Me sel Kristo a Ousubes er Kau, Moruul er Ngii el Dirrek

Me a sel kot el sils er a Sandei, er a mechututau, e te mlei er tial debull, lolab a chilt el tir a mirruul, me a bebil er a rechad lobengterir.

Me a temiltik er tial bad el miltitai el cheroid er tial debull.

Me te tiluu e di mlak el betik er a bedengel a Rubak el Jesus.

Me tiang, e te kmal mlo mechas a rengrir, me tulmes, er a teblong el chad el dechor er a mederir el oubail a medidiich el bail:

“Me te mle medakt, me te mlo osus el mo er a chutem, e dula el mor tir el kmo, Ngera me ko osiik er a rengar er a delongelel a remla mad?

“Ngii a diak el ngar tiang, eng mla mekiis er a kodall.”¹

Klukuk, el Chedaol el Baskua, ke de mo lotkii sel tokubets el omeruul el ngii el Jesus Kristo a rirelli el kired. “E le a Dios a kmal betik a rengul er a beluulechad meng milsa di tal Ngelekel, me tirkel rokui el mo oumera er a Ngelekel a Dios a diak el mad e bai mo ngar el diak a ulebengelel klengar.”² Meng uaisei, e kid a mo mekiis er a kodall el uaingii, e kiei el mo cherechar.

Ng uchul tia el ongasireng el chedaol el Tkangkireng er a Jesus Kristo, e kid a sebeched el nguu tial sengk er a klausubes er a kengtid me a mekngit el omeroled, me sel de kongei er tial techall me a deruchall er a ouchel reng. E ngmai a ruoll, oltirakl a telbiil, me a oltirakl a llechul a Dios, eng mo sebeched el nguu a diak a ulebengelel klengar e mo suobel.

Chelchal sils, eng soak el mo omtab er a klausubes, el klou a belkul e tokubets el sengk el blal beskid a Osebeled, el Jesus Kristo.

Sel kesus er a December 1982, e a bechik, el Terry, me a ngak a milkiis er a ngerel a dengua er a blimam el ngara Pocatello, Idaho. Me se ra kunger tial dengua, ak di rongesii a lemangel. Merekong, e a ochedak a dula el kmo, “Ng mla mad a Tommy.”

A lluich a rekil el cheltelaol el chad lomekall, a spido er a 85 miles el tal sikang, e ulmekall el lengelakel er a stoplight er chelsel a beluu er a Denver, Colorado. Ng tilchellii tial mlai el ngke el kot el kekerei lochellek a ulmekall er ngii, ng di mle mereched el mekodir ngii me a bechil, er a Joan. Tir a mle luetang el mo remei el mo er a ngkel kot el kekerei el ngelkir redil er a uriur er a omilil er a Kurismas.

A bechik me a ngak e di mle mereched el suebek el mo er a Denver e mlo er a mork. A ki mlo keldibel lobengekel a rechad er a blik me a rebebil er ngak e ngar er a klengit el reng el kirel a betik er a rengmam el Tommy me a Joan. Te mla remiid el luchul a mekngit el omeruul. Ng mle chelam a rengmam, e a kelsib el reng el mo er ngkal kekerei el chad a mocha dubech er a chesel a renguk.

A Tommy a ulureor el lawyer er a United State Department of Justice e mo omuchel el mo melekau aikel chutem er a Native American me a klungiolel a beluu er a ikel mei el rak.

Mla chemoit a bebil er a taem, eng mo a temel a court er a ngkal kekerei el chad el ngii a uchul aikal kodall. Meng kora dirk, mekekngit a renguk, rechad er a blik me a chudelek, el Kathy, a mlo teloi er tir. A rechad er a blil ngkal cheltelaol el chad a dirrek el mlar sei, me sera bol merek tial keldibl, te dilengchokl er a kingall e medidelangel. A rechad er a blik me a chudelek a mle dengchokl er a bitar tir e te milasm el lorreked er a rengrir. Ng mla chemoit a sesei el sikang, e a rechad er a blik me a chudelek a milekiis e merola el mo er a rechad er a blil ngkal cheltelaol el buik e ungil mengedecheduch er tir e ousubes er tir. Tirkal sechal a ulereked a chim, me tirkel redil me te ulereked a chim, e ngar sei a dmolech el klengit el reng me a chiuosech er a mederir a ulochotii el kmo aikal teblo el telungalek a kmal cheuarm. A chedil, chedam, me a Kathy ulmekrael loba klisichir me a klouerreng e ulchotii a telungalek er kemam el kmo a klausubes ng uangerang.

Me tial mlodars el klausubes er sel taem a kirel a dilmedemekii a renguk, e mekengii a rael el mo e ra omekungil. Meng uaisei ak silubii el kmo uangerang sel do ba klechubechub el reng. Lobengekel a ngesouil a Dios e a ringelek a mlo diak. Ak di blechoel el ourureng er a Tommy me a Joan, eng di chelechang e a klausubes a meskak a ungil deureng. E ak medengei el kmo ki lemuut el mo dmak el telungalek.

Ng diak kdung ke de melemolm aikal mekngit el lomeruul. Ke de kmal lungil medengei el kmo tirkel meruul a mekngit a kirir el mo chemau omeruul lokiu a llach. Eng di, kid a dirrek el medengei el kmo, sel dengelekel a Dios el sechal me a redil, e kid a oltirakl a osisecheklel a Jesus Kristo. Ng kired el di ngara klausubes ngii mesel ualak el kirir el nguu a klausubes.

A Osobel a ulisechakl:

A omousubes a kngterir, ea Demam el ngara babeluades a ousubes er kau:

Engdi alsekum eng diak mousubes a kngterir, e a Demam a diak lousubes a kengtim.³

Kid el rokui a sebeched el nguu a kot el lungil budech e dmak lobengkel a Osobel sel dosuub el mo beot el ousubes er tirkel tir a meruul a mekngit el mei er kid. Tial kaukledm a nguu a klisichel a Osobel el me er a klengar kid, el ngii a diak dousubes er ngii.

Apostol Paul a ulisechakl:

“Mal leuaisei, ngkel milengilt er a Dios, … chelsel a chubechub, blekokeuii, uldasou er ngariou el reng, medemdemek el reng, kemangel el cheuarm;

“Kllou el reng el mo er a tang, e ousubes er a tang … : el uaia Kristo el lousubes er kau, me kau me ke rulli el dirrek.”⁴

A Rubak a dilung:

“Nguchul, ak melekoi er kau, ng kirem el lousubes er a tang, le ngkel diak lousubes er a kengtil a obekul a dechor er a medal a Rubak e mo chemau a kengtil, e le ngara chelsel a lemuut el klou el klengit.

“Ngak, el Rubak, a mo ousubes er tirkel ngak a mo ousubes er tir, eng di kau a kirem el mo ousubes er a rokui el chad.”⁵

A osisecheklel a Osobeled, el Jesus Kristo, a kmal bleketakl; tirkel meruul a mekngit a kirir el ousubes er a rebebil alsekum e ke oureng el nguu a klausubes.⁶

Rodam me a rodos, te ngar er ngii a rechad el ngara klengar kid el sorir el meruul a mekngit el mei er kid? Ke de mengemekl a ikal reng el ngii a oreked a ngasech el reng? Ke de mecherei a keldidai el reng el lorreked er kid er a klausubes me a omengoit? Ak mengemdaol er kid rokui el mo mui lousubes meng momuchel a omkungil er a chelsel rengud. Me a alsekum a klausubes a diak el mei er a chelechal sils, modengei el kmo sel doureng er ngii e oureor el kirel, ngii a mei—di uai sel mlei er ngak ruriul er a kodellel a ochellek.

Kulengit me bom modengelii sel klou el osisecheklel a klausubes el ngii a uldimukl er a ousubes er kid.

“Ngii el mla mo ouchel er a kengtil,” a Rubak a dilung,” a osisiu a mla nguu a klausubes, Ngak, el Rubak, a mla ousubes el rokui.”⁷

Ak kulengit er kid el rokui er tial sils el mo melatk e oltirakl er a olechotel a Jesus Kristo. El ngara kerus er Golgotha, el ngar er a ringel, e ng dilu a ikal tekoi: “Chedam, mousubes er tir; le tir el diak lodengei a loruul.”⁸

Sel doba omekord er a klausubes e meruul er ngii, el di ua rechad er a blik me a ochedak, eng sebeched el mo metebengii sel yaksok er a Osobel: “Budech lekor kau, budech er ngak ak beskau: diak el ua beluulechad a meskau, ngak a meskau. “Lak becherei a rengum mel ngar er a klengit, me a diak ko medakt el dirrek.”⁹

Ak sioning el kmo tial budech a mei er a chesel a klengar kid sel doltirakl a osisecheklel a Jesus Kristo e oltirakl er a Olechotel el lousubes er a tang. Sel dousubes, e ak yaksok el kmo a Osobel a mo smisichid, e a klisichel me a deureng er ngii a mei er a klengar kid.

A debull a bechachau. A Kristo a ngar. Ak medengelii. Ng betik a renguk er Ngii. Ak dmeu a renguk er a krasia er Ngii, el ngii el klisichel a uchul a omekungil er a rokui el tekoi. El ngara chedaol el ngklel el Jesus Kristo, amen.