Ti’a fa’ahou mai te Fatu te Mesia

Te mau taea’e e te mau tuahine here, e mea ’āpī roa ā tā māua mau tamari’i, ’ua fa’ati’a vau ia rātou i te mau ’ā’amu nō te taime ta’otora’a nō ni’a i te mau ’ūrī fanau’a, ’e ’ua hīmene i te mau hīmene nō te taime ta’otora’a, mai te hīmene « Ti’a fa’ahou mai Iesu ».¹ I te tahi taime, e ha’uti au, e tāui au i te mau ta’o : E taime nō te haere ta’oto—haleluia. ’Ei reira e ta’oto ’oi’oi tā māua mau tamari’i ; ’ua ’ite pa’i rātou ē, ’ia mana’o vau tē ta’oto ra rātou, e fa’aea ïa vau i te hīmene.

E’ita te mau parau—tā’u iho a rā mau parau—e nehenehe e fa’a’ite atu i te mana’o māere i te taime ’a tāpe’a ai te peresideni Russell M. Nelson ma te here i tō’u nā rima i roto i tōna, ’e ta’u Susan here i pīha’i iho iā’u, ’e ’ua tu’u maira i teie pi’ira’a mo’a nō ’ō mai i te Atua ra, ’e ’ua mutu roa tō’u aho, ’e ’ua ta’i noa vau e rave rahi taime i roto i nā mahana i ma’iri a’enei.

I teie Sābati Pāsa, tē hīmene nei au ma te ’oa’oa, « Haleluia ». Tē fa’ahanahana nei teie hīmene o te here o te Fa’aora ti’a fa’ahou² i te au māite o te mau fafaura’a (’o tē fa’atū’ati ia tātou i te Atua ’e i te tahi ’e te tahi) ’e te tāra’ehara o Iesu Mesia (’o tē tauturu ia tātou ’ia vaiiho i te tāne ’e te vahine nātura, ’e ’ia fāri’i i te mau fa’aurura’a a te Vārua Maita’i³).

’Āmui, e fa’ati’a ’e e fa’ahanahana tā tātou mau fafaura’a ’e te tāra’ehara o to tātou Fa’aora ia tātou. ’Āmui, e tauturu te reira ia tātou ’ia tāpe’a ’e ’ia tu’u. ’Āmui, e ha’amonamona te reira, ’e e fa’aherehere ’e e ha’amo’a ’e e fa’aora ho’i.

’Ua parau te peropheta Iosepha : « E riro paha ē, e feruri te tahi mau ta’ata ē, e parau ha’api’ira’a fāna’o roa tā tātou e parau nei—te hō’ē mana ’o tē pāpa’i ’e ’aore rā ’o tē ha’amau i ni’a i te fenua ’e i te ra’i ra. Noa atu i te reira, i roto i te mau tau ato’a nō te ao nei, i te mau tau ato’a tā te Fatu i hōro’a mai i te hō’ē tau tu’ura’a o te autahu’ara’a i te hō’ē ta’ata nā roto i te heheura’a mau, ’e ’aore rā, i te hō’ē pupu ta’ata, ’ua hōro’a-ato’a-hia mai teie nei mana ».⁴

’E mai te reira ïa i teie mahana. E mau fafaura’a ’e e mau ’ōro’a, e’ita e roa’a i te tahi atu vāhi, maori rā i roto i te 159 fare mo’a nō te Fatu i roto e 43 fenua. E tae mai te mau ha’amaita’ira’a i parauhia nā roto i te mau tāviri ’autahu’ara’a ’e te ha’api’ira’a tumu ’e te mana i fa’aho’ihia mai, ma te fa’a’itera’a i to tātou fa’aro’o, te ha’apa’o ’e te mau parau fafau a tōna Vārua Maita’i ia tātou i roto i tō tātou nei u’i, i teienei ē a muri noa atu.

E te mau taea’e ’e te mau tuahine here i roto i te mau fenua ato’a, te mau ’ōpū ato’a, te mau reo ato’a, ’ati a’e tō tātou nei ’Ēkālesia nā te ao, māuruuru nō tō ’outou fa’aro’o ora, te tīa’ira’a, ’e te aroha i roto i te mau ta’ahira’a ato’a. Māuruuru ia ’outou nō te rirora’a ’ei putuputura’a nō te ’īra’a o te ’itera’a pāpū ’e o te mau ’itera’a rau o te ’evanelia tei fa’aho’i-fa’ahou-hia mai.

E te mau taea’e e te mau tuahine here, nō te tahi ’e te tahi tātou pā’āto’a.E nehenehe tō tātou ’ā’au e « au-tahi-māite-hia i te au māite ’e te aroha »⁵ i roto i te mau mea ato’a ’e i te mau vāhi ato’a.⁶ Mai tā te Fatu Iesu Mesia e ani nei ia tātou tāta’itahi, noa atu te vāhi tei reira tātou, noa atu tō tātou huru orara’a : « ’A haere mai ’e ’a hi’o ».⁷

I teie mahana, ma te ha’eha’a, tē ’euhe nei au i te pūai hope o tō’u nei vārua,⁸ tō’u pūai i teienei ’e tō ananahi, i tō’u Fa’aora, i tō’u Susan iti ’e tō’u ’utuāfare, i tō’u mau taea’e, ’e ia ’outou tāta’itahi, e au mau taea’e ’e e mau tuahine here.

Te mau mea maitata’i ato’a ’e te mure ’ore, ’ua fa’atumuhia ïa i ni’a i te ora-mau-ra’a te Atua tō tātou Metua Mure ’Ore ’e tāna Tamaiti ’o Iesu Mesia, ’e tāna tāra’ehara, tei ha’apāpūhia mai e te Vārua Maita’i.⁹ I teie sābati Pāsa. Tē fa’a’ite nei au ma te auraro ’e tē fa’a’ite pāpū nei au ma te hanahana nō te Mesia ora—’Oia ’o tei « pohe, ’ua hunahia, ’e ’ua ti’a fa’ahou i te toru o te mahana, ’e ’ua haere i ni’a i te ra’i ».¹⁰ ’O ’oia te Alepha ’e te Ometa¹¹—i pīha’i iho na ia tātou i te ha’amatara’a ra, tei pīha’i iho ’oia ia tātou ē tae noa atu i te hōpe’a.

Tē fa’a’ite pāpū nei au i te mau peropheta o te anotau hōpe’a nei, mai te peropheta Iosepha Semita ē tae mai i te peresideni here Russell M. Nelson, tā tātou i pāturu ma te ’oa’oa. Mai te mau tamari’i o te Paraimere e hīmene nei : « ’A pe’e i te peropheta, ’ua ’ite ’oia i te ’ē’a ».¹² ’E mai tei tohuhia i roto i te mau pāpa’ira’a mo’a, i roto ato’a i te Buka a Moromona : Te tahi fa’ahou ’ite nō Iesu Mesia, tē fa’a’ite pāpū nei au ē, « ’Ua fa’ati’a-fa’ahou-hia te bāsileia o te Fatu i ni’a i te fenua nei, ’ei fa’aineinera’a i te tae-piti-ra’a mai o te Mesia.¹³ Nā roto i te i’oa maita’i ’e te mo’a o Iesu Mesia ra, ’āmene.