Kauno Krais Iasadahr Rahnwet

Maing riei ko, ni ahnsou me nait pwutak ko tikitik, ni ansouhn meir I kin soaiahiong ira kisin kidi kan oh ingitingki koul, iangahki koulen “Kauno Krais Kaiasadahr Rahnwet.”¹ Ekei pak I kin pereniki wekidala koulo nda: “Met e lelehr ahnsou en meir—aleluia.” Pwutak ko kin mwadang en meirla; Pwe re ese ma re pahn meirla, I pahn uhdisang koul.”

Lepin lokaia kan—apw mehlel lepin lokaia kan me pahn kohsang rehi—sohte kak kawehwe audapan loaleiet sangete Preseden Russe M. Nelson koledi pehi kat, ni ahi pwoud Susan mih limwahi, oh e malipekin ie malipilip sarawi wet me pwilisang Kauno me inenen kapwuriamwei oh kahrehiong ie en sengiseng pak tohto.

Rahn en Ihster wet, I pereniki koulki, “Aleluia.” Koul pwoatet me pid limpoak en Sounkomouro me kaiasadahr² kin kawauwih ehupenehn inou kan (me kin karehiong kitail en miniminiong Koht oh ehupene) oh Tohmw en Sises Krais (me kin sewese kitail en kadowanweisang kitail ahnepen aramas oh ahpw keieng manaman en Ngehn Sarawi.³)

Ni ahnsou me atail inou kan oh Tohmw en atail Sounkomour kin ehupene, e kin kakehlaikitailda. E kin sewese kitail en poadidi oh liksang dihp. Patpene re kin kamwahwiala, sinsile, kamwakele oh doareikitailla.

Soukohp Joseph Smith mahsanih: “Ekei aramas pahn medemedewe me kitail kin koasoi padahk eimah ni atail kin koasoia—duwen manaman en kilelehdi de katengehdi pohn sampah oh katengehdi nanleng. Ahpw, sangete ni tepin kawa, ahnsou koaros me Kauno kin ketkihda irair en ahnsoun prihsduhd ong ohl emen de ohl kei, sang ni kaudiahl, manaman wet kin mie.”⁴

Ih duwen rahnwet. Inou oh tiahk sarawi kan, me sohte kin mie nan wasa teikan, kin alahldi nan tehnpas sarawi en Kauno me 159 nan wehi 43. Inoun kapahi kan kin pwilisang kih en prihsduhd kapwurpwurdo kan, padahk mehlel, oh mweimwei me kasalehda atail pwoson, peik, oh inouhn Sapwellime Ngehn Sarawi. Inou kan kodohng kitail nan atail dih kan, nan mour wet oh mour poatopoat.

Maing riei ko sang wehi koaros, kadaudok koaros oh lokaia koaros, wasa koaros nin sampah nan Mwomwohdiso wet, kalahngan en amwail momourki pwoson, koapworopwor, oh limpoak ni mehkoaros. Kalahngan en amwail pokonkihpene amwail kadehde en rongamwahu kapwurpwurdo.

Riei ko, kitail konehng en ehupene. Kitail kak miniminkihpene limpoak,⁵ ni mehkoaros oh wasa koaros.⁶ Ni atail Kaun Sises Krais kin luhke kitail, menlau kohdo oh kilang.”⁷

Rahnwet ni karakarahk I inoukihda me I pahn wia wen ahi kak oh kehl koaros,⁸ ong ahi Sounkomouro, ahi pwoud Susan oh aht kisin peneinei, Riei Ohl oko, oh emenemen kumwail koaros maing riei ko, me “sohte lipilipil dahme re wia de re pahn wiahla.

Mehkoaros me mwahu oh me poatopoat kin poahsoankihda mehlelpen Koht Sahm limpoak oh Sapwellime Iehros, Sises Krais, oh Sapwellime Tohmwo, me kadehdehkidahr sang ni Ngehn Sarawi.⁹ Trahn Sarawi en Ihster wet, I kadehde ni wahu, duwen Krais ieias—E ketin pwoula, seridi, oh ahpw mourda sapahl ni kesiluh en rahn, oh ketdahla nanleng.¹⁰ Ih me Alpa oh Omeka¹¹— E ketiket rehtail ni tapio E ketiket rehtail ni imwio.

I kadehdehki soukohp en imwin rahn akan, sang Soukohp Joseph Smith lel Preseden Russell M. Nelson, me kitail utungadahr. Duwen me neitail tohn praimeri kan kin koulki, “Idawehn soukohp; pwe Ih me ese ahlo.”¹²  Duwen me kokohpdahr nan pwuhk sarawi kan, iangahki Pwuhk en Mormon, I kadehdehda me wehin Kauno pwurehng koasoansoandi pohn sampah, pwehn kaunopadahn Ketido Keriau en Meseiahu.¹³ Ni lengileng sarawi en Sises Krais, ahmen.