2010–2019
Nooria! Ana Taanga ni Buaka te Uea
Eberi 2018


Nooria! Ana taanga ni Buaka te Uea

Ai kakukureira irouia ni kabane ake a karekea te Nakoanibonga ae te Merekitereka ni kakabwaia n reirei, reiakinna, ao ni kaai ni beku.

Taariu aika kam tangiraki, I a tei i matami ma te nanorinano ae korakora n te tai ae ururingaki aei, iaan tibwangara iroun ara burabeti ae tangiraki ao Beretitenti, Russell M. Nelson. E korakora au tangira ao au boutoka nakon te mwaane ae moan te tamaroa are ana aomata te Atua ao ara Moan Beretitentii ae boou. I raona au kakoaua nakon ana kakoaua Unimwaane D. Todd Christofferson ao Tariu ake tabeman n te Kooram n Abotoro n te Tengaun ma Uoman bwa te bitaki are e katanoataaki n te tairiki aei bon ana kantaninga te Uea.

N aron are e taekinaki iroun Beretitenti Nelson, aio te bwai are e a tia n rang n tataromwaaka ni maroroakina ma Taari aika a maan n te Ekaretia ibukin te tai ae maan. Te nano ae korakora bon ukoran ana kantaninga te Uea ao ni kakorakoraakiia te kooram n Nakoanibonga ae te Merekitereka. A reke kairi, ao n te tairiki aei ara burabeti e a tia ni kaota ana kantaninga te Uea. “E na bon aki karaoa te bwai teuana te Uea ae Iehova, ngkana e aki kaota moa nanona ae raba nakoia ana toro aika burabeti!”1 Ti rang kakabwaiaki ni karekea ara burabeti ae maiu n te bong aei!

Rinanon nako maiura, Titita Rasband ao Ngai ti mwananga n te aonaaba iaon tibwangara n te Ekaretia ao rabakaura aika kakaokoro. I a tia n noori e kaniia aekakin nako bairean iunite n te Ekaretia: te mwaanga ae uarereke i Russia are mwaitiia Nakoanibonga aika Merekitereka e kona ni warekaki iaon te bai teaina, te uoote ae boou ae rikirake i Africa are ibonga aika rietata ao unimwaane a ikotaki bwa te rabwata ae ti teuana ibukin mwaitiia ake iai irouia te Nakoanibonga ae te Merekitereka e uarereke, ao uoote ake a tabwanin are mwaitiia e a riai ni uamae nakon uoua te kooram!

N taabo nako are ti nako iai, ti a tia ni kakoaua bain te Uea n rimoan Ana toro, ni katauraoia aomata imwaina bwa aonga ni kabane Natina ni kakabwaiaki ni kaineti ma kainnanoia. E a tia ni berita “bwa E na rimoa [ara]” ni “mena i angatai [ira] ao n angamaingi[ira] ”ao “Tamneina e na mena i[nanora], ao [Ana] anera a mena i buako[ra]”?2

N iangoi ngkami ni kabane, I kauringaki n te anene “Nooria! Ana taanga ni buaka te Uea”

Nooria! Ana taanga ni buaka te Uea,

Ma buraeki, kabaang, ao otanga,

A mwaati ni waakirake bwa ana tokanikai

Iaon taaboni buaka aika korakora n te maiu.

E kainaki irouia tautia,

Katiteuanaaki, ninikoria, ao ni korakora,

Are a Ira aia Tia Kamaiu

Ao n anenei kunaia ma te kakatonga.3

Unimwaane Christofferson e a tia ni kaekai tabeua titiraki ake a kona ni kaoti man te katanoata n te kurubu n ibonga ae rietata ao kooram n unimwaane, n ana karinan te uoote, a ikotaki inanon te katiteuanaaki, bwa ana taanga ae korakora taari n Nakoanibonga ae te Merekitereka.

Bitaki aikai a na buokiia kooram n unimwaane ao te Bootaki n Aine ni mwakuri ma te nakoraoi. A na kabebetea naba reitakin te kooram ma te bitioburiki ao kauntira n te uoote. Ao a na karekea ana tai te bitiobi ni kanakoi riki tibwanga nakon te kooram n unimwaane ao te beretitenti n te Bootaki n Aine bwa e aonga te bitiobi ao ana kauntira ni boboto riki n tibwangaia—iaon tararuaia kairake n ataeinnaine, ao ataeinnimwaane ake iai irouia te Nakoanibonga ae te Aaron.

Bitaki n te bootaki ao mwakuri n te Ekaretia bon tiaki bwaai aika aki ririki. N 1883, te Uea e taku nakon te Beretitenti John Taylor: “Ni kaineta[ki] te babaire ao katean au Ekaretia ao te Nakoanibonga …N na kaoti nakoimi man te tai teuana nakon teuana, rinanon te kawai are I a tia ni bukinaki iai, bwaai ni kabane aika a riai ibukin te rikirake n taai aika a na roko ao kakororaoan au Ekaretia, ibukin te bitaki ao karabinoan nako abanueau.”4

Ngkai, tabeua taeka nakomi taari n nakoanibonga aika rietata—kam na ataia bwa ti tangiri ngkami! Tamara are i Karawa e tangirii ngkami! Ngkami mwakoron ana taanga ni buaka te Uea n te nakoanibonga, ao ti aki kona ni waaki nako ma te mwakuri aei n akean tamaroami, ami ibuobuoki, taneiaimi, ao tamaroami. Aramwa e reirei bwa mwaane ake a weteaki nakon te ibonga ae rietata ibukin aia onimaki ae rianako ao aia mwakuri ae tamaroa n reirei ao n ibuobuoki ibukiia tabeman.5 Te taneiai anne e kainnanoaki n te tai aei nakon riki are mai imwaina.

Ni uoote aika a mwaiti, ti kona ni karekeia ibonga aika rietata aika a na kona ni karekea tibwangaia n tararua iaoia unimwaane ao aia beretitenti n aia kooram. Iai iroura te mwakuri ni babaire irouia unimwaane n tararua iaona ibonga aika rietata, unimwaane aika a beku bwa beretitenti ni mwaanga n taabo tabeua n te aonaaba ake a maeka iai nakoanibonga aika rietata, ao iai mwaaka ake bon tii kooram n unimwaane a tei iai ao iai ibonga aika rietata.

Ai kakukureira te mena irarikimi ni kabane ake iai iroumi te Nakoanibonga ae te Merekitereka ni karekei kakabwaia n reirei, reiakin, ao n iaonanga ma ni kabane membwa n aia uoote. N taabo nako ake kam mena iai ao n aro nako ake kam rinanona, ti kaoi ngkami bwa kam na tataromwaaka, kakaonimaki, ao ni kimwareirei ni butimwaea te tibwanga ae boou ni kairi ao ni kairaki ao ni beku ni katiteuanaaki bwa te rabwata n tari n te nakoanibonga.

N na taekinii n te tai aei bwaai riki tabeua, ake a riai ni kamatataki, ngkai ti waaki nako ni katea ana kantaninga te Uea ni kaineti ma te bootaki n Ana kooram n te nakoanibonga ae mimitong.

Tera bitaki ibukin te kooram n nakoanibonga ae rietata? Kooram n ibonga ae rietata n te titeiki e na reitinako ni waaki. Te beretitentii n te titeiki e na reitinako ni beku bwa te beretitentii n te kooram n ibonga ae rietaata n te titeiki. E ngae n anne, are e taekinaki iroun Unimwaane Christofferson, Kaain te kooram anne bon ti ibonga aika rietaata aika beku ngkai n te beretitentii n te titeiki, n te bitioburiki, n te kauntira ae rietaata, ao tamanuea aika waaki. Kiraaka n te uoote ao n te titeiki ao taan koroboki ni kakoroi mooti tiaki kaain te kooram n ibonga ae rietaata. Ngkana temanna ae e kakaonimaki ni beku bwa te nakoanibonga ae rietata, tamanuea, itingaun, ke te Abotoro ni kawarii uoote ao ni kan irii bootaki n te nakoanibonga, e na bootaki ma te kooram n unimwaane.

Ngkai taari ni wewete aikai a kamotirawaaki n te tai aei, a na okirii aia iunite ni mweengaia bwa membwa n te kooram n unimwaane.

Tera taben te kooram n ibonga ae rietaata n te titeiki? Te beretitentii n te titeiki a na bowi ma kaain te kooram n ibonga ae rietaata n reirei irouia, ni kakoaua, ao ni buokiia kaain te kooram n nakoaia. Te bowi n te titeiki ae iai ngkai e kabwarabwaraaki n te Aeniboki e na reitnako ma bitaki aika uoua:

Teuana, uoote ao titeiki e aki manga karaoi boowi komete n te nakoanibonga ibukin kakoroan mwiin mooti. Ngkana iai ana kaangaanga te uoote ae onoti, ae riki n aron te kaangaanga n te utu ke te kakaewenako n te warebea, ae kona ni maroroakinaki n te bootaki ni bitioburiki. Tabeua bwaai ake aki ran roota te namakin a kona ni maroroakinaki ni kauntiran te uoote. Tera are a tia n taekinaki bwa “aia boowi komete n te nakoanibonga n te titeiki” a aranaki bwa “aia boowi kauntira aika rietaata”

Uoua, boowi ni katoa ririki irouia ni kabane ibonga aika rietata n te titeiki e aki manga karaoaki. E ngae n anne, beretitentii n titeiki a na reitinako ni karaoi boowi ni katoa ririki n te kooram n nakoanibonga ae rietata n te titeiki n aron ae katanoataaki n te bong aei.

E kona te uoote ni karekea ana kooram ae raka iaon teuana? Te kaeka bon eng. N te tamnei n Reirei ao Berita aika Tabu mwakoro 107, kibu 89, ngkana te uoote e karekea ana mwaiti ae bubura irouia aika iai irouia te Nakoanibonga ae te Merekitereka, a kona mataniwi ni bairea ae raka nakon teuana te kooram n unimwaane. N aron waaki aikai, e riai te kooram n iai ana mwaiti ae tau ni kaineti ma te ririki, te atatai, ao te nakoa n te nakoanibonga ao te korakora.

I kakoaua bwa ngkai ti wakirake ni manga katea ara kuoram n ara uoote ao ara titeiki ti na kona n norii kakabwaia aika a mwaiti. N na tii taekin tabeua katotoo.

Iaan ana kairiri te bitiobi, a mwaiti bwai ni ibuobuoki n te nakoanibonga ake ana ibuobuoki n te mwakuri ni kamaiu. Aei ni ikotaki ma bootakia tibun Iteraera rinanon te mwakuri n te tembora ao karaoan te mwakuri ibukia utu ao te mwakuri ma utu ao kainanoia n tatabemania, ao ni buokia mitinare ni uotiia aomata nakon Iesu Kristo.

N aron ara taan kairiri n tararua mai imwaina a oki ao man tibwauai baike a reiakin ma kain te kainimwaane, e na kona n anga te kakorakoraki riki nakoia kain te kooram.

A mwaiti aekakin ibuobuoki ao mwakuri inanon ara kooram.

Ana iai baitiin ao tatauraoi nakon bwaai aika rang ni kainanoaki inanon te uoote ao te kooram ao ibukin katiakin ara ibuobuoki aika kakaokoro.

Iai rikiraken te reiakinaki ao te katiteuanaaki ngkai unimwaane aika boou ao ibonga aika rietata a tibwauai bwaai ake a reiakin, imarenaia n aia bowi n te kooram ao katabeaia nako.

Bitiobi ao beretitenti ni mwaanga ana kantaninga te reireinaki ni kakorakorai nakoaia ni kairiia aia nanai ao n ibuobuoki nakoia ake a kainnano.

Ti ataia bwa uoote nako ao titeiki a kakaokoro. Ngkai ti ataia kaokoro aikai, ti kantaningaia bwa kam na irii nanona bitaki aikai n te tai ae waekoa imwiin te maungatabu ni kabuta aei. Ti a tia n anganaki te kaetieti iroun ana burabeti te Atua! Ai mwaitira kakabwaia ao tibwangara. Tina kakoroa bukina ma te raoiroi ni kabane ao te mwakuri korakora!

I kauringi ngkami: bwa te kariaikaki man te nakoanibonga e roko man kawai ni kaokoroaki, ma te mwaaka raoi n te nakoanibonga, te mwaaka ni karaoia n aran te Uea Iesu Kristo, are e kona n roko tii man maiuakinan te raoiroi.

Te Uea e katanoata nakon te Burabeti Iotebwa Timiti, te burabeti ni Kaokanbwaai:

“Nooria!, nooria, N na kawakiniia am nanai n tiibu, ao N na kateirakea iai unimwaane ao ni kanakoia.

“Nooria, N na kawaekoa au mwakuri n taina.”6

E koaua, aio te tai are te Uea e na kawaekoa iai Ana mwakuri.

Ti a kamanena te tai aei ni iangoia ao ni karikirakea maiura ni kaetia nakon ana kantaninga n te aro bwa ti na karekei kakabwaia aika a bati ake e a tia ni berita iai n te koaua ao te kakaonimaki.

Tariu, kam rabwa n ami beku are kam karaoia n riki bwa mwakoron te mwakuri ae kakaawaki aei. Tia bane ni wakirake inanon tamaroan ao karinean te mwakuri aei.

O, ngke a toki te buaka,

Ngke a toki te kaiangatoa ao te itaberara,

Ngke a bane ni botaki ni kamanoaki

Inanon maruan te raoi,

Imatan te Uea ae akea tokina,

Bwa e bubura ao e korakora aia mwaiti

Bane neboa arana n aki toki,

Ao aio kunaia:

Tokanikai, tokanikai,

Mai Irouna e kamauira!

Tokanikai, tokanikai,

Rinanon Iesu Kristo, ara Uea!

Tokanikai, tokanikai, tokanikai,

Rinanon Iesu Kristo, ara Uea!7

N te bong aei ti bane n tei bwa taan kakoaua iroun te Uea ni kaota Ana kantaninga rinanon Ana burabeti, Beretitenti Russell M. Nelson. I kakoaua bwa ngaia Ana burabeti te Atua ikai iaon te aba. I kaota au kakoaua iroun te Uea Iesu Kristo, are bon te Tia Kabooira ao te Tia Kamaiu. Aio Ana Mwakuri, aio Ana kantaninga, are I kaota iai au kakoaua n aran Iesu Kristo, amen.