Yexus Sawv Rov Los Hnub No

Cov kwv tij thiab cov muam, thaum kuv cov tub tseem yog me nyuam tub, kuv tau qhia tej zaj dab neeg txog cov me nyuam aub rau lawv thiab tau hu tej zaj nkauj qhuas Vajtswv rau lawv thaum txog sij hawm tsaug zog, tsis hais zaj no “Yexus Sawv Rov Los Hnub No.”¹ Tej lub sij hawm kuv tau muab tej lus hloov ua: Nim no txog sij hawm tsaug zog—aleluyas. Feem ntau kuv cov tub tau tsaug zog sai heev; los sis yog lawv paub kuv xav tias lawv twb tsaug zog lawm, kuv yuav tsum tsis hu nkauj ntxiv.

Tsis muaj lus—los yog hais tias kuv tsis muaj lus—uas piav tau kuv xav li cas txij thaum Thawj Tswj Hwm Russell M. Nelson muaj kev siab hlub tuav kuv tes, nrog kuv tus me Susan nyob kuv ib sab, thiab hais tias tus Tswv hu kuv ua txoj hauj lwm dawb huv uas ua rau kuv ua tsis tau pa thiab ua rau kuv los kua muag ntau zaus tau ob peb hnub no.

Hauv Hnub Caiv Easter no, kuv zoo siab hu nkauj, “Aleluyas.” Zaj nkauj txog peb tus Cawm Seej uas tau sawv rov los txoj kev hlub uas txhiv peb dim² yeej hais txog qhov uas tej kev khi lus (uas muab peb txuas rau Vajtswv thiab ib leeg rau ib leeg) koom nrog Yexus Khetos txoj Kev Theej Txhoj (uas pab peb tso tus neeg ntawm sab cev nqaij daim tawv tseg thiab ywj rau tus Ntsuj Plig Dawb Huv tej kev tshoov siab³).

Nyob ua ke, peb tej kev khi lus thiab peb tus Cawm Seej txoj Kev Theej Txhoj pab peb thiab ua rau peb ua neeg dawb huv. Nyob ua ke, tej ntawd pab peb tuav rawv thiab tso tseg. Nyob ua ke, tej ntawd pab peb kom zoo siab, muab tshwj cia, ua rau peb dawb huv, thiab txhiv peb dim.

Tus Yaj Saub Yauxej Xamiv hais tias: “Ib txhia yuav xav tias zaj lus qhuab qhia no yog kev khav khav xwb uas hais tias: ib lub hwj chim uas muab los sis khi tej yam hauv ntiaj teb thiab saum ntuj ceeb tsheej. Txawm li ntawd los, hauv txhua lub caij nyoog hauv ntiaj teb no, thaum twg tus Tswv tau muab lub pov thawj hwj rau ib tiam neeg twg thaum muab rau ib tug txiv neej los sis ib pawg txiv neej los ntawm kev tshwm sim, ces qhov ntawd yeej ib txwm muab lub hwj chim no thiab.”⁴

Hnub no yeej yog li ntawd. Peb txais tau tej kev khi lus thiab cov kab ke dawb huv nyob hauv tus Tswv 159 lub tuam tsev dawb huv nyob hauv 43 lub teb chaws, tsis muaj lwm qhov chaw uas peb txais tau tej ntawd. Peb txais tau cov koob hmoov dhau los ntawm cov yuam sij, cov lus qhuab qhia, thiab txoj cai uas tau muab txum tim rov qab los, thiab peb txais tau vim peb muaj kev ntseeg, mloog lus, thiab Nws tus Ntsuj Plig Dawb Huv cog lus rau peb nyob hauv peb lub caij nyoog no, nyob rau lub sij hawm no thiab nyob mus ib txhis.

Cov kwv tij thiab cov muam nyob hauv txhua haiv neeg, txhua xeem neeg, thiab txhua yam lus, nyob hauv lub koom txoos thoob plaws lub ntiaj teb, ua nej tsaug rau nej txoj kev ntseeg, kev cia siab, thiab kev siab hlub thaum nej ua txhua yam. Ua nej tsaug vim nej los koom ua hauj lwm kom muab txoj moo zoo tag nrho txum tim rov qab los.

Kuv cov kwv tij thiab cov muam, peb ib leeg muab siab npuab ib leeg. Peb muaj peev xwm “sib koom siab koom ntsws thiab muaj kev hlub”⁵ thaum ua txhua yam thiab nyob txhua qhov chaw.⁶ Thaum tus Tswv Yexus Khetos caw peb txhua tus, txawm peb nyob qhov twg los xij, txawm peb raug xwm txheej dab tsi los, thov “nej los saib.”⁷

Hnub no kuv txo hwj chim cog lus “tas lub zog ntawm kuv lub siab,”⁸ txawm yog kuv muaj zog npaum li cas los, rau kuv tus Cawm Seej, rau kuv tus me Susan thiab wb tsev neeg, rau kuv cov Kwv Tij, thiab rau nej txhua tus, kuv cov kwv tij thiab cov muam.

Txhua yam tsim nyog thiab txhua yam nyob mus ib txhis yeej los ntawm qhov uas muaj Vajtswv peb Leej Txiv Nyob Mus Ib Txhis uas hlub peb thiab Nws Leej Tub, Yexus Khetos, thiab Nws txoj Kev Theej Txhoj, uas tus Vaj Ntsuj Plig Dawb Huv ua tim khawv txog.⁹ Hnub no yog Hnub Easter Sunday. Kuv txo hwj chim ua tim khawv txog tus Khetos uas muaj txoj sia nyob—“tus uas tau tuag, raug kaw hauv qhov ntxa, thiab tau sawv rov los txog hnub peb, thiab nce mus saum ntuj.”¹⁰ Nws yog Alafas thiab Aumenkas¹¹—uas nrog nraim peb thaum chiv keeb, Nws yeej nrog nraim peb mus txog thaum kawg.

Kuv ua tim khawv txog cov yaj saub hauv hnub nyoog kawg no, txij ntawm tus Yaj Saub Yauxej Xamiv mus txog peb tus Thawj Tswj Hwm Russell M. Nelson, tus uas peb zoo siab txhawb nqa pom zoo. Zoo li peb cov me nyuam hu nkauj, “Coj raws tus yaj saub, nws paub txoj kev.”¹² Zoo li tau hais nyob hauv vaj lug kub dawb huv, tsis hais Phau Ntawv Maumoos: Ib Zaj Lus Tim Khawv Ntxiv txog Yexus Khetos los yog, kuv ua tim khawv tias “tus Tswv lub nceeg vaj [twb] tsa dua rov qab los ib zaug ntxiv nyob hauv lub ntiaj teb, los npaj tos tus Mexiyas txoj Kev Los Zaum Ob.”¹³ Los ntawm Yexus Khetos lub npe uas dawb huv thiab dawb ceev, amees.