“Stap Wetem mo Mekem Olgeta Oli Kam Strong Moa”

Blong talemsot toktok blong Ralph Waldo Emerson, ol bes memori blong laef oli olgeta we yumi filim revelesen i kam hariap.¹ Presiden Nelson, mi no save hamas moa “hariap” samting mifala i save tekem moa long wiken ia. Sam long mifala, hat i no wok strong. Be taem mi tingting long hemia, yu save lukaot long hemia tu. !Yu nambawan profet!

Wetem semfala spirit ia blong naesfala toktok mo ol testemoni blong Presiden Russel M. Nelson las naet mo long moning ia, mi witnes se ol jenis ia oli ol eksampol blong revelesen we i bin stap lidim Jos ia stat long stat. Be yet, oli wan moa pruf se Lod i stap muvum wok blong Hem i go hariap long taem naoia.²

Yufala evriwan we i wantem blong lanem ol ditel blong ol samting ia, plis, yufala i mas save se stret long en blong sesen ia blong konfrens, bae oli sendem wan leta we i kam long Fas Presidensi i go long evri memba blong Jos we mifala i gat wan imel adres blong olgeta.Wan pepa blong seven pej, we i gat ol kwestin mo ansa bae i go long evri prishud mo okseleri lida. Laswan, olgeta tul ia, bae oli putum i go naoia long ministering.lds.org/bis “Sapos yufala i wantem samting, yufala i mas gohed blong askem, nao bambae yufala i save kasem, mo yufala i mas gohed blong lukaot, nao bambae yufala i save faenem.³

Nao. Yumi gobak long bigfala wok we Presiden Russel M. Nelson i bin givim long mi, mo long Sista Jean B. Bingham. Ol brata mo sista. Taem wok blong ol kworom mo ol okseleri i kam antap folem wanwan grup ia, i minim se yumi tu, wanwan long yumi i mas kam raep, o kam antap—mo wanwan i mas girap i go antap i bitim ol kaen otomatik wok we i no gat filing long hem, i go kasem wok blong disaepol wetem hat we Sevya i bin soem klia long en blong seves blong Hem long wol ia. Taem Hem i bin stap rere blong livim smol grup blong ol man blong Hem we oli no save gud samting mo oli konfius yet, Hem i no raetemdaon wan longfala lis blong ol ofis wok blong mekem, o i no givim wan hip blong ol ripot we oli mas fulumap tri kopi blong hem. No, Hem i talem sot wok blong olgeta long wan stamba komanmen: “Yufala i mas lavlavem yufala, olsem we mi lavem yufala. …“Nao from we yufala i stap lavlavem yufala, bambae olgeta man oli luksave se yufala i man blong mi.”⁴

Blong traem tekem yumi i muv kolosap moa long gospel tingting ia, niufala anaonsmen blong prishud mo Rilif Sosaeti givhan aedia ia bae i tekem wetem sam moa samting, mo sam, Rilif Sosaeti i stat blong yusum finis wetem bigfala sakses.⁵

• Bambae yumi nomo yusum hom tijing mo visiting tijing toktok. Hemia i from plante long ol givhan wok blong yumi bae i stap long ol ples we i aotsaed long hom, mo tu, from se kontak blong yumi bae i nomo dipen blong tijim ol lesen we yumi rere long hem, nating we yu save serem wan lesen sapos i gat nid from. Fas stamba tingting biaen long tingting ia blong givhan, bambae hem i, olsem we oli talem long taem blong Alma: “blong oli lukaotem ol pipol, mo oli fidim olgeta wetem ol samting long saed blong stret mo gud fasin.”⁶

• Bambae yumi gohed blong visitim ol hom taem i posibol, be samtaem ol lokol situesen, olsem bigfala namba blong visit, ples we i longwe, sefti blong man, mo ol nara jalenj, oli save mekem se maet i no posibol blong mekem visit long hom long evri manis. Olsem we Fas Presidensi i bin kaonselem sam yia i pas, mekem bes we yu save mekem.⁷ Antap long wanem taemtebol we yu putum blong mekem ol visit, kalenda ia, yu save ademap wetem ol telefon kol, ol not we yu raetem, ol teks, ol imel, ol storian long vidio, ol storian long ol miting blong Jos, ol seves projek, ol sosol aktiviti, mo plante moa rod long wol blong sosol media. Be, mi mas talemaot gud se niu bigfala lukluk ia, i no gat insaed, wan fasin blong sem we mi jes luk long wan stika blong trak. Stika i talem: “Sapos mi bip long yu, mi hom tijim yu finis.” Plis, plis, ol brata (ol sista bae oli neva rong long hemia—mi toktok long ol brata blong Jos), wetem ol jenis ia, mifala i wantem se man i kea moa, mo i gat tingting moa, i no nara wei.

• Wetem niufala gospel aedia blong stap givhan, mi filim se bae yu stap blong seksek mo no save wanem nao bae yu kaontem long ripot. Be, yu rilaks, from se i no gat eni ripot—i no gat ripot blong namba 31 blong manis we i talem “Mi jes mekem visit long las minit.” Long ples ia tu, yumi mas kam raep moa. Wan ripot ia nomo we bae yu mekem, i namba blong ol intaviu we ol lida oli bin gat wetem ol givhan kompanion insaed long wod long kwota ia. I saon simpol ol fren blong mi, be ol intaviu ia, oli nidim olgeta mo oli impoten. Sapos i no gat infomesen ia i kam, bisop bae i no gat rod blong kasem infomesen we hem i nidim long saed blong situesen long saed blong spirit mo laef blong ol pipol blong hem. Tingbaot: ol givhan brata oli ripresentem bisoprik mo presidensi blong kworom blong ol elda; oli no tekem ples blong olgeta. Ol ki blong wan bisop o wan kworom presiden oli wok i bitim givhan program ia.

• From se ripot ia i defren long eni samting we yu bin mekem bifo, bae mi poenem gud se mifalalong hedkwota blong Jos i no nidim blong savehaoo weapleaso wetaemyu stap kontaktem ol pipol blong yu, mifala i jes nidim blong save mo kea se yu stap mekemmo we yu stap blesem olgeta long evri wei we yu save mekem.

Ol brata mo sista. Heven i sendem wan janis i kam long yumi, olsem wan ful jos, blong yumi soemaot “stret relijin we i no gat mak long fes blong God”⁸—“blong yumi tektekem trabol blong wanwan long yumi blong oli nomo hevi” mo blong “kamfotem olgeta we oli nidim kamfot,”⁹ blong givhan long ol wido mo olgeta we oli no gat papa, olgeta we oli mared, mo olgeta we oli singgel, olgeta we oli strong mo olgeta we oli trabol, olgeta we oli gat hadtaem mo olgeta we oli helti, olgeta we oli hapi mo olgeta we oli harem nogud—long sot toktok, evriwan long yumi, from se yumi evriwan i nidim blong filim wom han blong frensip, mo blong harem wan strong toktok blong bilif. Be, mi givim woning long yufala, Wan niu nem, wan niu isi wei, smol ripot bae i no mekem tumas samting i defren long seves blong yumi sapos yumi no luk hemia olsem wan invitesen blong kea long wanwan long yumi long wan moa klia, niu mo tabu wei, olsem we Presiden Nelson i jes talem. Taem yumi stap leftemap spirit ae blong yumi i luk i go blong yumi laef folem loa blong lav moa fulwan, nao bambae yumi ona long ol jeneresen we oli bin givim seves long wei ia blong plante yia. Bae mi tokbaot wan eksampol blong kaen ful komitmen ia wetem hop se ol ami blong ol memba bambae oli kasem komanmen ia blong Lod blong “stap wetem mo mekem ol brata mo sista blong yumi oli kam strong¹⁰ moa.

Long las 14 Jenuware, wan Sandei, smol afta long 5 klok aftenun, ol yang fren blong mi, Brett mo Kristin Hamblin, tufala i stap storian long hom blong tufala long Tempe, Arisona, afta we Brett i spendem dei blong wok long bisoprik mo Kristin i gat bisi dei blong lukaot long ol faef pikinini blong tufala.

Wantaem nomo, Kristin, we i bin winim wan kansa blong titi long yia bifo, i foldaon. Oli ring 911, mo wan imejensi tim i kam i traehad blong stap wekemap hem. Taem Brett i stap prea, i askem help, kwiktaem hem i ring tu taem: faswan, i ringim mama blong hem i kam blong help stap wetem ol pikinini; narawan, i ringim Edwin Pota, hom tija blong hem. Storian blong las fon kol i go olsem:

Edwin, we i luk namba, i talem: “Hei Brett, ?olsem wanem?”

Brett i ansa i tok laod, i se: “!Mi nidim yu long ples ia, naoia!”

Sam minit afta, we Brett i no save kaontem, prishud fren blong hem i stap long saed blong hem, i stap help wetem ol pikinini mo i draevem Brata Hamblin i go long hospital biaen long ambulens we i tekem waef blong hem. Longwe, i no 40 minit afta we Kristin i sarem ae blong hem, ol dokta oli talem se Kristin i ded.

Taem Brett i stap krae krae, Edwin i holem hem lnomo long han blong hem mo i krae wetem hem— wan longfala taem. Afta, hem i livim Brett i stap krae wetem ol nara memba blong famli we oli bin kam tugeta. Edwin i draev i go long hom blong bisop blong talem long hem wanem i jes hapen. Wan gudfala bisop i aot wantaem i go long hospital, mo Edwin i go long hom blong ol Hamblin. Long ples ia, hem mo waef blong hem, Charlotte, we i kam hariap i pleiplei wetem ol faef pikinini we naoia oli nomo gat mama, we oli gat 3 kasem 12 yia. Tufala i fidim ol pikinini, singsing smol wetem olgeta mo mekem oli go slip.

Brett i talem afta long mi afta: “Gudfala pat blong stori ia i no we Edwin i kam taem mi ringim hem. Long wan imejensi, i gat oltaem ol pipol we oli glad blong help. No. Gudfala pat blong stori ia, i we, hem nao mi tingting blong ringim. I gat ol nara pipol oli stap raon. Kristin i gat wan brata mo sista we tufala i laef kolosap nomo. Mifala i gat wan gudfala bisop. Hem i beswan. Be rilesensip bitwin Edwin mo mi, i we mi filim kwik blong ringim hem taem mi bin nidim help. Jos i givim yumi wan rod we i stap blong laef folem seken komanmen ia long wan moa gud wei—blong lavem, givim seves, mo developem ol rilesensip wetem ol brata mo sista blong yumi we oli stap helpem yumi blong muv i go klosap moa long God.”¹¹

Edwin i tokbaot eksperiens ia: “Elda Holland. Wanem i defren long stori ia i we Brett i bin hom tija blong famli blong mifala i moa longtaem bitim we mi bin hom tija blong olgeta. Ova long taem ia, hem i stap visitim mifala moa olsem wan fren bitim we i hom tija. Hem i bin wan gudfala eksampol, stret eksampol blong wanem wan aktiv man we i holem prishud we i komitim hem, bae i mekem. Waef blong mi, ol boe blong mi—mifala i no luk hem se bae hem i mas tekem wan mesej i kam long mifala evri en blong manis;l mifala i lukluk long hem olsem wan fren we haos blong hem i stap long kona blong rod, we bae i mekem eni samting long wol ia blong blesem mifala. Mi glad se mi save pembak wan smol kaon we mi gat long hem.”¹²

Ol brata mo sista. Mi joenem yufala blong presem evri eria tija, mo wod tija, mo hom tija, mo visiting tija we i bin lavem mo i fetful blong givim seves long wei ia truaot long histri. Pres blong yumi tedei, i we, evri man mo woman—mo ol bigfala yang man mo yang woman blong yumi—bambae i livim jeneral konfrens ia wetem moa dip komitmen blong kea long wanwan wetem hat blong hem, we stret lav blong Kraes nomo i pusum hem blong mekem olsem. I nomata wanem yumi evriwan i stap filim abaot ol limit mo samting we i no stret long yumi, bambae yumi wok saesaed wetem Lod blong plantesen,¹³ we yumi givim long God mo Papa blong yumi, wan han blong help, blong bigfala wok blong stap ansarem ol prea, blong givim kamfot, blong waepem wota blong ae, mo blong mekem ol ni oli kam strong moa bakegen.¹⁴ Sapos yumi mekem hemia, bambae yumi kam moa disaepol blong Kraes, we yumi mas kam olsem. Bae yumi lavlavem wanwan long yumi olsem we Hem i lavem yumi,¹⁵ mi prea olsem long nem blong Jisas Kraes, amen.