Kristo te Uea E a Uti n te Bong Aei

Mauri tariu ao mwaneu, ngke a uarereke natira mwaane, I karakin karaki ni kauamatu iaon kamea aika uarereke ao n anene ni kauamatu, ni ikotaki ma “Iesu Kristo e a Uti n te Bong Aei”¹ N tabetai I bita te taeka: Ngkai ai te tai ni matu—areruia. A tataneiai ni matu natira mwaane ni waekoa; bwa a ataia bwa ngkana a matu, ao I aki naba anene.

Taeka—man au taeka aika uarereke—e aki kona ni kabwara te namakin ae tamaroa ngke Beretitenti Russell M. Nelson e anai baiu n taui, ma te tangira, ma au Susian ae tangiraki i rarikiu, ao n anganai te wewete ae tabu aei mairoun te Uea are e ana ikeu ao ni katukai ma te tang n te tai ae mwaiti inanon boong aika nako.

N Tabatin te Itita aei, I anene ni kukurei, “Alleluia” Te anene ibukin ana tangira ni kamaiu ara Tia Kamaiu are e a uti² e bukamarua te reitaki n te berita ae tabu (are e reitira ma te Atua ao nakoira n tatabemaniira nako) ao Ana mwakuri ni kamaiu Iesu Kristo (are e buokira ni kararoa ana mwakuri te aomata ae ana kairiribai te Atua ao ni kararoaira ma karaoan ana mwakuri te Tamnei ae Raoiroi³).

Ni kabane, ara berita ae tabu ao ana Mwakuri ni kamaiu te tia Kamaiu e anganiira te konabwai ao te karineaki. Ni kabane, a buokira ni kateimatoaira n ara onimaki ao ni kamaunai ara bure. Ni kabane, e kanakoraoa, e wakin, e katabui, ao e anganiira te kamaiuaki.

E taku te Burabeti Iotebwa Timiti: “E kona n taraaki irouia tabeman bwa te reirei ae e rang ni mataata ae ti taekinna—te mwaaka are e taui mwiina ke ni kabaei i aon te aba ao ni kabaei i karawa. E ngae n anne, n rooro ni kabane n te aonaaba, n te tai are e a tia te Uea n anga te mwioko n tararua n te nakoanibonga nakoia aomata nako man te kaotioti ni koaua, ke te bootaki ni mwaane teuana, e aki toki n angania te mwaaka aei.”⁴

Bon ti tebo ma ngkai. Berita aika a tabu ao otenanti, aika aki kona ni karekeaki n tabo nako, a ti kona ni karekeaki inanon 159 n ana auti te Atua aika tabu n 43 taabo. Berita ni kakabwaia a reke rinanon kaokakin kingin te nakoanibonga, reirei, ao te kariaiakaki, a kaota ara onimaki, ongotaeka, ao berita mairoun te Tamnei ae Raoiroi, nakoira nakoia ara roro, ngkai ao akea tokina.

Tariu ao mwaneu aika kam tangiraki mai buakoia baronga nako, ma natanaomata ma botanaomata, ma taetae, kam rabwa n ami onimaki ae maiu, te kantaninga ma te tangira ae kororaoi ni bwaai ni kabane ake kam karaoi. Kam rabwa ngkami aika kam riki bwa kaain te ikotaki ae bwanin ni kaota reiakinan te euangkerio.

Tariu ao mwaneu aika tangiraki, ti bane ni katiteuanaaki. Ti na boti nanora n te nano ae ti teuana inanon te tangira imarenara”⁵ ni bwaai ni kabane ao n tabo nako ike ti mena iai.⁶ Ngke te Uea Iesu Kristo e weteira ni kabane n te tabo are ti mena iai ke tera ae ti rinanona, taiaoka, “nakomai noria.”⁷

Te tai aio I a berita ma te nanorinano n anga nanou ma korakoran tamneiu ni kabane,⁸ bwa a mena ia ke tera ae riki nakoia I anga, nakon au Tia Kamaiu, nakon kainabau Susan ao nakoia au utu, nakoia Tariu, ao nakoimi, tariu ao mwaneu.

Bwaai ni kabane ake a itiaki ao n akea tokia e boboto iaon maiun ni koaua te Atua,Tamara ae akea Tokina ae tangirira, ao Natina, Iesu Kristo, ao Ana Mwakuri ni kamaiu, a kakoauaki iroun te Tamnei ae Raoiroi.⁹ Aio bon Tabatin te Itita. I nanorinano man kakoaua ao n anga au koaua iroun Kristo ae maiu—Are E mate, man taunaki, ao ni manga uti n te katenua ni bong, ao n rierake nako karawa.¹⁰ Ngaia bon te Areba ao te Omeka¹¹ma ngaira mai moana, E na bon raonira ni karokoa te toki.

I kakoauaia burabeti ni bong aika kaitira, mai iroun te Burabeti Iotebwa Timiti ni karokoa Beretitenti Russell M. Nelson, are ti boutokaia ma te kukurei n te tai aei. N aron aia anenen kaain te Moanrinan a anenea, “Ira te Burabeti; e ata te kawai.”¹² I kakoaua bwa, n aron are e taetae ni burabetiaki n ni booki aika tabu, n ikotaki ma ana Boki Moomon: Kakoauaan Taekan Iesu Kristo.“abanuean te Uea [e] a manga kateaki iaon te aba, ni katauraoira nakon Kauaokin te Mesia.”¹³ N aran Iesu Kristo ae mimitong man tabu, amen.