol Reng, el louchais a klemerang el kirel a chedaol belkud.

A Rubak a silodii sel deluill er a delongelel a belkud ma sel klou tenget er a tngakireng er Ngii sera ledung:

“Bo melbedebek el kmo a belkul a chad a klou a ututelel er a osengel a Dios;

“Maluaisei, ea Rubak el Osebelem a mlo chuarm er a kodall er a tech; meng mlo chuarm e ra ringel er a rokui el chad, ma rokui el chad bo louuchel a rengrir er a kengterir e lebo er a Rubak.”⁹

Rodos, eleng sel rirelii el merkid, “kid a orenged er ngii lokiu a beltik el reng.”¹⁰ Ng dilung, “Ea Demak a ulderchak me ak mo mekider el mora bebul a kerus; me a uriul er a blak mekider el mora bebul a krus, e bol sebechek el mengideb er a rokui el chad el mer Ngak.”¹¹

A King Benjamin a dirrek milsaod er tial tekoi el kirel a Osobel: “Ng mlo chuarm er a ongitikaik, me a ringel er a bedenged, me a klengrenger, me a chedelreng me a saul el diak a chad el sebechel mo er ngii, ng di ta el kodall; leng di mlo merael a kelesbengel rasech, ng kmal mlo klou el ringel al be er ngii el uchul a mekngit lomeruul er a rechedal.¹² Eleng uchul a kengtid. Tial ringel me a uchul aikal ringel a mlei ra rengud loba beltik el reng ma omereng el saul. A Elder Paul E. Koelliker, “Mesel dongeroid aikel mengurs er kid mo bedul a beluulechad e dousbech er sel klisiched el melilt losiik er Ngii, e kid a mok a rengud e sel klisichel a celestial e olkeed er kid el mo er Ngii.”¹³ Alsekum sel beltkil a rengud el mo er a Osobel me a aikel riruul merkid a mesisiich er sel klisiched el mo er a klitechetud, omdednger, malechub eng mekngit el blekeradel, e Ngii a mo ngosukid el mo choroid aikel teletael el ngii milskid a ringel. Ngii a olsobel er kid.

Ng soak el lemuut el melekoi: alsekum sel ongurs er a beluulechad a mesisiich er sel klemerang me a klaumerang er kid er a Osobel, ea ongurs er a beluulehcad a mo mesisiich er a bek el taem. Alsekum ke melilt lomdasu a mekngit e omdednger er a belkum, ra bai kirem melisiich er a deluill er kau me a Osobel, eng kmal mo meringel er kau el mo omelchesuar er sel odbechel a Chedaol Reng.

Rodos, lak lebo rau a rengud el kmo kid ke detechang! Malta blechoel beot sel diak doruul a chedaol ra bai blak a rengud el meruul a chedaol mebo dodengeii e doutkeu er a chedaol telteled, eng diak el sebeched el uasei a teleteled er aikal uriur klebesei. Kulengit, kid el rodos, “bomesisiich loumerang er a Kristo; … el bo le [kiderid] a Kristo, me a ringelel me a kodall, … me a klechubechub me a kemange el ongarm, me a ongiil er a klebkelle ma diak a ulebengelel klengar, bole medechel ra [uldesuem] el mo cherechar.”¹⁴  Mesel Osobel kiderid el mo rebab, e kid a mo ungil mesang el diak di dodengei el kmo kid kede techang kede dirrek el mo kmeed er Ngii el kmal dimlak domdasu el uaisei. Loba ngklel a Jesus Kristo, amen.