I Gag e Bitir ku Got?
Ra bagdaed ma urogon ni nge nang gelngin rogdaed nib thothup? Be tabab napan ni yibe gay rogon ni ngan nang Got, ni Chitamangdaed.
Dawori n’uw napan ni gu un ngak e nina’ rog ko galasia romaed nike n’uw napan. I mit owcheg nga luman e bitir nibe yib u lan ta’ab senggil ko Primary ni ku ug un ngay nike bukun e duw. Ku falfalen’ napan ni gu waen nga tomur ko senggil ko Primary mug guy e pi toygang’ ni yaed ba mangil ni yibe machib nag e numon ko biney e duw ni: “Gag e Bitir ku Got.” 1 Mug tingi’ napan ni gube leam nag e sensey napan kakrom ni gamaed ma tang ni baga’ nima sap ngog—chi pagael ne, ko benchi ko galasia— ni boed nibe leam, “Riyul’ni ir e bitir ku Got? Ma mini’ e ke pi’ ngara’?”2
Ra bagdaed ma gube pining ni nge bing gumircha’en ko fare Kan ni Thothup, nima “micheg ko ya’el rodaed, ni gadaed e pifaak Got.”3
Thin rok President Boyd K. Packer e ba moem nib tamilang: “Gur e bitir ku Got. Ir e chitamangin e ya’el rom. Ra ya’el ma gab fak e pilung, faak e Pilung u Tharmiy. Mu tay e binem e riyul’ nga lanin’um ni dam pag. Machane bukun e yangar ko rogon e gidii’ rom ni kakrom, demtrug ko miti mang gidii’ e gabe feek pa’, ma rogon e ya’el rom e rayog ni ngan yoloey ko ta’ab layn. Gur e bitir ku Got!”4
“Napan ni gara … guy e Chitamangdaed, “Brigham Young e ray nibe weliy, “ma gara guy bee’ ni ku um nang nikari n’uw napan, ra thapegem nga tan poen, ma gara yan ngam tu’ufeg ma gabe fangichiy.5
Fare Mael nib Gel ni mornga’agen Rogoy ni Thothup
Moses e fil mornga’agen nib thothup ni non ngak Somoel nibay u pow’chen. Tomuren e binem nni buch, me yib Satan nibe tawasor nag Moses” ni nge baen nag ni ba adag ni nge kireb nag rogon Moses. Satan e pining e faak e gidii’ ngak Moses me yoeg ngak ni nge liyoer ngak. Me sap Moses ngak e fith ngak ko ir mini’ ya manang ni ir e Faak Got.”6
Biney mael ni mornga’agen daed nib thotuhp e alamrin nib togpluw, napan nibe gay rogon Satak ni nge kireb nag e mich rodaed nge gonop rodaed ni mornga’agen e tha’ rodaed ngak Got. Fithik e falfalen’, ma kan tawa’ath nag daed ko gonop nib tamilang ni mornga’agen daed ni yib thothup ko somm’on: “Me ga’ar Got, aram e chiney e ngad ngongliyed e girdi’, girdi’ e bay ra boded gadad muyad boded ya’adad,”7 nge pi profet e ri yoeg ni, “Ra bagdaed ma gadaed e ya’el ni faak e galabthir nu tharmiy, ma, boed, ni ra bee’ ma rogon nib thotuhp nge gin ni nge thap ngay.”8
Pi riyul’ ney nikan nang ni ri yib michan’uy ngay9 e ma ayuweg daed ni ngad gel gaed ko sikeng, magawon, nge gafgow ni gubin mit.10 Napan nikan fithey, “Urogon ni rayog ni ngad ayuweg ned e pi’in nibe gafgow ko [tirok ban’en]?” ma ke ga’ar ba Apostle rok Somoel, “Mfil ngoraed mornga’agen rograed nge fan raed.”11
“Bin Tha’ani gel e Gonop ni Bay Rog”
Pin’ey nib riyul’ e thilyeg e yafas rok Jen ni fagar rog, 12 napan ni kab rugod me ka’aring e mad’ad u karo. Mus nib alamrin e birok e mad’ad, ke gel e amith rok riy, ya cha’an nibe yan ko reb e karo e ke yim’. “Bay bee’ nike yim’ e nina’ rok, ma i gag e kireb rog,” e n’en nni yoeg. Jen, ni i sak’iy nge ga’ar, “Gadaed e ppin ni faak e Chitamangdaed nu Tharmiy, ni gadaed ba tu’uf rok,”13 e be fith e duwer nibe ga’ar e chiney, “Urogon ni nggutu’uf Rok?”
“Ke m’ay e amith ko dowef,” ir nibe non, “machane dagur leam nag ni gura gol ko amith nibe yib nga ngorongreg nge ya’el rog.”
Ir ninge gol, me mithag Jen e n’en nibe aw nga laniyan’ nib gel, me be tabab ko palog ni dakir thamiy ban’en. Tomuren e duw, napan nike yag ni nge weliy mornga’agen fare mad’ad u karo, ma ba counselor e yoeg ngak ni nge yoloey e thin ni “Gag e bitir ku Got” me yoeg ni 10 yay.
“Yoloey e ba moem,” ir nibe non, “machane dabyog ni nggog. … Binem e rib momaw’, ma dani mich u wun’ug ni ba adag Got ni nge fakyeg. Guma yoer.”
Tomuren in e pul, me yag ni nge rrin’ Jen gubin e sikeng ni gubin e rran. “Ku pu’og gubin gumircha’eg,” ir e be non, “gube wenig ngak Got . … Mug tabab i michan’ ko fapi thin.” Biney e mich e pag fare Tathapeg ni nge tabab i gol nag e ya’el rok nike kirbaen’. Fare Babyor ku Mormon e ma pi’ e gapas nge ahtmagil u lan e Bayul Rok.14
“Ke thamiy Kristus e amith rog, kirbaen’ rog, nge kirkireb rog,” Jen nibe non. “Ku thamiy e tu’ufeg rok Got nib ma’ang’ang ma dariy ban’en ni ke buch rog nib gel nib boed e binem! Gag ni ku nang ni gag e bitir ku Got e ba gonop nib gel ni bay rog!”
Gay ni ngan Nang Got, ni Chitamangdaed
Urogon ni ra bagdaed me nang gelngin mornga’agen daed nib thothup? Ma tabab ni yibe gay ni ngan nang Got, ni Chitamangdaed.15 I President Russell M. Nelson e micheg ni ga’ar, “Bay ban’en nima buch napan nima gay e bitir rok Got ni nge nang boech Mornga’agen nge fare Faak nib Tu’uf Rok.”16
Fare Tathapeg ni yibe fil mornga’agen ma yibe fol rok e ma ayuweg daed ni ngad nanged e Chitamangdaed. “Ngan … mang ya’an e [Chitamangin] ,”17 e yoeg Yesus, “En ni Fak Got e dariy ban’en ni be rin’ ni ir e tafinay rok, kemus ni tin ni be guy ni be rin’ e Chitamngin e ir e be rin’.”18 Gubin e thin rok Kristus nge murwel rok me dag rogon Got nib riyul’ nge tha’ rodaed Ngak.19Ke yoeg Elder Jeffrey R. Holland ni ga’ar, “Racha’ nibe m’ug ko gubin yang u dow nge thin nibe yib u dipilangan nib kirbaen’, me gay Kristus e Cha’an ni gubin ngiyal’ ma ma gay—Chitamangin. ‘Aba’ nibe yoer, ‘Papa.’”20
Napan ni gay Yesus e Chitamangin u Gethsemane, chuchgur ku Joseph Smith ni kab bitir, u lane 1820, mag gay Got u fithik e Paan nib Thothup. Tomuren i bi’ieg e, “Fa’anra dariy e gonop rok bigimed, ma nge wenignag ngak Got,”21 me yan Joseph nge meybil.
“Mugu gabog nga but,” e yoloey, “mug tabab i weliy mornga’agen e n’en ni bay u gumircha’eg ngak Got. …
“… Muguy chi ram’en e tamilang nibay pulwon loelgeg ngalang. …
“… Mugguy l’agruw Ni’, nib gel ram’en row ko gubin ban’en, ni yow be sak’iy u pulwog ngalang u dakean e nifeng. Bagyow e non ngog, nibe pining fithngan me nibe ga’ar, nibe yup pa’ ngak bagyow—[Joseph,] Iraray Fakag nib Tu’uf Rog.Mmotoyil Ngak!” ”22
Napan ni gadaed ra fol ko pi wo’en fare Tathapeg nge fare Profet Joseph man gay Got u fithik e athamgil, ma gadaed ra nang fan nib riyul’ rogon, boed rogon Jen, ni manang e Chitamangdaed fithngan daed, ni gadaed e pifaak.
Pi’in nib nina’ ni fal’ yangren, ni baga’ nima kirbaen’ nib gel ma be athamgil ni nge chugliy e “bitir ni nge gel ko denen,”23 dam kireb nag rogon e murwel rom nib ga’fan u lane tunom rok Got. Fithik e ngiyal’ nib kirbaen’—sana napan ni gabe tuluf e bitir ma gabe farabon ban’en nike yik u ta’ang e be dag nike yik e gaan nikam fal’eg nikay ni balayal’—manang ni be yibliyem Got ko bin tha’abi momaw’ e rran rom.24 “Dam rug; ya gubay rom,”25 e yoeg u fithik e gapas. Gamaed be tay fan med napan ni gimed be rrin’ e n’en ni athapeg Sister Joy D. Jones, ni ga’ar, “Pifaak daed e baga’ fan ni ngar nanged rograed ni yad ba thothup.”26
Ra bagdaed ma gube pining ni ngad gayed Got nge Faak nib Tu’uf Rok. “Dariy bang, “President Nelson nibe non, “ni ra weliy e pi riyul’ nem ni rib tamilang mab gel riy ni boed u lan fare Babyor ku Mormon.”27 Mbing mag fil ni Got e ma rrin’ “gubin ban’en ni fan ko rogodaed nge falfalen’ [rodaed] ”;28 ma ba “marnguy ma ba ga’ e t’ufeg rok, ba sowath nma yib e damumuw ngak, ma ba sug ko t’ufeg ni dabimus”;29ma “gubin ma ta’ab rogon [Ngak].”30 Napan ni gara amith, kam man nga biyang, murus, chalban, kirbaen’, blig, fa boed ni go’gur ma dariy e athap napan e tin momaw’ u lane yafas31—mbing fare Babyor ku Mormon, ma gara nang ni “ri dabi digey daed [Got]. Dawori rrin’, ma dabi rrin’. Dabyog ni nge rrin’. Bee’ ni gathi aram rogon [ni nge rrin’] e binem.”32
Napan ni gu nanag nima thilyeg Chitamangdaed gubin ban’en, baga’ ni gumircha’en daed, napan nima micheg fare Kan Nthothup e bin riyul’ ni mornga’agen daed ni gadaed ba tu’uf Rok.33 Got e ma un ngodaed ko kanawo’ ko fare m’ag napan ni gadaed ra gay u lane meybil i gadaed be wenig, ni yibe bi’eg u lane chep nib thotup, ma yibe athamgil ni yibe fol.
Rogon Nib Tolang Got—Mich Rog
Ba tu’uf Got ni Gubinfen rog,34 ”fare Somoel Got ni Gubin e rayog Rok,”35 nima un ngodaed ko yoer u fithik e kirbaen’ rodaed, ma be gechig nag daed ko tin kireb rodaed u fithik e athamgil, ma ma falfalen’ napan ni gadaed ra gay rogon ni ngad “paged gubin e denen [rodaed] ni ngad nanged [Ir] .”36 Guma liyoer Ngak, ni ir e “chitamangin e pi’in ni dariy e chitamangin”37 ma fagar ko pi’in ni dariy e fagar rok. Gub falfalen’, ni gube micheg ni ku nang Got, ni Chitamangig, ma gube micheg e ma’ang’ang, mangil, nge “rogon [Nib] tolang.”38
Ni nge gadaed gubin ma ngad ngarin nanged fan ma gadaed ayuweg e “rogon daed ni yib mangil”39 ni yib bitir ku Got ni ngan nang Ir, “bin tha’abi riyul’ e Got, nge Yesus Kristus, [Nike]”40e meybil rog. U dakean fithngan Yesus Kristus, amen.