N̄aij ke juon Ajri Nejin Anij?

Moses eaar jeļā kōn jolet eo an ekwojarjar ilo kenono jelm̧ae ippān Irooj. Ilo en̄jake in, “Setan eaar itok im kapo e” jab maron̄ kile e aaet kōņaan kakkure kadkad eo an Moses, “im ba: Moses, nejin armej, kwōn kabun̄-jar n̄an eō. Im … Moses ekar reilo̧k n̄an Setan im ba: Wōn kwe? Bwe lo, N̄aij juon m̧aan nejin Anij.”⁶

Tariņae in eļap kōn kadkad eo ekwojarjar ej wōnm̧aanļo̧k wōt ilo an lukkuun kajoor kōbo̧uwe ilo an Setan kajieon̄ kakkure tōmak im jeļāļo̧kjeņ eo ad kōn jem̧doon eo ad ippān Anij. Kam̧m̧oolol, jekar maron̄ jeraam̧m̧an kōn visōn ealikkar im meļeļe ko kōn kadkad eo ad em̧ool jān jinoin kōm̧anm̧an eo: “Jen kōm̧anm̧an armej ilo wāweed im āinwōt Kōj,”⁷ im rikanaan ro An remour rej kwaļo̧k, “Kōj [armej] kajjojo rej juon jetōb m̧aan im kōrā nejin jemedwōj im jinedwōj ilan̄, im, āinwōt, kōj kajjojo ewōr juon ad piktok eo ekwojarjar im mejān kajjik.”⁸

N̄an jeļā m̧ool kein kōn ejjeļo̧k pere⁹ ej jipan̄ kōj anjo̧ jān apan̄ ko, inepata ko, im liaajlaļ ko otemjej.¹⁰ N̄e kajjitōk, “Elmen ad jipan̄ ro rej apan̄ kōn [idajon̄jon̄ ko an juon make]?” Juon Rijilōk an Irooj eaar kwaļo̧k, “Katakin er paoktok im jibadbad eo aer.”¹¹

Mool kein rekajoor rekar ukōt mour eo an m̧ōtta Jen,¹² eo eaar juon rūm̧m̧an ded ekar jorrāān jen juon itaak in wa. Men̄e ānbwniin eaar kanooj metak, ta eo ekōm̧m̧an bwe en lukkuun metak ekar an rikattōr eo juon ekar mej. Ekar ba, “Ewōr juon armej eluuji jinen, im ekar aō bōd.” Jen, eo ekar jutak jejjo raan mokta im ba naan kein, “Jej jiron̄ ro nejin Jemedwōj Ilan̄, eo ej iakwe kōj,”¹³ kiiō kar kajjitōk, “Ewi wāween An kar maron̄ iakwe eō?”

Eaar ba, “nan̄inmej eo eaar jako,” “ak ij ļōmņak iban inem̧m̧an jen kinjen ānbwiin im jetōb.”

Bwe en maron̄ mour, Jen eaar lukkuun dāpij en̄jake eo an, jino ettoļo̧k im ajimakeke. Ālkin juon iiō, eaar maron̄ kenono kōn itaak eo, juon ritōl eo eim̧we eaar ba bwe en je naan in “N̄a nejin Anij” im ba 10 alen.

Eaar keememej, “je naan ko repidodo,” “ak ijjab maron̄ ba. … Ebwe an pen, im ijjab lukkuun tōmak Anij ekōņaan bwe in Nejin. Ij būrom̧ōj im jan̄.

Ālkin jet allōn̄, Jen eaar maron̄ in kadedeļo̧k jerbal eo kajjojo raan. “Iaar kōm̧aat aolepān aō,” liin ej ba, “akweļap n̄an Anij. … Innām iaar jino tōmak naan ko.” Tōmak ekōm̧m̧an bwe Rilo̧mo̧o̧r en jino kemour an jetōb. Bok in Mormon eaar bōktok aenōm̧m̧an im ineem̧m̧an kōn Pinmuur eo An.¹⁴

Jen eaar ba, “Kraist eaar kemour metak ko aō, būrom̧ōj ko aō, likjab ko aō.” “Iaar en̄jake iakwe eo em̧ool an Anij im ijjan̄in kar en̄jake jabdewōt kajoor! Jeļā bwe N̄a nejin Anij ej make wōt jeļāļo̧kjeņ eo ekajoor ij bōke!”

Ro jeiū im jatū, ewi wāween ad kajjojo maron̄ en̄jake kajoor n̄an meļeļe kadkadin eo ekwojarjar? Ej ijjino ilo pukot n̄an jeļā Anij, Jemed.¹⁵ Būreejtōn Russell M. Nelson eaar kam̧ool, “Juon men ekajoor ej waļo̧k n̄e juon ajri nejin Anij ej pukot n̄an jeļā eļapļo̧k kōn E im Nejin Ejitōn Bōro.”¹⁶

Jeļā kake im ļoor an Rilo̧mo̧o̧r jipan̄ kōj jeļā kōn Jemān. “Eo … ej jatōltōl an aiboojoj eo an [Jemān],”¹⁷ Jisōs eaar katakin, “Nejin e jab make maron̄ kōm̧anm̧an jabdewōt, a men eo Ej lo Jemān kōm̧m̧ane.”¹⁸ Aolep naan an Kraist im kōm̧m̧an em̧m̧an rej kwaļo̧k piktokin Anij im jem̧jerā eo ad n̄an E.¹⁹ ElderJeffrey R. Holland eaar katakin, “Ilo an bōtōktōk toor jen kajjojo ron̄ in ānbwinnin im An en̄taan, Kraist eaar pukot E eo Eaar aolep iien pukot—Jemān. Eaar lamōj, ‘Abba,’ ‘Jema.’”²⁰

Ilo an Jisōs pukot Jemān ilo Gethsemane, bar Josep Smith eo edik, ilo 1820, kar kappukot Anij ilo Bukwon Wōjke ko. Ālkin riit, “Eļan̄n̄e jabdewōt iaami ej aikuj māletlet, en kajjitōk ippān Anij,”²¹ Josep eaar etal im jar.

Tokālik ekar je, “Iaar bukwelōlō,” “im jino ajeļo̧k ikdeelel ko an būruwō n̄an Anij. …

“… Iaar lo juon jurōn meram lukkuun ioon wōt bōra. …

“… Iaar lo ruo Armej, ro meram im aiboojoj eo aer eaar eļļāļo̧k jān aolep wāween kōmmeļeļe, rej jutak ilōn̄ū ilo mejatoto. Juon iaer eaar ekkōnono n̄an eō, im kūr eō kōn eta im ba, im jitōn̄e ļo̧k eo juon—[Josep,] En̄in Nejū Jitenbōro.Kwon Ron̄jake E!²²

Ilo ad ļoor waanjon̄ok ko an Rilo̧mo̧o̧r im Rikanaan Josep n̄an lukkuun pukot Anij, jenaaj meļeļe ilo juon wāween eo em̧ool, āinwōt kar Jen, bwe jemād ejeļā kajieed kōn et, im bwe kōj jej ro Nejin.

N̄an m̧am̧a ro rem̧m̧an ded, ro ekkā aer en̄jake eddodo im m̧ōk n̄an kōkajjiririik juon “epepen ejjeļo̧k an bōd,”²³ jab keidi eddo eo am̧ ilo karōk in an Anij. Ilo iien ko rekam̧ōkm̧ōk—bōlen n̄e kwoj pukot ro reddik im bwiin enno jen jikin kōmat eo ej kwaļo̧k n̄an kwe bwe am̧ kōpooj kejota eo ej pojak—jeļā bwe Anij ej kakwojarjar raan ko am̧ reppen.²⁴ “Jab mijak; bwe Ij pād ippāmi,”²⁵ An aenōm̧m̧an ej kōperan. Jej nōbar kom̧ ilo ami kakūrm̧ool kōjatdikdik eo Sister Joy D. Jones, eo eaar kwaļo̧k, “Ajri ro nejid rekōņaan jeļā paoktok eo aer ekwojarjar.”²⁶

Ij kūr kōj kajjojo n̄an pukot Anij im Nejin Emake Wōt. “Ejjeļo̧k bar jikin,” Būreejtōn Nelson eaar ba, “m̧ool ko rej kwaļo̧k alikarļo̧k im kajoorļo̧kļo̧k jān Bok in Mormon eo.”²⁷ Kōpeļļo̧k peij ko im jeļā bwe Anij ej “kōm̧m̧an aolep men ko n̄an oņaake im m̧ōņōņō an armej ro An”;²⁸ bwe E ej “tiriam̧o kake im jouj, erum̧wij an illu, kijenmej im obrak kōn jouj”;²⁹ im bwe “aolep rej juon wōt n̄an [E].”³⁰ N̄e kwoj en̄jake metak, jābwābwe, mijak, būrom̧ōj, illu, ak ajjimakeke ilo mour in³¹—kōpeļļo̧k Bok in Mormon eo, im kwonaaj jeļā bwe “[Anij] ejamin katamjinemjen kōj. Ejjan̄in kar, im Ejamin. Ejjab maron̄ kōmm̧ane. Ejjab m̧wil eo An in [n̄an kōm̧m̧an āindein].”³²

Jeļā bwe Jemād ej ukōt men otemjej, eļaptata būruwōd, āinwōt An Jetōb kapen paoktok eo ad em̧ool im aorōk im̧aan Mejān.³³ Anij ej etetal ippād ilo iaļen bujen eo ilo ad pukot E ilo jar, pukot jeje ko rekwojarjar, im kajjieon̄ pokake.

Ij iakwe Anij an ro jemād,³⁴ “Anij Ekajoor Bōtata,”³⁵ ij jeļā Ej jan̄ ippād ilo būrom̧ōj ko ad, kijenmej ilo jabwānōk ko ad, im m̧ōņōņō n̄e jej kappukot n̄an “joļo̧k aolep jerawiwi ko [ad] n̄an jeļā [E].”³⁶ Ij kabun̄jar n̄an E, eo ej “jemān ro ejjeļo̧k jemeir,”³⁷ im m̧ōttan ro ejjeļo̧k m̧ōttaer. Mōņōņō, ij kam̧ool bwe iaar jeļā Anij, Jema, im kam̧ool kōn wānōk, piktokin “m̧wiļ eo [An] em̧m̧antata.”³⁸

Bwe kōj kajjojo maron̄ lukkuun meļeļe im m̧ōņōņō kōn “lo̧tak eo ad”³⁹ āinwōt juon nejin Anij n̄an jeļā E, “Anij eo em̧ool, im Jisōs Kraist, eo [Eaar] jilkintok”⁴⁰ ej aō jar ekajoor.