ຈົ່ງເບິ່ງ! ກອງທັບຂອງພຣະເຈົ້າ
ຊ່າງເປັນຄວາມຊື່ນຊົມແທ້ໆ ທີ່ຜູ້ດຳລົງຖານະປະໂລຫິດແຫ່ງເມນຄີເສເດັກ ທຸກຄົນ ຈະໄດ້ຮັບພອນແຫ່ງການສິດສອນ, ຮຽນຮູ້, ແລະ ຄຽງບ່າຄຽງໄລ່ ຮັບໃຊ້ນຳກັນ.
ອ້າຍນ້ອງໃນຖານະປະໂລຫິດຂອງຂ້າພະເຈົ້າ, ຂ້າພະເຈົ້າມີຄວາມຖ່ອມຕົວຫລາຍ ທີ່ໄດ້ມາຢືນຢູ່ຕໍ່ໜ້າທ່ານ ໃນໂອກາດແຫ່ງປະຫວັດສາດນີ້, ພາຍໃຕ້ການມອບໝາຍຂອງສາດສະດາ ແລະ ປະທານຣະໂຊ ເອັມ ແນວສັນ. ຂ້າພະເຈົ້າຮັກ ແລະ ສະໜັບສະໜູນຊາຍທີ່ດີເລີດຄົນນີ້ຂອງພຣະເຈົ້າ ແລະ ຝ່າຍປະທານສູງສຸດກຸ່ມໃໝ່. ຂ້າພະເຈົ້າຂໍເປັນພະຍານຕື່ມໃສ່ກັບ ແອວເດີ ດີ ທອດ ຄຣິສໂຕເຟີສັນ ແລະ ອ້າຍນ້ອງຄົນອື່ນໆ ໃນກຸ່ມອັກຄະສາວົກສິບສອງ ວ່າການປ່ຽນແປງ ທີ່ໄດ້ປະກາດໃນຄ່ຳຄືນນີ້ ແມ່ນເປັນໄປຕາມພຣະປະສົງຂອງພຣະຜູ້ເປັນເຈົ້າ.
ດັ່ງທີ່ປະທານແນວສັນໄດ້ກ່າວໄປນັ້ນ, ມັນເປັນເລື່ອງທີ່ໄດ້ສົນທະນາ ແລະ ພິຈາລະນາ ດ້ວຍການອະທິຖານ ໂດຍບັນດາອ້າຍນ້ອງຜູ້ໃຫຍ່ ຂອງສາດສະໜາຈັກ ມາເປັນເວລາດົນນານແລ້ວ. ພວກເຮົາມີຄວາມປາດຖະໜາທີ່ຈະເຮັດຕາມ ພຣະປະສົງຂອງພຣະຜູ້ເປັນເຈົ້າ ແລະ ເພີ່ມຄວາມເຂັ້ມແຂງ ໃຫ້ແກ່ກຸ່ມຖານະປະໂລຫິດແຫ່ງເມນຄີເສເດັກ. ພວກເຮົາໄດ້ຮັບການດົນໃຈ ແລະ ໃນຄ່ຳຄືນນີ້ ສາດສະດາຂອງພວກເຮົາ ກໍໄດ້ແຈ້ງໃຫ້ຮູ້ເຖິງພຣະປະສົງຂອງພຣະຜູ້ເປັນເຈົ້າ. “ແນ່ນອນ ອົງພຣະຜູ້ເປັນເຈົ້າ ບໍ່ໄດ້ເຮັດສິ່ງໃດ ໂດຍບໍ່ບອກແຈ້ງໃຫ້ຮູ້ລ່ວງໜ້າ ເຖິງແຜນການຂອງພຣະອົງແກ່ສາດສະດາ ຄືຜູ້ຮັບໃຊ້ຂອງພຣະອົງ”!1 ເຮົາໄດ້ຮັບພອນຫລາຍແທ້ໆ ທີ່ມີສາດສະດາທີ່ມີຊີວິດຢູ່ ໃນທຸກວັນນີ້!
ຕະຫລອດຊີວິດຂອງພວກເຮົາ, ຊິດສະເຕີ ແຣັສ໌ແບນ ແລະ ຂ້າພະເຈົ້າ ໄດ້ເດີນທາງໄປທົ່ວໂລກ ເຮັດການມອບໝາຍຂອງສາດສະໜາຈັກ ແລະ ເຮັດພາລະກິດການງານ. ຂ້າພະເຈົ້າເຄີຍໄດ້ເຫັນໂຄງຮ່າງຂອງໜ່ວຍເກືອບທຸກຮູບແບບ ໃນສາດສະໜາຈັກ: ສາຂານ້ອຍແຫ່ງໜຶ່ງໃນປະເທດຣັດເຊຍ ບ່ອນທີ່ຜູ້ດຳລົງຖານະປະໂລຫິດແຫ່ງເມນຄີເສເດັກມີພຽງແຕ່ສີ່ ຫລື ຫ້າຄົນ, ຫວອດໃໝ່ທີ່ກຳລັງເຕີບໂຕຢູ່ປະເທດ ອາຟຣິກາ ມະຫາປະໂລຫິດ ແລະ ແອວເດີ ໄດ້ມາເຕົ້າໂຮມກັນຮ້ອງເພງ ເປັນກຸ່ມດຽວ ເພາະຈຳນວນຂອງຜູ້ດຳລົງຖານະປະໂລຫິດແຫ່ງເມນຄີເສເດັກມີໜ້ອຍ; ແລະ ຫວອດທີ່ຖາວອນແລ້ວ ບ່ອນທີ່ຈຳນວນແອວເດີມີຫລາຍ ຈົນຕ້ອງໄດ້ແຍກອອກເປັນສອງກຸ່ມ!
ທຸກບ່ອນທີ່ພວກເຮົາໄປຫາ, ພວກເຮົາໄດ້ເຫັນພຣະຫັດຂອງພຣະຜູ້ເປັນເຈົ້າ ຈັດການກ່ອນຜູ້ຮັບໃຊ້ຂອງພຣະອົງ, ຕຽມຜູ້ຄົນ ແລະ ວິທີທາງລ່ວງໜ້າ ເພື່ອວ່າລູກໆຂອງພຣະອົງ ຈະໄດ້ຮັບພອນ ອີງຕາມຄວາມຕ້ອງການແຕ່ລະຢ່າງຂອງພວກເຂົາ. ພຣະອົງບໍ່ໄດ້ສັນຍາບໍວ່າ ພຣະອົງຈະອອກໜ້າເຮົາ ແລະ ຈະຢູ່ທາງເບື້ອງຂວາມືເຮົາ ແລະ ທາງຊ້າຍເຮົາ, ແລະ ວິນຍານຂອງພຣະອົງຢູ່ໃນໃຈຂອງເຮົາ, ແລະ ທູດຂອງພຣະອົງຈະອ້ອມຮອບເຮົາໄວ້, ເພື່ອຄ້ຳຊູເຮົາ?2
ເມື່ອຄິດກ່ຽວກັບທ່ານທຸກຄົນ, ຂ້າພະເຈົ້າໄດ້ຖືກເຕືອນກ່ຽວກັບເພງສວດເພງໜຶ່ງ ຊື່ວ່າ “ຈົ່ງເບິ່ງ! ກອງທັບຂອງພຣະເຈົ້າ.”
ຈົ່ງເບິ່ງ! ກອງທັບຂອງພຣະເຈົ້າ,
ພ້ອມດາບງ້າວ, ໂລ່, ແລະ ທຸງ,
ເດີນຕົງໄປສູ່ໄຊຊະນະ
ໃນສະໜາມຮົບຊີວາ.
ມີທະຫານເຕັມຢູ່ທຸກກອງ,
ປອງດອງ, ກ້າຫານ, ຂຶງຂັງ,
ຕ່າງເຊື່ອຟັງຜູ້ບັນຊາ
ແລະ ຮ້ອງເພງອອກມາຢ່າງສຸກສັນ.3
ແອວເດີ ຄຣິສໂຕເຟີສັນ ໄດ້ຕອບຄຳຖາມຫລາຍຂໍ້ທີ່ແນ່ນອນ ວ່າຕ້ອງມີ ຈາກການປະກາດວ່າ ກຸ່ມມະຫາປະໂລຫິດ ແລະ ກຸ່ມແອວເດີ, ໃນລະດັບຫວອດ, ຈະຖືກລວມເຂົ້າກັນ ເປັນກຸ່ມດຽວ, ເປັນກອງທັບທີ່ເຂັ້ມແຂງຂອງບັນດາອ້າຍນ້ອງ ຖານະປະໂລຫິດແຫ່ງເມນຄີເສເດັກ.
ການດັດແປງເຫລົ່ານີ້ ຈະຊ່ວຍກຸ່ມແອວເດີ ແລະ ສະມາຄົມສະຕີສົງເຄາະ ປອງດອງກັນໃນວຽກງານຂອງເຂົາເຈົ້າ. ມັນຍັງຈະເຮັດໃຫ້ການປະສານງານໃນກຸ່ມງ່າຍຂຶ້ນ ນຳຝ່າຍອະທິການ ແລະ ສະພາຫວອດ. ແລະ ມັນຈະອະນຸຍາດໃຫ້ອະທິການ ມອບໝາຍໜ້າທີ່ຮັບຜິດຊອບຕື່ມອີກ ໃຫ້ກຸ່ມແອວເດີ ແລະ ຝ່າຍປະທານສະມາຄົມສະຕີສົງເຄາະ ເພື່ອວ່າອະທິການ ແລະ ທີ່ປຶກສາຂອງເພິ່ນ ຈະສາມາດເອົາໃຈໃສ່ຕໍ່ ໜ້າທີ່ຕົ້ນຕໍຂອງພວກເພິ່ນ—ໂດຍສະເພາະການດູແລກຸ່ມຍິງໜຸ່ມ, ແລະ ກຸ່ມຊາຍໜຸ່ມ ຜູ້ດຳລົງຖານະປະໂລຫິດແຫ່ງອາໂຣນ.
ການປ່ຽນແປງຢູ່ໃນອົງການ ແລະ ພາລະໜ້າທີ່ຕ່າງໆ ຂອງສາດສະໜາຈັກ ບໍ່ໄດ້ເປັນເລື່ອງແປກ. ໃນປີ 1883 ພຣະຜູ້ເປັນເຈົ້າໄດ້ກ່າວກັບປະທານຈອນ ເທເລີ ວ່າ: “ກ່ຽວກັບການບໍລິຫານ ແລະ ການຈັດຕັ້ງ ຂອງສາດສະໜາຈັກ ແລະ ຖານະປະໂລຫິດ … ເຮົາຈະເປີດເຜີຍມັນແກ່ເຈົ້າ, ເປັນບາງຄັ້ງ, ຜ່ານທາງວິທີທີ່ເຮົາໄດ້ກຳນົດໄວ້, ທຸກສິ່ງທີ່ຈຳເປັນສຳລັບການພັດທະນາໃນອະນາຄົດ ແລະ ການປັບປຸງໃຫ້ສາດສະໜາຈັກດີພ້ອມ, ສຳລັບການດັດແປງ ແລະ ການນຳພາອານາຈັກຂອງເຮົາໄປຂ້າງໜ້າ.”4
ບັດນີ້, ຂ້າພະເຈົ້າຢາກກ່າວກັບຜູ້ເປັນມະຫາປະໂລຫິດ ຈັກໜ້ອຍໜຶ່ງ—ພວກເຮົາຮັກທ່ານ! ພຣະບິດາເທິງສະຫວັນກໍຮັກທ່ານ! ທ່ານເປັນພາກສ່ວນທີ່ສຳຄັນໃນກອງທັບທີ່ຍິ່ງໃຫຍ່ແຫ່ງຖານະປະໂລຫິດຂອງພຣະເຈົ້າ, ແລະ ພວກເຮົາບໍ່ສາມາດເຄື່ອນຍ້າຍວຽກງານນີ້ໄປໜ້າໄດ້ ຖ້າປາດສະຈາກຄວາມດີງາມ, ການຮັບໃຊ້, ປະສົບການ, ແລະ ຄວາມຊອບທຳຂອງທ່ານ. ແອວມາໄດ້ສອນວ່າ ພວກຜູ້ຊາຍຖືກເອີ້ນຈາກເບື້ອງບົນໃຫ້ເປັນມະຫາປະໂລຫິດ ຍ້ອນສັດທາອັນຍິ່ງໃຫຍ່ ແລະ ວຽກງານດີຂອງເຂົາເຈົ້າ ເພື່ອສິດສອນ ແລະ ປະຕິບັດສາດສະໜາກິດຕໍ່ຄົນອື່ນ.5 ປະສົບການນັ້ນແມ່ນຕ້ອງການຫລາຍ ບາງເທື່ອຫລາຍກວ່ານັ້ນ ໃນເວລານີ້.
ໃນຫລາຍໆຫວອດ, ເຮົາອາດມີມະຫາປະໂລຫິດ ຜູ້ຊຶ່ງບັດນີ້ ຈະຖືກຄວບຄຸມໂດຍ ແອວເດີຜູ້ກາຍເປັນປະທານກຸ່ມ. ພວກເຮົາກໍເຄີຍມີແອວເດີຄວບຄຸມກຸ່ມມະຫາປະໂລຫິດ ມາກ່ອນແລ້ວ: ແອວເດີທີ່ກຳລັງຮັບໃຊ້ເປັນປະທານສາຂາ ໃນບາງພາກພື້ນຂອງໂລກ ບ່ອນທີ່ມີມະຫາປະໂລຫິດອາໄສຢູ່ໃນສາຂາ, ແລະ ກໍມີຫລາຍສາຂາ ທີ່ຈັດຕັ້ງກຸ່ມແອວເດີຂຶ້ນເທົ່ານັ້ນ ເຖິງແມ່ນມີມະຫາປະໂລຫິດຢູ່ນຳກໍຕາມ.
ຊ່າງເປັນຄວາມຊື່ນຊົມແທ້ໆ ທີ່ຜູ້ດຳລົງຖານະປະໂລຫິດແຫ່ງເມນຄີເສເດັກ ທຸກຄົນ ຈະໄດ້ຮັບພອນແຫ່ງການສິດສອນ, ຮຽນຮູ້, ແລະ ຄຽງບ່າຄຽງໄລ່ ຮັບໃຊ້ນຳກັນ ກັບສະມາຊິກທຸກຄົນໃນຫວອດ. ບໍ່ວ່າທ່ານຈະອາໄສຢູ່ບ່ອນໃດ ຫລື ສະພາບການຂອງທ່ານຈະເປັນແບບໃດ, ພວກເຮົາຂໍເຊື້ອເຊີນທ່ານ ໃຫ້ຮັບເອົາໂອກາດໃໝ່ນີ້ ດ້ວຍການອະທິຖານ, ດ້ວຍຄວາມຊື່ສັດ, ແລະ ດ້ວຍຄວາມຊົມຊື່ນຍິນດີ ເພື່ອນຳພາ ຫລື ເພື່ອຖືກນຳພາ ແລະ ເພື່ອຮັບໃຊ້ນຳກັນເປັນກຸ່ມດຽວ ໃນຖານະປະໂລຫິດ.
ບັດນີ້ ຂ້າພະເຈົ້າຈະກ່າວເພີ່ມເຕີມອີກ ຊຶ່ງຕ້ອງເຮັດໃຫ້ແຈ່ມແຈ້ງ ໃນຂະນະທີ່ເຮົາດຳເນີນໄປໜ້າ ເພື່ອປະຕິບັດຕາມພຣະປະສົງຂອງພຣະຜູ້ເປັນເຈົ້າ ເລື່ອງການຈັດຕັ້ງກຸ່ມຂອງພຣະອົງ ໃນຖານະປະໂລຫິດທີ່ສັກສິດ.
ການປ່ຽນແປງສຳລັບກຸ່ມມະຫາປະໂລຫິດລະດັບສະເຕກ ມີຫຍັງແດ່? ກຸ່ມມະຫາປະໂລຫິດລະດັບສະເຕກ ຈະດຳເນີນການຕໍ່ໄປເໝືອນເດີມ. ຝ່າຍປະທານສະເຕກ ຈະສືບຕໍ່ຮັບໃຊ້ເປັນຝ່າຍປະທານຂອງກຸ່ມມະຫາປະໂລຫິດລະດັບສະເຕກ. ເຖິງຢ່າງໃດກໍຕາມ, ດັ່ງທີ່ ແອວເດີ ຄຣິສໂຕເຟີສັນ ໄດ້ກ່າວມານັ້ນ, ບັດນີ້ ສະມາຊິກໃນກຸ່ມມະຫາປະໂລຫິດ ຈະຮ່ວມດ້ວຍມະຫາປະໂລຫິດທີ່ຮັບໃຊ້ໃນຝ່າຍປະທານສະເຕກ ໃນເວລານີ້, ໃນຖານະສະມາຊິກໃນຝ່າຍອະທິການປະຈຳຫວອດ, ສະມາຊິກໃນສະພາສູງຂອງສະເຕກ, ແລະ ປິຕຸໃນປະຈຸບັນ. ສະໝຽນປະຈຳຫວອດ ແລະ ສະເຕກ ແລະ ເລຂາຜູ້ບໍລິຫານ ບໍ່ໄດ້ເປັນສະມາຊິກໃນກຸ່ມມະຫາປະໂລຫິດລະດັບສະເຕກ. ເມື່ອບຸກຄົນໃດທີ່ກຳລັງຮັບໃຊ້ໃນຖານະເປັນມະຫາປະໂລຫິດ, ປິຕຸ, ສາວົກເຈັດສິບ, ຫລື ອັກຄະສາວົກ ທີ່ໄດ້ໄປຢ້ຽມຢາມຫວອດ ແລະ ຢາກໄປຮ່ວມການປະຊຸມຂອງຖານະປະໂລຫິດ, ເພິ່ນຕ້ອງໄປຮ່ວມການປະຊຸມນຳກຸ່ມແອວເດີ.
ເມື່ອອ້າຍນ້ອງເຫລົ່ານີ້ຖືກປົດຈາກການເອີ້ນ ເມື່ອໝົດກຳນົດ, ພວກເພິ່ນຈະກັບຄືນໄປຫາໜ່ວຍຂອງຕົນ ເຂົ້າຮ່ວມຢູ່ໃນກຸ່ມແອວເດີ.
ບົດບາດ ຂອງກຸ່ມມະຫາປະໂລຫິດລະດັບສະເຕກ ມີຫຍັງແດ່? ຝ່າຍປະທານສະເຕກ ຈະພົບກັບສະມາຊິກຂອງກຸ່ມມະຫາປະໂລຫິດ ເພື່ອປຶກສາຫາລືນຳກັນ, ເພື່ອເປັນພະຍານ, ແລະ ເພື່ອຈັດການອົບຮົມ. ການປະຊຸມສະເຕກ ທີ່ມີລະບຸໄວ້ຢູ່ໃນຄູ່ມືຂອງເຮົາ ຈະດຳເນີນຕໍ່ໄປຕາມປົກກະຕິ ພ້ອມດ້ວຍການດັດແປງສອງຢ່າງ:
ຢ່າງທີໜຶ່ງ, ຫວອດ ແລະ ສະເຕກ ຈະບໍ່ມີການປະຊຸມຄະນະກຳມະການບໍລິຫານຂອງຖານະປະໂລຫິດ ອີກຕໍ່ໄປ. ຖ້າຫາກມີບັນຫາໃດໜຶ່ງເກີດຂຶ້ນໃນຫວອດ, ດັ່ງເຊັ່ນ ເລື່ອງຄອບຄົວທີ່ລະອຽດອ່ອນ ຫລື ມີການທ້າທາຍເລື່ອງສະຫວັດດີການ, ສິ່ງດັ່ງກ່າວສາມາດຖືກນຳໄປພິຈາລະນາ ໃນການປະຊຸມຂອງຝ່າຍອະທິການ. ສ່ວນບັນຫາທີ່ບໍ່ລະອຽດອ່ອນປານໃດນັ້ນ ໃຫ້ນຳໄປພິຈາລະນາ ໃນການປະຊຸມຂອງສະພາຫວອດ. ສິ່ງທີ່ເຄີຍຮູ້ກັນວ່າ ການປະຊຸມຄະນະກຳມະການບໍລິຫານຂອງຖານະປະໂລຫິດ, ຕໍ່ໄປນີ້ ຈະຖືກເອີ້ນວ່າ “ການປະຊຸມຂອງສະພາສູງ.”
ຢ່າງທີສອງ, ກອງປະຊຸມປະຈຳປີ ຂອງມະຫາປະໂລຫິດທັງຫລາຍ ທີ່ໄດ້ຮັບການແຕ່ງຕັ້ງໃນສະເຕກ ຈະບໍ່ມີອີກຕໍ່ໄປ. ເຖິງຢ່າງໃດກໍຕາມ, ຝ່າຍປະທານສະເຕກ ຈະສືບຕໍ່ຈັດການປະຊຸມປະຈຳປີ ສຳລັບກຸ່ມມະຫາປະໂລຫິດລະດັບສະເຕກ ດັ່ງທີ່ໄດ້ປະກາດໄປແລ້ວ ໃນມື້ນີ້.
ຫວອດສາມາດມີກຸ່ມແອວເດີ ໄດ້ຫລາຍກວ່າໜຶ່ງກຸ່ມບໍ? ຄຳຕອບນັ້ນກໍຄື ມີໄດ້. ໃນພຣະຄຳພີ Doctrine and Covenants ພາກທີ 107, ຂໍ້ທີ 89ມັນບອກວ່າ, ເມື່ອຫວອດໃດໜຶ່ງມີຜູ້ດຳລົງຖານະປະໂລຫິດແຫ່ງເມນຄີເສເດັກ ທີ່ເຂັ້ມແຂງຢ່າງຫລວງຫລາຍ, ຜູ້ນຳສາມາດຈັດຕັັ້ງກຸ່ມແອວເດີ ຫລາຍກວ່າໜຶ່ງກຸ່ມ. ໃນກໍລະນີດັ່ງກ່າວ, ແຕ່ລະກຸ່ມຄວນມີຈຳນວນທີ່ເໝາະສົມ ເລື່ອງອະຍຸໄຂ, ປະສົບການ, ຕຳແໜ່ງ, ແລະ ພະລັງຂອງຖານະປະໂລຫິດ.
ຂ້າພະເຈົ້າເປັນພະຍານວ່າ ເມື່ອເຮົານຳພາການຈັດຕັ້ງກຸ່ມໃໝ່ ທີ່ໄດ້ຮັບການດົນໃຈນີ້ ໃນຫວອດ ແລະ ໃນສະເຕກຂອງເຮົາ ໄປຂ້າງໜ້າ, ແລ້ວເຮົາຈະເຫັນພອນຢ່າງຫລວງຫລາຍ. ຂ້າພະເຈົ້າຂໍກ່າວເຖິງຈັກສອງສາມຕົວຢ່າງ.
ພາຍໃຕ້ການຊີ້ນຳຂອງອະທິການ, ແຫລ່ງຊ່ວຍເຫລືອຖານະປະໂລຫິດຫລາຍໆຢ່າງຕື່ມອີກ ອາດຈະຊ່ວຍໃນວຽກງານແຫ່ງຄວາມລອດນີ້ໄດ້. ສິ່ງນີ້ແມ່ນຮ່ວມດ້ວຍການເຕົ້າໂຮມອິດສະຣາເອນ ຜ່ານທາງວຽກງານພຣະວິຫານ ແລະ ການສືບປະຫວັດຄອບຄົວ, ທຳງານຮ່ວມກັບຄອບຄົວ ແລະ ບຸກຄົນ ທີ່ຂັດສົນ, ແລະ ຊ່ວຍຜູ້ສອນສາດສະໜາ ນຳພາຈິດວິນຍານມາຫາພຣະເຢຊູຄຣິດ.
ເມື່ອຜູ້ນຳທີ່ເຄີຍຄວບຄຸມ ກັບຄືນມາແບ່ງປັນປະສົບການນຳກຸ່ມແອວເດີ, ສະມາຊິກໃນກຸ່ມຈະເຂັ້ມແຂງຂຶ້ນຫລາຍກວ່າເກົ່າ.
ມັນຈະມີຂອງປະທານ ແລະ ຄວາມສາມາດທີ່ແຕກຕ່າງກັນ ແລະ ຄວາມດີເດັ່ນ ຢູ່ໃນກຸ່ມ.
ມັນຈະມີເວລາທີ່ປ່ຽນໄດ້ ແລະ ເວລາວ່າງຫລາຍຂຶ້ນ ເພື່ອຊ່ວຍເຫລືອໃນຍາມສຸກເສີນ ພາຍໃນຫວອດ ແລະ ໃນກຸ່ມ ແລະ ເຮັດການມອບໝາຍຕ່າງໆໄດ້ຫລາຍກວ່າເກົ່າ.
ມັນຈະມີການໃຫ້ຄຳແນະນຳ ແລະ ຄວາມເປັນອັນໜຶ່ງດຽວກັນເພີ່ມຂຶ້ນ ເມື່ອແອວເດີຄົນໃໝ່ ແລະ ມະຫາປະໂລຫິດທີ່ມີປະສົບການຫລາຍ ແບ່ງປັນປະສົບການ, ຢູ່ຄຽງຂ້າງກັນ, ໃນການປະຊຸມຂອງກຸ່ມ ແລະ ໃນໜ້າທີ່ມອບໝາຍ.
ອະທິການ ແລະ ປະທານສາຂາ ຈະມີເວລາເພີ່ມຂຶ້ນອີກ ເພື່ອຂະຫຍາຍການເອີ້ນຂອງພວກເພິ່ນ ໃນການດູແລຝູງຂອງພວກເພິ່ນ ແລະ ໃນການປະຕິບັດສາດສະໜາກິດຕໍ່ຜູ້ທີ່ຂັດສົນ.
ພວກເຮົາເຂົ້າໃຈວ່າ ແຕ່ລະຫວອດ ແລະ ແຕ່ລະສະເຕກ ມີຄວາມແຕກຕ່າງກັນ. ເມື່ອເຂົ້າໃຈຄວາມແຕກຕ່າງເຫລົ່ານີ້ແລ້ວ, ພວກເຮົາຫວັງວ່າ ທ່ານຈະລົງມືປະຕິບັດຕາມການປ່ຽນແປງ ຢ່າງຮີບດ່ວນ ຫລັງຈາກກອງປະຊຸມໃຫຍ່ສາມັນ. ພວກເຮົາໄດ້ຮັບການຊີ້ນຳຈາກສາດສະດາຂອງພຣະເຈົ້າ! ຊ່າງເປັນພອນ ແລະ ໜ້າທີ່ຮັບຜິດຊອບ ທີ່ຍິ່ງໃຫຍ່ແທ້ໆ. ຂໍໃຫ້ເຮົາຈົ່ງບັນລຸມັນດ້ວຍຄວາມຊອບທຳ ແລະ ພາກພຽນ!
ຂ້າພະເຈົ້າຂໍເຕືອນທ່ານວ່າ ສິດອຳນາດຂອງຖານະປະໂລຫິດ ມາເຖິງໂດຍການແຕ່ງຕັ້ງເປັນທາງການ, ແຕ່ອຳນາດຂອງຖານະປະໂລຫິດທີ່ແທ້ຈິງ, ອຳນາດຂອງການກະທຳໃນພຣະນາມຂອງອົງພຣະເຢຊູຄຣິດເຈົ້າ, ມາເຖິງພຽງແຕ່ຜ່ານທາງການດຳລົງຊີວິດທີ່ຊອບທຳເທົ່ານັ້ນ.
ພຣະຜູ້ເປັນເຈົ້າໄດ້ປະກາດຕໍ່ສາດສະດາໂຈເຊັບ ສະມິດ, ສາດສະດາແຫ່ງການຟື້ນຟູວ່າ:
ພຣະອົງຈະດູແລຜູ້ຄົນຂອງເພິ່ນ, ແລະ ຈະຍົກພວກແອວເດີຂຶ້ນ ແລະ ສົ່ງໄປໃຫ້ພວກເຂົາ.
ພຣະອົງຈະເລັ່ງວຽກງານຂອງພຣະອົງ ເມື່ອເຖິງເວລາຂອງມັນ.6
ແນ່ນອນ, ນີ້ແມ່ນເວລາທີ່ພຣະຜູ້ເປັນເຈົ້າ ກຳລັງເລັ່ງວຽກງານຂອງພຣະອົງ.
ຂໍໃຫ້ເຮົາແຕ່ລະຄົນ ຈົ່ງໃຊ້ໂອກາດນີ້ ເພື່ອຄິດໄຕ່ຕອງ ແລະ ພັດທະນາຊີວິດ ໃຫ້ດີຂຶ້ນ ເພື່ອໃຫ້ສອດຄ່ອງກັບພຣະປະສົງຂອງພຣະອົງ ເພື່ອວ່າເຮົາຈະເໝາະສົມກັບພອນ ທີ່ພຣະອົງໄດ້ສັນຍາໄວ້ ກັບຄົນທີ່ຈິງໃຈ ແລະ ຊື່ສັດ.
ອ້າຍນ້ອງທັງຫລາຍ, ຂໍຂອບໃຈທ່ານຫລາຍໆ ສຳລັບສິ່ງທີ່ທ່ານກຳລັງເຮັດຢູ່ ເພື່ອເປັນພາກສ່ວນໃນວຽກງານທີ່ຍິ່ງໃຫຍ່. ຂໍໃຫ້ເຮົາຈົ່ງດຳເນີນໄປໜ້າ ໃນຈຸດປະສົງທີ່ຍິ່ງໃຫຍ່ ແລະ ມີກຽດນີ້.
ເມື່ອສົງຄາມຢຸດສຸດສິ້ນໄປ,
ເມື່ອບໍ່ມີການຂັດແຍ້ງຕໍ່ສູ້,
ເມື່ອຕ່າງຢູ່ຮ່ວມກັນປອດໄພ
ພາຍໃນຫຸບເຂົາສັນຕິ,
ຕໍ່ພຣະພັກກະສັດນິລັນດອນ,
ພົງພັນໄພສານສັກດາ
ຈະຊ້ອງພຣະນາມຊົ່ວການ,
ແລະ ຂັນຂານບັນເລງເພງນີ້:
ໄຊຊະນະ, ໄຊຊະນະ,
ທາງອົງພຣະຜູ້ໄຖ່ເຮົາ!
ໄຊຊະນະ, ໄຊຊະນະ,
ທາງພຣະເຢຊູຄຣິດເຈົ້າ!
ໄຊຊະນະ, ໄຊຊະນະ, ໄຊຊະນະ,
ທາງພຣະເຢຊູຄຣິດເຈົ້າ!7
ມື້ນີ້ ເຮົາທຸກຄົນຢືນເປັນພະຍານເຖິງພຣະຜູ້ເປັນເຈົ້າ ໃນການເປີດເຜີຍພຣະປະສົງຂອງພຣະອົງ ຜ່ານທາງສາດສະດາຂອງພຣະອົງ, ປະທານຣະໂຊ ເອັມ ແນວສັນ. ຂ້າພະເຈົ້າເປັນພະຍານວ່າ ເພິ່ນເປັນສາດສະດາຂອງພຣະເຈົ້າ ຢູ່ເທິງໂລກ ໃນເວລານີ້. ຂ້າພະເຈົ້າເປັນພະຍານເຖິງອົງພຣະເຢຊູຄຣິດເຈົ້າ, ຜູ້ເປັນພຣະຜູ້ໄຖ່ ແລະ ພຣະຜູ້ຊ່ວຍໃຫ້ລອດ ທີ່ຍິ່ງໃຫຍ່ຂອງເຮົາ. ນີ້ແມ່ນວຽກງານຂອງພຣະອົງ; ແລະ ນີ້ແມ່ນພຣະປະສົງຂອງພຣະອົງ, ຊຶ່ງຂ້າພະເຈົ້າເປັນພະຍານດ້ວຍຄວາມໜັກແໜ້ນ ໃນພຣະນາມຂອງພຣະເຢຊູຄຣິດ, ອາແມນ.