Nge Are Emon Epwe Nikiitu tori Nesoponon, iwe Epwe Manau.

Pwii me fefinei achengicheng, ua ennetin kinisou ren ei tufich ai upwe pwarata ngeni kemi ekkoch mefiei.

Ekkoch ier a no, ngang me punuwei we aua nom ren ew apwapwan an semirit chunga non ewe Church History Museum non Salt Lake City. Nesopun ewe apwapwa, Preseten Thomas S. Monson a feito rem, me nupwen a kapong ngeni kem ren poum, a apasa, “Nikitu, iwe oupwe fetanoch”—ew afanafan mi nap me emon an  ennet, ennetin, kich meinisin mi tongeni tipeew.

Jises Kraist a pwonei ngeni kich pwe “nge are emon epwe nikiitu tori nesoponon, iwe epwe manau.”¹

Ach sipwe nikiitu a wewen “pwe sipwe nukuchar non ew pwon ach sipwe ennet ngeni ekewe anukun Kot ina mwo ika mi wor sossot, ungeni, me riaffou.”²

Pwan mwo ekkewe a fen fis ngenir mwokutukutun ngun mi pochokun me ir mi fen tupwen ne angang ngeni ekkoch ir mi tongeni rikino non ew ran ika patapateno ika rese nikiitu ngeni nesoponon. Amwo sipwe annomu non ach ekiek me non netipach fansoun meinisin fiti pochokun ewe kapas “Ei esapw fis ngeniei.”

Nupwen Jises Kraist a afanafan non Capernaum, “chommong me nein chienan Jises kewe ra suseni, rese chuwen nuku i.

“Iwe Jesus a eisini ekkewe engon me ruemon chon kaeo, Nge ami oua mochen oupwe pwan suseni ei?”³

Ua nuku pwe ikenai, Jises Kraist a eisini kich meinisin ekkewe sia fen fori pwon mi pin ngeni I, “Oua mochen oupwe pwan suseni ei?”

Ua iotek pwe kich meinisin, ren ennetin weweochun met ekkewe fansoun ese much epwe awora ngeni kich, sipwe ponuweni usun Simon Peter a ponuweni: “Samol, ion am oupwe feinno ren? En chok a wor reom ekkewe kapasen manau ese much.”⁴

Sipwe nikitu ngeni met sia fen nuku me sinei. Ika sise manaueni met kich mi sinei pwe mi pung, sipwe siwin. Chon tipis mi soposopono non ar tipis, me rese aier, repwe kokotiw non nimengaw, tori an Setan epwe angeiir pwe noun, epwe ennetin aukano ar tufichin aier, ar repwe musono, me ar repwe feioch ren ekkewe feiochun ese much.

Ua fen rong chommong apungupung seni ekkewe ra fen kouno ne fiti ewe Mwichefen me ra tur seni ar weweochuti usun popun ach sai won ei fonufan. Ua pesei kemi ami oupwe ekipwichi me niwin, pokiten ngang mi nuku pwe ese wor emon epwe fori an niketip me mwen ach Samon, Jises Kraist.

Nupwen sia papatais, sia fori ekkewe pwon mi pin—esapw ngeni emon mwan nge ngeni ewe Chon Amanau, sia tipeew ach sipwe wata woch iten Jises Kraist me angang ngeni I tori nesoponon.⁵

Ach fifiti mwichen sakrament ina ew kiien ach sipwe tongeni attonaochu ach mochen angang ngeni I, ach apochokunen ngun, me maritan ach nuku non Jises Kraist.

Ach angei ewe sakrament ina ewe mettoch a kon auchea sipwe fori non ewe Raninfel. Ewe Samon a awewei ei angang mi pin ngeni Noun kewe Aposel me mwen chok epwe mano. A pwan fori ena usun me non fonuen Merika. A ereni kich pwe ika sipwe fori ei angang mi pin, epwe pwarata ngeni ewe Sam pwe kich mi chechemeni I fansoun meinisin, me A pwonei pwe, ika sipwe fori, ngunun we epwe nonom rech.⁶

Non ekkewe afanafan an Alma ewe Kukkun ngeni noun ewe Shiblon, sia kuna aurouren mirit me fon repwe anisi kich ach sipwe nukuchar ngeni ach kewe pwon mi pin:

“Tumunu pwe kosap nuapas ngeni namanam tekia; ewer, tumunu pwe kosap sikaseni non om pusin mirit, are non om pochokun mi watte.

“Kopwe pwaracho, nge esapw non napanapen nemenem; me pwan tumunu pwe kopwe aukuku om kewe pochokunen memef meinisin, pwe kopwe tongeni ureno ren tong; tumunu pwe kopwe engino seni chipwang.”⁷

Ekkoch ier a no, nupwen aua asoso, ua mochen no wawa wanfotun ren ewe aewin fansoun. Ua rentini efoch wafotun, me uren mwasangasang, ua no non ewe sat.

Mwirin fitu minich, ew no a anupano ewe wafotun. Ren ai achocho ngeni, ua kamwoch ewe fotun non efoch pei me ewe wafotun non ewe efoch, ua tongeni upwe uta sefan.

Ua sotuni sefan ne fotunei wai we wafotun, nge mwirin fitu minich, ewe wafotun a pwan nupeno. Ua chok nukumach ne sossot, nge ese fisioch, tori an emon mi weweiti fotun a ereniei pwe eni mi wor ew mwok non ewe wafotun me a ureno ren konik, a fori an esapw wenechar me ese tufich ai upwe amokutu. Ua etekini ewe wafotun ngeni oroset me eti ewe pinepin, iwe ennetin, amen watte kusun ewe konik me non.

Ua ekieki pwe fan ekkoch nupwen sia feinfetan non manau ren tipis mi, usun ewe nich non wai we wafotun, a akouono ach fefeita non ngunuch.

Ika sipwe soposopono non ach tipis, sipwe monnuki ekkewe pwon mi pin sia fen fori ngeni ewe Samon, ina mwo sipwe chok nupeno pokiten nopongawen ekkewe tipis sia fori non manauach.

Usun ekkewe mwok non wai we wafotun, ekkewe tipis non manauach sipwe awesir. Ekkoch tipis a namot epwe watte angangan nap seni ekkoch repwe aier seni ar tipis.

Ina mine sipwe eisini kich: Ia sia nom ia anongonong won netipach ngeni ewe Chon Amanau me An angang? Sia usun Peter we nupwen an we a amam Jises Kraist? Ika sia fen tikeri ikewe ie mokutukutuch me ach mochen a usun mwirin ewe watten annuk i a angei seni ewe Chon Amanau?⁸

Sipwe achocho ne aneasochisi ekkewe annuk meinisin me tumunuochu ekkena annuk mi kon weires ach sipwe aponueta. Ewe Samon epwe nom nepekich, epwe anisikich non fansoun osupwang me apwangapwang, me ika sia pwari ennetin ach mochen me fori usun, I epwe “fori mettoch mi apwangapwang repwe pochokun.”⁹

Aneasochis epwe ngeni kich ewe pochokun ach sipwe akkufu tipis. Sipwe pwan weweiti pwe sossotun ach nuku mi pwan namot ach sipwe aneasochis, napengeni sisap sinei pungun.

Upwe wau ew kokkot epwe anisikich ren ach sipwe nikiitu tori nesoponon:

1. Iteiten ran, iotek me aneani ekkewe pukefel.

2. Iteiten wik, angei ewe sakrament fiti netipechou me netip niemam.

3. Moni ach ew ne engon me asoren echikifen iteiten maram.

4. Iteiten ru ier—iteiten ier ren ekkewe serafo—siwinisefani nouch toropwen mumuta non tempel.

5. Non unusen manuach, angang non an ewe Samon we angang.

Amwo ekkewe ennetin ewe kapas allim repwe atipeposa ach ekiek, me amwo sipwe fori manauach epwe ngas seni tipis ekkewe repwe ammangano ach sai non setin ei manau.

Fetanoch non an ewe Samon we an awor niwinin, ach moni niwinin ina chok ewe anen ach sipwe apwonueta.

Ua men kinisou pwe ach Chon Amanau a nikitu tori nesoponon, a awesi An asoren fangeno mi nap.

A riaffou fan iten ach tipis, metek, netipengaw, riaffou, apwangapwang, me nuokus, iwe I mi sinei ifa usun an epwe anisi kich, ifa usun epwe pesei kich, ifa usun epwe ekinamwei kich, me ifa usun epwe apochokuna kich pwe sipwe tongeni nikitu me anegi ewe mwarin mi tekia mi isoisono fan iten ekkewe resap kuf.

Manau mi sokono ngeni emon me emon kich. Kich meinisin mi wor ach fansoun sossot, ew fansoun pwapwa, ew fansoun finata, ew fansoun akkufueppet, me ew fansoun ach aea ekkewe tufich.

Met chok pwisin nonnomuch, ua pwarata pwe Semach won Nang mi chok akapasa, “Ngang mi tongeok. Ngang mi etiwok. Ngang mi nom reom. Kosap fangeta. Aier me nikitu won ewe aan uwa fen pwar ngonuk. Me ua pwon ngonuk pwe sipwe kuna fengeni kich sefan non imwach selestial.” Non iten Jises Kraist, amen.