Oupwe Omusa Fengeni Kemi Ussun Chok Kraist A Fen Omusakemino
Kich meinisin mi tongeni angei ennetin kinamwe me aninis seni ach Chon Amanau nupwen sia kaeo ach sipwe omusano ekkewe mi tipis ngenikich.
“Unumweiranin ewe Raninfel, ekkewe fefin ra feinno ren ewe peias, ra uwei ekkewe spices ra fen amonnata.
“Nge ra kuna ewe fau a mwokut seni asamen ewe peias.
“Iwe ra tonong non, nge rese kuna inisin ewe Samol Jises.
“Ra chok ukkuta o ekieki met a fis, nupwen ruomon mwan mi ufouf mangaku mi saramaram ra uta unukur.
“Ekkewe fefin ra pworetiw ren ar nuokus, nge ekkewe mwan ra kapas ngenir, Pwata oua kukkutta ewe emon mi manau nein ekkewe mi mano?
“Ese nom ikei pwe a fen manaueta.”1
Nessor, ewe Raninfelin Paska, sipwe chechemeni met Jises Kraist a fori fan itach non och napanap mi auchea: “Pun God a fakkun tongei chon fonufan, ina minne a fangeno Noun we anamon, pun iteiten aramas mi nuku i resap mano nge repwe kuna manau ese much.”2 Nesoponon, sipwe manausefan usun chok I, ach sipwe manau fenfeino.
Me ren ewe manamanen ewe Achesefanin Jises Kraist, sia pwan angei ewe niffangen omusomusen tipisich me ach fofforungau, ika sia etiwa ewe tufich me wisen aier. Me ren ach angei ekkewe angang mi pin, aponueta pwon mi pin, me anneasochisi annuk, sia tongeni kuna manau ese much me pwapwa ese much.
Ikenai, ua mochen poraus usun omusomus, eu niffang mi namwot me auchea minne sia angei seni nouch Chon Amanau me Chon Angaseno, Jises Kraist.
Non eu pwin non December 1982, ngang me punuei, Terry aua neno ren am angei eu kokko ngeni imwem non Pocatello, Idaho. Nupwen ua ponueni ewe fon, ua chok rong an emon kechiw. Mwirin, fefinei a apasa, “Tommy a mano.”
Emon chon sakau 20 ierin, a speedo nap seni 85 mwain (135 km) ew aua, ese kouno ren ewe stoplight non eu sop unukun Denver, Colorado. A pwurei ewe toraku pwii we kukun a wisen uwei, Tommy, iwe i me punuwan, Joan, ra mano. Ra chok niwin ngeni imwer ngeni nour kukkun nengin mwirin eu parin Kirisimas.
Ngang me punuei aua sai ngeni Denver me aua feino ngeni ewe nenien mi ma. Aua chufengen ren inei, semei, pwi me fefinei me aua netipechou ren manon Tommy me Joan. Ra mano pokiten tipisin emon. Aua fokkun netipechou, me ua poputa ai upwe song ren ewe emon chon tipis mi kukkun ierin.
Tommy mi emon sou annuk non ewe United States Department of Justice me epwene winiti emon chon angang ngeni tumun fonuen me pisekin ekkewe Native American non ekkewe ier epwap feito.
Mwirin ekkis fansoun, a tori ewe ranin kapung fan iten ewe anuen mi wisin nieno pwi ren wan we. Non ar mefi riaffou me netipechou, semei, inei me fefinei watte, Katy, ra fiti ewe kapung. Seman me inan ewe chon sakau mi pwan fiti, me mwirin a wes ewe kapung, ra mommot won ekkewe sea me kechiw. Semei, inei me fefinei ra pwan mommot arapakan ngenir me ra pwan achocho ne poracho ngeni mefier. Mwirin ekkis fansoun, semei, inei me fefinei ra uta me ra feino ngeni seman me inan ewe anuen me ra apasa kapasen kinamwe me omusomus. Ekkewe mwan ra kapong fengen; ekkewe fefin ra komoch fengeni pour; ir meinisin mi netipechou me kechiw me ra weweiti pwe ekkewe ru famini mi ennetin riaffou. Inei, Semei, me Katy ra emweni am famini non pochokun mi mosonoson me tipepochokun me pwarata met wewen omusomus.
Ar omusomus non ekkei fansoun a apweteteno netipei me a suki ewe aanen chikar. Mwirin och fansoun ua kaeo ifa usun upwe apochokuna ai mochen omusa aramas. Ren chok aninisen ewe King epwe awora Kinamwe osei mi metek mi pwaseno. Netipei epwe pwositi Tommy me Joan, nge iei omusomus a mut ngeniei ai upwe chechemeniir ren pwapwa ese much. Me ua sinei pwe aupwe nonnom fengen sefan non am famini.
Usap apasa pwe sipwe tipeu ngeni fofforun tipis. Sia ennetin sinei pwe araamas repwe kuna niwinin ar fofforun tipis me fofforungau. Nge, sia pwan sinei, pwe kich noun Kot at me nengin minne mi aponuenta an Jises Kraist kewe afanafan. Sipwe omusa aramas ina mo ika a usun rese fich ngeni ach omusomus.
Ewe Chon Amanau a aitikich:
“Ika oua omusano tipisin ekkewe ekkoch ngeni kemi, Sememi we non nang epwe pwan omusakemino.
“Nge ika ousap omusano tipisin ekkewe ekkoch, iwe Sememi we esap pwan omusano ami tipis.”3
Kich meinisin mi tongeni angei ennetin kinamwe me aninis seni ach Chon Amanau nupwen sia kaeo ach sipwe omusano ekkewe mi tipis ngenikich. Ei aninis a esenipato an ewe Chon Amanau manaman non manauach non och napanap sipwe weweiti me sisap monuki.
Ewe Aposel Paul a aiti:
“Ami noun God aramas. … Oupwe pwinitanong womi umoumoch, kirokiroch, tekisoson, netip pwetete, pwan engino.
“Oupwe songomang fengen nefinemi, iwe oupwe pwan omusa fengeni kemi … : ussun chok ewe Samol a fen omusakemino.”4
Ewe Samon A pwisin pwarata:
Ika sise omusa aramas, sisap angei omusomus seni ewe Samon me ewe tipis mi watte a chok nom rech.
Ewe Samon a apasa pwe Epwe omusa ion epwe omusa, nge a annuku pwe sipwe omusa aramas meinisin.5
Ekkewe afanafanen ach Chon Amanau me Chon Angaseno, Jises Kraist, mi fat; mi namwot pwe ewe chon tipis epwe omusa aramas ika a mochen angei omusomus.6
Pwi me fefinei, mi wor aramas non manauach me afeingaua kich? Kich mi chuwen meffi memmefin oput me song minne sia ekieki pwe mi pung? Sia mut ngeni ach namanam tekia an epwe epetikich seni ach sipwe omusa me nikitano ekkewe sokkun memmef? Ua tingorei kich meinisin ach sipwe ennetin omusa me atufichikich ach sipwe chikar. Me ika omusomus ese fis ikenai, oupwe sinei pwe sia mochen angei me sia angang ngeni, epwe feito—usun chook a fis me rei mwirin manon pwi we.
Ouse mochen oupwe pwan chechemeni pwan eu kinikinen omusomus mi auchea pwe sipwe pwisin omusano kich.
Ion a fen aier seni tipisin, ewe Samon a apasa, ewe pwan a omusano, me ngang, ewe Samon use chiwen chechemeniir.7
Ua iotek ikenai pwe kich meinisin sipwe chechemeni me tapweno mwirin an Jises Kraist nenien appiru. Won ewe irapenges non Golgotha, non An riaffou, A apasa ekkei kapas: “Semei, kopwe omusereno! Rese sinei met ra fori.”8
Ren ach angei eu napanapen omusomus me ach anganga, usun chok semei, inei me fefinei watte, sia tongeni angei ewe pwon seni ewe Chon Amanau: “Upwe ngeni kemi kinamwe, upwe fang ngeni kemi pwisin ai kinamwe. Ai fang ngeni kemi esap ussun an fonufan fang ngeni kemi. Ousap noninen are tipemwaramwar; ousap pwan nuokus.”9
Ua pwarata pwe ei kinamwe epwe feito ngeni manauach nupwen sia aponueta an Jises Kraist afanafan me tapweno mwirin An nenien appiru ren ach omusa aramas. Nupwen sia omusa, ua pwon pwe ewe Chon Amanau epwe apochokunakich me An manaman me pwapwa epwe tonong non manauach.
Ewe peias mi peen. Kraist mei manau. Ua sinei I. Ua tongei I. Ua kinisou ren An chen, ena ewe manaman mi tufichin echikarita mettoch meinisin. Non ewe it mi pin iten Jises Kraist, amen.