Ngkaikid Ngii el Chad!
Tirkel metik er a rael el mo er ngike el meral ngii el Chad a metik er a chesimer el kirel a deureng er a klengar me a kerul aikel kot el meringel el tekoi er a klengar.
Betik er a renguk el rodam me a rodos er ngak, resechelik, ng dmeu a renguk lobengkemiu er tial klebokel el klou el ongdibel. Ngak me a Harriet a dmeu a rengmam el mengemedaol er a Elders Gong me a Soares me a tirkel betok el rodam me a rodos el mla mai a beches el okedong er tir el tial klou el ongdibel.
Ng uaisei el kusiik er a sechelik er a President Thomas S. Monson, eng di betik a renguk, e oldubech, e olngeseu er a profet e President, el Russell M. Nelson, me a re counselor er ngii.
A kmal ngara omereng el saul el bocha kluut loureor lobengterir a Rodam er ngak er a Chelechad er a Teruich me a teru.
E a kot el ngaruchei, e a kuba ngariou el reng e kmal ungil a renguk el chedal a Ikelesia er a Jesus Kristo er a Uriul-klebesei el Santo, el million el sechal, redil, me a rengalek a blak a rengrir el mesiou— er a ngii di el ngerang malechub aikel ngerchelir—e blak a rengrir el melasm el mesiou er a Dios me a rebebil er a rechad, el mengederoder er a rengedel a Dios.
Chelechal sils a chedaol sils. Ng Sandei el temel a Baskua, el doldeu er sel klebokel el tutau er a Osobeled er a lekedoked a lechetel a kodall1 e lebekiis er a debuul.
Kot el Ngaruchei el Sils er a chelsel a Reksi
Ak dirk ulesbech er a internet, “Ngera el sils a mle kot el ngodechii a teletelel a reksi?”
A nger a mle betok, el ngarngii a ko er a mengas a rengud me a kuk kora ngodech e llomes me a uldasou. A bebil er ngii a kmo, sel sils el bad el mlara eanged a rirebet el subechii er a Yucatan Peninsula; a kuk chimong a kmo ng sera 1440, er a Johannes Gutenberg er a rekir a urerel a mesil el meluches a babier; me a dirrek sel sils er a 1903 er tirkel Wright Brothers er a lochotii el kmo a rechad a meral sebechir el suebek.
Omko osisiu el ker a mloker kau, e ngera ke dmung?
A denguu er ngak, e a nger a bleketakl.
A dosiik er a kot el klou a belkul sils er a chelsel a reksi, eng kired lomdasou er sel kesus er a kmeed el eru el telael el rak er a memong er a Sers er a Gehtsemane el Jesus a mlo outubaruach el ngara meringel el nglunguuch e uledersii el mo osebeled er a kngtid. Ng tiaikid el taem er a ngarbab el tngakireng el diak a mo uai ngii el ringel er a tech me a reng el Jesus Kristo, el Dios, a mlo mengerngars a rsechel. Ngokiu a cherrungel el beltikereng, e Ngii a uldars a rokui el uchul e bodengai a rokui. Sel chedaol tngakireng er Ngii, el meringel a bododengelii, ng di sebeched el melchesuar er a rengud me a uldesued, a mekletkid el kmo ng meral diak a ulebengelel omereng el saul er kid el mo er a Kristo el kirel chedaol sengk er Ngii.
Uriul er sel kesus, e a Jesus a mlengai el mo er mederir a rechad er a klechelid me a rengarbab el chad el uleltuub er Ngii, milngelebed er Ngii, e kulebsengii el mo er a kodall. Ng mle telcherakl el ngara ringel er a kerus, el [molmuut] er a lemerekong.”2 A dikea longitengtik el bedengel a mlo ulekedurs er a lengiil el debull. E sola, e sel tutau er a ongedei er a klebesei, e a Jesus, el Ngelekel a Mesisiich el Dios, a milkiis er a debull loba klebkellel, el mla mekiis er a kodall el chad el mui, er a llomes, e dmiich, e mesisiich.
Choi, ng betok el mla duubech el tekoi e ra chelsel a reksi a meklou a belkul e ngarngii a bla relii er a beluu me a rechad. E ng di a omodak el rokui, eng diak el sebechel mo uaisel dilubech er sel kot el tutau er a Baskua.
Ngera sel rulii tial tngakireng me a Okiis er a kodall er a Jesus Kristo el kmal mo klou a ultutelel tekoi er a chelsel a reksi—el muut el klou a belkul er a rua mekemad, meklou el kerior el duubech, me a ikel melodech a klengar el teletael er a re scientist?
Eleng Jesus Kristo, a Uchul Eng Sebeched el Muut el mo Ngar
A nger a debetik er a chelsel a eru el kmal meringel ongarm el kid el bek lechad a mo obangel.
A kot, e kid el rokui a mo mad. Ng diak el iior er a kmo ke ngeasek, ke klebokel, mesisiich a bedengem, malechub e ke kmal kerekikl, le tara klebesei e tial bedengem a mo er a kodall. A resechelei me a rechedal a telungalek a mo lmangel el kirem. Eng di diak el sebechir el muut lolutau el mo ngar.
Eng di, a Jesus Kristo a uchul, e a kodellem a di kedeb el taem. A ta er a klebesei e a delbengem a lmuut el mo dmak ngii me a bedengem. Tiaikid el mla mekiis er a kodall el bedengem a diak el luut el mo er a kodall,3 e kau a mo kiei el mo er a ulebongel, el diak a ringel me a ongarm er a bedengem.4
Tia mo duubech el Jesus Kristo a uchul, el mlodersii a klengar ngii e liluut el nguu.
Ngii a kildmeklii tiang el mo er tirkel rokui loumera er Ngii.
Ngii a kildmeklii tiang el mo er tirkel diak loumera er Ngii.
Ngii a kildmeklii tiang el mo er tirkel loltuub, melenguul, e melbeakl er a Ngklel.5
A Jesus Kristo a Uchul, Eng Sebeched el mo Kiei lobengkel a Dios
Ongerung, e kid el rokui el mla ruebet er a klengit. A kngtid a ngoikid el mo cheroid er a Dios, le ng diak a “diak el klikiid el sebechel soiseb er a rengedel.”6
A leuaisei, e bek el sechal, redil, me a rengalek a diak el sebechir el soiseb er a Rengedel— el uaisei, el merekmo Jesus Kristo, el diak a kngtil Chad, a uldersii a klengar Ngii losebelid er a kngtid. A Jesus a dimlak a kngtil me a uchul e, Ngii a sebechel osebelid er a kngtid el llemalt a mengerchir ngii er a rebek el chad. E tia uldimukl er a kau me a ngak.
A Jesus Kristo a ngilubet a belsel a kngtid.
Rokui el kngtid.
Tiaikid el kot el klou a belkul sils er a chelsel a reksi, e a Jesus Kristo a milkengii a sersel a kodall e ngilubet aikel olibesongel el ngii a torbengid meng diak bodesiseb er a chedaol siseball er a diak a ulebengelel klengar. Ng Rubak e Osobeled a uchul, e kau me a ngak a sebeched el nguu a kot el mekreos e diak el mochar el sengk—el diak el iior er a ikel bla deruul, le ng sebeched el mo ouchel a rengud e oltirakl er a rael el ngoikid el mo er a llomes me a klebkellel a celestial, el mo iliuekl er a remisisiich a klaumera er tir el ngelekel a Chedam er a Babeluades.
Ngera Me Kede Ngara Deureng
Tiaikid a doldeu er ngii er a Sandei er a Baskua—kede oldeu er a klengar!
A Jesus Kristo a uchul, e kid a mo mekiis er a kodall e mechulterir tirkel betik er a rengud, e kaididengelangel er a deureng me a dmolech el omereng el saul. A Jesus Kristo a uchul, e kid a mo melemolem el ngar el chad, el mo er a ulebongel.
A Jesus Kristo a uchul, ea kngtid a diak di le mesuld el merekong; ng dirrek el mo mousubes.
Ng sebeched el mo klikiid e mo suobel.
Chedaol.
Ngokiu a betik er a rengud el Osobel, e ng sebeched el di mereko el melim er sel ralm er a chido el bedul a diak a ulebengelel klengar.7 Ng sebeched el mo kiei el mo er a ulebongel er a blil a diak a ulebengelel King er sel diak dotebengar el klebkall me a cherrungel el deureng.
Kede Mesa “Ngii el Chad”?
Aika el rokui, e te betok el chad el ngara beluulechad er chelechal sils a locha diak lodengei malechub eng diak loumerang er tial mekreos el sengk el Jesus Kristo a mla meskid. Te locha mla rongesii a ngakl el Jesus Kristo malechub e te medengei el kmo Ngii a merael chisel chad, eng di te diak lesang er sel meral Teletelel.
Sel kumdasou er tiang, eng melcheluches e ra uldesuek Osobel el dechor medal ngike el merredel er a Judea, el Pontius Pilate, er a di chelsel a tela el sikang ruchei er a Kodellel.
A Pilate a kmal millai ngesonges a osengel kirel a Jesus. A Pilate a ulureor, el meruul eru el tekoi: ngoungerachel el melai a teksir a rechad er a Rom e mengeluolou er a budech er a beluu. E chelecha e tirkal Jewish Sanhedrin a merema er ngii loba chad el tir omdasou el kmo ng melemall aika el eru el tekoi.8
Uriul er a loukerkeriil er ngika el kelebus, e a Pilate a dula el kmo, “Ng kmal diak kbetik er a telmellel ngika el chad.”9 Eng di ngulmelchesiu el kirel remuul a rengrir tirkal loltelechakl er a Jesus el chad, me a Pilate lokiu a siukang a mocha kongei me a chimol kelebus a mo sebechel merael er sel temel a Passover. Ngera meng dimlak lebecherei a Jesus me lorael e bai kongei er a dengerenger el merechorech e omekeuad el chad el Barabbas?10
Eng di ng mlo klou a nglemuu el sorir a Pilate a lebecherei a Barabbas me lorael e bai lemekerus a Jesus.
“Ngera uchul?” A Pilate a uleker. “Ngera el mekngit a [bla] el relii?”
Eng di rechad a liluut loldiu el mo klou, Bol mekerus!”11
A Pilate a dula er a rechedal el mocha omekringel er a Jesus, el mle soal rulterir a rechad el mo ungil a rengrir.12 Meng mlo uaisei, el blo lorkedii el cholbedii e tomall a bedengel. E uleltuub er Ngii, e nguu a techodulik loia er a bdelul, e milii er a bekekerekard el mamed.13
A Pilate a locha ulemdasou el kmo tia mo rulterir tirka el chad el mo ungil a rengrir. Te locha ko er a mo chubur ngika el chad. “Chelecha, e a kudersii leko er kemiu,” ng millekoi a Pilate, “me bo modengei el kmo ng diak betik a telmellel. … Ngkakid ngii el chad!”14
A Ngelekel a Dios a dilchor mederir a rechad er a Jerusalem.
Te ulemes er a Jesus, eng di dimlak el mui el medengelii el kmo ng techang.
Ng dimlak a mederir lomes.15
A domes er ngii er a kuk tara teletael, e kid me kede dirrek el mongit el mo “omes er ngika el chad.” Ngodech a uldasou er a beluulechad el Kirel. A reprofet er a recheuodel me a chelechang a kmo Ngii a Ngelekel a Dios. Ngak me a kumdasu el uaisei. Ng klou a belkul el dersta er kid a di kid el mo ungil medengei. A leuaisei, e sel molbedebek er a klengar me a urerel a Jesus Kristo, e ngera kemesang?
Tirkel metik er a rael el mo er ngike el meral ngii a Chad a metik er a chesimer el kirel a deureng er a klengar me a kerul aikel kot el meringel el tekoi er a klengar.
Me sel, bom iliuekl er a klengitelreng me a ongarm, e momes er ngii el Chad.
Sel momelchesiu luriid e rrau a rengum, e momes er ngii el Chad.
Sel mngara ringel, cheloit, rrau a rengum, telemall, malechub e ke mechitechetong, e momes er ngii el Chad.
Ngii a mo chemolodau.
Ngii a mo omekungil er kau e meskau a moktek er a klengar kau. Ngii a mo meskau a Reng er Ngii e mekekii a rengum er a deureng.16
Ngii a msa “klisiich a mechitechetong; e tirkel dikea klisichir e ngii a mo choisois a klisichir.”17
Sel demeral mesa ngika el Chad, e kede suubii e osiik el mo mengaisisiu a klengar el mo er Ngii. Kede ouchel a rengud e melasm el melodech a teleteled e bek el sils el dorael el mo kmeed er Ngii. Kede oumera er Ngii. Kede chotii a beltkil a rengud lokiu otirekled er a Llechul e kiei loltirakl a chedaol telbiled.
Ng belkul a kmo ked emo oltirakl er Ngii.
A dmiich el llomes er ngii a mei er a rengud. A krasia er Ngii a sobecheklid. A berraod a mo kebekakl e a budech a mo dmolech er a rengud. Sel bo dungil mesa ngika el Chad, e kede mo ngeltengat e mo ulekrael a klengar ngii er a ikel olibesongel me a ongarm er a klechad. E a uriul, e kede mo mtebengar el kmo ngarngii a chedaol teletael, me a rokui el tekoi a di ngarngii a moktek er ngii.18
Sel mkengei er a tngakireng er Ngii, e bo moltirakl er Ngii, e bocha er sel ulebongel er a klengar kau er a beluulechad, e ngera belkul aikel klengitelreng el blom chebangel er tial klengar?
Aike a mo diak.
A sebekereng, mekngit lomerellir a rechad, me a odechelakl el bla bom chebangel?
A Mo Diak.
A ongarm, ringel, klengit, merur, me a berraod el bla msiseb er ngii?
Mo diak.
Mo mousubes.
Ng diak el ko er a mengasireng el dosaod el kirel a Kristo, ngara deureng el kirel a Kristo, omerk a tekingel a Kristo, e omlaoch el kirel a Kristo … me a rengeleked bo lodengei el kmo ngera losiik er ngii el kirel a ngebetel a kngterir”?19
Ng diak el ko er a mengasireng sel dolasm loba rengud el rokir el meral mo medengelii ngika el Chad?
Betik er a renguk el rodam me a rodos er ngak, a kuchais el kmo sel kot el klou a ultutelel sils er a reksi er a chad a sel sils el Jesus Kristo, el ngar el Ngelekel a Dios, a mlo mesisiich er a kodall me a klengit el kirir a rokui el ngelekel a Dios. E a kot el klou a belkul sils er a klengar kau me a ngak a sel sils el kid a mo “medengelii ngika el chad”; sel bo Desang er sel meral Teletelel; sel bo denguu loba rengud me a uldesued rokir sel klisichel a tngakireng er Ngii; me sel domekbeches er a klemeriar reng me a klisiched, el mo blak a rengud loltirakl er Ngii. Tiaikid le bol blechoel sils er kid er a chelsel a klengar kid el rokir.
Ak meskemiu a sioning me a klengeltengat er ngak el kmo sel “doltirakl er ngii el chad,” e kede mo metik er a belkul, me a deureng, me a budech er tial klengar er a beluulechad me a diak a ulebengelel klengar er sel tara beluulechad. El ngara chedaol ngklel a Jesus Kristo, amen.