Ani nakuyuk toj sa’ roso’jik a’an ajwi’ taakole’q

Ex was wiitz’in raarookex inb’aan, k’a’jo’ naq ninb’antioxi naq wan inhoonal re xwotzb’aal eere junjunq li week’ahom.

Wiib’ oxib’ chihab’ chaq, li wixaqil ut laa’in xoowan sa’ jun ch’utam re lix teeb’al li exhibición interactiva reheb’ li kok’al sa’ li Museo de Historia de la Iglesia aran Lago Salado. Naq xraqe’ li ch’utam, li Awa’b’ej Thomas S. Monson xnach’o’ qik’in, ut naq xchap li quq’ xye qe, “Wi texkuyuq, tex’elq chi uub’ej”—jun k’utum jwal nim xchamal li, relik chi yaal, chiqajunilo naqanaw lix yaalalil.

Li Jesukristo naxkʼojobʼ qachʼool naq “ani nakuyuk toj sa’ roso’jik, a’an taakole’q.”¹

Li kuyuk toj sa’ roso’jik naraj xyeeb’al “kanaak chi xaqxo ut chi k’eek’o xch’ool chixpaab’ankil lix taqlahom li Dios, us ta nachal li aaleek, li wech’e’k, ut li ch’a’ajkilal.”²

Us ta li ani ak xnumsihom xnimal ru na’leb’ sa’ musiq’ej ut kik’anjelak chi tiik xpaab’aal, taaruuq ajwi’, sa’ junaq kutan, chixjalb’al xb’e malaj t’ane’k chi ink’a’ chik nawulak sa’ li Iglees wi ink’a’ naxkuy toj sa’ roso’jik. Chiqak’uula taxaq junelik ut chi anchal qach’ool sa’ li qak’a’uxl ut sa’ li qaam li ch’ol aatin a’in: “Moko a’an ta li k’a’ru tink’ul laa’in.”

Naq li Jesukristo kik’utuk sa’ Kapernaum, “naab’aleb’ lix tzolom ke’sutq’iik chirixeb’ ut ink’a’ chik ke’rochb’eeni.

“Toja’ naq li Jesus kixye reheb’ li Kab’laju: Ma laa’ex ajwi’ teeraj chi xik?”³

Nink’oxla naq sa’ li kutan a’in, li Jesukristo naxpatz’ qe chiqajunilo li okenaqo sa’ loq’laj sumwank rik’in, “Ma laa’ex ajwi’ teeraj chi xik?”

Nintz’aama naq chiqajunilo, rik’in jun nimla tz’ilok-ix sa’ li qak’a’uxl chirix li k’a’ru yoo chiqoyb’eninkil sa’ li yu’am maak’a’ roso’jik, toosumenq raj jo’ kixb’aanu laj Simon Pedro: “Qaawa’, ani aj-ik’in tooxik? Aawik’in wank li aatin nak’ehok li junelik yu’am.”⁴

Tiikaqo chi paab’ank chirix li k’a’ru xqapaab’ ut naqanaw. Wi ink’a’ yooko chixb’aanunkil a’ yaal jo’ li qanawom, tento naq toojaloq. Eb’ laj maak li ink’a’ neke’raj xkanab’ankileb’ lix maak, ut ink’a’ neke’xjal xk’a’uxleb’, neke’sub’e timil timil sa’ li tz’ajleb’aal ru, toj reetal naq laj Satanas naxchapeb’ choq’ re, xramb’aleb’ lix hoonal re naq te’xjal xk’a’uxl, re naq te’kuye’q xmaak, ut re naq te’osob’tesiiq rik’in chixjunil li osob’tesink re li junelik yu’am.

Wab’ihom naab’al li tiikob’resink-u reheb’ li aniheb’ anajwan ink’a’ chik neke’wulak sa’ li Iglees, li ke’xsach li tz’aqal rilob’aal chirix li qajom sa’ li qanumik arin sa’ li ruchich’och’ a’in. Nintz’aama reheb’ naq te’xtz’il rib’ ut te’sutq’iiq, xb’aan naq nink’oxla naq maajun taaruuq chixmuqb’al xmaak chiru li Qaawa’ Jesukristo.

Naq xkub’e qaha’, xoo’ok sa’ sumwank—moko rik’in ta jun li winq, rik’in b’an li Kolonel, naq wanq qach’ool “chixkʼulbʼal saʼ [qabʼeen] lix kʼabʼaʼ li Jesukristo, chi kʼeekʼo qachʼool chi kʼanjelak chiru aʼan toj saʼ rosoʼjik.”⁵

Li wulak sa’ li ch’utam re li loq’laj wa’ak a’an jun eetalil re xnawb’al lix anchalil qach’ool chi k’anjelak chiru li Dios, li qamusiq’ejil kawilal, ut li xk’iijik li qapaab’al chirix li Jesukristo.

Xk’ulb’al li loq’laj wa’ak a’an li na’leb’ jwal nim ru sa’ li hilob’aal kutan. Li Qaawa’ kixch’olob’ li k’ojob’anb’il k’anjel a’in chiruheb’ lix apostol ma nak’ulun chaq xhoonal naq taakamq. Kama’an ajwi’ kixb’aanu sa’ li ch’och’ America. A’an naxye qe naq wi noko’okenk sa’ li k’ojob’anb’il k’anjel a’an, a’anaq jun eetalil re xch’olob’ankil xyaalal chiru li Yuwa’b’ej naq junelik naqajultika a’an, ut a’an naxyeechi’i qe naq chi kama’an lix Musiq’ taawanq qik’in.⁶

Sa’eb’ lix k’utum laj Alma li alalb’ej choq’ re laj Xiblon, li ralal, naqataw li chaab’il na’leb’ ut tijom li nokoxtenq’a chi kanaak chi tiik qach’ool rik’ineb’ li qasumwank:

“Chawil aawibʼ re naq moko taqsinbʼilaqat ta chi qʼetqʼetil; relik chi yaal, chawil aawibʼ re inkʼaʼ a taanima aawibʼ xbʼaan xchaabʼilal aanaʼlebʼ laaʼat, chi moko chirix xnimal aametzʼew.

“Kawaq aachʼool, aʼbʼan minumta xkawil; ut chawil ajwiʼ aawibʼ naq rambʼilaq aabʼaan chixjunil aawatawom, re naq tatwanq chi nujenaq rikʼin rahok; chawil aawibʼ re inkʼaʼ tatok saʼ li qʼemal.”⁷

Junjunq chihab’ chaq, sa’ xq’ehil li hilank, kiwaj chi numxik sa’ jun ch’ina jukub’ kayac li maajun sut inb’aanuhom. Kinto’oni jun li kayac, ut chi anchal inch’ool, kinch’ik wib’ sa’ li palaw.

Chirix junjunq k’asal, jun xb’oolam li palaw kixb’alq’usi li kayac. Rik’in x’anchalil inmetz’ew, chi wan sa’ li wuq’ li che’ re xb’eresinkil li kayac, ut li kayac sa’ li jun chik li wuq’, kinru chixaqab’ankil wib’ wi’chik.

Kinyal inq’e wi’chik chixb’eresinkil li kayac, a’b’an yal junjunq k’asal chik naq kixb’alq’usi rib’ wi’chik li kayac. Ink’a’ kiwaj xkanab’ankil ut kinyal inq’e naab’al sut toj reetal naq jun li winq li naxnaw chan ru xb’eresinkil, kixye we naq maare li kayac k’atzb’il li rix xb’aan naq yoo chi ok li ha’ ut naxnujob’resi rib’, jo’kan naq ink’a’ nakana chi xaqxo ut chi kama’an moko naru ta xb’eresinkil. Kink’am li kayac chire li palaw ut naq kinwisi lix tz’apleb’, ut relik chi yaal, ki’el naab’al li ha’.

Nink’oxla naq naab’al sut nokob’eek sa’ li qayu’am rik’in li qamaak, jo’ li jachb’il ru kayac, li nokoxram li chaab’ilo’k sa’ musiq’ej.

Wi nokokana sa’ li qamaak, naqakanab’ xk’oxlankil li sumwank xoo’ok wi’ rik’in li Qaawa’, us ta naq rajlal nokot’ane’ xb’aan naq ink’a’ nokoru chixaqab’ankil qib’ sa’ tiikilal xb’aaneb’ li qamaak sa’ li qayu’am.

Jo’ chanchan li kayac naq kixjach rib’, tento naq taqatz’ap ru li k’a’ru k’atz’b’il sa’ li qayu’am. Wankeb’ junjunq li maak li neke’raj ru xjalb’al qak’a’uxl chi anchal wi’chik qach’ool chiru jalaneb’ chik.

Jo’kan naq, tento naq taqapatz’ qib’: B’ar wanko chirix li k’a’ru naqaj ut naqeek’a chirix li Kolonel ut lix k’anjel? Ma wanko jo’ chanchan laj Pedro naq ink’a’ kiraj xyeeb’al naq naxnaw ru li Jesukristo? Malaj ak yooko chi xik chi uub’ej toj reetal naq wan li qak’a’uxl ut li qajom jo’ kiwan rik’in chirix lix nimal ru xtaqlankil kik’ehe’ re xb’aan li Kolonel?⁸

Tento naq taqayal qaq’e chixpaab’ankileb’ chixjunil li taqlahom ut chixk’eeb’al qach’ool chirix li junjunq reheb’ li k’a’jo’ xch’a’ajkilal xpaab’ankileb’ choq’ qe. Li Qaawa’ taawanq chiqak’atq, tooxtenq’a sa’ rajb’al qu ut sa’ li qamajelal, ut wi naqak’ut chi anchal qach’ool li qajom ut naqab’eresi qib’ a’ yaal a’an, a’an tixk’e “li kʼaʼru qʼun [qametzʼew] choqʼ kawilal [chiqu].”⁹

Li ab’ink chiru a’an tixk’e qe li kawilal re naq toonumtaaq sa’ xb’een li maak. Jo’kan ajwi’, tento taqataw ru naq lix yalb’al rix li qapaab’aal naraj ru naq too’ab’inq, us ta chi kok’ aj xsa’ ink’a’ naqanaw chan ru too’elq.

Ninwotz eere jun na’leb’ li tooxtenq’a chi kuyuk toj sa’ roso’jik:

1. Rajlal kutan, tootijoq ut taqileb’ ru li loq’laj hu.

2. Rajlal xamaan, taqak’ul li loq’laj wa’ak rik’in jun yotʼbʼil chʼoolej ut tuulanil musiq’ej.

3. Rajlal po, taqatoj li qalajetqil ut eb’ li qamaatan re kuyuk sa’.

4. Rajlal wiib’ chihab’—rajlal chihab’ choq’ reheb’ li saaj—taqa’ak’ob’resi li qahu re xk’ulub’il chi ok sa’ li santil ochoch.

5. Chiru chixjunil li qayu’am, took’anjelaq sa’ lix k’anjel li Qaawa’.

Che’k’ojob’aaq taxaq li xninqal ru yaalil na’leb’ re li evangelio sa’ li qak’a’uxl, ut choowanq chi maak’a’ li k’atz’e’k li tixram li qab’eenik chiru li yu’am a’in.

Li elk chi uub’ej jo’ naraj li Qaawa’ wan lix tz’aq, ut ka’ajwi’ tooruuq chixk’ub’al rik’in xtojb’al li tz’aq a’an.

K’a’jo’ xnimal lin b’antioxihom xb’aan naq li qaKolonel Jesukristo kikuyuk toj sa’ roso’jik, xtz’aqob’resinkil ru lix nimal ru mayej aj tojol-ix.

A’an kixnumsi rahilal xb’aan li qamaak, li qarahilal, li yot’e’k, li qayajel, ut li qaxiw, jo’kan naq naxnaw chan ru qatenq’ankil, xwaklesinkil qach’ool, xk’ojob’ankil qach’ool, ut chan ru xk’eeb’al qametz’ew re naq tooruuq chi kuyuk ut chixkulb’al li koroon li k’eeb’ilaq reheb’ li ani ink’a’ q’axb’ileb’ ru.

Jalan jalanq li qayu’am chiqajunil. Sa’ junjunqal wan qahoonal re xnumsinkil li yalok-ix, re saho’k sa’ ch’oolej, re sik’ok-u, re numtaak sa’ xb’een li k’a’ru nokoxram, ut re xk’ulb’al li chaab’ilal nachal qe.

Yalaq k’a’ru yooko chixnumsinkil, ninch’olob’ xyaalal naq li qaChoxahil Yuwa’ rajlal yoo chixyeeb’al qe, “Nakatinra, nakatinxaqab’, wankin aawik’in. Maakanab’ xik chi uub’ej. Chajal aak’a’uxl ut chatkuyuq sa’ li b’e ak xink’ut aawe. Chi kama’an taqil qib’ wi’chik aran sa’ li qachoxahil ochoch.” Sa’ xk’ab’a’ li Jesukristo, amen.