Anak Bala Ako sang Diyos?

Nagtuon si Moises sang iya balaan nga himata sang nagistorya siya sa Ginuo sing atubanganay. Pagkatapos, “nagabot si Satanas nga nagasulay,” nga may tinago pero mapintas nga handum nga gumonon ang kinaugali ni Moises. “Siling niya: Moises, anak sang tawo, simbaha ako. Kag … nagtulok si Moises kay Satanas kag nagsiling: Sin-o ka man? Kay tan-awa, Ako anak sang Diyos.”⁶

Ini nga dako nga gera bangod sa balaan nga kinaugali nagapadayon sing grabe, kay nagadamo-damo ang mga galamiton ni Satanas para gub-on ang aton pagtuo kag pagkahibalo parte sa relasyon naton sa Diyos. Pero salamat nga ginbendisyonan kita sang klaro nga pagintyende sang aton matuod nga kinaugali halin pa sang ginsugoran: “Kag ang Diyos nagsiling, magtuga kita sang tawo sa aton dagway, kaanggid sa aton,”⁷ kag ang mga buhi nga propeta nagapahayag, “Ang kada [tawo] isa ka pinalangga nga espirituhanon nga anak nga lalaki o anak nga babayi sang ginikanan nga langitnon, kag, tungod sina, ang kada isa may balaan nga kinaugali kag kapalaran.”⁸

Ang pagtuon sini nga mga kamatuoran sigurado gid⁹ makabulig sa aton nga lampuasan ang mga pagtilaw, problema, kag kada sari sang kabudlayan.¹⁰ Sang ginpamangkot ang isa ka Apostol sang Ginuo, “Paano naton mabuligan ang mga nabudlayan [sang personal nga pagtilaw]?” gintudlo niya, “Tudloan sila sang ila kinaugali kag ila tinutuyo.”¹¹

Ini nga gamhanan nga kamatuoran nagpabag-o sang kabuhi sang amiga ko nga si Jen¹². Sang lamharon pa siya, drayber siya sang kotse nga nabunggo sa iban nga salakyan. Dako ang halit sa lawas niya, pero grabi gid ang nabatyagan niya nga sakit tungod napatay ang drayber sang nabunggoan niya. “May nadula-an sang nanay, kag ako ang may kulpa,” hambal niya. Pila ka adlaw antis, si Jen nagtindog kag nagsiling, “Kita mga anak nga babayi sang aton Amay nga Langitnon; palangga niya kita.”¹³ Pero sang aksidente, namangkot siya, “nga-a nga palangga Niya ako?”

“Naglapas ang pisikal nga pagantos,” hambal niya, “pero abi ko indi gid ako maumpawan sang sakit sa akon balatyagon kag espiritu.”

Para mangabuhi, si Jen nagtago sang iya mga balatyagon sing madalom, kag nangin mahipos kag binhod. Pagkatapos isa ka tuig, sang handa na siya nga istoryahan ang natabo, isa ka maalam nga counselor naglaygay sa iya nga isulat ang tinaga “Ako anak sang Diyos” kag suliton hambal pulo ka beses kada adlaw.

“Mahapos lang ang pagsulat sining tinaga,” ginsaysay niya, “pero wala ako makahambal sini. … Kay kon ihambal ko, buot silingon matuod ina, kag wala man ako nagpati nga ginabaton ako sang Ginuo bilang Iya anak. May beses nga nagbalikoko ako kag naghibi.”

Pagkatapos pila ka bulan, nahimo na ni Jen nga tumanon ang laygay adlaw-adlaw. “Ginbo-bo ko ang bug-os ko nga kalag,” siling niya, “nga nagapakiluoy sa Diyos. … Kag amat-amat, nagpati ako sa tinaga.” Tungod sini nga pagpati, ang Manluluwas nakasugod sa pagpaayo sang iya nasakitan nga kalag. Ang Libro ni Mormon nagdala man sang katawhay kag kaisog bangod sa pagbayad-sala ni Hesu Cristo.¹⁴

“Nabatyagan ni Cristo ang akon kasakit, kasubo, kag kulpa,” siling ni Jen. “Nabatyagan ko ang puro nga paghigugma sang Diyos kag wala gid ako may naeksperiensyahan nga daan nga amo’na ka baskog! Ang pagkahibalo nga anak ako sang Diyos amo ang pinakagamhanan nga kaalam nga may ara ako!”

Mga kautoran, paano naton maeksperiensyahan ang gahum sang pagintyende sang aton balaan nga kinaugali? Masugod ini paagi sa pagtinguha nga kilalahon ang Diyos, nga aton Amay.¹⁵ Si Presidente Russell M. Nelson nagpamatuod, “May mabaskog nga matabo kon ang isa ka anak sang Diyos magtinguha nga mas kilalahon Siya kag ang Iya Hinigugma nga Anak.”¹⁶

Mas makilala naton ang Amay paagi sa pagtuon kag pagsunod sa Manluluwas. “Sa dagway gid sang iya [Amay],”¹⁷ gintudlo ni Hesus, “Wa’ay mahimo ang Anak kon sa iya lang, luwas sa nakit-an niya nga ginahimo sang Amay.”¹⁸ Ang kada pulong kag buhat ni Cristo nagapakita sang matuod nga kinaugali sang Diyos kag ang aton relasyon sa Iya.¹⁹ Si Elder Jeffrey R. Holland nagtudlo, “Sang si Cristo may dugo nga nagaguluwa sa kada buho sang panit kag isa ka masakit nga pagtuaw sa Iya bibig, ginpangita Niya ang tawo nga pirme Niya ginapangita—ang Iya Amay. ‘Abba,’ gintuaw niya, ‘Papa.’”²⁰

Parehas nga maukod si Hesus nagpangita sa Iya Amay sa Gethsemane, amo man ang batan-on nga si Joseph Smith nagpangita sa Diyos sa Sagrado nga Kakahoyan sang 1820 paagi sa pagampo. Sang nabasa niya, “Kon may isa sa inyo nga nagakulang sang kaalam, mangayo siya sa Diyos,”²¹ naglakat si Joseph para magpangamuyo.

“Nagluhod ako,” sulat niya, “kag ginhalad ko ang mga handum sang akon tagipusoon sa Diyos.  ...

“...May nakit-an ako nga haligi sang kasanag sa ibabaw sang akon ulo. ...

“...Nakakita ako sang duha ka Tawo, nga ang kasilaw nila kag himaya indi gid masaysay, nga nagatindog sa ibabaw ko sa hangin. Ang isa sa ila naghambal sa akon, nga nagatawag sa akon gamit ang akon ngalan, kag nagsiling, nga ginatudlo ang isa—[Joseph,] Siya ang Akon Hinigugma nga Anak. Pamatii Siya!”²²

Kon sundon naton ang ihemplo sang Manluluwas kag Propeta Joseph kag maukod nga magpangita sa Diyos, kita, parehas kay Jen, magaabot sa hugot nga pagintyende nga kilala kita sang aton Amay, kabalo siya sang aton ngalan, kag mga anak Niya kita.

Sa mga iloy, labi mga batan-on nga iloy, may beses nga sa pamatyagan niyo daw ginalumos kamo samtang nagapadako sang “henerasyon nga indi madutlan sang sala,”²³ indi niyo gid pagpagagmayon ang inyo importante nga parte sa plano sang Diyos. Sa mga mabudlay nga tinion—siguro kon ginalagas niyo ang inyo mga bata kag mabalitaan kamo sang baho sa kusina nga sunog na ang inyo panyapon—intyendehon niyo nga ginapakabalaan sang Diyos ang mga adlaw nga tam-an ka budlay.²⁴ Ginapasalig Niya nga, “Indi ka magkahadlok; kay upod mo ako.”²⁵ Ginataha namon kamo kay ginatuman niyo ang ginala-uman ni Sister Joy D. Jones, nga nagsiling, “Ang aton kabataan may katarungan nga maintyendehan ang ila balaan nga kinaugali.”²⁶

Ginahagad ko ang tagsa-tagsa sa aton nga pangitaon ang Diyos kag ang Iya Hinigugma nga Anak. Hambal ni Presidente Nelson nga “Wa’ay iban nga nagatudlo sina nga kamatuoran sing mas klaro sang sa Libro ni Mormon.”²⁷ Abrihan niyo lang ang mga panid kag tun-an nga ang tanan nga ginahimo sang Diyos “para ina sa [aton] kaayohan kag kalipayan”;²⁸ kag “maluluy-on siya kag maalwan, indi dali-dali mangakig, pasensyoso kag puno sang kaayohan”;²⁹ kag “ang tanan nga tawo palareho sa mata [Niya].”³⁰ Kon nasakitan kamo, natalang, nahadlok, nasuboan, ginagutman, o napabay-an sa kapitipit sang kinabuhi³¹—abrihan niyo ang Libro ni Mormon, kag mabal-an niyo nga “ang Diyos indi gid magpabaya sa aton, wala gani sang una pa, kag indi gid sa gihapon. Indi siya sarang nga magpabaya. Indi amo ina ang iya ugali.”³²

Ang pagkakilala sa aton Amay makapabag-o sang tanan, labi ang aton tagipusoon, kay ginapamatud-an sang Iya mahinay nga Espiritu ang aton matuod nga kinaugali kag aton dako nga pulos sa Iya pananawan.³³ Nagaubay ang Diyos sa aton sa dalan sang kasugtanan samtang ginapangita naton Siya sa pagpangamuyo, pagtuon sa balaan nga kasulatan, kag pagsunod.

Palangga ko ang Diyos sang akon katigulangan,³⁴ ”Ang Ginoong Diyos nga Makagagahum,”³⁵ nga nagatangis siya sa aton kasubo, pasensyoso siya nga magtadlong sang aton mga sala, kag nagakalipay siya kon tinguhaan naton nga “dulaon ang tanan nga sala [naton] para kilalahon [Siya].”³⁶ Ginasimba ko Siya, nga amo ang “amay sang mga ilo”³⁷ sa gihapon, kag ang upod sang mga isahanon. Nagapasalamat ako kag nagapamatuod nga nakilala ko ang Diyos, nga akon Amay, kag ginasaksihan ko ang iya kahimpit, pagginawi, kag “kataas-taasan sang [Iya] ugali.”³⁸

Ginapangamuyo ko nga ang tagsa-tagsa sa aton makahangop kag magahalong sa aton “harianon nga panublion”³⁹ bilang anak sang Diyos paagi sa pagkakilala sa Iya, “nga amo ang bugtong nga matuod nga Diyos, kag kay Hesu Cristo, nga [Iya] ginpadala.”⁴⁰ Sa ngalan ni Hesu Cristo, amen.