Kilang! Karis Lapalap Ehu

Riei prihsduhd kan, lapalahn ei karakarahngkihdi ahi kesihnen mwohmwail nan doadoahk poad wet, sang ni pwukoa me kohsang atail soukohp oh Presiden Russell M. Nelson. I poakohng mehlel oh utung ohlen Koht menet oh atail Presidensi Keieu me kapwo. Ahi kadehde pil patehng en Elder D. Todd Christofferson oh Riei teikan nan Pwihn en Wahnpoaron Ehk riemeno me wekdekla kei me pakairda pwohngpwongwet iei kupwuren Kauno.

Nin duwen me Presiden Nelson kasalehdahr, mwekid wet wia ire ehu me Ohl Mah kan nan Mwomwodiso wet kapakap kiher oh losenpwongikiher ansou reirei. Inengo iei en rapahki kupwuren Kauno oh kakehlailiala pwihn en Melkisedek Prihsduhd. Kamarain alahldiher oh soutik wet atail soukohpo kasalehda kupwuren Kauno. “Kauno, Wasa Lapalahpie, sohte kin wia mehkot, ma e sohte kin ketin kasalehiong sapwellime ladu soukohp kan kupwure!”¹ Kitail kapaikihda eh mie atail soukohp ieias rahn wet!

Erein aht wie momour, Sister Rasband oh ngehi seiloakiher nan sampah pwehki pwukoa en Mwomwohdiso oh doadoahk teikan. I kilangehr kerenieng songosongen pwihn kan koaros nan Mwomwohdiso wet; branch tikitik ehu nan Russia me aramas kak wadek irail Melkisedek Prihsduhd kan ni apalih peh; ehu ward kapw me wie kekeirda nan Africa wasa me samworo lapalap kan oh elder kan kin pokonpene wia ehu pwehki malaulaun irail kan me kolokol Melkisedek Prihsduhd; oh ward kan me uhdahn laud wasa me uwen tohtohn elder kan anahne pwalpeseng pwehn wiahda pwihn riau.

Wasa koaros me se kolahr ie, se kilangehr limen Kauno eh kin tihengla mwohn Sapwellime ladu kan pwehn kaunopada ahl mwohn aramas akan pwe Sapwellime kan koaros en kak ale kapai nin duwen arail anahn akan koaros. E sou inoukidahr me E “pahn ketla mwohtail” oh “ket ni pali maun oh pali meing” oh Sapwellime “Ngehno pahn ketket nan mohngiongitail kan oh [Sapwellime] tonleng kan kapel [kitail] pene?”²

Ni ei medemedewe kumwail koaros, I tamanda koul me mahsanih “Kilang! Karis Lapalap Ehu.”

Elder Christofferson sapengalahr peidek kei me uhdahn pahn wiawi sang ni pakair me dene pwihn en samworo lapalap oh pwihn en elder kan nan ward kan pahn kapatapatpenehr wiahla ehu pwihn me miniminpene, wia karis kehlail en irail me kolokol Melkisedek Prihsduhd.

Wekdekla pwukat pahn sewese pwihn en elder kan oh Pwihn en Sawas en Lih koasoanehdi arail doadoahk. Re pil pahn kamangaiala en pwihn kan arail kin ehuehng pisoprik oh ward kaunsel. Oh re mweidehng pisop en kak kesepwil pwukoa tohto ong presiden kan en pwihn en elder kan oh Pwihn en Sawas en Lih pwe pisop oh eh tungoal sounsawas kan en kak apwalih inondehn arail pwukoa—ni mehlel kakaun peinakapw kan oh mwahnakapw akan me kolokol Prihsuhd en Aron.

Wekdeklahn nan pwihn kan oh pwukoa kan nan Mwomwohdiso sohte wia mehkoat kapw. Nan 1883 Kauno mahsaniheng Presiden John Taylor; “Me pid epwelpen ahi Mwomwohdiso oh Prihsduhd … I pahn kasalehiong uhk, ni ehuehu ansou, nin duwen wiepe me I koasonedier, mehkoaros me pahn konehng wiawi pwehn apwalih oh kamwauwiala ahi Mwomwohdiso, ong ni koasoanepen oh kekeirdahn ahi wehi.”⁴

Pwulei ehu ong kumwail riat ohl akan me wia samworo lapalap—ese me se poakehng kumwail! Samatail me ketiket Nanleng poakehng kumwail! Kumwail iang towe karis lapalapo en prihsduhd, oh se anahne amwail sawas, koahiek oh pwuhng kan pwehn kamwakidewei doadoahk wet. Alma padahngki me ohl akan malipilip dahng samworo lapalap pwehki arail pwoson kehlail oh doadoahk mwahu kan pwehn kasukuhli oh sewese mehteikan.⁵ Anahnepen koahiek wet inenen laud ansou wet sang mahso.

Nan ward tohto kitail kak ahneki samworo lapalap kei me met pahn ahneki ansou mwahu en mih pahn emen elder me wia presiden en arail pwihno. Kitail ahnekiher koasoandi ehu me elder kan pahn kakaun samworo lapalap kan: elder kan me wie papah ni arail wia branch presiden nan wasa kei nan sampah wasa me samworo lapalap kan mie nan branch kan; oh mie branch kei me pwihn en elder kan te me kokouda oh mie samworo lapalap wasao.

E pahn wia kaperen laud ong me kolokol Melkisedek Prihsduhd koaros ni arail ahneki kapai en kasukuhli, esehla oh papah patehng towehkan koaros nan arail wardo. Sohte lipilipil wasa de irair me kumwail mihmi ie de ahneki, se luke kumwail en kapakapki, pwoson oh pereniki kapwaiahda ansou mwahu pwukat pwehn miniminpene kahluwa de idawehn oh papah ni atail wia pirien en prihsduhd ehu.

Met I pahn koasoia soahng teikan me ele anahne kawehwe, ni atail mwekid kohwei mwowe pwehn kapwaiahda kupwuren Kauno me pid kokoudahn Sapwellime pwihn kan en prihsduhd sarawio.

Iahnge koasoansapahl kan nan pwihn en samworo lapalap kan en stake? Pwihn kan en stake samworo lapalap kan pahn wie momourte. Presidensi kan en stake pahn peusehla papah nin duwen presiden en pwihn en samworo lapalap en stake. Ahpw ihme Elder Christofferson kawehweier, tohn pwihn en samworo lapalap en stake pahn met audaudki samworo lapalap kan me iei iang presidensi en stake, tohn pisoprik en ward, tohn ahi kaunsel en stake, oh patriarch me wie doadoahk. Klerk kan en ward oh stake, oh sekteri kan sohte wia tohn pwihn en samworo lapalap. Ansou me emen aramas me wie doadoahk en samworo lapalap, patriarch, Isiakan de Wahnpoaron pahn pwarek ehu ward oh men iang mihting en prihsduhd, e pahn iang mihting en pwihn en elder kan.

Ni en ohl pwukat ahr pahn kommoaldi sang malipilip pwukat, irail pahn pwuralahng uhdahn arail wasa oh iang towehda pwihn en elder kan.

Ia en pwihn en samworo lapalap en stake ah pwukoah? Presidensi en stake kin tuhong tohn pwihn en samworo lapalap pwe irail en kaweidpene, kadehde oh wia kasukuhl. Mihting kan en stake sansalehr nan pwuhk en kaweid kan oh pahn doudoula ni wekdekla riau.

Keieu, ward kan oh stake kan solahr pahn wia mihting en prishduhd executive committee. Ma mie ire tohrohr ehu en ward me pwarada, me duwehte kahpwal nan peneinei de mehkoht ehu soahng nan pali en welfare, mepwukat kak epwella nan mihting en pisoprik. Ire tikitik teikan kan epwella nan mihting en ward kaunsel. Dahme kitail kin kahdaneki mihting en eksekiudihp komidi en prihsduhd en stake pahn uhd adanekihla mihting en ahi kaunsel.

Keriau, mihting pak ehu nan ehu pahr en samworo lapalap koaros me kasarawihlahr nan stake solahr pahn wiawi. Ahpw, presidensi en stake pahn peusehla wiewia mihting pak ehu nan ehu par en pwihn en samworo lapalap en stake me pakairda rahnwet.

Ward ehu kak ahneki tohtosang ehu pwihn en elder? Pasapengo ehi. Nin duwen kaweid sang Doctrine and Covenant irelaud 107, iretikitik 89, ni en me kolokol Melkisedek Prihsduhd nan ehu ward eh tohtola mehlel, sounkaweid kan kak kauwada tohtosang pwihn en elder ehu. Nan irair pwukat, ehuehu pwihn anahne en kolokol sounpar, koahiek, oh ohpis en prihsduhd oh kehlail pahrek.

I kadehde me ni atail mwekid kohwei nan wekdeklahn pwihn kan me kamarainpe wiawi nan atail ward oh stake kan, kitail pahn kilang kapai tohto. I pahn kasalehda ekei karasepe kan.

Mehn sawas kan en prihsduhd kak doadoahk pahn kaweid en pisop pwehn sewese doadoahk en komour. Met pahn iangahki kapwurpwurpenehn Israel sang ni sewese peneinei kan wahdo poadopoad en peneinei nan tehnpas sarawi oh aramas akan me anahne sawas, sewese misineri kan wahdo aramas akan rehn Sises Krais.

Ni en kaun en mwowehkan arail ehukihda dahme irail loiengehr kan ong pwihn en elder kan, tohn pwihno pahn kehlaila ni imwio.

E pahn tohtohla soangsoangen koahiek oh eripit nan pwihno.

E pahn mengei oh miehda sawas me pahn kak apwalih doadoahk oh anahn karuwaru nan ward oh pwihno pil pahn kak kapwaiada atail pwukoa en sawas kan.

E pahn laudla sawas en kasukuhl oh ehupene ansou me elder kapw men oh samworo lapalap koahiek men kin ehukihpene irehkan me ira lelehngehr nan mihting oh pwukoa kan en pwihno.

Pisop oh branch presiden kan pahn kak ahneki saledek en kadaiala arail malipilip pwehn apwalih neiral souleng kan oh sewese irail me anahne kan.

Se wehwehki me ehuehu ward oh stake kan wekpeseng. Ni aht wehwehki wekpeseng pwukat, se koapworopworiki me kumwail pahn tepda doadoahngki wekdekla pwukat mwurinte kapokon lap wet. Kitail alehier kaweid sang soukohp en Koht men. Meid kapai laud oh pwukoa laud. Kitail kapwaiahda mepwukat ni pwung mehlel oh ngidingid!

I katamankin kumwail me manaman en prihsduhd kin kohda sang kasarawi oh kapai, ahpw inoandehn manamano, manaman en doadoahk ni mwaren Kaun Sises Krais kin kak kohdahte sang ni mour mwakelekel.

Kauno mahsanihong Joseph Smth, soukohp en Kapwurpwurdohu:

“Kilang, oh ese, me I pahn apwalih noumw souleng kan, oh pahn pilada elder kan oh kadar irail lahng rehrail.

“Kilang, I pahn kamwadangala ansoun ahi doadoahk.”⁶

Mehlel, met iei ansou me Kauno ketin kamwadangala Sapwellime doadoahk.

Emenemen kitail en doadoahngki ansou mwahu wet pwehn douloali oh kamwahuwiala atail mour pwehn kainenehiong Kupwure pwe kitail en kak warehng kapai kan me E ketin inoukihong me mehlel oh pwoson kan.

Riei ohl oko, kalahngan en kumwail pwehki soahng koaros me kumwail wiewia me pid doadoahk kesempwal wet. Kitail wenla nan mwekid lap oh waun wet.

Rahn wet kitail koaros uhkihda atail kadehde en Kauno kasalehda Kupwure rehn Sapwellime soukohp, Presiden Russell M. Nelson. I kadehde me ih me soukohp en Koht pohn sampah. I kadehdeki me Kauno Sises Krais me wia atail Soundoar oh Sounkomour lapalap. Met iei Sapwellime doadoahk; met iei Kupwure, me I kadehde ni mehlel ni mwaren Sises Krais, amen.