Ngang emon Noun Kot?
Ifa usun emon me emon kich mi tongeni mefi ewe manamanen ach sipwe weweiti usun nonnomuch seni nang? A poputa ren ach kutta ach sipwe sinei Kot, Semach we.
Ua keran chok fiti inei we ne no fan non am we imwen fan mi simen. Ua ingeno ren mongungun semirit a feito seni ewe chok rumwen Kinter ua fen fiti chommong ier a no. Ua fetan nukunupen ewe rum me katon ekkewe souemwen mi uren tong ra afanafana itenapen ei ier “Ngang emon Noun Kot.”1 Ua amenimen nupwen ua chemeni ekkewe sense ir mi tipepos me tong, ekkewe fansoun aua kon me nom, ra kan soun nengeniei—ena kukkun at mi nukumach nesopun ewe sea, usun ita ra ekieki, “Met I ennetin emon noun Kot? Me ion a tinato ikei?”2
Ua tingorei emon me emon kich sipwe suki netipach ngeni ewe Ngun mi Fel, ewe a “pwarata ngeni ngunuch pwe kich noun Kot.”3
An Preseten Boyd K. Packer kapas mi fatoch me auchea: “Ami noun Kot. I ewe semen ngunumi. Ren pekin ngun ami oua uputiw seni mi tekia, noun ewe Kingen Nang. Oupwe fori ena ennet non ami ekiek me oupwe amwochu. Nge inamo chommong tappin aramas non uruon ami manau, ese nifinifin mwicheich ika aramas oua tupuni, ewe tettenin uruon ngunumi mi tongeni epwe makketiw won efoch chok nain. Ami noun Kot!”4
“Nupwen oua … kuna Semach we,” Brigham Young a awewei, “oupwe kuna emon oua fen chiechi ngeni non fansoun nakatam , me I epwe etiwa kemi non Poun, me oupwe moneta ne turunong non An foropachei kemi me kis.”5
Ewe Maun mi Nap usun Nonnomuch seni Nang
Moses a kaeo usun pisekin seni nang ren an kapas nenefengen me ewe Samon. Mwirin ena, Setan a feito sotuni ren pwetete nge rochongaw an epwe angawa nonnomun Moses, a apasa: Moses, noun aramas, fen ngeniei. Iwe … Moses a neneta won Setan me apasa: En ion? Pun nengeni, Ngang emon noun Kot.6
Ei maun mi nap usun nonnomuch seni nang a soposopono nupwen an Setan anapano pisekin an epwe atupu kich pwe epwe ataeno ach nuku non me mirit usun nefinach ngeni Kot. Kinisou, sia fen feioch ren fatochun me wewe ren ennetin nonnomuch seni nepoputan: “Iwe God a apasa, Iei sipwene forata aramas, repwe chok ussuch,”7 me Soufos mi manau ra apasa, “Emon me emon noun semach me inach won nang anuon me fopun ngun mi achengicheng, iwe, ren ena, mi wor nonnomur seni nang me met repwe apwonueta.”8
Ach sinei usun ekkei ennet fiti apinukunuk9 a anisi kich ach sipwe akkufu sossot, osukosuk, me sokopaten riaffou.10 Nupwen a eis, “Ifa usun sia tongeni anisi ekkewe ra osukosuk ren [ar pwisin weires]?” emon Aposelin ewe Samon a aurour, “Aitir usun nonnomur me auchear.”11
“Ewe Mirit mi Kon Nap a Nom Rei”
Ekkei ennet mi nap ir mi ekesiwini manauen chienei we Jen,12 ewe fansoun nupwen an emon serafo a efisi ew watten akseten. Ina mwo ika riaffoun inisin mi watte, a mefi watte metek pokiten ewe emon chon wunteng a mano. “Inen emon a mano, me a tipisi,” a apasa. Jen, ekkoch chok ran mwan a uta me apasa, “Kich noun Semach won Nang, ewe mi tongei kich,”13 iei a aureki, “Ifa usun epwe tongei ei?”
“Ewe riaffoun inis a muchuno,” a apasa, “nge use ekieki pwe upwe tongeni chikar seni feiengawen memef me ngun.”
Ren an epwe nonnom, Jen a opaochueno an memmef, a imuno me fanafaneno. Mwirin ew ier, nupwen a keran tongeni kapas usun ewe akseten, emon chon aninis a tingorei pwe epwe makkei ewe kapas “Ngang emon noun Kot” me apasa fan 10 iteiten ran.
“Ai makkei ekkei kapas mi mecheres,” a achema, “nge use tongeni apasar. … A weires, me use nuku pwe Kot a mochen ai upwe Noun. Ua kan pworetiw me kechiw.”
Mwirin ekkoch maram, Jen a keran tongeni awesi ewe angang iteiten ran. “Ua pwarata unusen netipei,” a apasa, “sio ngeni Kot. … Mwirin ua poputa ne nuku ekkewe kapas.” Ei nuku a mut ngeni ewe Chon Amanau an epwe poputa echikara feiengawen ngunun. Ewe Puken Mormon a awora kinamwe me pworacho non An Achasefan.14
“Kraist a mefi ai metek, ai riaffou, ai tipis,” Jen a asopwano. “Ua mefi an Kot tong mi nimenimoch me use pwan weri och mettoch mi kon manaman! Ai sinei pwe Ngang emon noun Kot ina ewe mirit mi kon nap a nom rei!”
Kutta ach sipwe Sinei Kot, Semach
Ifa usun emon me emon kich mi tongeni mefi ewe manamanen ach sipwe weweiti usun nonnomuch seni nang? A poputa ren ach kutta ach sipwe sinei Kot, Semach we.15 Preseten Russell M. Nelson a pwarata, “Och mettoch mi manaman a fis nupwen emon noun Kot a kutta an epwe kon sinei usun I me Noun we Achengicheng.”16
Ach kaeo usun me tapweno mwirin ewe Chon Amanau a anisi kich ach sipwe sinei usun ewe Sam. “Usun … chok nikinikin [Seman],”17 Jises a aitikich, “Ewe Nau ese tongeni pwisin fori och mettoch. A chok fori minne a kuna Seman we a fori.”18 An Kraist kapas meinisin me angang a pwarano ennetin napanapen Kot me nefinach ngeni I.19 Elter Jeffrey R. Holland a aitikich, “Ren cha a pwa seni mononan meinisin me ew kechiwen riaffou won Tinnawan, Kraist a kutta I ewe a soun kukutta—Seman we. “Abba,’ A kechiw, ‘Papa.’”20
Usun chok Jises a ennetin kutta Seman we non Gethsemane, iwe kukkun Joseph Smith, non 1820, a iotek ne kutta Kot me nein Ekkewe ira mi Pin. Mwirin an anneani “Nge ika emon me neimi ese mirit, epwe tingor ngeni Kot,”21 Joseph a feino epwe iotek.
“Ua fotopukutiw,” a makketi, “me poputa ne pwarata mochenin netipan ngeni Kot. …
“… Ua kuna efoch urun saram a nom wenewenen asetan mokurei. …
“… Ua kuna ruemon Aramas, aukukun ar ning me saram use tongeni awewei, mi ukuta asan seniei me non asepwan. Emon a fos ngeniei, kokoriei ren itei o apasa, me itini ngeni ewe emon—[Joseph,] Iei nei At mi Achengicheng. Ausening ngeni I!”22
Nupwen sia tapweno mwirin ewe nenien appiru an ewe Chon Amanau me ewe Soufos Joseph non ennetin kutta Kot, sipwe angei ew weweoch non ew ennetin napanap, usun Jen a fori, pwe Semach mi sinei kich ren itach pwe kich Noun.
Ngeni in mi chok kukkun, ekkewe oua soun mefi kuf me pekus nupwen oua achocho ne amari “ew tappin aramas mi tongeni ungeni tipis,”23 ousap tipemwaramwa ren auchean wisemi me non an Kot kokkot. Non fansoun pekus—eni nupwen oua chefetanei noumi kewe kukkun semirit me ewe pwonnen kar seni ewe nenien kuk a esine ngeni kemi pwe ami mwongon faf mi mwoneta a winiti ew asoren kek—oupwe sinei pwe Kot a enimenimochu ranimi kewe mi weires.24 “Kosap nuokus, ngang mi nonnom reom,”25 A pesei non kinamwe. Aua sufoniti kemi nupwen oua apwonueta an Sister Joy D. Jones apinukunuk, ewe a apasa, “Mi fich ngeni nouch kewe ar repwe weweiti nonnomur seni nang.”26
Ua tingor ngeni emon me emon kich ach sipwe kutta Kot me Noun we Achengicheng. “Ese wor neni,” Preseten Nelson a apasa, “ekkewe ennet repwe kon aitikich me ia non fatafatoch me pochokun nap seni me non ewe Puken Mormon.”27 Suki peichan me kaeo pwe Kot a fori “mettoch meinisin fan iten [ach] tufich me pwapwa.”;28 pwe I mi umoumoch me kirekiroch, songomang , tipepos me uren och”;29 me “meinisin ra nonno chok ngeni [I].”30 Nupwen oua mefi metek, poutuno, nuokus, noninen, netipengaw, echik, ika mefi anamon non fansoun weires31— suki ewe Puken Mormon, me oupwe apareni pwe “Kot esap tongeni nikitikicheno, Ese mwo fori, me esap fori. I ese tongeni. Esap ina nonnomun [an epwe fori].”32
Ach sinei usun Semach a siwini mettoch meinisin, akkaewin netipach, nupwen Ngunun mi pwetete a apungano ennetin nonnomuch me aucheach me ne mesan.33 Kot a fetan ren won ewe aanen pwon nupwen sia kutta I non iotek, annea pukefel, me achocho ne aneasochis.
Ewe Murinon Napanapen Kot—Ai Pwarata
Ua tongei ewe Koten semei kewe,34 ewe Samon Kot mi Napanap,35 ewe a fitikich ne kechiw non ach riaffou, a tipepos ne fonou ach sise wenechar, me a pwapwa nupwen sia kutta ne “aturano [ach] kewe tipis meinisin pwe sipwe sinei [I].” 36 Ua fen ngeni I, I ennetin “semen ekkewe ese wor semer,”37 me chienan ekkewe ese wor chiener. Kinisou, ua pwarata pwe ua fen sinei Kot, Semei, me pwarata usun unusochun, nikinikin, me “murinon Napanapan.”38
Pwe kich meinisin sipwe ennetin weweiti me aucheani ach “osufonu tufichin ach uputiw”39 ren emon noun Kot ren ach sinei I, “ewe emon chok Kot, mi ennet me Jesus Kraist, ewe [A] tinato”40 ina ai ennetin iotek. Non iten Jises Kraist, amen.