“Obengterir e Melisich er Tir”

A dongedeb er a tekingel a Ralph Waldo Emerson, e a ikel kot el klebokel el taem er a klengar aikel taem el dolchesuar chedaol ocholt.¹ President Nelson, ng diak kudengei el kmo ng tela el taem el bo “dolchesuar” chedaol ocholt er chelechal taem. A rebebil er kid a mechitechut a rengrmam. Ng di sel kumdasou er ngii, eng sebechem el sumechekli tiang. Ke meral profet!

Okiu okesiu ra cheldechedechal a President Nelson ra kesus ma chelechal tutau, a kuchotii a sioning er ngak el kmo aikang a okesiu er a chedaol ocholt el mla omekerael er tial Ikelesia er a uchelel. Aikang a olchotel a kmo a Rubak a orreched er a Urerel er chelechal taem.²

Tirkel rokui el semeriar el mesuub a komakai el kirel tial tekoi, e bo modengei el kmo urirul er tial ongdibel, e a bebil er a tekoi omuchel luldimukl, e diak el ngara blechebechel, eng mo tuobed a babier er a First Presidency el mo er a rebek el chedal a Ikelesia el tir a ki molab a email address er tir. A euid el llel a babier el ker me a nger a mo obengkel el mo er a rokui loba priesthood me a roungerachela telengtengil a ikelesia. A ulebongel, aikal babier a mo mocholt er sel ministering.lds.org. “Molengit, e kau a mo ngmai; mosik, me bo betik.”³

Chelecha e sel ureor el blal beskak a President Russell M. Nelson ngak me a Sister Jean B. Bingham. Rodam me a rodos, sel loarael mukeroul a urerel a chelechad me a auxiliaries, e kid el dersta el chad a dirrek el kired el mukeroul dersta el chad el mukeroul er a urered, el diak de kora omelchesiu el oberedang el uai tirkel lultirakl er a Osobel er a ulebongel er a Urerel er a beluulechad. Sera longedmokl er Ngii el mocha cheroid er tirkal dirk metitur el oltirakl er Ngii el chad, e Ngii a dimlak el bechobech a teletelel a urerir malechub e longedmokl a betook el report el kirel kedmekill. Ng diak, Ng di dilu ngerchelir lokiu a chimol llach: “Bom kaubeltikereng; el uai ngak el betik a renguk er kemiu. … Tiaikid a rechad a mo medengei el kmo kom chedak, alsekum e kom kaubeltikereng.”⁴

A dolasm el moltirakl ra tial uldasou ra ebangkelio, eng ungil a rengmam ra beches el osisechakl ra priesthood ma Relief Society el oebngkel aikal tekoi, a bebil er ngii a bla, loruul a Relief Society er chelechang e kmal ungil.⁵

• Ng mla mo diak dousbech ra tekoi el oldingel e olisechakl ra blai. A bebil ra omeruul el bodoruul a kuk diak el ngara blai leng odingel er kid a diak bolultuil ra keldmokel el suobel, eng di a bolngarngii a usbechellel a suobel eng sebeched lousbech er ngii. A telengtengil omesodel, e sel kmal moktek ra odingel, a uaikel ble lolekoi a rechedal a Alma el mo “mengkar ra rechad, e … melisiich er tir ra tekoi el kirel a llemalt.”⁶

• Kid a mo melemolem loldingel obliil al sebeched, ng di a teletael el uaia iidisir a recahd, cherroid, sebecheklel a chad, ma lmuut el bebil ra meringel el teletael a sebechel torbengii odingel el mora blai ra bek el buil. Uaikel tekingel a First Presidency ra meketeketang, moruul el morsel sebechem lolab aikel ngarngii er kau.⁷ Obengkel a iioter ra odingel el kau a kudmeklii, e tial iioter a sebechem el kuk di omekedong ra dengua, llechukl el tekoi, text, email, video chat, chadecheduch ra temel a miting ra Ikelesia, omeruul ra klaingeseu, omilil, ma lmuut el kmal betook el bebil ra teletael lokiu a social media ra beluulechad. Engdi, ak meketetklii el uase aikal kmal betook el teletael a diak luldimukl a kora merur el blekeradel el ngak a dirk milsang ra babier el bereked ra mlil a chad. Ng uase, “sel kuupip ra blik eng kirem el medengei el uase ke mla mosisechakl ra blim.” A kulengit, e olengit, e rodam (a rodos a kmal diak el bol chetirir tiang—ak mengedecheduch el kirir a rodam er a Ikelesia), aikel ngeldechel a teletael e kid a soad el muut el mal mo mesisiich el omekerreu e melatk ra rebebil, ng diak dolngesonges.

• Tial beches, el oltirakl a sosiechakl ra ebangkelio el teletael ra olngeseu, ak omelchesiu el uase kobekikl el ngera mo llechukl ra report. Msall, e bom chelellakl, leng diak a report—er sel ulebongel ra bek el buil “Ng kmal osii ak momerek ra ngerchelek” el report. Kid a mla mkeroul. A dital report elmo mekedmokl aikel iidisel a cheldecheduch ra roungerachel loebngterir a rekeldemir ra ward er seikid el quarter. Ng kmal kora beot el tekoi, e resechelei, aikal cheldecheduch a kmal meklou a belkul. A lak aikal tekoi e a bisop a diak lengai a tekoi el ngii ousbech el kirel a chedaol ma klechad er a rechedal. Moldebedebk el kmo: a roldingel el odam a ometechei er a bisop me a chelchad er a presidency er a elders; ng diak lorribech a deruchellir. A kiis er a bisop me a merredel er a chelechad a chengelakl er tial teletael er a oldingel.

• Ng tial report el kuk ngodech er a ikal mongedmokl er a mlamemong e msall ek beketeklii el kmo kemam el ngara obis er a Ikelesia a diak a belkul kibomodengei el kmouangerang malechub eng ker malechub eng oingerange kau a mlo oldingel; ng di kiram el mo medengei el kmo komekerreu e meruul er ngii e omekngeltengat er tir e ra ikel sebechem.

Rodam me a rodos, kid a mla ngmai a techall ra babeluades el ochotii a meral Ikelesia lochotii a “klikiid el klechelid … ra medal a Dios”⁸—“el mo mesebechakl er a berraod er a ta me a tang me bol kebekakl” e mo “mengelaod er a tirkel ousbech ongelaod,”⁹ oldingel ra mla melakl ma diak a redemerir, a rebechiil ma remesobil, mar mesisiich mar mechitechut, ngara secher ma remesisiich, rengara deureng ma rengara kelngitelreng—ma dongedeb er ngii, e kid el rokui, bek el chad, le kid el rokui el do ousbech ongelaod ma mesisiich lolchotel a klaumerang. Eng di, a beches el tekoi, beches el teletael, kesai el report a diak el klou e lengedechii ra ikel omesiunged aleskum eng diak desa tiang el ongit el mei er kid el mo omekerreu ra ta ma tang loba bleketakl, e beches, el chedaol teletael, el uaia tekingel a President Nelson. Sel dengai osenged el bedul tial llach ra beltikelreng ra beluulechad, e kede mereng a saul ra ikel telcheroll el mla mesiou el betok el rak. Msall e kuchais ra okesiu el dirk dilubech lolchotel a blakelreng e oureng ma betook el chad bololtirakl ra llechul a Rubak el mo “olngeseu e melisiich”¹⁰ra rodam ma rodos er kid.

Tial mlomerek el January 14, el mle Sandei, el mla telkib limit ra eim el klok ra kebesengei, a resechelik ra Brett ma Kristin Hamblin a mlra blirir ra Tempe, Arizona, el chadecheduch ruriul ra lemei a Brett el mlara miting er ngii ra klebisop ma Kristin a mle mechesang ra reteim el ngelekir.

A Kristin, el silobel ra kasinoma ra tul er sel mlomerek el rak, a di mle kiul metilech e diak louteliil. A okedong a mlora 911 ma rechad ra emergency a mlei e melasm el melisiich e rngii. A Brett ra lsal meluluuch lolengit, e di mle mereched el muut el omekedong ra dengua: el kot a mlora delal lolengit a ngesou el kirir a renelekel, e a chimong a mlora Edwin Potter, el home teacher ngii. Sel uriul okedong a mle uaitiakid a teletelel:

Edwin, ng melekoi ra caller ID, e dilu el kmo, “Brett, ngera, ngarngii?”

A Brett a kilongoldiu el kmo: “A kusbech er kau er—chelechang!”

Di mle sesei el bung ea Brett a sebechel omechur, ra rodam er ngii ra priesthood el ngar bitar ngii, el kaingeseu ra rengalek ma roltak ra Brother Hamblin el mora ospitar lokiuellel a ambulance loba bechil. Seikid, eng kesai ra okeua el bung ririul ra lbutek a medal, ea retoktang a dula el kmo a Kristin a mla mad.

A Brett ra llangel, ea Edwin a ulerreked er ngii ra chimal e lmangel lobengkel—el meketeket, el taem. E milcherei, a Brett meng lmangel lobengterir a rebebil ra chedal a telungalek, ea Edwin a ulemekall el mora blil a bisop el mo ouchair erngii el uase ngera mla duubech. A bisop a di mle mereched el merael mora ospitar ea Edwin a merolang el mora blirir ar Hamblins. E ngii ma bechil, ra Charlotte, el dirrek el dirirurt el mei, a ulemes er tirkal teim el dikea derrir el ngelekir a re Hamblin, el 12 a rekil el mora edei a rekil, e milsterir a belsilir, e mengitakl lobengterir, e ngilsuterir el mo mechiuaiu.

A uriul a Brett a millekoi rngak, “Sel mengasireng el tebedechel tial teletael a diak el Edwin el mlei ra kumekedong er ngii. Sel tekoi ra bkaischemrungel, eng blechoel di ngar ngii a rechad lolngeseu. Ng diak, sel mengasireng el tebedechel tial teletael a ngii a mle kot el cha el kudesuar. Ng mlar ngii a rebebil ra rechad. A Kristin a ngar ngii a ochedal ma merrengel el di tela el mael a cherridir kemam. Ngar ngii a kmal ungil bisop, er kemam. Ng deleuill rngak ma Edwin a kmal mesisiich mak mel omelchesiu lomekedong er ngii ra kusbech a ngesou. A Ikelesia a meskid a ulterekokl el teletael doltirakl ra ongeru el llach el mo—oubeltikereng, mesiou, e mengeluolou ra ungil deleuill lobengterir a rodam ma rodos el ngosukid el mo kmeed ra Dios.”¹¹

A Edwin Potter a mle melekoi ra tial teletael el ause, “Elder Holland, sel ngodech ra chelsel tiang a Brett a kmal meketeketang el home teacher kemam el kuk meketeketang el taem er ngak. Tiaikid el taem, eng oldingel er kemam el uaia kim sechelil ng diak el ngerachel. Ng kmal ungil okesiu, ra ungil blekerdelel a oba priesthood. A bechik, rengelekam el sechal—ma ngak a diak kimesang el morrimel loba klumech el mei ra bek el buil; aki omdasou er ngii el sechelimam el dikiei ra bitar kemam, el sebechel rulii a ngii dil ngerang ra tial beluuelchad el ngosukemam. Ak mereng a saul el sebechek el kuk ngoseuir ra kmo ngerang el oureng a sulel.”¹²

Rodam ma rodos, ak obengkemiu e chemat block teacher ma home teacher ma roldingel e olisechakl el oubeltikereng e mesiou ra tiaikid el teletael ra chelsel a reksi er kid. A nglunguched ra chelechal sils a kmo a bek sechal ma redil—ma remeklou el chad ma remeklou el redil—a merael ertial klou el ongdibel el muut el kmal mo blak a rengrir el mo omekerreu ra ta ma tang, el diultuil ra klikiid el beltikereng ra Kristo. Eng di, ng diak el iior er a chelitechetud me a telitur kid—le kid el rokui el ngarngii a chelitechetud—eng di, kede dmak el oureor lobengkel a Rubak,¹³ lolngeseu er a Dios e Demad el rokui er a Urerel longer a nglunguuch, oldars ongelaod, mesuld a chiuosech, e melisiich er a remechitechetong.¹⁴ Sel bodeuaisei, e kid a kuk mo mui ra chubechub el oltirakl ra Kristo leng ngercheled. Chelechal Sandei er a Basqua, e bo dekaubeltikereng el uai Ngii el betik a rengul er kid,¹⁵ a nglunguchek el ngara ngklel a Jesus Kristo, amen.