មើលចុះ ! ទ័ពហ្លួង
វានឹងជាអំណរអ្វីម្ល៉េះចំពោះពួកអ្នកកាន់បព្វជិតភាពមិលគីស្សាដែកគ្រប់រូបដើម្បីមានពរជ័យនៃការបង្រៀន ការរៀនសូត្រ និងការបម្រើប្រកៀកស្មាគ្នា ។
បងប្អូនប្រុសនៅក្នុងបព្វជិតភាពជាទីស្រឡាញ់ វាគឺជាការរាបសាខ្លាំងណាស់ដែលខ្ញុំបានឈរនៅចំពោះមុខបងប្អូននៅក្នុងឱកាសជាប្រវត្តិសាស្ត្រនេះ នៅក្រោមការចាត់តាំងមកពីព្យាការី និងប្រធានជាទីស្រឡាញ់របស់យើងប្រធាន រ័សុល អិម ណិលសុន ។ ខ្ញុំស្រឡាញ់ ហើយគាំទ្រចំពោះបុរសដ៏អស្ចារ្យទាំងនេះរបស់ព្រះ និងគណៈប្រធានទីមួយថ្មីរបស់យើងខ្លាំងណាស់ ។ ខ្ញុំសូមបន្ថែមសាក្សីរបស់ខ្ញុំចំពោះសាក្សីរបស់អែលឌើរ ឌី ថត គ្រីស្តូហ្វឺសិន និងបងប្អូនប្រុសរបស់ខ្ញុំផ្សេងទៀតក្នុងកូរ៉ុមនៃពួកសាវកដប់ពីរនាក់ថា ការផ្លាស់ប្ដូរដែលបានប្រកាសនាល្ងាចនេះគឺជាព្រះទ័យរបស់ព្រះអម្ចាស់ ។
ដូចដែលប្រធានណិលសុនបានថ្លែង នេះគឺជាបញ្ហាមួយដែលត្រូវបានពិភាក្សា ហើយបានពិចារណាប្រកបដោយការអធិស្ឋានដោយបងប្អូនប្រុសរៀមច្បងនៃសាសនាចក្រជាយូរមកហើយ ។ បំណងប្រាថ្នានេះគឺដើម្បីស្វែងរកព្រះទ័យរបស់ព្រះអម្ចាស់ ហើយពង្រឹងដល់កូរ៉ុមនៃបព្វជិតភាពមិលគីស្សាដែក ។ ការបំផុសគំនិតត្រូវបានទទួល ហើយនាល្ងាចនេះ ព្យាការីរបស់យើងបានប្រកាសអំពីព្រះទ័យរបស់ព្រះអម្ចាស់ ។ « ពិតប្រាកដជាព្រះយេហូវ៉ាទ្រង់នឹងមិនធ្វើអ្វីដូច្នោះឡើយ លើកទ្រង់សម្ដែងឲ្យពួកហោរា ជាអ្នកបម្រើទ្រង់ឃើញគំនិតលាក់កំបាំងរបស់ទ្រង់ផង ! »១ យើងមានពរជ័យអ្វីម៉្លេះដោយមានព្យាការីនៅរស់ម្នាក់នាសព្វថ្ងៃនេះ !
ពេញមួយជីវិតរបស់ខ្ញុំ ស៊ិស្ទើរ រ៉ាសបាន និងខ្ញុំបានធ្វើដំណើរជុំវិញពិភពលោកតាមរយៈការចាត់របស់សាសនាចក្រ និងអាជីពការងារខុសៗគ្នា ។ ខ្ញុំធ្លាប់ឃើញស្ទើរតែអង្គភាពគ្រប់ប្រភេទនៅក្នុងសាសនាចក្រ ៖ ដូចជាសាខាតូចមួយនៅប្រទេសរុស្សីដែលមានចំនួននៃបព្វជិតភាពមិលគីស្សាដែកអាចអង្គុយពេញកៅវែងមួយ វួដថ្មីមួយ ហើយកំពុងរីកចម្រើនៅទ្វីបអាហ្វ្រិកដែលសង្ឃជាន់ខ្ពស់ និងពួកអែលឌើរបានជួបជុំគ្នាជាក្រុមតែមួយ ដោយសារចំនួនអ្នកកាន់បព្វជិតភាពមិលគីស្សាដែកទាំងអស់មានតិចពេក និងវួដដ៏រីកចម្រើនជាច្រើនដែលចំនួនពួកអែលឌើរដ៏ច្រើន ហើយតម្រូវឲ្យបំបែកកូរ៉ុមរបស់ពួកគេជាពីរ !
នៅគ្រប់ទីកន្លែងដែលយើងទៅ យើងបានឃើញព្រះហស្ដរបស់ព្រះអម្ចាស់ទៅពីមុខពួកអ្នកបម្រើរបស់ទ្រង់ ដោយរៀបចំមនុស្ស និងផ្លូវទុកជាមុន ដើម្បីបុត្រាបុត្រាទាំងអស់របស់ទ្រង់អាចមានពរស្របតាមសេចក្ដីត្រូវការរបស់ពួកគេ ។ តើទ្រង់មិនបានសន្យាទេឬអីថា ទ្រង់ « នឹងទៅពីមុខ[ យើង ] » ហើយ « នៅខាងស្ដាំដៃ [ យើង ] ហើយខាងឆ្វេងដៃ [ យើង ] » ហើយថា ព្រះវិញ្ញាណរបស់ទ្រង់« នឹងសណ្ឋិតនៅក្នុងដួងចិត្តរបស់ [ យើង ] ហើយពួកទេវតារបស់ [ ទ្រង់ ] នៅព័ទ្ធជុំវិញ[ យើង ] » ?២
ដោយគិតអំពីបងប្អូនទាំងអស់គ្នា ខ្ញុំនឹកចាំអំពីទំនុកតម្កើងបទ « មើលចុះ ! ទ័ពហ្លួង » ។
មើលចុះ ! ទ័ពហ្លួង
បំពាក់ជាប់ខ្លួនដោយទង់ ដាវ និងខែល
ទៅមុខប្រយុទ្ធក្នុងលាន
ចម្បាំងដែលពេញដោយទាហាន ។
ដោយឈរជាជួរយ៉ាងមាំមួន
ខ្ជាប់ខ្ជួនក្នុងសាមគ្គីភាព
ស្ដាប់តាមមេទ័ពខ្លួន
រួចច្រៀននូវចម្រៀងដ៏រីករាយ ។៣
អែលឌើរ គ្រីស្តូហ្វឺសិន បានឆ្លើយសំណួរមួយចំនួនដែលបានចោទសួរទាក់ទងនឹងការប្រកាសថា ក្រុមសង្ឃជាន់ខ្ពស់ និងកូរ៉ុមអែលឌើរ នៅកម្រិតវួដ នឹងត្រូវដាក់បញ្ចូលគ្នាជាទ័ពដ៏អស្ចារ្យតែមួយ ដែលមានសាមគ្គីភាពនៃបងប្អូនប្រុសនៃបព្វជិតភាពមិលគីស្សាដែក ។
ការកែតម្រូវនេះនឹងជួយកូរ៉ុមអែលឌើរ និងសមាគមសង្គ្រោះធ្វើការជាមួយគ្នាយ៉ាងសុខដុម ។ វាក៏នឹងធ្វើឲ្យការសម្របសម្រួលរបស់កូរ៉ុមមានភាពងាយស្រួលជាមួយនឹងគណៈប៊ីស្សព និងក្រុមប្រឹក្សាវួដផងដែរ ។ ហើយវាអនុញ្ញាតឲ្យប៊ីស្សពបែងចែកការទទួលខុសត្រូវច្រើនដល់ប្រធានកូរ៉ុមអែលឌើរ និងប្រធានសមាគមសង្គ្រោះ ដើម្បីប៊ីស្សព និងទីប្រឹក្សារបស់គាត់អាចផ្ដោតលើកាតព្វកិច្ចចម្បងរបស់ពួកគាត់—ជាការធ្វើជាអធិបតីជាពិសេសលើយុវនារី និងយុវជនដែលកាន់បព្វជិតភាពអើរ៉ុន ។
ការផ្លាស់ប្ដូរនៅក្នុងអង្គការ និងតួនាទីរបស់សាសនាចក្រពុំមែនជារឿងខុសប្លែកនោះទេ ។ នៅឆ្នាំ១៨៨៣ ព្រះអម្ចាស់បានមានបន្ទូលទៅកាន់ប្រធាន យ៉ូហាន ថេលើរ ថា « [ ទាក់ទងនឹង ] ការគ្រប់គ្រង និងការរៀបចំនៃសាសនាចក្រ និងបព្វជិតភាពរបស់យើង … យើងនឹងបើកសម្ដែងដល់អ្នកពីមួយគ្រាទៅមួយគ្រា តាមរយៈបណ្ដាញដែលខ្ញុំបានតែងតាំង នូវអ្វីគ្រប់យ៉ាងដែលនឹងចាំបាច់សម្រាប់ការអភិវឌ្ឍ និងការការពារដល់សាសនាចក្ររបស់យើងនាពេលអនាគត សម្រាប់ការកែតម្រូវ និងការរំកិលទៅមុខនៃនគររបស់យើង » ។៤
ខ្ញុំមានពាក្យសម្ដីពីរបីម៉ាត់សម្រាប់បងប្អូនប្រុសដែលជាសង្ឃជាន់ខ្ពស់—សូមដឹងថា យើងស្រឡាញ់បងប្អូន ! ព្រះវរបិតារបស់យើងដែលគង់នៅស្ថានសួគ៌ទ្រង់ស្រឡាញ់បងប្អូន ។ បងប្អូនគឺជាផ្នែកដ៏ធំមួយនៃទ័ពហ្លួងនៃបព្វជិតភាព ហើយយើងមិនអាចរំកិលការងារនេះទៅមុខដោយគ្មានសេចក្ដីល្អ ការបម្រើ បទពិសោធន៍ និងសេចក្ដីសុចរិតរបស់បងប្អូនបានឡើយ ។ អាលម៉ាបានបង្រៀនថា បុរសត្រូវបានហៅជាសង្ឃជាន់ខ្ពស់ ដោយសារតែសេចក្ដីជំនឿដ៏លើសលុប និងកិច្ចការល្អរបស់ពួកគេដើម្បីបង្រៀន ហើយធ្វើការងារបម្រើដល់មនុស្សដទៃ ។៥ បទពិសោធន៍នោះគឺត្រូវការចាំបាច់នៅពេលនេះជាជាងពេលណាៗទាំងអស់ ។
នៅក្នុងវួដជាច្រើន យើងអាចនឹងមានសង្ឃជាន់ខ្ពស់ដែលឥឡូវនេះកំពុងមានឱកាសត្រូវបានដឹកនាំដោយអែលឌើរម្នាក់ជាប្រធានកូរ៉ុមរបស់ពួកគេ ។ យើងមានទម្លាប់មួយពីមុនដោយមានពួកអែលឌើរធ្វើជាអធិបតីលើពួកសង្ឃជាន់ខ្ពស់ដូចជា ៖ ពួកអែលឌើរកំពុងបម្រើនាបច្ចុប្បន្ននេះជាប្រធានសាខានៅក្នុងភូមិភាគមួយចំនួននៃពិភពលោក ដែលមានសង្ឃជាន់ខ្ពស់នៅក្នុងសាខានោះ ហើយមានសាខាដែលមានតែកូរ៉ុមអែលឌើរមួយគត់ត្រូវបានរៀបចំឡើង ហើយមានវត្តមានរបស់សង្ឃជាន់ខ្ពស់ ។
វានឹងជាអំណរអ្វីម៉្លេះចំពោះពួកអ្នកកាន់បព្វជិតភាពមិលគីស្សាដែកគ្រប់រូបដើម្បីមានពរជ័យនៃការបង្រៀន ការរៀនសូត្រ និងការបម្រើប្រកៀកស្មាគ្នាជាមួយនឹងសមាជិកទាំងអស់ក្នុងវួដរបស់ពួកគេ ។ ទោះជាបងប្អូននៅទីណា ហើយមានស្ថានភាពយ៉ាងណាក្ដី ក៏យើងសូមអញ្ជើញបងប្អូនប្រកបដោយការអធិស្ឋាន ភាពស្មោះត្រង់ និងពេញដោយអំណរដើម្បីទទួលឱកាសថ្មីដើម្បីដឹកនាំ ឬទទួលការដឹកនាំ ហើយបម្រើដោយមានសាមគ្គីភាពជាក្រុមតែមួយនៃបងប្អូនប្រុសនៃបព្វជិតភាព ។
ឥឡូវនេះខ្ញុំនឹងលើកឡើងអំពីបញ្ហាបន្ថែមទៀត ដែលអាចនឹងត្រូវការការបញ្ជាក់ឲ្យច្បាស់ កាលយើងឆ្ពោះទៅមុខដើម្បីអនុវត្តព្រះទ័យរបស់ព្រះអម្ចាស់ស្ដីពីការរៀបចំកូរ៉ុមនៃបព្វជិតភាពដ៏បរិសុទ្ធរបស់ទ្រង់ ។
តើការកែតម្រូវសម្រាប់កូរ៉ុមសង្ឃជាន់ខ្ពស់ស្តេកមានអ្វីខ្លះ ? កូរ៉ុមសង្ឃជាន់ខ្ពស់ស្តេកនឹងបន្តដំណើរការដូចធម្មតា ។ គណៈប្រធានស្តេកនឹងបន្តបម្រើជាគណៈប្រធាននៃកូរ៉ុមសង្ឃជាន់ខ្ពស់ស្តេក ។ ប៉ុន្តែ ដូចដែលអែលឌើរ គ្រីស្តូហ្វឺសិន បានលើកឡើង ឥឡូវនេះសមាជិកនៃកូរ៉ុមសង្ឃជាន់ខ្ពស់ស្តេកនឹងមានសង្ឃជាន់ខ្ពស់ដែលកំពុងបម្រើក្នុងគណៈប្រធានស្តេក នាពេលបច្ចុប្បន្ននេះ ជាសមាជិកនៃគណៈប៊ីស្សពវួដមួយ ជាសមាជិកនៃក្រុមប្រឹក្សាជាន់ខ្ពស់ស្តេក និងលោកអយ្យកោកំពុងបម្រើ ។ ស្មៀន ព្រមទាំងលេខាប្រតិបត្តិវួដ និងស្តេកពុំមែនជាសមាជិកនៃកូរ៉ុមសង្ឃជាន់ខ្ពស់ស្តេកទេ ។ នៅពេលមនុស្សម្នាក់ដែលកំពុងបម្រើយ៉ាងសកម្មជាសង្ឃជាន់ខ្ពស់ម្នាក់ ជាអយ្យកោ ពួកចិតសិបនាក់ ឬសាវកទៅចូលរួមវួដមួយ ហើយមានបំណងប្រាថ្នាចង់ចូលរួមការប្រជុំបព្វជិតភាព នោះគាត់នឹងជួបប្រជុំនឹងកូរ៉ុមអែលឌើរ ។
កាលបងប្អូនប្រុសនៅក្នុងហៅទាំងនេះត្រូវបានដោះលែងនៅពេលណាមួយ នោះពួកគាត់នឹងត្រឡប់ទៅអង្គភាពរបស់គាត់វិញជាសមាជិកក្នុងកូរ៉ុមអែលឌើរ ។
តើ តួនាទី របស់កូរ៉ុមសង្ឃជាន់ខ្ពស់ស្តេកមានអ្វីខ្លះ ? គណៈប្រធានស្តេកជួបនឹងសមាជិកនៃកូរ៉ុមសង្ឃជាន់ខ្ពស់ស្តេកដើម្បីប្រឹក្សារួមគ្នា ថ្លែងទីបន្ទាល់ ហើយផ្ដល់ការបំពាក់បំប៉ន ។ ការប្រជុំស្តេកដូចដែលបានគូសបញ្ជាក់នៅក្នុងក្បួនខ្នាតរបស់យើងនឹងបន្តមានការកែតម្រូវពីរចំណុច ៖
ទីមួយ វួដ និងស្តេកនឹងឈប់ធ្វើការប្រជុំគណៈកម្មាធិការប្រតិបត្តិបព្វជិតភាពទៀតហើយ ។ បើមានបញ្ហាពិសេសមួយកើតឡើងក្នុងវួដ ដូចជាបញ្ហាគ្រួសារដ៏ធំមួយ ឬបញ្ហាសុខុមាលភាពដ៏លំបាកមួយ វាអាចត្រូវបានលើកឡើងលើសពីការប្រជុំគណៈប៊ីស្សព ។ បញ្ហាមិនសូវសំខាន់ផ្សេងទៀតអាចត្រូវបានលើកឡើងនៅក្នុងក្រុមប្រឹក្សាវួដ ។ អ្វីដែលធ្លាប់ស្គាល់ថាជាការប្រជុំគណៈកម្មាធិការប្រតិបត្តិបព្វជិតភាពស្តេក ឥឡូវនេះនឹងហៅថា« ការប្រជុំក្រុមប្រឹក្សាជាន់ខ្ពស់ » ។
ទីពីរ ការប្រជុំប្រចាំឆ្នាំនៃបុគ្គលទាំងអស់ដែលបានតែងតាំងជាសង្ឃជាន់ខ្ពស់នឹងឈប់ធ្វើទៀតហើយ ។ ប៉ុន្តែ គណៈប្រធានស្តេកនឹងបន្តធ្វើការប្រជុំប្រចាំឆ្នាំមួយនៃកូរ៉ុមសង្ឃជាន់ខ្ពស់ស្តេក ដែលបានប្រកាសនៅថ្ងៃនេះ ។
តើវួដមួយអាចមានកូរ៉ុមអែលឌើរលើសពីមួយដែរឬទេ ? ចម្លើយគឺអាចមាន ។ នៅក្នុង គោលលទ្ធិ និង សេចក្តីសញ្ញា កណ្ឌ ១០៧ ខទី ៨៩ នៅពេលវួដមួយមានចំនួនអ្នកកាន់បព្វជិតភាពមិលគីស្សាដែកច្រើនខុសពីធម្មតា ថ្នាក់ដឹកនាំអាចនឹងរៀបចំកូរ៉ុមអែលឌើរច្រើន ។ ក្នុងករណីបែបនេះ កូរ៉ុមនីមួយៗគួរមានតុល្យភាពសមហេតុផលមួយអំពីអាយុ បទពិសោធន៍ តំណែង និងភាពរឹងមាំនៃបព្វជិតភាព ។
ខ្ញុំសូមថ្លែងទីបន្ទាល់ថា នៅពេលយើងឆ្ពោះទៅមុខជាមួយនឹងការរៀបចំរចនាសម្ព័ន្ធឡើងវិញនៃកូរ៉ុមដ៏បំផុសគំនិតនេះនៅក្នុងវួដ និងស្តេករបស់យើង នោះយើងនឹងមើលឃើញពរជ័យដ៏ច្រើន ។ ខ្ញុំសូមលើកឡើងនូវឧទាហរណ៍មួយចំនួន ។
នៅក្រោមការដឹកនាំរបស់ប៊ីស្សព ធនធានបព្វជិតភាពជាច្រើនអាចនឹងជួយដល់កិច្ចការនៃសេចក្ដីសង្គ្រោះ ។ ការណ៍នេះអាចរួមបញ្ចូលទាំងការប្រមូលផ្ដុំសាសន៍អ៊ីស្រាអែលតាមរយៈកិច្ចការព្រះវិហារបរិសុទ្ធ និងពង្សប្រវត្តិ ការធ្វើការជាមួយក្រុមគ្រួសារ និងបុគ្គលដែលខ្វះខាត និងការជួយពួកអ្នកផ្សព្វផ្សាយសាសនាដើម្បីនាំយកព្រលឹងមករកព្រះយេស៊ូវគ្រីស្ទ ។
កាលថ្នាក់ដឹកនាំជាអធិបតីកាលពីមុនត្រឡប់មកចែកចាយបទពិសោធន៍របស់ពួកគេជាមួយនឹងកូរ៉ុមអែលឌើរ នោះវានឹងធ្វើឲ្យមានសមាជិកកូរ៉ុមដ៏រឹងមាំមួយ ។
វានឹងមានអំណោយទាន និងសមត្ថភាពខុសៗគ្នានៅក្នុងកូរ៉ុមនោះ ។
វានឹងមានការបត់បែន និងលទ្ធភាពច្រើនដើម្បីបំពេញសេចក្ដីត្រូវការបន្ទាន់នាពេលបច្ចុប្បន្ននៅក្នុងវួដ និងកូរ៉ុម ព្រមទាំងក្នុងការបំពេញការចាត់តាំងជាច្រើនរបស់យើងផងដែរ ។
វានឹងមានការបង្កើនការប្រឹក្សា និងភាពជាឯកច្ឆន្ទ កាលអែលឌើរថ្មីម្នាក់ និងសង្ឃជាន់ខ្ពស់ម្នាក់ដែលមានបទពិសោធន៍បានចែកចាយបទពិសោធនដល់គ្នាទៅវិញទៅមកនៅក្នុងការប្រជុំកូរ៉ុម និងការចាត់តាំង ។
ប៊ីស្សព និងប្រធានសាខានឹងសង្ឃឹមថា បានរួចខ្លួនពីកិច្ចការទាំងនេះ ដើម្បីលើកតម្កើងការហៅរបស់ពួកគេដើម្បីមើលថែហ្វូងចៀមរបស់ពួកគេ ហើយបម្រើដល់អ្នកដែលខ្វះខាត ។
យើងយល់ថា វួដ និងស្តេកនីមួយៗគឺខុសៗគ្នា ។ ដោយយល់ដឹងអំពីភាពខុសប្លែកទាំងនេះ យើងសង្ឃឹមថា បងប្អូននឹងធ្វើតាមការផ្លាស់ប្ដូរទាំងនេះភ្លាមៗ បន្ទាប់ពីសន្និសីទទូទៅនេះ ។ យើងត្រូវបានទទួលការណែនាំមកពីព្យាការីនៃព្រះ ! វាគឺជាពរជ័យ និងការទទួលត្រូវមួយដ៏ធំអ្វីម៉្លេះ ។ ចូរយើងបំពេញកិច្ចការនេះដោយមានគ្រប់សេចក្ដីសុចរិត និងភាពឧស្សាហ៍ព្យាយាម !
ខ្ញុំសូមរំឭកដល់បងប្អូនថា សិទ្ធិអំណាចបព្វជិតភាពកើតមានតាមរយៈការញែកចេញ និងការតែងតាំង ប៉ុន្តែអំណាចបព្វជិតភាពពិត ជាអំណាចដើម្បីធ្វើកិច្ចការនៅក្នុងព្រះនាមរបស់ព្រះអម្ចាស់ ព្រះយេស៊ូវគ្រីស្ទ អាចកើតមានតែតាមរយៈការរស់នៅដោយសុចរិតប៉ុណ្ណោះ ។
ព្រះអម្ចាស់បានប្រកាសទៅកាន់យ៉ូសែប ស្ម៊ីធ ជាព្យាការីនៃការស្ដារឡើងវិញថា ៖
« មើលចុះ ហើយមើលន៏ យើងនឹងថែរក្សាហ្វូងរបស់អ្នក ហើយនឹងបណ្ដាលឲ្យមានពួកអែលឌើរកើតឡើង ហើយចាត់ឲ្យទៅរកពួកគេ។
« មើលចុះ យើងនឹងពន្លឿនកិច្ចការរបស់យើងឲ្យឆាប់កើតនៅពេលកំណត់ » ។៦
ពិតណាស់ នេះគឺជាពេលដែលព្រះអម្ចាស់កំពុងពន្លឿនកិច្ចការរបស់ទ្រង់ ។
ចូរយើងម្នាក់ៗប្រើឱកាសដើម្បីសញ្ជឹងគិត ហើយកែលម្អជីវិតរបស់យើងឲ្យបានល្អស្របតាមព្រះទ័យរបស់ទ្រង់ ដើម្បីយើងអាចរក្សាទុកពរជ័យជាច្រើនដែលទ្រង់បានសន្យាទៅដល់មនុស្សដែលមានភក្ដីភាព ហើយស្មោះត្រង់ ។
បងប្អូនប្រុស សូមអរគុណចំពោះរាល់កិច្ចការដែលបងប្អូនកំពុងធ្វើជាផ្នែកមួយនៃកិច្ចការដ៏ធំនេះ ។ សូមឲ្យយើងដើរឆ្ពោះទៅមុខនៅក្នុងបុព្វហេតុដ៏អស្ចារ្យ ហើយមានកិត្តិយសនេះ ។
ពេលសង្គ្រាមចប់
ពេលទុក្ខព្រួយ និងវិបត្តិរសាយទៅ
ពេលបានជួបជុំនៅច្រក
ភ្នំនៃក្ដីស្ងប់ដោយសុខសាន្ត
ចំពោះស្ដេចដ៏អស់កល្ប
មនុស្សអស្ចារ្យដ៏ច្រើននោះ
នឹងសរសើរព្រះនាមទ្រង់
រៀងរហូត ហើយច្រៀងចម្រៀង ៖
ជ័យជំនះ ជ័យជំនះ
ក្នុងព្រះដែលប្រោសលោះយើង !
ជ័យជំនះ ជ័យជំនះ
ក្នុងព្រះគ្រីស្ទអម្ចាស់យើង !
ជ័យជំនះ ជ័យជំនះ
ក្នុងព្រះគ្រីស្ទអម្ចាស់យើង !៧
នៅថ្ងៃនេះ យើងទាំងអស់គ្នាឈរជាសាក្សីថាព្រះអម្ចាស់កំពុងបើកសម្ដែងព្រះទ័យរបស់ទ្រង់តាមរយៈព្យាការីរបស់ទ្រង់គឺប្រធាន រ័សុល អិម ណិលសុន ។ ខ្ញុំសូមថ្លែងទីបន្ទាល់ថា លោកគឺជាព្យាការីរបស់ព្រះនៅលើផែនដីនេះ ។ ខ្ញុំសូមថ្លែងសាក្សីរបស់ខ្ញុំអំពីព្រះយេស៊ូវគ្រីស្ទថា ទ្រង់គឺជាព្រះដ៏ប្រោសលោះ និងព្រះអង្គសង្គ្រោះដ៏មហិមារបស់យើង ។ នេះគឺជាកិច្ចការរបស់ទ្រង់ នេះគឺជាព្រះទ័យរបស់ទ្រង់ ហើយខ្ញុំសូមថ្លែងទីបន្ទាល់ជាឧឡារិកអំពីកិច្ចការនេះ ក្នុងព្រះនាមព្រះយេស៊ូវគ្រីស្ទ អាម៉ែន ។