Kuv Puas Yog Vajtswv Ib tug Me Nyuam?
Peb txhua tus yuav ua li cas kom txais tau lub hwj chim uas muaj thaum peb to taub peb lub keeb los ntawm Vajtswv? Yuav pib muaj li no thaum peb nrhiav kom paub Vajtswv, peb Leej Txiv.
Tsis ntev tas los kuv twb nrog kuv niam mus rau wb lub tsev koom txoos uas yog pob zeb ua. Kuv xav mloog tej lub suab yau yau uas kuv hnov tawm ntawm chav rau Koom Haum Me Nyuam Yaus uas kuv twb nyob haud ntau xyoo tas los, es kuv mus hauv chav ntawd thiab tau saib cov thawj coj qhia xyoo no lub ntsiab lus “Kuv Yog Vajtswv Me Nyuam.”1 Kuv luag nyav thaum kuv nco txog kuv cov xib hwb uas ua siab ntev thiab hlub kuv, cov uas thaum lub sij hawm hu nkauj, tau saib kuv—tus me nyuam tub ntxhov quav niab uas zaum ntawm lub rooj zaum ntev—zoo li lawv hais tias, “Nws puas yog Vajtswv ib tug me nyuam tiag tiag? Thiab leej twg yog tus uas xa nws los nyob no?”2
Kuv caw peb txhua tus kom peb qhib siab rau tus Vaj Ntsuj Plig Dawb Huv, tus uas “qhia rau peb lub siab hais tias peb yog Vajtswv cov me nyuam.”3
Thawj Tswj Hwm Boyd K. Packer tej lus los meej thiab muaj nqi: “Nej yog Vajtswv cov me nyuam. Nws yog leej txiv ntawm nej tus ntsuj plig. Hais txog sab ntsuj plig nej tau yug los ntawm ib tug vaj ntxwv, nej yog cov me nyuam ntawm tus Vaj Ntxwv Nyob Saum Ntuj Ceeb Tsheej. Cia li muab siab npuab qhov tseeb ntawd thiab cim ntsoov. Txawm nej muaj tiam neeg npaum li cas hauv nej caj ceg ntawm lub ntiaj teb no, txawm nej yog xeem neeg dab tsi los yog nej cov neeg zoo li cas los, caj ceg ntawm nej tus ntsuj plig los tsuas sau ib txoj kab xwb. Nej yog Vajtswv cov me nyuam!”4
Brigham Young tau hais tias, “Thaum nej … pom peb Leej Txiv, nej yuav pom ib tug neeg uas nej twb paub ntev lawm, thiab Nws yuav txais nej los puag nej hauv Nws lub xub ntiag, thiab nej yuav npaj siab puag Nws thiab nwj Nws.”5
Kev Tsov Rog Loj txog Peb lub Keeb Los ntawm Vajtswv
Mauxes tau kawm txog nws lub keeb los ntawm Vajtswv thaum nws nrog tus Tswv tham tim ntsej tim muag. Tom qab ntawd, “Dab Ntxwg Nyoog los ntxias nws,” nrog tej kev haub kev ntxias phem uas nws xav siv kom muab Mauxes lub keeb ntxeev, “hais tias: Neeg leej tub Mauxes, teev tiam kuv. Thiab … Mauxes ntsia Dab Ntxwg Nyoog thiab hais tias: Koj yog leej twg? Vim saib seb, kuv yog Vajtswv ib tug tub.”6
Kev tsov rog loj txog peb lub keeb los ntawm Vajtswv yeej kub heev vim Dab Ntxwg Nyoog cov tub rog xav ua rau peb txoj kev ntseeg thiab paub txog peb txoj kev txheeb ze Vajtswv puas tsuaj tas. Zoo siab ua Vajtswv tsaug, vim peb tau koob hmoov to taub meej txog qhov uas peb yog leej twg tiag txij puag thaum chiv keeb los: “Vajtswv hais tias, Nim no peb yuav tsim neeg kom muaj yam ntxwv zoo li peb,”7 thiab cov yaj saub tshaj tawm tias, “Txhua txhia tus [neeg] yog nkawm niam txiv saum ntuj ceeb tsheej ib tug tub ntsuj plig los yog ib tug ntxhais ntsuj plig uas nkawd hlub thiab xws li txhua tus yog li ntawd, txhua txhia tus muaj ib tug cwj pwm thiab txoj hmoov los saum ntuj los.”8
Qhov uas peb paub tej yam tseeb no tiag tiag9 yuav pab peb kov yeej tej kev sim siab, tej teeb meem, thiab txhua yam kev txom nyem.10 Thaum ib tug neeg tau nug, “Peb yuav ua li cas kom pab ib tug neeg uas nyuaj rau nws kov yeej [ib qho teeb meem]?” tus Tswv ib tug Thwj Tim tau qhia tias, “Qhia lawv tias lawv yog leej twg thiab qhia lawv txog lawv lub hom phiaj.”11
“Kev Txawj Ntse uas Muaj Hwj Chim Tshaj Plaws”
Tej yam tseeb no yeej tau hloov kuv tus phooj ywg Jen12 lub neej, uas thaum nws yog ib tug ntxhais hluas tau ua tsheb raug sib tsoo. Txawm yog nws sab cev mob kawg nkaus, qhov uas ua rau nws mob tshaj plaws yog qhov uas tus tsav lwm lub tsheb tau tas sim neej. Nws hais tias, “Muaj ib tug neeg uas nws niam xiam, es kuv yog tus uas ua txhaum.” Jen, tus uas ob peb hnub ua ntej tau sawv thiab hais tias, “Peb yog cov ntxhais ntawm peb Leej Txiv Saum Ntuj Ceeb Tsheej, uas hlub peb,” yog tus uas tam sim no xav seb “Nws yuav ua li cas hlub kuv?”
Nws hais tias, “Qhov mob ntawm sab cev nqaij daim tawv twb zoo lawm, tiam sis kuv tau xav tias kuv qhov mob ntawm sab ntsuj plig yeej yuav tsis zoo ntxiv.”
Xwv kom nws nyob tau, Jen tau zais nws tej kev xav, nyob deb ntawm tib neeg thiab tsis xav nrog leej twg tham. Ib xyoos tom qab ntawd, thaum nws txawj tham me ntsis txog kev raug xwm txheej ntawd, ib tug pab cuam tau caw nws sau kab lus “Kuv yog Vajtswv tus me nyuam” thiab hais cov lus ntawd 10 zaus txhua hnub.
Nws hais tias, “Kev sau lus yeej yooj yim, tiam sis kuv hais tsis tau. … Qhov kuv hais li ntawd ntshe yuav muaj tiag tiag thiab kuv tsis tau xav ntseeg tias Vajtswv xav kom kuv ua Nws tus me nyuam. Ntshe kuv yuav zaum tib pob quaj.”
Tom qab ob peb lub hlis, Jen txawj ua tau qhov no txhua hnub. Nws hais tias, “Kuv tau thov Vajtswv kawg siab kawg ntsws. … Ces kuv pib ntseeg tej lus ntawd.” Kev ntseeg li no tau cia tus Cawm Seej pib kho nws tus ntsuj plig mob ntawd. Phau Ntawv Maumoos ua rau nws txais kev nplij siab thiab ntseeg Nws txoj Kev Theej Txhoj.14
Jen hais tias, “Khetos tau hnov kuv txoj kev mob, kuv txoj kev tu siab, kuv txoj kev muaj txim. Kuv tau hnov Vajtswv txoj kev hlub dawb huv thiab tsis tau muaj ib yam dab tsi uas muaj hwj chim npaum li ntawd! Qhov uas kuv paub tias kuv yog Vajtswv tus me nyuam yog kev txawj ntse uas muaj hwj chim tshaj plaws!”
Kev Nrhiav Kom Paub Vajtswv, Peb Leej Txiv
Cov kwv tij thiab cov muam, peb txhua tus yuav ua li cas kom txais tau lub hwj chim uas muaj thaum peb to taub peb lub keeb los ntawm Vajtswv? Yuav pib muaj li no thaum peb nrhiav kom paub Vajtswv, peb Leej Txiv.15 Thawj Tswj Hwm Russell M. Nelson ua tim khawv tias, “Muaj ib qho hwj chim los thaum Vajtswv ib tug me nyuam nrhiav kom paub ntxiv txog Vajtswv thiab Nws Leej Tub.”16
Qhov uas peb kawm txog thiab coj raws li tus Cawm Seej pab peb paub Leej Txiv. Vim Nws muaj yam ntxwv zoo ib yam li Nws Leej Txiv,17 Yexus qhia hais tias, “Leej Tub yeej tsis ua ib yam dab tsi raws li nws lub siab, nws tsuas ua tej yam uas nws pom nws Txiv ua xwb.”18 Txhua lo lus uas Khetos hais thiab txhua yam Nws ua qhia tias Vajtswv zoo li cas thiab peb txoj kev txheeb ze nws.19 Txwj Laug Jeffrey R. Holland qhia hais tias, “Nrog cov ntshav uas tawm txhua lub qhov hws thiab kev quaj nyuaj siab uas tawm Nws lub qhov ncauj los, Khetos tau nrhiav tus uas Nws yeej ib txwm nrhiav—nws Leej Txiv. ‘Abba,’ Nws hais, ‘Txiv.’”20
Zoo li Yexus xav tau Nws Leej Txiv nyob hauv Khexemanes, tus tub hluas Yauxej Xamiv kuj tau thov Vajtswv kom nrhiav tau Nws nyob hauv Koog Ntoo Dawb Huv. Tom qab Yauxej tau nyeem, “Yog nej cov leej twg tsis muaj tswv yim, kom nws cia li thov Vajtswv,”21 Yauxej thiaj li mus thov Vajtswv.
Nws sau hais tias, “Kuv txhos caug thiab pib hais tej kev xav hauv kuv lub siab rau Vajtswv. …
“… kuv pom ib tug duab ci nyob kiag ntawm kuv taub hau lawm saud. …
“… kuv pom ob tug Tib Neeg, uas ci ntsa iab thiab muaj yeeb koob uas yeej piav tsis tau, sawv ntawm kuv lawm saum nruab cua. Ib tug hais rau kuv, hu kuv lub npe thiab taw tes rau tus sab tod, thiab hais tias—[Yauxej,], Tus no yog Kuv Leej Tub uas Kuv Hlub.Cia li mloog Nws lus!”22
Thaum peb ua raws li tus Cawm Seej thiab tus Yaj Saub Yauxej tus yam ntxwv thiab rau siab nrhiav Vajtswv, peb yuav to taub tiag tiag, zoo li Jen, hais tias peb Leej Txiv paub peb lub npe thiab peb yog Nws cov me nyuam.
Hais rau cov niam tsev hluas, uas pheej ntxhov siab thiab muaj ntau dhau ua thaum lawv siv zog tu “ib tiam neeg uas tsis xav ua txhaum,”23 tsis txhob xav tias nej txoj hauj lwm hauv Vajtswv txoj hau kev tsis tseem ceeb.Thaum nej ntxhov siab txhawj xeeb—tej zaum thaum nej caum cov me nyuam thiab kev tsw ntxhiab kub hnyiab qhia nej tias tej zaum nej pluas hmo los twb tau muab hlawv fij rau Vajtswv lawm—cia li paub tias Vajtswv muab nej tej hnub uas nyuaj tshaj plaws hloov ua dawb huv.24 Nws nplij peb lub siab hais tias, “Nej tsis txhob ntshai, rau qhov kuv nrog nraim nej.”25 Peb hwm nej vim nej ua raws li Muam Joy D. Jones cia siab nej yuav ua hais tias, “Tsim nyog uas peb cov me nyuam to taub lawv lub keeb los ntawm Vajtswv.”26
Kuv caw peb txhua tus kom nrhiav Vajtswv thiab Nws Tib Leeg Tub. Thawj Tswj Hwm Nelson tau hais tias, “Tsis muaj lwm phau ntawv uas qhia tej qhov tseeb no uas meej meej thiab muaj hwj chim ntau tshaj Phau Ntawv Maumoos.”27 Cia li nyeem Phau Ntawv Maumoos thiab kawm hais tias Vajtswv ua “ua txhua yam kom [peb] noj qab nyob zoo thiab muaj kev zoo siab”;28 kawm tias Nws “muaj kev siab hlub thiab siab zoo, chim tsis sai, ua siab ntev thiab zoo tag nrho”;29 thiab kawm tias “txhua tus yeej zoo tib yam rau [Nws].”30 Thaum twg nej mob, poob zoo, ntshai, npau taws, tu siab, tshaib plab, los yog raug tso tseg nyob hauv kev txom nyem ntawm lub neej no31—cia li qhib Phau Ntawv Maumoos, thiab nej yuav paub tias “Vajtswv yeej yuav tsis tso peb tseg. Nws yeej tsis tau ua li ntawd, thiab Nws yeej yuav tsis ua. Nws ua tsis tau. Tsis yog Nws tus cwj pwm [ua li ntawd].”32
Qhov uas peb paub peb Leej Txiv hloov tau txhua yam, qhov tseem ceeb yog peb lub siab, thaum Nws tus Ntsuj Plig pom zoo rau peb lub keeb tiag tiag thiab qhov uas Nws saib peb rau nqi heev.33 Vajtswv yeej nrog peb taug kev khi lus thaum peb nrhiav Nws los ntawm kev thov Vajtswv, kev kawm vaj lug kub, thiab kev rau siab mloog lus.
Vajtswv tus Cwj Pwm Zoo Kawg Nkaus—Kuv txoj Kev Ua Tim Khawv
Kuv hlub kuv cov yawg suab tus Vajtswv,34 “tus Tswv Vajtswv uas Muaj Hwj Chim Tag Nrho,”35 tus uas quaj nrog peb thaum peb tu siab, ua siab ntev qhuab ntuas peb thaum peb tsis ncaj ncees, thiab xyiv fab thaum peb xav “tso tag nrho [peb] tej kev txhaum tseg los paub [Nws].”36 Kuv teev tiam Nws, tus uas “ua txiv rau cov tsis muaj txiv,”37 thiab ib tug khub rau cov uas tsis muaj khub. Kuv zoo siab kawg, kuv ua tim khawv tias kuv twb tau los paub kuv tus Vajtswv, kuv Leej Txiv, thiab kuv ua tim khawv txog Nws txoj kev zoo tag nrho, nws tus yam ntxwv, thiab “Nws tus cwj pwm zoo kawg nkaus.”38
Kuv rau siab thov kom peb txhua tus yuav to taub tiag tiag thiab saib peb txoj kev “muaj meej mom los ntawm vaj ntxwv”39 rau nqi vim peb yog Vajtswv cov me nyuam uas paub Nws, “tib leeg [uas] yog Vajtswv, thiab paub tus uas yog Yexus Khetos uas [Nws] txib los”40 los ntawm Yexus Khetos lub npe, amees.