Kraes I Bin Raesap Tudei

Ol dia brata mo sista. Taem ol boe blong mitufala oli smol, mi stap talem ol bedtaem stori abaot ol smol dog mo singsing ol bedtaem singsing, mo wan i “!Kraes hem i raesap tudei!”¹ Samtaem, mi jenisim ol toktok: “Naoia i taem blong go slip— Aleluia.” Plante taem, ol boe blong mitufala oli slip kwik; o,oli save se sapos oli slip, bae mi stop singsing.

Ol toktok— toktok blong mi—i no save talem ol bigfala filing blong mi stat long taem we Presiden Russel M. Nelson i holem han blong mi, dia Susan i stap long saed blong mi, mo givim tabu koling ia we i kam long Lod, we i mekem mi nomo pulum win mo i mekem mi stap wokem kraekrae long ol dei we oli jes pas.

Long Ista Sabat dei ia, mi singsing wetem glad: “Aleluia.” Singsing ia blong lav blong Sevya blong yumi we i girap mo i pemaot ol man² i stap selebretem yuniti blong ol kavenan (we oli joenem yumi long God mo long wanwan long yumi) mo Atonmen blong Jisas Kraes (we i stap helpem yumi blong lego man we i folem fasin blong wol, mo i wantem folem ol toktok blong Tabu Spirit.³).

Tugeta, ol kavenan blong yumi mo Atonmen blong Sevya i mekem yumi save mekem mo gat paoa blong mekem samting. Tugeta, oli helpem yumi blong holem mo lego samting. Tugeta, oli mekem samting i swit, i holemtaet, i mekem i tabu mo i pemaot man.

Profet Josef Smit i se: “Long sam, oli ting se i wan gud doktrin we yumi tokbaot—i wan paoa we i rekodem o fasem yumi … long wol mo i fasem yumi long heven. Nomata hemia, long eni taem long wol, taem we Lod i givim wan dispensesen blong prishud long eni man tru long revelesen, o long eni grup blong man, oltaem hem i givim paoa ia i kam wetem.”⁴

Mo hem i olsem tedei. Ol tabu kavenan mo odinens, we oli no stap long eni nara ples, oli stap kasem olgeta long 159 tabu haos blong Lod long 43 kantri. Ol blesing blong promes oli kam tru long ol prishud ki, long doktrin, mo atoriti we oli bin putumbak, we i soemaot bilif mo fasin blong obei blong yumi, mo ol promes blong Tabu Spirit blong Hem we i kam long yumi, long jeneresen blong yumi, long taem naoia, mo long taem we i no save finis.

Ol dia brata mo sista long evri nesen, famli mo lanwis, raon long wol Jos blong yumi, tangkyu from fet, hop, mo jareti blong yufala we i stap laef long evri wokbaot blong yufala. Tangkyu blong kam pat blong wan kam tugeta long testemoni mo eksperiens blong ful gospel we i kambak.

Ol dia brata mo sista blong mi; yumi blong wanwan long yumi bakegen. Oli save wivim yumi long yuniti mo lav,⁵ long saed blong evri samting mo long evri ples.⁶ Olsem we Lod Jisas Kraes, i stap invaetem wanwan long yumi, long weaples yumi stap long hem, nomata wanem situesen blong yumi, plis, “kam mo luk.”⁷

Tedei, wetem tingting we i stap daon, mi mekem tabu promes se mi givim evri paoa mo wok blong sol blong mi,⁸ olsem wanem we oli stap o bae oli kam, i go long Sevya blong mi, long dia Susan mo famli blong mi, long ol Brata Lida blong mi, mo long wanwan long yufala, ol brata mo sista we mi lavem.

Evri samting we i klin inaf mo i no save finis i fas long trutok ia se God, Papa blong yumi we i no save finis we i gat lav, i ril, mo Pikinini blong Hem, Jisas Kraes, mo Atonmen blong Hem i ril mo Tabu Spirit i witnes long hemia.⁹ Tedei i Ista Sandei. Wetem respek mi witnesem mo testifae long tabu fasin se Kraes Hem i stap laef—Hem we i bin ded, we oli bin berem, mo i girap bakegen long nambatri dei, mo i bin go antap long heven.¹⁰ Hem i Alfa mo Omega¹¹—i stap wetem yumi long stat; Hem i stap wetem yumi kasem en.

Mi testifae abaot ol lata-dei profet, stat long Profet Josef Smit i go kasemdia Presiden Russel M. Nelson, we yumi sastenem hem wetem fulap glad. Olsem we ol pikinini blong Praemeri oli singsing, “Folem profet; hem i save rod.”¹² Mi mi witnes we, olsem we ol skripja oli profesae long hem, wetem Buk blong Momon: Wan Nara Testeman abaot Jisas Kraes, se “kingdom blong Lod i stanap wan moa taem bakegen long wol ia, i rere from Seken Kaming blong Mesaea.”¹³ Long holi mo tabu nem blong Jisas Kraes, amen.