Kuh Nga sie Tuhlihk Nuhtin God?
Kais sie sesr ac puhlakihn fuhkah kuh in kahlwem ke luhman God? Muhtwacwacack ke suk in etuh God, Pahpah tuhmasr.
Kihtin pacl somlah Nga wi alu yurin ninac wolacna kiyuck ke lohm in alu mahtuh lasr oreklac ke yot. Lohlah ke puhsra srihsrihk tuhkuh ke rum se pacna luhn Primary nga tuh wi ke yac puhs somlah ah, nga utyak tok ah ac liye mwet kol luhngse lotwelos mwe nuhnak se ke yac sac: “Nga sie Tuhlihk Nuhtin God.”1 Nga isracsr ke nga esamwack mwet luti mongfihsracsr ac luhngse suc, ma ke pacl in on lasr ke pacl sac, ac kwacna liyeyuc—tuhlihk orahru muhta e tok—oacna in nuhnkuh, “Kuh pwacye el sie tuhlihk nuhtin God? Ac suc suhpwaclma nuh ngwe uh?”2
Nga suli kais sie sesr in ikacslah insiyacsr nuhke Nguhn Muhtahl, ma “kupasrme nu ke ngunasr, in akkalemye lah kut tulihk nutin God.”3
Kahs lal Prestuhn Boyd K. Packer’s. ah kahlwem ac sacohk: “Kom tuhlihk nuhtin God. El pa Pahpah tuhmwacn nguhnum. Ke nguhn kom ma ke isuslac fuhlwact uh, tuhlihk nuhtin Tohkohsrah luhn Kuhsrao. Fihliyac ma pwacye sacn in nuhnak lom ac srukyac na. Tuhsruhk puhs fihl ke mwet mahtuh moul in ikoac lom, wacngihn ma ke tuhna kuh mwet kom ahol an, pedigree luhn nguhn lom an kuh in sihmlac ke soko na lain an. Kom sie tuhlihk nuhtin God!” 4
“Ke kom … liye Pahpah tuhmasr,” Brigham Young el ahkuhtweyac, “kom ac liye sie mwet ma kom etuh ke pacl na loeloes se, ac El ac eis kom nuh in Pahol, ac kom ac ahkolah in puhtatyang nuh ke ahkkweye Lal ac ngokyac Muhtahl.”5
Mweun Wolacna ke Ohiac Wolacna
Moses el lotwelah ke usru lal sin God sramsram nuh sin Leum angwetwacni. Tukun oruh sacn, Setuhn el srihfacl ke kuhtasrihk inge kalweni na in kiacpwel luhmahl Moses, pahnglol Moses, sie wen nuhtin mwet, ac fahk nuh sel lan alu nuh sel. Moses el ngwetwacng ac siyuck lah suc el uh mwen Moses el etuh lah el sie tuhlihk nuhtin God.”6
Mweun yohk se ke luhman God uh fahfahlac ke akuhkuhin, ke ohiyac kikiacp lal Setuhn in kuhnahoslah luhlahlfongi lasr ac etuh ke kuhpahsr lasr nuh sin God uh. Ke kuloh, kuht ahkinsewowoyeyuck ke kahlwem na suwohs se ke luhmah na pwacye lasr ke muhtwacwacack ah: “Na God El fahk, inge kut ac fah oru mwet uh: elos ac oana kut ac lumahlos ac oana lumasr,7 ac mwet pahluh moul uh fahkwelihk, “Kais sie pa tuhlihk mukul kuh muhtwacn nguhn nuhtin pahpah ac ninac inkuhsrao, ac, elos, eis luhman God ac in kuh in oacna God.”8
Eis etwacack ke ma pwacye inge ke pwacye9 kahsrekuht kuhtanglah mwe sruhf, elyah, ac kweok ke kain nuhkwewa.10 Ke siyuckyuck, “Kuht ac kahsruh fuhkah elos ma fosrngahlah ke [ma upac nuh selos sifacna]?” sie Mwet Sap luhn Leum ahkuhtweyac, “Luti nuh seltahl luhmahlos ac srihpac lalos an.”11
“Etuh Fokoko Se Emet Ma Oasr Sihk”
Ma pwacye fokoko inge mwe ekuhllah moul nuh sin kawuck luhk Jen,12 ke el tuh yac singucul kuhtuh tuh acksitacn ke stosah soko. Finne kweok ke mahnol upac, el puhla ngal na pwacye ah mweyen mwet se us stosah soko sahyac ah misac. “Ninac se kiyacn mwet se misac, ac nga pa koluk ac,” el fahk. Jen, suc kena lwen ekahsr met ah tuyak ac fahk, “Kuht tuhlihk muhtwacn nuhtin Pahpah tuhmasr Inkuhsrao, suc luhngse kuht,”13 inge nuhnkuh, “El ac luhngse nga?” fuhkah?”
“Kweok luhn mahno wacngihnlac,” el fahk, “tuhsruhk nga tena nuhnkuh muh ngwac kuh in unweyucklac liki puhla ac kihnet in nguhn uh.”
In kuh in painmoullac, Jen el okanlah puhla lal allac loal, srwenglah ac wacngihnlac puhla lal. Tukun yac se, ke el sahflahiyac kuh in sramsram ke acksitacn sac, kaunselucr se pihrihkyuck in ngihsre sel in suhmuhslah “Nga sie tuhlihk nuhtin God” ac fahk pacl 10 kais sie lwen.
“Suhmuhslah kahs ah fihsracsr,” el esam, “tuhsruhk nga tiac kuh in fahk. … Arulacna upac, ac nga tena allac luhlahlfongi muh God El ke ngan tuhlihk Nahtuhl. Ngwac suwoli ac tuhng.”
Tukun mahlwem ekahsr, Jen el sahflahiyac kuh in oraclah oruh sac lwen nuhkwewa. “Nga okwaclah nguhnihk nohfohn,” el fahk, “kwacfe sin God. … Na nga muhtwacwacack in luhlahlfongi kahs ah. “Luhlahlfongi se inge lwelah Mwet Lahngo lan muhtwacwacack unwe nguhn kihneta lal. Puk luhn Mormon use puhla wo ac puhlaik ke Iwaclah Lal.14
“Kraist El puhla ngal luhk, ahsor luhk, mwacta luhk,” Jen el ahksahfye. “Nga puhla luhngse pwacye luhn God ac soenna puhlakihn oacna ma arulacna fokoko! In etuh lah nga sie tuhlihk nuhtin God pa etuh fokoko se emet ma oasr sihk uh!
Suk In Etuh God, Pahpah Tuhmasr
Kais sie sesr ac puhlakihn fuhkah kuh in kahlwem ke luhman God? Muhtwacwacack ke suk in etuh God, Pahpah tuhmasr.15 Prestuhn Russell M. Nelson el fahkwack, “Sie ma fokoko sikyak pacl se sie tuhlihk nuhtin God el suk in yohkwaclihk etuh Kacl ac Wen Kuloh Nahtuhl.”16
Lutlut kacl ac ukwe Mwet Lahngo kahsrwekuht eklac in etuh Pahpah. “Pa … lumahl oapana luman [Pahpah] tuhmwacl,”17 Jisus El luti, “Wen El tia ku in oru kutena ma ke ku lal sifacna. El oruh na ma el liye Papa tumal El oru.”18 Kahs ac orekma luhn Kraist nuhkwewa fahkwack ohiyac pwacye luhn God ac kuhpahsr lasr nuh Sel.19 Elder Jeffrey R. Holland el luti, “Ke srah sikyak ke pat nuhkwewa ac sie saho ke kweok ke ngasrol, Kraist El Sokol El suc El pacl nuhkwewa suk—Pahah Tuhmwacl. ‘Abba,’ El tuhng, ‘Papa.’”20
Ke Jisus El suk na pwacye Pahpah Tuhmwacl Gethsemane ac, oacna Joseph Smith fuhsr ke yac 1820, suk God ke Insack Muhtahl sac. Tukun rit, “Kutena suwos fin enenu in akyokye lalmwetmet lal, enenu elan pre nu sin God,”21 Joseph el som in pruhe.
“Nga sikuckmuhtuhntei,” el suhmuhslah, “ac muhtwacwacack in okwaclah kena luhn insiyuck nuh sin God. …
“…Nga liye soko kan kahlwem lucng kuhtuh likina fin sifuck. …
“… Nga liye Mwet luo, suc kahlwem ac wolacna lalos ahluhkwelah ma nuhkwewa ma kuh in ahkuhtweyac uh, tu lucng likiyuc yen engyeng uh. Sie seltahl sramsram nuh sihk, pahngonyuc ke inek ac fahk, srihsrngiyac ma se sahyac ah—[Joseph,] Pa Inge Wen Kuloh Nuhtihk. Porongwel!”22
Ke kuht ukwe srihkasrak luhn Mwet Lahngo ac Mwet Pahluh Joseph ke suk pwacye God uh, kuht ac eis kahlwem ke sie ohiyac na pwacye, oacna Jen el oruh ah, lah Pahpah tuhmasr El etwekuht ke inwacsr, lah kuht tuhlihk Nahtuhl.
Nuh sin ninac fuhsr, ma wacna puhla kahfofo ac oasr ye kof uh srihke in tuhfahlah “sie fihl ma kuh in lain ma koluk,”23 nimet pihlesruh yohk srihpaciyacn ip kunom ke plwacn luhn God uh. Ke pacl suhpwacr—sahp pacl kom ukwe tuhlihk srihsrihk an ac folin mongo fihrihryak ke acn in mongo ah fahk lah mongo in ekuh ahkoeyuck uh inge mwe kihsac fihrihr se—etuh lah God el ahkmuhtahlye pacl upac lom uh.24 “Tiac sahngweng tuh nga wi kowos. 25 El ahkweye ke mihs. Kuht ahkfuhlwactye kowos ke kowos ahkpwacyeye finsrak lal Sis. Joy D. Jones ma fahk, “Tuhlihk nahtuhsr uh fal in kahlwem ke luhman God lalos uh.”26
Nga suli kais sie sesr in suk God ac Wen Kuloh Nahtuhl. “Wacngihn acn sahyac,” Presttuhn Nelson el fahk, “ma mwe luti pwacye inge lutiyuck arulacna fokoko liki luti ke Puk luhn Mormon uh.”27 Ikacslah sra puk kac ac luti lah God El oruh “ma nuhkwewa nuh ke mwe ahkwoye ac engan [lasr]”;28 tuh El pahkotwen ac kuhlwacng, tiac sa in kasrkuhsrak, mongfihsracsr ac yohklacna luhng kuhlwacng”;29 na lah mwet nuhkwewa oacna sie nuh [Sel]”30 Ke kom puhla ngal, tuhlac, sahngweng, toasrlah, suhpwacr, masrinsracl, kuh kom muhkuh ac wacngihnlac finsrak pacl kom oasr ke elyah31—ikacslah Puk luhn Mormon, na kom ac akihlen lah “[God] El tena siskuhtlac, El soena, El ac fah tiacna. El tiac kuh in oruh. Tiac ohiyac Lal [in oruh].”32
Eklac in etuh Pahpah tuhmasr ekuhlah ma nuhkwewa, yohkna insiyacsr, ke nguhn wolacna Lal ahkkweyelah pwacye luhn luhmahsr ac yohk srihpaciyac ye muhtahl.33 God El wi kuht fahsr ke inkacnek luhn olweacng uh ke kuht sokol ke pruhe in kwacfe, suk ma suhmuhslah, kwacfe in ahkos.
Ohiyac Fuhlwactlacna luhn God— Mwe Loh Luhk
Nga luhngse God pahpah tuhmuhk,34 “Luem God Kuhlacna,”35 suc tuhng ke ahsor lasr, ke muhtweng ahksuwohsye kuht ke sesuwohs lasr, ac enganwack ke suk in “tohllah nohfohn ma koluk [lasr] in etuh [Kacl].”36 Nga alu nuh Sel, suc “sie pahpah tuhmuhn tuhlihk muhkahimtacl,”37 ac sie kawuck nuh sin mwet wacngihn kawuck la. Tarilacna, nga fahkwack lah nga eklac in etuh God, Pahpah tuhmuhk, ac sang mwe loh ke suwohswohs, elah, ac wolacna luhn ohiyac Lal.”38
Tuh kais sie sesr nuhkwewa in lihksreni kahlwem ac engan ke“usru fuhlwact” lasr39 ekihn sie tuhihk nuhtin God ke eklac Etwacl, “God pwacye sefanna, ac Jisus Kraist, suc [El] suhpwacma,”40 pa pruhe fokoko luhk. Ke inen Jisus Kraist, amen.