?Mi Mi Pikinini blong God o no?

Moses i bin lanem se hem i kamaot long tabu laen taem hem i bin toktok wetem Lod, fes tu fes. Afta long eksperiens ia, “Setan i bin kam i stap temtem hem,” i waes gud, be yet, i gat tingting blong tantanem gud aedentiti blong Moses, nao “i talem: Moses, pikinini blong man,yu wosipim mi.” Moses i bin lukluk Setan mo i bin talem: ?Huia yu?From luk, mi mi wanpikinini blong God.”⁶

Bigfala wo ia, ova long tabu aedentiti blong yumi, i wan strong faet, from ol tul blong Setan we oli stap evri ples oli wantem prapa spolem gud bilif mo save blong yumi long saed blong rilesensip blong yumi wetem God. Tangkyu tumas, yumi gat blesing ia blong gat klia visen mo andastaning abaot tru aedentiti blong yumi, stat long stat finis: “Nao God i tok bakegen, i talem se: ‘I gud yumi mekem man, mo i gud yumi mekem we hem i tekem fasin blong yumi, i olsem yumi;”⁷ mo olgeta profet blong Hem we oli stap laef oli taltalem: “Mo wanwan [man o woman] i wan spirit pikinini boe o gel blong papa mo mama we oli stap long heven, mo from hemia, wanwan i gat wan tabu fasin mo fiuja.”⁸

Blong kam blong save ol trutok ia, we i no gat tu tingting long hem,⁹ i helpem yumi blong winim ol evri kaen tes, trabol mo hadtaem.¹⁰ Taem oli askem: “?Olsem wanem nao yumi save helpem olgeta we oli traehad blong gotru wan jalenj blong olgetawan?” Wan Aposol blong Lod i givim instraksen: “Tijim olgeta aedentiti blong olgeta mo stamba tingting blong olgeta.”¹¹

Olgeta trutok ia we oli gat paoa, oli bin jenisim laef blong fren blong mi, Jen,¹² we, taem hem i yangfala, i mekem wan bigfala aksiden blong trak. Nomata we kil blong hem i bigwan, hem i harem i soa we i soa, from se narafala draeva i lusum laef blong hem. “Wan i lusum mama blong hem, mo i rong blong mi,” Jen i talem. Jen, we tu dei bifo, i stanap mo talem baehat: “Mifala ol gel blong Papa blong yumi long Heven, we Hem i lavem yumi,”¹³ naoia i stap askem kwestin: “Olsem wanem nao Hem i save lavem mi?”

“Safaring blong bodi i kam i go lus,” hem i talem, “be mi no bin ting se bae mi save kam oraet long ol kil blong filing mo spirit.”

Blong save gohed blong laef, Jen i bin haedem ol filing blong hem, i nomo toktok long man, mo i nomo filim samting. Afta long wan yia, hem i stat blong save tokbaot aksiden ia, mo wan kaonsela wetem insperesen i bin invaetem hem blong raetem toktok ia: “Mi mi pikinini blong God,” mo talem toktok ia 10 taem evri dei.

“Blong raetem ol toktok ia, hem i isi,” hem i rimemba, “be mi no save talem olgeta. …Blong talem, i mekem se samting i ril, mo mi nomo rili biliv se God i wantem mi olsem pikinini blong Hem. Bae mi benbenem mi olsem wan balong mo krae.”

Afta samfala manis, Jen i bin save mekem hemia evri dei. “Mi kapsaetem ful sol blong mi” hem i talem, “mi plis long God. …Afta nao mi stat blong bilivim ol toktok ia.” Bilif ia i bin letem Sevya i stat blong mekem gud sol blong hem we i karekil. Buk blong Momon i tekem i kam, kamfot mo strong paoa long tingting long Atonmen blong Hem.¹⁴

“Kraes i filim ol sobodi blong mi, ol harem nogud blong mi, mo sem blong mi,” Jen i talem long en. “Mi bin filim klin mo stret lav blong God mo !mi neva filim wan samting olsem we i gat strong paoa! !Blong save se mi mi wan pikinini blong God, i save ia we i gat moa strong paoa we mi gat!

Ol brata mo sista. ?Olsem wanem nao, wanwan long yumi i save filim paoa blong andastanem tabu aedentiti blong yumi? Hem i stat taem we yumi lukaot blong save God, Papa blong yumi.¹⁵ Presiden Russel M. Nelson i testifae: “I gat wan samting we i gat paoa i hapen taem wan pikinini blong God i lukaot blong save moa abaot Hem mo Pikinini blong Hem we Hem i Lavem.”¹⁶

Blong lanem abaot mo stap folem Sevya, i stap helpem yumi blong kam blong save Papa. “From se hem i stret pikja blong Papa blong hem,”¹⁷ Jisas i talem: “Mi mi Pikinini blong God mi no save mekem wan samting nating long tingting blong mi nomo. Mi save mekem ol samting ya nomo we mi luk Papa blong mi i stap mekem.”¹⁸ Olgeta toktok mo wok blong Kraes i soemaot huia stret i God, mo rilesensip blong yumi wetem Hem.¹⁹ Elda Jeffrey R. Holland i tijim: “Wetem blad we i kamkamaot long evri hol blong skin blong Hem, mo wetem ol trabol krae blong maot blong Hem, Kraes i bin lukaotem Man ia we Hem i stap lukaotem oltaem—Papa blong Hem. ‘Abba,’ Hem i singaot, ‘Papa.’”²⁰

Olsem we Jisas i lukaotem Papa blong Hem long Getsemane, i semmak long yang Josef Smit, long 1820 taem hem i prea mo i askem God long Tabu Bus. Afta we hem i bin ridim: “Sapos wan long yufala i no gat waes, hem i mas askem long God,”²¹ nao Josef i go stap hemwan blong prea.

Hem i raetem: “Mi bin nildaon mo stat blong talem ol tingting blong hat blong mi long God. …

“… mi bin luk wan laet, i saen antap i kamdaon, stret antap long hed blong mi. …

“Mi bin luk tufala Man, we i no gat wan toktok we i save tokbaot laet mo glori blong Tufala, mo Tufala i stap flot nomo long ea antap long mi.Wan long Tufala i toktok long mi, i singaotem nem blong mi, mo talem wetem fingga blong Hem i poenem narawan—[Josef,]Hem, Hem i Pikinini blong Mi we Mi Lavem Tumas.!Lisin gud long Hem!²²

Taem yumi stap folem ol eksampol blong Sevya mo Profet Josef, blong stap tru blong luklukgud long God, bambae yumi kam blong andastanem, long wan ril wei, semmak olsem Jen, se Papa blong yumi i save yumi, mo we yumi ol pikinini blong Hem.

Yufala ol yang mama, we plante taem yufala i filim se samting i bigwan tumas mo wota i kavremap yufala taem yufala i traehad blong resemap “wan jeneresen we i save stanap agensem sin,”²³ yufala i no tingdaon long impoten rol blong yufala insaed long plan blong God. Long taem we i had—maet taem yufala i stap ronem ol smol pikinini mo wan nogud smel i kamaot long kijin i talem se gudfala kaekae blong naet, naoia i wan ofring we i bon—yufala i mas save se God i mekem i tabu, ol dei ia we oli moa had.²⁴ “Yufala i no fraet; Mi mi stap wetem yufala,”²⁵ Hem i talem kwaet long yumi bakegen. Mifala i gat ona long yufala taem yufala i stap gat hop ia we Sista Joy D. Jones i talem: “Ol pikinini blong yumi, oli nidim blong andastanem tabu aedentiti blong olgeta.”²⁶

Mi invaetem wanwan long yufala blong lukaotem God mo Pikinini blong Hem we Hem i Lavem. “I no gat eni nara ples moa,” Presiden Nelson i talem, “we oli stap tijim ol trutok ia oli klia moa mo wetem paoa bitim olsem we i stap long Buk blong Momon.”²⁷ Openem ol pej blong hem, mo lanem we God i mekem “evri samting blong gudlaef blong yumi mo hapines blong yumi.”²⁸ Se Hem i gat sore mo gladhat, i slo blong kros, i gat longfala tingting long hadtaem, mo i fulap long gud fasin.”²⁹ Mo “evriwan i olsem Hem.”³⁰ Taem yu filim nogud, yu lus, yu fraet, tingting i harem nogud, yu no glad, yu hanggri, o no gat hop long ol hadtaem we i kasem mak blong hem,³¹openem Buk blong Momon, mo bambae yu kam blong save se “God bae i neva lego yumi. Hem i neva mekem olsem, mo bambae Hem i neva mekem. Hem i no save mekem. Hemia i no fasin blong Hem blong mekem olsem.”³²

Blong kam blong save Papa blong yumi, i jenisim evri samting; speseli hat blong yumi, taem we kwaet Spirit blong Hem i konfemem tru aedentiti blong yumi mo hamas yumi impoten long ae blong Hem.³³ God i stap wokbaot wetem yumi folem rod ia blong kavenan taem yumi stap lukaotem Hem tru long ol prea blong askem samting, ol skripja we yumi luklukgud insaed long ol, mo taem yumi obei mo traehad.

Mi lavem God blong ol papa blong mi,³⁴ “Lod we I Gat Olgeta Paoa,”³⁵ we i stap krae wetem yumi long ol harem nogud blong yumi, i gat longfala tingting blong stretem yumi long ol fasin we oli no stret mo oli no gud, mo i stap glad taem “yumi lego evri sin blong yumi blong kam blong save Hem.”³⁶ Mi stap wosipim Hem, we i oltaem “wan papa blong olgeta we oli no gat papa,”³⁷ mo wan kompanion long olgeta we oli no gat kompanion. Wetem tangkyu, mi testifae se mi kam blong save God, Papa blong mi, mo talem witnes blong mi abaot ol stret samting, ol stret fasin blong Hem, mo “fasin blong Hem we i gud we i gud tumas.”³⁸

Blong yumi evriwan i save andastanem tru mo holemtaet tabu laen blong yumi³⁹ olsem wan pikinini blong God taem yumi kam blong save Hem, we “i wan tru God mo Jisas Kraes we Hem i bin sendem Hem i kam,”⁴⁰ hemia i strong prea blong mi, long nem blong Jisas Kraes, amen.