Adtoy! Ti Naarian a Buyot

Patpatgek a kakabsatko iti priesthood, napakumbabaak nga agtakder iti sangoyo iti daytoy a napnuan pakasaritaan a pasken, a dinutokan ti patpatgentayo a propeta ken President, Russell M. Nelson. Ay-ayatek daytoy naimbag a tao ti Dios ken ti baro nga Umuna a Panguluentayo. Inayonko ti panagsaksik ken Elder D. Todd Christofferson ken ti maysa pay a Kabsat ti Korum ti Sangapulo-ket-dua nga Apostol a dagiti panagbalbaliw a naipakaammo ita ket pagayatan ti Apo.

Kas kinuna ni President Nelson, daytoy ti banag a nainkararagan a napagsasaritaan ken imbilang dagiti senior a Kakabsat ti Simbaan iti nabayag a panawen. Ti tarigagay ket gun-oden ti pagayatan ti Apo ken papigsaen dagiti korum ti Melchizedek Priesthood. Naawat ti inspirasion, ket itay impakaammo ti propetatayo ti pagayatan ti Apo. “Kinapudnona, awanto ti aramiden ni Apo Jehova a dinto maipalgak ti palimedna kadagiti adipenna dagiti mammadto”!(¹ Nagasattayo nga addaan iti sibibiag a propeta iti agdama!

ti unos ti biagmi, nagbaniagakami ken Sister Rasband iti lubong iti agduduma a Simbaan ken propesional nga assignment. Nakitakon ti dumani tunggal kita ti unit configuration ti Simbaan: bassit a branch iti Russia a mabilang ti ima ti bilang ti Melchizedek Priesthood; ti baro ken dumakdakkel a ward iti Africa a pagmimitingan dagiti high priest ken elder kas maysa a ragup gapu ta nababa ti bilang dagiti Melchizedek Priesthood holder; ken dagiti well-established ward a ti bilang dagiti elder ket agkasapulan iti pannakabingay ti korumda iti dua a korum!

Napankamin iti amin a lugar, nasaksianmi ti ima ti Apo mangtartarabay kadagiti katulonganna, a mangisagsagana kadagiti tao ken ti agur-uray a dalan tapno mabendisionan ti amin nga annakna maibatay iti kasapulada. Di kad’ inkarina nga Isu “addanto iti sango[tayo]” ken “addanto ti makanawan[tayo] ken iti makanigid[tayo]” ken “addanto ti Espirituna iti puspuso[tayo], ken dagiti anghel[na] mangtarabay [kadatayo]”?²

Iti panangpanunotko kadakayo, naipalagip kaniak ti himno “Behold! A Royal Army.”

Sinungbatan ni Elder Christofferson ti sumagmamano a saludsod nga awan duadua a madamag iti pannakaipakaammo a dagiti high priests group ken elders quorum, iti ward level, ket agtipon iti maysa a nakaykaysa, nablieg a buyot ti kakabsat iti Melchizedek Priesthood.

Dagitoy nga adjustment ti mangtulongto kadagiti elders quorum and Relief Society a mangitunos iti aramidda. Dagitoy pay ti mangpalaka iti pannakitunos ti korum iti bishopric ken ward council. Palugodanda ti bishop a mangidutok iti ad-adu pay a pagrebbengan kadagiti presidente ti elders quorum ken Relief Society tapno makapagpokus ti bishop ken dagiti councelorna iti kangrunaan a pagrebbenganda—nangruna iti panangidaulo iti young women, ken ti young men nga addaan iti Aaronic Priesthood.

Gagangay ti panangbalbaliw kadagiti organisasion ken pagtakeman iti Simbaan. Idi 1883, kinuna ti Apo ken President John Taylor: “[Maipanggep] ti panangimaton ken organisasion ti Simbaanko ken Priesthood … ipalgakkonto kenka, sagpaminsan, babaen dagiti wagas nga impasdekko, amin a banag a kasapulan iti masakbayan a panagdur-as ken pannakaan-anay ti Simbaanko, para iti pannakabaliw ken panagdur-as ti pagariak.”⁴

Ita, sumagmamano a balikasko kadakayo kakabsat a high priest—ay-ayatendakayo! Ay-ayatennakayo ti Amatayo iti Langit! Dakkel a pasetkayo ti naarian a buyot ti priesthood, ket ditayo mapadur-as daytoy nga aramid no awan ti kinaimbag, serbiso, padas, ken kinalintegyo. Insuro ni Alma a maawagan dagiti lallaki a high priest gapu iti aglaplapusanan a pammati ken nasayaat nga aramidda a mangisuro ken agserbi iti dadduma.⁵ Kasapulan dayta a padas ita nalabit nga ad-adda pay.

Iti adu a ward, mabalin nga addantay’ kadagiti high priest a maaddaan iti gundaway a maidauluan ti maysa nga elder kas presidente ti korumda.Addaantayo ti pagsurotan dagiti elder a mangidaulo kadagiti high priest: agdama nga agserserbi dagiti elder kas branch president iti sumagmamano a rehion ti lubong a pagnaedan dagiti high priest iti branch, ken adda dagiti branch a ti laeng elders quorum ti nabukel ken adda dagiti high priest.

Anian a rag-o para iti amin a Melchizedek Priesthood holder a nagkaykaysa iti bendision ti panangisuro, panagsursuro, ken panagserbi iti amin a miembro iti wardda. Sadinokayo ken ania man ti kasasaadyo, awisendakayo a sikakararag, sipupudno, ken sirarag-o nga awatenyo dagiti baro a gundaway a mangidaulo wenno agpaidaulo ken agkaykaysa nga agserbi kas agkakabsat iti priesthood.

Isaritak ita ti nayon a banag a mabalin nga agkasapulan iti pannakalawlawag bayat ti panagtultuloytayo a mangipatungpal iti pagayatan ti Apo maipanggep iti organisasion dagiti korumna iti nasantuan a priesthood.

Ania dagiti panagbalbaliw iti stake high priests quorum? Agtultuloyto nga agtrabaho dagiti stake high priests quorum. Agtultuloyto nga agserbi dagiti stake presidency kas presidency ti stake high priests quorum. Nupay kasta, kas inlawlawag ni Elder Christofferson, dagiti miembro ti stake high priests quorum ket buklen dagiti high priest nga agdama nga agserserbi iti stake presidency, kas miembro ti ward bishopric, kas miembro tistake high council, ken ti agak-akem a patriarch. Dagiti ward ken stake clerk ken executive secretary ket saan a miembro ti stake high priests quorum. No ti maysa nga aktibo nga agserserbi kas high priest, patriarch, Pitupulo, wenno Apostol ket bumisita iti ward ken agtarigagay a dumar-ay iti miting ti priesthood, dar-ayanna ti elders quorum.

No mai-release dagiti kakabsat kadagitoy a calling iti umno a panawen, agsublidanto iti home unitda kas miembro ti elders quorum.

Ania ti akem ti stake high priests quorum? Makipagmiting ti stake presidency kadagiti miembro ti high priests quorum tapno aggiinnuman, mamaneknek, ken mangted training. Agtuloyto dagiti miting iti stake kas nabalabala iti handbooktayo iti dua a panagbalbaliw:

Maysa, dinton angayen dagiti ward ken stake dagiti priesthood executive committee meeting. No adda espesial nga isyu ti ward, kas iti nakain-inaka a pakaseknan ti pamilia wenno karit iti welfare, mailawlawag daytoy iti napadakkel a miting ti bishopric. Mailawlawag ti dadduma a di sensitibo a banag iti ward council. Ti naawagan a stake priesthood executive committee meeting ket maawagan itan iti “high council meeting.”

Dua, dinton maangay ti tinawen a miting ti amin a naordenan a high priest iti stake. Nupay kasta, ituloyto ti stake presidency ti mangangay iti tinawen a miting ti stake high priests quorum kas naipakaammo ita.

Maaddaan kadi ti ward iti nasurok ngem maysa nga elders quorum? Wen ti sungbat. Segun iti Doktrina ken Katulagan benneg 107, bersikulo 89, no ti ward adda dakkel a bilang ti aktibo a Melchizedek Priesthood bearer, mabalin a buklen dagiti lider ti nasurok ngem maysa nga elders quorum. Iti kasta a kaso, nasken nga addaan ti tunggal korum iti maitutop a balanse iti edad, padas, ken priesthood office ken pigsa.

Paneknekak nga iti panagtuloytayo iti daytoy naparegta a pannakabukel manen iti korum kadagiti ward ken staketayo, makitatayto dagiti nawadwad a bendision. Mangibagaak man iti sumagmamano a pagarigan.

Babaen ti direksion ti bishop, makatulong ti adu pay a priesthood resources iti aramid ti pannakaisalakan. Iraman daytoy ti panangummong ti Israel babaen ti aramid iti templo ken family history, pannakipagtrabaho iti pamilia ken indibidual nga agkasapulan, panangtulong iti misionario a mangyeg kararua ken Jesucristo.

No agsubli dagiti sigud a mangidaulo a lider a mangbinglay iti padasda iti korum dagiti elder, agbunga iti napigpigsa a quorum membership.

Addanto dakdakkel a pagdudumaan ti sagut ken kapasidad iti uneg ti korum.

Ad-adunto ti flexibility ken availability a maited ti agdama ken pettat a kasapulan iti uneg ti ward ken korum ken iti pannakaipatungpal ti agduduma nga assignment iti panagserbi.

Umadunto ti panangisuro ken panagkaykaysa bayat ti panangibinglay iti padas ti baro nga elder ken aduan-padas a high priest, aginnabay, kadagiti miting ti korum ken assignment.

Sapay ta nawayanto dagiti bishop ken branch president nga i-magnify ti callingda a mangsaluad kadagiti arbanda ken agserbi iti agkasapulan.

Maawatanmi nga agduduma ti tunggal ward ken stake. Iti panangawatmi kadagitoy a pagdudumaan, namnamaenmi a surotenyo a dagus dagitoy a panagbalbaliw kalpasan daytoy sapasap a komperensia. Inikkanatayo iti direksion ti maysa a propeta ti Dios! Anian a dakkel a bendision ken pagrebbengan. Ipatungpaltayo koma daytoy iti kinalinteg ken kinapasnek!

Ipalagipko kadakayo: nga umay ti turay ti priesthood babaen ti setting apart ken ordinasion, ngem ti pudno a bileg ti priesthood, ti bileg nga agtignay iti nagan ti Apo Jesucristo, umay laeng babaen ti nalinteg a panagbiag.

Impakdaar ti Apo ken ni Propeta Joseph Smith, ti propeta ti Pannakaisubli:

“Adtoy, ket imutektekanyo, taripatuekto dagiti arbanyo, pataudekto dagiti elder ket ibaonko kadakuada.

“Adtoy, idarasko ti aramidko iti panawenna.”⁶

Pudno, daytoy ti panawen a padarasen ti Apo ti aramidna.

Usarentayo koma daytoy a gundaway ngaagutob ken pasayaaten ti biagtayo tapno mayurnostayo a nasaysayaat iti pagayatanna ken maikaritayo iti adu a bendision nga inkarina kadagiti pudno ken napudno.

Kakabsat, agyamanak iti amin nga ar-aramidenyo tapno agbalin a paset ‘toy naindaklan nga aramid. Agtultuloytayo koma itoy naindaklan ken nadayaw a panggep.

Ita agtakdertayo kas saksi ti Apo a mangipalgak iti pagayatanna babaen ti propetana, President Russell M. Nelson. Paneknekak nga isu ti propeta ti Dios ditoy daga.Paneknekak ni Apo Jesucristo, ti naindaklan a Mannubbot ken Mangisalakantayo. Daytoy ti aramidna, daytoy ti pagayatanna, a paneknekak a sipapasnek iti nagan ni Jesucristo, amen.