Aroni Kristo naba, ngke E Kabwara Ami Bure, ao Ai Aromi Naba

“Ao n te bong are te moa ni bong n te wiki, ngke e a tiba ngaina, ao nakekei a roko n te ne ni mate ao a uoti baike a boiarara ake a karaoi.

“Ao a nora te atibu ba e karabinoaki nako man te ne ni mate.

“A ngke a rin, ao a aki kunea rabatan te Uea are Iesu.

“Ngke a mwaninga iai, ao noria, a tei i rarikia uoman te aomata ma kunnikai aika raneanea:

“Ao nakekei a bati ni maku, ao a bobaraki i aontano, ao uakekei a taku nakoia, Kam aera ngkai kam ukoukora Teuare maiu i buakoia mate?

“E aki mena ikai, ma E a uti.”¹

Ningabong, are bon Tabatin te Itita, ti na riai n uringa te kawai ae onoti tera are e karaoia Iesu Kristo ibukira: “Ba E tangiria aomata te Atua n te aro are E anga Natina ae te rikitemanna iai, ba e aonga n aki mate ane onimakinna, ma e na reke irouna te maiu are aki toki.”² Man aei, ti na bane n uti n ai Arona, ni maiu n akea tokina.

Rinanon ana Mwakuri ni Kamaiu Iesu Kristo, ti na kona ni bane ni karekea te bwaintangira ibukin kabwaraan ara bure ma mwakuri aika aki riai, ngkana ti kariaia reken te tai ao ni mwakuria te rairannano. Ao man karekean otenanti aika a riai, kawakinan berita, ao te ongotaeka nakon tua, ti kona iai ni karekea te maiu ae akea tokina ao te karietataaki.

N te bong aei, I tangiria ni maroro iaon te kabwarabure, te bwai n tangira ae kakawaki ao ni bongana are e anga ara Tia Kamaiu ao te tia Kabooira, Iesu Kristo.

N tairikin Ritembwa n 1982, Ngai ma kainnabau, aeTerry, ti uti n te tareboon ae roko ni mweengara i Pacatello, Idaho. Ngke I kaeka te tareboon, I tii ongo te maikeike n tang. N tokina, bwanaan mwaneu ae ikawai nakoiu e korakai n taetae man taku, “E a mate Tommy.”

Te tia kabutikaa te ataeinimwaane ae manging ae 20 ana ririki, e buti riaon 85 te maaire (135 te kiromiita) n te aoa, e okanako te taura are kakaira te kawai, ni mwakoron Denver, Colorado. E kauntaba ma te kaa are e kabutaki iroun tariu are e uarereke, Tommy ike e a mate iai ma buuna, ae Joan. A oki rikaaki nakon mweengaia nakon natia ae uarereke imwiin bwaran aia Kakiritimati.

Ngai ao kainnabau ti waekoa ni kiba nako Denver ao ni kawara te tabo are a kawakinaki iai rabwataia maate. Ti bootaki ma ara utu ao ara koraki n ataei ao n nanokawaki ibukin buan Tommy ao Joan aika ti tangiriia. A bua mai irarikira n akean karaoan katean te tia bure. A uruaki nanora, te un inanou iroun teuare e karaoa te bure e moanna n waerake inanou.

Tommy e beku bwa te rooia n Aia Aobiti Taan Moti n te United States ao n riki ngaia bwa te tia tei ni kawakinan abaia Kain raoi America ao ni katana kaubwain te aba ibukin ririki aika a na roko.

Imwiin tabeua te tai n nako, e waaki te boowi ni kaburebure n ongoraeakinaki ana bure te ataeinimwaane are e rekereke ma te bure n tiriaomata ni kabutan te kaa. N reitinakon te maraki ma te nanokawaki, au utu ao mwaneu are e ikawai, Kattey a ira ongoraeakinan te tang. Taman ma tinan te tia kabutikaa are e manging a mena naba ikekei, ao imwiin kainan ongoraeakinan te tang, a tekateka iaon te kaintekateka ao n tang. Au utu ao mwaneu a tekateka naba ni uakaan nakoia ike a kakaea naba katokan nanokawakiia. Imwiin tabeua te tai, au utu ao mwaneu a teirake ao n nakoia ana utu te turaiwa ao n angania aia taeka ni karaunano ao ni kabwara aia bure. A iobai mwaane; a taubai aine; iai te nanokawaki ma rannimata irouia ni kabane man ataaki bwa utu aikai a bon rootaki n te rawawata. Tamau, tinau ao Kathy a kaira te kawai ma te aki karongoa ao ma te korakora ao ni kaotia nakon ara utu bwa e kanga aron te kabwarabure.

Karaoan te kabwarabure n te tai anne e karekea raun nanou man kabebeteaki ao ni kauka te kawai nakon te kamarurungaki. Ni mwaitin te tai I reiakinna bwa e kanga karekean te kabwarabure man te nano. Bon tii man ana ibuobuoki Uean te Raoi ae e na kona n tabeka rawawatau. Nanou e aki toki n uringa Tommy ao Joan, ma te kabwarabure e anganai bwa N na uringiia ma ni kukurei n tainako. Ao I ataia bwa ti na manga bon kaitibo ni kabane bwa utu ngaira.

I aki iangoia ikai bwa ti kakea te katua n urua te tua ni maiura. Ti ota raoi bwa ngaira n tatabemaniira ti bon bane ni bukinaki ni karaoan waaki aika a urua te tua ao karaoan bwaai aika aki riai. E ngae n anne, ti ataia naba bwa, ngkai naati mwaane ao aine iroun te Atua, ti irii ana reirei Iesu Kristo. Ti na kabwarai buure e ngae ngkana taraana irouia tabeman aki kariaia ara kabwarabure.

E reirei te Tia Kamaiu:

“Ba ngkana kam kabara aia bure aomata mai rouia, ao E a kabara naba ami bure Tamami are i karawa:

“Ma ngkana kam aki kabwara aia bure aomata mai irouia ao E aki kabwara naba ami bure Tamami.”³

Ti kona ni karekea te rau ae akea n ai arona ao te reitaki ma ara Tia Kamaiu ngkai ti reiakina kabwaraan aia bure naake a bure” nakoira. Te reitaki aei e uota mwaakan te Tia Kamaiu nakon maiura inanon te aki manga kairua n aki-manga-mwaninga te kawai.

Te Abotoro Bauro e reirei:

“Ma ngaia aei, ngkai ana aomata te Atua ngkami aika kam rineaki, … kam karina te nano ae nanoanga, te atataiaomata, te nanorinano, te nimamanei, ao te taotaonaki n nano;

“Kam na i taotaon nanomi, ao kam na i kabara bure iroumi …: aroni Kristo naba ngke E kabwara ami bure, ao ai aromi naba.”⁴

E taetae te Uea:

“Mangaia are, I tuangkami, bwa kam riai ni kabwara bure i marenami; bwa ane e aki kabwara ana bure tarina e na tei ni kabuakakaaki i matan te Uea; bwa e tiku irouna te bure ae korakora riki.

“Ngai, te Uea, N na kabwara ana bure are I taku bwa N na kabwara, ma ngkami kam riai ni kabwarai aia bure aomata ni kabane.”⁵

Ana reirei ara tia Kamaiu ao te Tia Kabooira a ota raoi; te tia bure e riai ni kukurei ni kabwara aia bure tabeman ngkana teuanne ke neienne e kantaninga reken te kabwarabure.⁶

Tariu ao mwaneu, iai aomata ni maiura ae a tia ni kamarakira? Ti kawakina taraan te namakin anne iroura bwa te bwai ae aki raoiroi man kauniira? Ti karekea te kamoamoa n totokoira man te kabwarabure ao ni kanakoa? I kaoi ngkami ni kabane bwa kam na kabwara bure ao mam waakina te kabebete imarenami. Ngkana e aki mwakuri n te tai aei, ataia bwa ngkana iai nanora ni kan karaoia, e na kona n roko n aron are e roko irou imwiin maten tariu.

Taiaoka uringnga bwa kanoan te kabwarabure naba ae kakawaki bon kabwaraan ara bure.

“Nooria, ane e tia n raira nanona man ana bure,” e taekina te Uea, “ao e na bon kabwaraaki ana bure, ao Ngai, te Uea, N na aki manga uring ana bure.”⁷

I bubuti ngkami n te tai aei n uringa ao n ira ana katoto Iesu Kristo. Iaon te kaibangaki i Korokota, inanon Marakina, E taekin taeka aikai: “Tamau, Ko na kabarai aia bure; ba a aki ata ae a karaoia.”⁸

Man karekean tamnein te kabwarabure ao mwakuriana, n aron au utu ao mwaneu te ikawai, ti kona n ataia iai ana berita te Uea: “I katuka te rau iroumi, I anganingkami au rau: I aki anganingkami n ai aron te aba, ngkana e anga. A na tai rawawata nanomi, ao a na tai maaku.”⁹

I kakoaua te rau aei bwa e na roko ni mauira ngkai ti kakauongo nakon ana reirei Iesu Kristo ao n ira Ana banna ni katoto ni kabwarai aia bure tabemwaang. Ngkai ti kabwarai bure, I berita bwa te tia Kamaiu e na anganira te korakora, ma Mwakana ao te kukurei e na ranganako inanon maiura.

Akea kanoan te rua ni mate. E maiu Kristo. I Ataia. I Tangiria. I karabwarabwa ibukin Ana akoi, are e anga te kakorakoraaki ae tau ni kamaiu bwaai nako. I a atong baikai n aran Iesu Kristo ae tabu, amen.