Nengeni! Ew Sounfiu mi Tekia

Pwii achengicheng non ewe pristut, a fiti watten ai tipetekison ua uta me mwemi non ei auchean fansoun, fan emwenien nouch soufos achengicheng me Preseten, Russell M. Nelson. A watte ai tong me anisi ei mwan noun Kot mi amwarar me nouch we Aewin Presetensi. Ua apachata ai pwarata ngeni an Elter D. Todd Christofferson me pwan Pwii kewe seni ewe Mwichen Engon me Ruemon Aposel pwe ekkewe ekkesiwin a fis non ei kunionun iei mochenin ewe Samon.

Usun Preseten Nelson a apasa, ei mettoch a fen fis ren aurouren iotek me pwonuta me ren Pwich Nouwis Tekia non ewe Mwichefen non nakatam fansoun. Ewe mochen pwe repwe kutta mochenin ewe Samon me apochokuna ekkewe mwichen Pristut seni Melkisetek. Ra angei aurour, iwe non ei kunionun nouch we soufos a pwarano mochenin ewe Samon. “Ewe Samon mi Napanap ese tongeni epwe fori och mettoch ika pwe ese pwar ngeni noun kewe chon angang, ekkewe soufos, an kokkot”!¹ Sia fokkun feioch pwe a wor nouch soufos mi manau ikenai!

Non unusen manauem, Sister Rasband me ngang aua sai fetan non ewe fonufan ren sokopaten wisen Mwichefen me angang. Ua fen kuna arapakan meinisin kinikinin tettenin non ewe Mwichefen: ew kukkun pranch non Russia ikewe kich mi tongeni anneani chochon ekkewe Pristut seni Melkisetek won efoch pau, ew wart non Afrika mi minafo me watteno ikewe ekkewe prist mi nap me elter ra chufengen non ew chok mwich pokiten unusen chon ewe Pristut seni Melkisetek mi chokukkun, me ekkewe wart mi fisioch ikewe mi namot pwe nampan ekkewe elter repwe eimufeseni non ru mwich!

Ekis me ekis aua nom ie, aua kuna mwokutukutun ewe Samon a fis me mwen Noun chon angang, a amonata ekkewe aramas me ewe aan mwan pwe Noun kewe meinisin repwe feioch anongonong won met mi auchea ngenir. Met ese mwo pwonei pwe I epwe feino mwen mesach me epwe nom won peniemwanich me won peniefefinich me Ngunun epwe nonnom non netipach, me Noun chon nang repwe pwenikicheno?²

Ren ai ekieki usun ami meinisin, ua chemeni usun ewe kon mi fel “Nengeni! Ew Sounfiu mi Tekia.”

Elter Christofferson a ponuweni ekkoch kapas eis repwe wesen pichita seni ewe porous pwe mwichen pris mi nap me mwichen elters, ren kinikinin wart, ra kachufengen non ew, etipeew, soufiun pwipwi non ewe Pristut seni Melkisetek mi nap.

Ekkei ekkesiwin epwe anisi mwichen elter me Fin Anisi ra repwe achufengeni ar angang. Repwe pwan amecheresi angangan ewe mwich ngeni mwichen ewe pisop me wart. Me repwe mut ngeni ewe pisop epwe ewisa chommong wis ngeni ewe mwichen elter me presetenin Fin Anisi pwe ewe pisop me noun chon aninnis repwe anonga ar ekiek won wiser kewe mi nap—akkaewin ar repwe nemenem won ekkewe fopun, me ekkewe anuon mi amwochu ewe Pristut seni Aaron.

Siwin non tettenin me mwokutukutun ewe Mwichefen mi fis fan ekkoch. Non 1883, ewe Samon a apasa ngeni Preseten John Taylor: “[Usun] angangen me tettenin ai Mwichefen me Pristut … Upwe pwar ngonuk, seni fansoun me fansoun, seni ekkewe mettoch ua forata, mettoch repwe auchea ren forun me unusochun ai Mwichefen non ekkan ran mwach, ren ekkesiwinin me fefeitan ai muu.”⁴

Iei, ekkoch ai kapas ngeni kemi pwii kewe pris mi nap—oupwe sinei pwe am mi tongei kemi! Semach won Nang mi tongei kemi! Ami watten kinikinin ewe sounfiun pristut mi nap, iwe sise tongeni amokutu ei angang me nuku ami och, angang, mirit, me wenechar. Alma a aiti kich pwe mwan ra kokko ngeni pris mi nap pokiten ar nuku mi watte me ar angang mi och ne afanafan me angang ngeni ekkoch.⁵ Ena angangoch mi auchea iei seni akkom.

Non ekkoch kapas, meni epwe wor pris mi nap ekkewe repwene tufichin nemenem me ren emon elter non wisan we preseten. Mi wor tettenin elter ra nemenem won pris mi nap: iei elter ra wiseni wisen pranch preseten non ekkoch kinikinin ewe fonufan ikewe pris mi nap ra nonnom non ewe pranch, me mi wor pranch ikewe mwichen chok elter a foruta me mi wor pris mi nap mi nom.

Epwe watte pwapwa ngeni ekkewe mi amochu ewe Pristut seni Melkisetek meinisin ar repwe angei ewe feiochun asukun, kaeo, me angang fengen me ekkewe memper meinisin non ar wart. Ian chok oua nom ia me met chok nonnomumi, aua tingor ngeni kemi non iotek, nukuchar, me pwapwa pwe oupwe etiwa minafon tufich ne emweni ika emwen me ren emon me ne angang non tipeew non ew mwichen pwipwi non pristut.

Upwene kapas usun pwan ekkoch mettoch mi auchea repwe affatoch nupwen sia sopweno ne fori mochenin ewe Samon usun etettenin An kewe mwichen ewe pristut mi pin.

Met kewe ekkesiwin ren ew mwichen pris mi nap non steik? Mwichen pris mi nap ren steik epwe chok soposopono ne mwokutukut. Presetenin steik epwe chok soposopono ne wiseni ewe presetensin mwichen pris mi nap ren steik. Nge, usun mi awewetiw me ren Elter Christofferson, pwe chon ewe pris mi nap ren mwichen steik repwene pachenong ren ekkewe pris mi nap ir mi angang iei non ewe presetensin steik, ir chon ewe mwichen pisop, chon mwichen steik mi nap, me ewe petriark. Soumak non wart me steik, me meinapen seketeri ir resap chon ewe mwichen pris mi nap ren steik. Nupwen emon pris mi nap, petriark, Fik, ika Aposel epwe churi ew wart me a mochen fiti mwichen pristut, i epwe chu ngeni ewe mwichen elter.

Nupwen pwiich kewe non ekkei wis ra wes seni wiser non fansoun mi fich, repwe niwin ngeni ewe fan non nenier me choni ewe mwichen elter.

Met ewe wisen ewe mwichen pris mi nap ren steik? Ewe presetensin steik ra chufengen me chon ewe mwichen pris mi nap ne aurour fengen, ne pwarata, me ne awora kaeo. Mwichen steik usun mi awewetiw non nouch puken emwen repwe soposopono ren ru ekkesiwin:

Aewin, wart me steik resap chiwen efisi ekkewe mwichen chon ewe pristut mi nap. Ika a wor ew auchean mettoch epwe fis, ren awewe ew osukosuken famini mi pwetete ika och sokkun osukosuken moni, chon ewe mwichen pisop repwe poraus usun non ar mwich.Ekkoch mettoch mi kis osukosukan repwe porous fengen won me non ewe mwichen aurouren wart. Met kich mi sinei pwe ewe mwichen pristut mi nap ren steik epwene iteni ewe “mwichen aurour mi nap.”

Aruwan, ewe mwichen pris mi nap mi kan fis iteiten ier me non ewe steik esap chiwen fis. Nge, ewe presetensin steik epwe soposopono ne efisi ew mwichen pris mi nap ren steik iteiten ier usun mi affateno ikenai.

Mi tongeni wor nap seni ew mwichen elter non ew wart? Ponuwan pwe ewer. Ach tapweno mwirin Doctrine and Covenant kinikin 107, uwekisin 89, nupwen ew wart a kon watte chochon ewe Pristut seni Melkisetek, souemwen repwe fori nap seni ew chok mwichen elter. Non ena sokkun napanap, ew me ew mwich epwe nonno och masowan ren ier, mirit, me tettenin ika pochokunen pristut.

Ua pwarata pwe nupwen sipwe soposopono ren ei forsefanin mwicheich non ach ewe wart me steik pwe sipwe angei chommongun feioch. Upwe apasa ekkoch awewe.

Fan emwenien ewe pisop, ekkoch pisekin pristut epwe anisi ewe angangen manau ese much. Ei mi pachenong ewe achufengenin Israel me non tempel me angangen uruon famini, angang fengen me famini me emon me emon mi nom non osupwang, me anisi ekkewe misineri ne uweiato aramas ngeni Jises Kraist.

Nupwen ekkewe souemwen akkom ra niwin ar repwe aea fengen ar mirit ngeni ewe mwichen elter, ew chochon ewe mwich mi pochokun epwe fis.

Epwe wor chommong sokopaten niffang ika tufich me non ena mwich.

Epwe kon wor tufich me fansoun ne churi osupwang mi wor ika weiweita me non ewe wart me mwich me non apwonuetan wisach kewe mi sokopat ne angang.

Epwe napeno aurour me tipeew nupwen emon minafon elter me emon pris mi nap mi sinenap ra aea ar mirit, fengen, non mwich me wis.

Anean pwe pisop me presetenin pranch repwe ekis ngaseno ne apwonueta wiser ne emweni nour pwin aramas me angang ngeni met mi auchea ngenir.

Am mi weweiti pwe ew me ew wart me steik mi sokofesen. Nupwen am mi weweiti ekkei sokofesen, aua anean pwe oupwe aneasochisi ekkei siwin mwirin chok ei mwichenapen mwichefen. Sia fen emwen me ren emon soufosun Kot! A ew watte feioch me wis. Sipwe apwonueta ren unusen wenechar me nikitu!

Upwe achema ngeni kemi pwe mumutan pristut a fis ren ach ewisa ngeni me epinipinino, nge ennetin manamanen pristut, ewe manaman ne foffor non iten ewe Samon Jises Kraist, a chok tongeni fis ren ach manau tupwon.

Ewe Samon a apasa ngeni Joseph Smith, ewe soufosun ewe Niwinsefanito:

Pwe, I epwe tumunu nouch kewe aramas me I epwe amarieta elter me tinireno rer.

Epwe, emwitiri an angang non pwisin fansoun.⁶

Ennetin, iei ew fansoun nupwen ewe Samon a amwitiri An angang.

Amwo sipwe aea ei tufich ne ekiek me aochueno manauach epwe wenengeni An mochen pwe epwe fich ngeni kich ekkewe chommong feioch a pwonei ngeni ekkewe mi ennet me tupwon.

Pwii kana, kinisou ren mettoch meinisin oua fori ren ami oupwe chon ei angang mi amwarar. Amwo sipwe feino non ei popun mi nap me sufon.

Ikenai sia uta pwe kich chon pwarata an ewe Samon pwarano An mochen me non Noun soufos, Preseten Russell M. Nelson. Ua pwarata pwe i noun Kot soufos ikei won fonufan. Ua pwarata usun ewe Samon Jises Kraist, I ach Chon Angasano mi nap me ach Chon Amanau. Iei An angang, me iei An mochen, minne ua apasa ai kapasen pwarata non iten Jises Kraist, amen.