Āinwōt Kraist eaar Jeorļo̧k Ami bōd, En Āindein Barāinwōt Ami Kōm̧m̧an

“A ilo raan eo m̧okta ilo wiik, ke e raantak, rej ilo̧k n̄an lōb eo, im bōktok toļaj ko raar kōpooji, im ko ekar wōr jet rekar itok ippāer tok.

“Im rej lo ejm̧aan eo e dāpiļo̧k jān lōb eo.

“Im rej deļo̧n̄ ilowaan, im jab lo ubōn Irooj Jisōs.

“Im ke eļap aer pere kake, lo, ruo armej rej jutak iturir, ilo nuknuk ko re jatōltōl:

“Im ke rej lōļn̄o̧n̄, im jirļo̧k mejeir n̄an bwidej, rejro ba n̄an er, Etke kom̧ij pukot eo E mour, ippān ro re mej?

“E jab pād ijin, a em̧ōj An jerkakpeje.”¹

Ilju, Jabōt in Ijtō: jenaaj keememej ilo juon wāween eaorōk kōn ta eo Jisōs Kraist ekar kōm̧m̧ane n̄an kōj: “Bwe kōn an Anij yokwe laļ, Ear letok juon wōt Nejin Ear Keotak, bwe jabdewōt eo ej lōke E en jab jako, a en mour indeeo.”² Āliktata, jenaaj jerkakpeje āinwōt An kar, n̄an mour indeeo.

Jān kabwilōn̄lōn̄ in Pinmuur eo ekwojarjar an Jisōs Kraist, jemaron̄ barāinwōt bōk menin letok eo an jeorļo̧k bōd an jerawiwi ko ad im kōm̧m̧an ko rebōd, eļan̄n̄e jej bōk iien eo em̧m̧an im eddo in ukweļo̧k. Im jān ad bōk kain̄i ko remenin aikuj, kōjparok bujen ko, im pokake kien ko, jemaron̄ bar bōk mour indeeo im mour ippān Anij.

Rainin, ikōņaan kōnono kōn jeorļo̧k bōd, juon menin letok emenin aikuj im aorōk kar letok n̄an kōj jān ad Rilo̧mo̧o̧r im Ripinmuur, Jisōs Kraist.

Ilo juon bon̄ ilo Tijemba ilo 1982 eo, lio pāleō, Terry, im n̄a kar ruj kōn juon kūr ilo taļboon n̄an m̧weo im̧ōm ilo Pocatello, Idaho. Ke iaar uwaake taļboon eo, iaar ron̄ m̧ōtato wōt. Āliktata, lio jeiū eaar kakkōt n̄an ba ke, “Tommy emej.”

Juon rikattōr 20 iiō-dettan, kar kaiiūm̧ eļapļo̧k jān 85 m̧aiļ (134 km) juon awa, jab kea ilo an ettōr eaar kijoone ļait būrōrō in bōjrak eo ilo juon jikin in Denver, Colorado. Eaar dibōje wa eo ļeo ediktata jatū eaar kattōre, Tommy, kar m̧ōkaj an im lio pāleen Joan mej. Raar jepļaak n̄an m̧weo im̧wer n̄an ippān leddik eo edik nejier ālkin juon kōjota in Kūrijm̧ōj.

Lio pāleō im n̄an kar kaiir in keļo̧k n̄an Denver im etal n̄an im̧ōn rimej eo. Kōm kar koba ippān ro jinō im jema im ro jeiū im jatū im būrom̧ōj kōn jako eo an eo jitōnbōro ippām Tommy im Joan. Raar mej kōn juon m̧akūtkūt jab kea an uroor. Būruwōm eaar rup, im iaar jino en̄jake eļapļo̧k illu n̄an likao rijorrāān in.

Tommy eaar jerbal āinwōt juon ļoāār ilo United States Department of Justice im eaar erom juon rijojomar ekajoor n̄an kōjparok bwidej ko menin jeraam̧m̧an ko an Native America ro elōn̄ iiō ko rej itok wōt.

Ālkin jet iien ko raar eļļāļo̧k, juon iien ron̄jake liakeļo̧k eo an jikin ekajet eo eaar kōm̧m̧an n̄an likao eo kar lo ruwōn kōn kamej juon armej ilo an ettōr. Aaer liājļōļ im būrom̧ōj ekar wōnm̧aanļo̧k wōt, ro jinō im jema im leddik eo erūtto tata jeiū, Kelly, kōm̧ kar pād ilo iien ron̄jake eo. Ro jinen im jemen rikattōr eo eaar kadōk raar barāinwōt pād ijo, im ālkin an jem̧ļo̧k iien ron̄jake eo, raar jijet ilo juon jea im kar jan̄. Ro jinō im jema im lio jeiū kōm̧ kar jijet epaak ke raar pukōt n̄an dāpij en̄jake ko aer make. Ālkin juon iien, ro jinōm im jema im lio jeiū raar jutak im etal n̄an ippān jinen im jemen rikattōr ro im leļo̧k aer naan in kaenōm̧m̧an im jeorļo̧k bōd. Em̧m̧aan ro raar idik pein doon; kōrā ro raar jibwe pein doon; eaar wōr juon m̧wilaļ in būrom̧ōj im kemejaaļaļ n̄an aolep im juon nōbar n̄an jim̧or baam̧le ko raar en̄taan eļāp. Jinō, Jema, im Katy raar ijjno kōn kajoor eo im peran eo aer im kwaļo̧k n̄an baam̧le eo am jekjek eo an jeorļo̧k bōd.

Kwaļo̧k jeorļo̧k bōd ilo iien ko kar kōm̧m̧an bwe būruwō make en pidodoļo̧k im ejake juon iien em̧m̧an n̄an kōmour. Āliktata iaar katak ekōjkan n̄an bōk juon būruwōn jeorļo̧k. Kōn wōt jipan̄ eo an Irooj in Aenōm̧m̧an eo eddo eo ekōmettak kar ļōn̄aje. Inaaj iien otemjej būrom̧ōj kōn Tommy im Joan, ak jeorļo̧k bōd kiiō ej kōtļo̧k bwe in keememej er kōn lan̄lōn̄ ejjeļo̧k jon̄an. Kiiō ijeļā kōm naaj bar ippān doon āinwōt juon baam̧ļe.

Ijjab ba bwe jej kōmālim jerbal ko rejjab jim̧we. Ekanooj ļap ad jeļā bwe kajjojo rej aikuj in inene kōn jerbal in uror ko aer im jerbal ko rebōd. Kōn menin, jej barāinwōt jeļā bwe, āinwōt m̧aan im kōrā ro nejin Anij, jej ļoor katak ko an Jisōs Kraist. Jej aikuj in jeorļo̧k an ro jet bōd men̄e ro jet remaron̄ jab aikuji jeorļo̧k bōd eo ad.

Rilo̧mo̧o̧r eo eaar katakin:

“Bwe eļan̄n̄e kom̧ij jeorļo̧k bōd ko an armej, barāinwōt Jememwōj i lan̄ E naaj jeorļo̧k bōd ko ami:

“A eļan̄n̄e kom̧ jab jeorļo̧k bōd ko an armej, barāinwōt Jememwōj e jāmin jeorļo̧k bōd ko ami.”³

Jemaron̄ aolep bōk aenōm̧m̧an eo eļap im m̧ōttā ippān ad Rilo̧mo̧o̧r ilo ad katak n̄an ilo ejjeļo̧k kapan̄pan̄ jeorļo̧k bōd an ro me raar bōd ņae kōj. M̧ōtta in ej bōktok kajoor eo an Rilo̧mo̧o̧r eo n̄an mour ko ad ilo juon wāween eo eban bōd, im ban meļo̧kļo̧ke.

Rijilōk Paul eaar kōkapilōklōk:

“Innām, āinwōt Anij ear kāālōt, … kōņak būruon tūriam̧o, jouj, ettā bōro, ineem̧m̧an, kijenmej;

“Im kom̧win meanwōr n̄an doon, im jeorļo̧k nana jān doon … : im āinwōt Kraist ear jeorļo̧k ami nana, en āindein barāinwōt ami kōm̧m̧an.”⁴

Irooj E make eaar kean̄:

“Kōn menin, Ij ba n̄an kom̧, bwe kom̧ij aikuj jeorļo̧k an doon bōd; bwe eo ej jab jeorļo̧k an eo jein im jatin bōd, bōd ko an rej liaakeļo̧k im̧aan Irooj; bwe epād ippān jero̧wiwi eo eļapļo̧k.

“N̄a, Irooj, Inaaj jeorļo̧k bōd an ro Inaaj jeorļo̧k aer bōd, ak jān kom̧ emennin aikuj bwe kom̧in jeorļo̧k an aolep armej bōd.⁵

Katak ko an ad Rilo̧mo̧o̧r im Ripinmuur, Jisōs Kraist, ralikkar; juon rijerawiwi aikuj in m̧ōņōņō in jeorļo̧k bōd an ro jet eļan̄n̄e ej kōjatdikdik n̄an bōk jeorļo̧k bōd.⁶

Ro jeiū im jatū, ewōr ke armej ilo mour ko ami me raar kōmetak kom̧? Kom̧ij ke dāpij wōt ta eo me ej āinwōt kabun̄ būruwōn en̄jake ko an matōrtōr im illu? Jej ke kōtļo̧k an uteij bōro bōbrae kōj jān jeorļo̧k bōd im kōtļo̧ke? Ij kūr kōjwōj aolep n̄an lukkuun jeorļo̧k bōd im kōm̧m̧an bwe kōmour en waļo̧k jān itulowa. Im jedko̧o̧n eļan̄n̄e jeorļo̧k bōd ejjab waļo̧k rainin, jeļā bwe ilo ad ikdeelel im jerbal n̄an e, enaaj itok—ejja āinwōt āliktata eaar itok n̄an n̄a ālkin mej eo an ļeo jatū.

Jouj barāinwōt keememej bwe men eo eaorōk an jeorļo̧k bōd ekoba jeorļo̧k ad make bōd.

“E eo em̧ōj an ukeļo̧k jen jero̧wiwi ko an,” Irooj eaar ba, “ejja in wōt ej bōk jeorļo̧k bōd, im N̄a, Irooj, ij jab bar keememeji.”⁷

Ij akweļap n̄an kōjwōj aolep rainin n̄an keememej im ļoor waanjon̄ak eo an Jisōs Kraist. Ioon debwāl eo ilo Koļkota, ilo An en̄taan, Eaar ba naan kein: “Jema, kwōn joļo̧k rueir, bwe re jaje ta eo rej kōm̧m̧ane.”⁸

Jān wōr juon m̧wil in jeorļo̧k bōd im kipel n̄an kōm̧m̧ane, āinwōt ro jinōm im jema im lio jeiū erūttotata, jemaron̄ bōk kallimūr eo an Rilo̧mo̧o̧r: “Aenōm̧m̧an Ij likūt ņa ippemi, Aō aenōm̧m̧an Ij lewaj n̄an kom̧. En jab pok būruemi, im en jab lōļn̄o̧n̄.”⁹

Ij kam̧ool kōn aenōm̧m̧an in enaaj itok n̄an mour ko ad ilo ad n̄e jej pokake katak ko an Jisōs Kraist im ļoor waanjon̄ak eo An kōn jeorļo̧k an ro jet bōd. Ilo ad jeorļo̧k bōd, ij kallim̧ur Rilo̧mo̧or eo enaaj kōkajoorļo̧k kōj, im An kajoor im lan̄lōn̄ renaaj jiōbtok n̄an mour ko ad.

Lōb eo ejjeļo̧k kobban. Kraist ej mour. Ijeļa Kajien. Ij iakwe E. Ij kam̧m̧oolol kōn An jouj, eo ej kōkajoorļo̧k kajoor eo me ebwe n̄an kōmour aolep men. Ilo āt eo ekwojarjar etan Jisōs Kraist, amen.