Kraist ewe Samon a Manausefan Ikenai
Iei Raninifenin Paska. Ua karan chok pusin kuna me wesewesen pwarata ussun ewe Kraist mi manu—I ewe a “mano, peiaseno, me manau sefan non ewe aunungatin ran.”
Pwii me fefeinei achengicheng, nupwen noum kewe at ra kukkun, ua tutunapei ngenir tutunapen kukkun konak me kon ngenir ekkewe konu pin, mi pachenong “Kraist ewe Samon a Manusefan Ikenai.”1 Fan ekkoch ua siwini ekkewe kapas: “Iei a tori fansoun mour, alleluia.” Fan ekkoch noum kewe at ra muttir mour; ra sinei pwe ika ra mour, iwe ua kouno ne kon.
Kapas—ai kewe kapas—rese tongeni pwarata ekkewe memmef non ewe fansoun Preseten Russell M. Nelson a komoch pei non poun, me Susan mi nom unuki, me a ngeniei ei koko mi pin seni ewe Samon ewe a uweano ai pochokun me a ngeni ei ai nuokus fan chommong non ekkewe ran ano.
Non ei Ranin Paska, ua puapua ne konnu, “Alleluia.” Ewe konun an ach Chon Amanau tong2 a pwarano usun ekkewe pwon mi pin (mi rii fengeni nefinach ngeni Kot me nefinach fengen) me ewe Achasefanin Jises Kraist (mi anisikich ach sipwe pwiniti ewe ennetin mwan me fefin me etekisona kichetiw ngeni ewe Ngun mi Fel3).
Ir fengen, ach kewe pwon me an ach Chon Amanau Achasefan a etufichi kich me eki kich eta. Ir fengen, ra anisikich ach sipwe komochunuk me pwan nikitano. Ir fengen, ra murino, isoni, enimenim, me amanauakich me naponon nonomun manauach mi auchea.
Anon ewe Soufos Josef Smith: Amo usun mi pochokkun ei sokkun poraus—eu manaman mi makkei ika foti mettoch won fonufan me won nang. Nge inamo, non tappin meinisin won fonufan, inet ewe Samon a ngeni emon aramas eu tappin ewe pristut seni pwarata, ika mwichen mwan, ei manaman a pwan fiti.4
Ina usun ikenai. Pwon me efeioch mi pin, rese tufich ekis, kich mi angei me non 159 imwen ewe Samon non 43 eif. Feioch mi pwon ra feito seni ekkewe kiien pristut mi niwinsefanito, nongong, me mwumwuta, ra pwarata ach nuku, anneasochis, me pwonen ewe Ngun mi Fel, ngenikich non ei tappin, ikenai me feinfeino chok.
Pwii me fefinei non einang meinisin, aramas, me kapas, non unusan ach mwichefen, kinisou ren ami nukunuk, epinukunuk, me tong ennet non mettoch meinisin. Kinisou ren ami oua choni ei mwichen chufengen ren unusan ewe kapas allim mi niwinsefanito.
Pwii me fefinei achengicheng, kich eu chok. Sia tongeni “fofo non tipeu me tong”5 non mettoch meinisin me neni meinisin.6 Nupwen ewe Samon Jises Kraist a tingorei kich, ian sia nom ia, ika mo met nonnomuch, ouse mochen “feitto me nengeni.”7
Non ei ran ua pwon fiti tekisoson ren unusen pochokkunen nguni,8 ren met repwe fori ika winiti, ngeni ai we Chon Amanau, ngeni Punuwei Susan me am family, ngeni Pwii, me ngeni kemi meinisinpwi me fefinei Achengicheng.
Mettoch meinisin mi nimoch me nom fochofoch mi nongonong won ennetin manauen Kot Semach ese Much me Noun, Jises Kraist, me an Achasefan, mi pwar ngeni kich me ren ewe Ngun mi Fel.9 Non ei Ranin fel ranin paska ifenin, ua pwarata me ren ai unusen pwarata ren ewe Kraist mi manau—I ewe a mano, a peias, me manuasefan non ewe aunungatin ran, me feita nang10 I ewe Alpha me Omega11—a fiti kich nepoputan, me a nom rech tori nesoponon.
Ua pwarata usun soufosun ikenai, seni Ewe Soufos Josef Smith ngeni nouch Achengicheng Preseten Russell M. Nelson, ewe sia pwapwa ne etiwa ikenai. Ussun nouch kewe semiritin Kinter ra konu, “Tapweno mwirin ewe soufos; I a sinei ewe an”12 Ua pwarata ussun met mi osini non ekkewe pukefel, pachenong ewe Puken Mormon: Pwan ew Testamen Jises Kraist, “ewe muu an ewe Samon ewe a forsefanita won ei fonufan, a amonata ngeni ewe Oruen Niwinsefaniton ewe Mesaia.”13 Non ewe it mi pin iten Jises Kraist, amen.