អ្នកណាដែលកាន់ខ្ជាប់ដរាបដល់ចុងបំផុតវិញ អ្នកនោះនឹងបានសង្គ្រោះ

ដោយអែលឌើរ ក្លូឌ្យួ ឌី ហ្ស៊ីវិក

ក្នុងពួកចិតសិបនាក់

ចូរយើងមានចិត្តស្មោះត្រង់ចំពោះអ្វីដែលយើងបានជឿ និងយល់ដឹង ។

បងប្អូនប្រុសស្រីជាទីស្រឡាញ់ ខ្ញុំរីករាយយ៉ាងខ្លាំង ចំពោះឱកាសដើម្បីសម្ដែងអារម្មណ៍របស់ខ្ញុំដល់បងប្អូន ។

ជាច្រើនឆ្នាំកន្លងមកភរិយាខ្ញុំ និងខ្ញុំមានវត្តមាននៅក្នុងពិធីសម្ពោធពិព័រណ៍កុមារអន្តរកម្មនៅក្នុងសារមន្ទីរប្រវត្តិសាស្ត្រសាសនាចក្រនៅទីក្រុងសលត៍លេក ។ នៅចុងបញ្ចប់នៃពិធីនោះប្រធាន ថូម៉ាស អេស ម៉នសុនដើរទៅរកយើងហើយនៅពេលគាត់ចាប់ដៃយើងគាត់បាននិយាយថា « ចូរកាន់ខ្ជាប់ហើយអ្នកនឹងជ័យជម្នះ »—ជាការបង្រៀនដ៏ស៊ីជម្រៅ និងសេចក្ដីពិតមួយ ពិតណាស់ យើងទាំងអស់គ្នាអាចអះអាងបាន ។

ព្រះយេស៊ូវមានបន្ទូលអះអាងថា « អ្នកណាដែលកាន់ខ្ជាប់ដរាបដល់ចុងបំផុតវិញ អ្នកនោះនឹងបានសង្គ្រោះ »^១

កាន់ខ្ជាប់មានន័យថា « ស្ថិតស្ថេរក្នុងកិច្ចសន្យា ដើម្បីឲ្យបានពិតចំពោះព្រះបញ្ញត្តិទាំងឡាយនៃព្រះ ទោះជាមានសេចក្ដីល្បួង សេចក្ដីប្រឆាំង និងសេចក្ដីទំនាស់ក៏ដោយ » ។^២

ទោះជាអស់អ្នកដែលធ្លាប់មានបទពិសោធន៍ខាងវិញ្ញាណយ៉ាងខ្លាំង និងបានផ្តល់នូវការបម្រើយ៉ាងស្មោះក្តី ក៏ថ្ងៃណាមួយអាចធ្លាក់ចូលក្នុងភាពអសកម្មបានដែរ ប្រសិនបើពួកគេមិនកាន់ខ្ជាប់រហូតដល់ទីបញ្ចប់ ។ សូមឲ្យយើងចងចាំ និងចងចាំជានិច្ចនូវឃ្លាថា « វានឹងមិនកើតឡើងចំពោះខ្ញុំទេ » ។

នៅពេលព្រះយេស៊ូវគ្រីស្ទត្រាស់បង្រៀននៅក្រុងកាពើណិម « តាំងពីនោះមក មានសិស្សទ្រង់ជាច្រើន ដកខ្លួនថយចេញមិនតាមទ្រង់ទៀតទេ ។

នោះព្រះយេស៊ូវ មានបន្ទូលទៅពួកដប់ពីរនាក់ថា អ្នករាល់គ្នាចង់ថយទៅដែរឬ ? »^៣

ខ្ញុំជឿថាសព្វថ្ងៃនេះ ព្រះយេស៊ូវសួរយើងរាល់គ្នា ដែលជាអ្នកបានធ្វើសេចក្តីសញ្ញាពិសិដ្ឋជាមួយនឹងទ្រង់ថា « អ្នករាល់គ្នាចង់ថយទៅដែរឬ ? »

ខ្ញុំអធិស្ឋានសូមឲ្យយើងគ្រប់រូប ដោយការសញ្ជឹងគិតយ៉ាងជ្រៅ អំពីភាពអស់កល្បជានិច្ចដែលបានរក្សារទុកសម្រាប់យើង ចូរយើងឆ្លើយតបដូចជាស៊ីម៉ូនដែរថា ៖ « ព្រះអម្ចាស់អើយ តើយើងខ្ញុំនឹងទៅឯអ្នកណាវិញ ? គឺទ្រង់ហើយដែលមានព្រះបន្ទូលនៃជីវិតដ៏នៅអស់កល្បជានិច្ច » ។^៤

ចូរយើងមានចិត្តស្មោះត្រង់ចំពោះអ្វីដែលយើងបានជឿ និងយល់ដឹង ។ ប្រសិនបើយើងពុំទាន់បានរស់នៅ ស្របតាមចំណេះដឹងដែលយើងដឹងទេ ចូរយើងផ្លាស់ប្តូរទៅ ។ មនុស្សមានបាបដែលរឹងរូសក្នុងអំពើបាបរបស់ខ្លួន និងមិនប្រែចិត្តទេនោះ នឹងធ្លាក់ចូលទៅក្នុងភាពកខ្វក់កាន់តែជ្រៅ រហូតដល់សាតាំងក្លាយទៅម្ចាស់របស់ពួកគេ ដោយដកហូតចេញពីពួកគេនូវឱកាសដើម្បីប្រែចិត្ត ដើម្បីទទួលបានការអភ័យទោស និងទទួលបានពរជ័យនៃភាពអស់កល្បជានិច្ចគ្រប់បែបយ៉ាង ។

ខ្ញុំបានឮដំណោះសារជាច្រើនចេញពីមាត់របស់អស់អ្នកដែលឈប់ចូលរួមយ៉ាងសកម្មនៅក្នុងសាសនាចក្រ និងដែលបានបាត់បង់ចុក្ខវិស័យត្រឹមត្រូវនៃគោលបំណងរបស់យើងនៅលើផែនដីនេះ ។ ខ្ញុំសូមទូន្មានពួកគេឲ្យសញ្ជឹងគិត និងត្រឡប់មកវិញ ពីព្រោះខ្ញុំជឿថា គ្មាននរណានឹងអាចធ្វើការដោះសារចំពោះព្រះអម្ចាស់យើង ព្រះយេស៊ូវគ្រីស្ទបានឡើយ ។

ពេលយើងបានទទួលពិធីបុណ្យជ្រមុជទឹក យើងបានធ្វើសេចក្តីសញ្ញា—ពុំមែនជាមួយបុគ្គលណាម្នាក់ឡើយ ប៉ុន្តែជាមួយព្រះអង្គសង្គ្រោះវិញ ដោយសុខចិត្ត « លើកដាក់មកលើ [ ខ្លួនគេ ] នូវព្រះនាមនៃព្រះយេស៊ូវគ្រីស្ទ ដោយប្ដេជ្ញាថា នឹងបម្រើទ្រង់ដល់ចុងបំផុត » ។^៥

ការចូលរួមក្នុងការប្រជុំសាក្រាម៉ង់គឺជារបៀបដ៏សំខាន់មួយ ដែលយើងអាចវាយតម្លៃទៅលើការប្តេជ្ញាចិត្តរបស់យើងដើម្បីបម្រើទ្រង់ ភាពរឹងប៉ឹងខាងវិញ្ញាណរបស់យើងនិងការលូតលាស់នៃសេចក្ដីជំនឿរបស់យើងលើព្រះយេស៊ូវគ្រីស្ទ ។

ការទទួលទានសាក្រាម៉ង់គឺជាទង្វើសំខាន់បំផុត ដែលយើងធ្វើនៅថ្ងៃឈប់សម្រាក ។ ព្រះអម្ចាស់បានពន្យល់ប្រាប់អំពីពិធីបរិសុទ្ធនេះ ទៅកាន់ពួកសាវករបស់ទ្រង់ មុននឹងទ្រង់សុគត ។ ទ្រង់បានធ្វើដូចគ្នានៅលើទ្វីបអាមេរិកផងដែរ ។ ទ្រង់ប្រាប់យើងថា ប្រសិនបើយើងចូលរួមក្នុងពិធីបរិសុទ្ធនេះ វានឹងក្លាយជាទីបន្ទាល់មួយ ចំពោះព្រះវរបិតាថា យើងតែងតែចងចាំអំពីទ្រង់ជានិច្ច ហើយទ្រង់សន្យាថា យើងនឹងមានព្រះវិញ្ញាណរបស់ទ្រង់គង់នៅជាមួយយើង ។^៦

ក្នុងការបង្រៀនរបស់អាលម៉ាកូនទៅកាន់កូនប្រុសរបស់គាត់ឈ្មោះ ស៊ិបឡុន យើងរកឃើញពាក្យទូន្មានដ៏វាងវៃនិងការព្រមានដែលជួយយើង ឲ្យនៅតែមានភាពស្មោះត្រង់ចំពោះសេចក្តីសញ្ញារបស់យើងដូចនេះ ៖

« ចូរកូនប្រយ័ត្នកុំលើកខ្លួនឡើងទៅជាឆ្មើងឆ្មៃ មែនហើយ ចូរឲ្យឃើញថា កូនមិនអួតអាងក្នុងប្រាជ្ញាផ្ទាល់របស់កូន ឬក្នុងកម្លាំងដ៏ច្រើនរបស់កូនឡើយ ។

ចូរប្រើសេចក្ដីក្លាហាន ប៉ុន្តែកុំកោងកាច ហើយចូរឲ្យឃើញថា កូនទប់អស់ទាំងតណ្ហារបស់កូន ដើម្បីឲ្យកូនអាចបានពោរពេញ ទៅដោយសេចក្ដីស្រឡាញ់ ចូរឲ្យឃើញថា កូនទប់ខ្លួនកុំឲ្យធ្លាក់ទៅក្នុងការខ្ជិលច្រអូស » ។^៧

កាលពីប៉ុន្មានឆ្នាំមុន នៅពេលដែលខ្ញុំសម្រាកវិស្សមកាលខ្ញុំចង់ទៅជិះទូកកាយ៉ាក់លើកដំបូង ។ ខ្ញុំបានជួលទូកកាយ៉ាក់មួយ ហើយមានចិត្តរីករាយយ៉ាងខ្លាំង ខ្ញុំក៏បានរុញវាចុះទៅក្នុងសមុទ្រ ។

ពីរបីនាទីក្រោយមក រលកមួយបានធ្វើឲ្យទូកកាយ៉ាកក្រឡាប់ ។ ដោយប្រើកម្លាំងយ៉ាងខ្លាំង ទាំងដៃម្ខាងកាន់ចង្វា ហើយដៃម្ខាងទៀតចាប់ទូកកាយ៉ាកនោះខ្ញុំក៏អាចផ្ងារវាមកវិញ ។

ខ្ញុំបានព្យាយាមអុំម្តងទៀត ប៉ុន្តែគ្រាន់តែពីរបីនាទីក្រោយមក ទូកកាយ៉ាកក៏បានក្រឡាប់ម្តងទៀត ។ ខ្ញុំខំប្រឹងទាំងល្ងិតល្ងង់ ទាំងគ្មានជោគជ័យសោះ រហូតដល់មានមនុស្សម្នាក់ទៀតដែលយល់ពីទូកកាយ៉ាកបានប្រាប់ខ្ញុំថា មានស្នាមប្រេះនៅលើទូក ហើយទឹកបានហូរចូល បានជាវាមិននឹង និងពិបាកគ្រប់គ្រងដូច្នេះ ។ ខ្ញុំបានទាញទូកកាយ៉ាកមកច្រាំងវិញ ហើយបានដកឆ្នុកចេញ មើលចុះពិតជាមានទឹកច្រើនក្នុងទូកមែន ។

ខ្ញុំគិតថា ពេលខ្លះយើងធ្វើដំណើរឆ្លងកាត់ជីវិតជាមួយអំពើបាបដែលដូចជាទឹកជ្រាបក្នុងទូកកាយ៉ាករបស់ខ្ញុំ វារារាំងការរីកលូតលាស់ខាងវិញ្ញាណរបស់យើង ។

ប្រសិនបើយើងរឹងរូសក្នុងអំពើបាបរបស់យើង យើងភ្លេចសេចក្តីសញ្ញាដែលយើងបានធ្វើជាមួយព្រះអម្ចាស់ ទោះជាយើងព្យាយាមចង់រីកចម្រើនក្ដី នោះព្រោះតែដំណើរឃ្លីងឃ្លោងដែលអំពើបាបទាំងនោះបង្កើតឡើងក្នុងជីវិតរបស់យើង ។

ដូចជាស្នាមប្រេះលើទូកកាយ៉ាករបស់ខ្ញុំដែរ កំហុសទាំងឡាយក្នុងជីវិតយើងត្រូវតែយកមកដោះស្រាយ ។ អំពើបាបខ្លះនឹងតម្រូវឲ្យមានការប្រឹងប្រែងប្រែចិត្តឲ្យខ្លាំង ។

ហេតុដូច្នេះហើយ យើងត្រូវតែសួរខ្លួនយើងថា ៖ តើយើងស្ថិតនៅត្រង់ចំណុចណាទាក់ទងទៅនឹងអាកប្បកិរិយារបស់យើងចំពោះព្រះអង្គសង្គ្រោះ និង កិច្ចការរបស់ទ្រង់ ? តើយើងស្ថិតនៅក្នុងស្ថានភាពរបស់ពេត្រុស ពេលដែលគាត់បានបដិសេធព្រះយេស៊ូវគ្រីស្ទនោះឬ ? ឬមួយយើងបានបោះជំហានទៅមុខរហូតទៅដល់ចំណុចដែលយើងមានអាកប្បកិរិយា និងការប្តេជ្ញាចិត្តដែលគាត់បានមាន ក្រោយពី « ការត្រាស់បង្គាប់ដ៏មហិមា » ដែលគាត់បានទទួលពីព្រះអង្គសង្គ្រោះ ?^៨

យើងត្រូវតែខិតខំគោរពតាមបញ្ញត្តិទាំងអស់ ហើយយកចិត្តទុកដាក់យ៉ាងផ្ចិតផ្ចង់ចំពោះបញ្ញត្តិដ៏ពិបាកបំផុត សម្រាប់ឲ្យយើងកាន់តាម ។ ព្រះអម្ចាស់នឹងគង់នៅក្បែរយើង ជួយយើងក្នុងគ្រាចាំបាច់ និង គ្រាទន់ខ្សោយ ហើយប្រសិនបើយើងបង្ហាញនូវបំណងស្មោះ និងអនុវត្តស្របតាម នោះទ្រង់នឹងធ្វើឲ្យ « អ្វីដែលទន់ខ្សោយក្លាយទៅជាខ្លាំងពូកែវិញ » ។^៩

ការគោរពប្រតិបត្តិនឹងផ្តល់កម្លាំងឲ្យយើងយកឈ្នះលើអំពើបាប ។ យើងក៏ត្រូវយល់ដែរថា ការសាកល្បងនៃសេចក្តីជំនឿរបស់យើង តម្រូវឲ្យយើងគោរពតាម ទោះមិនដឹងអំពីលទ្ធផលក្ដី ។

ខ្ញុំសូមផ្តល់យោបល់នូវមធ្យោបាយមួយ ដែលនឹងជួយយើងឲ្យស៊ូទ្រាំដល់ទីបញ្ចប់ ៖

អធិស្ឋាន ហើយអានព្រះគម្ពីររៀងរាល់ថ្ងៃ ។
ទទួលទានសាក្រាម៉ង់ដោយចិត្តសង្រេង និងវិញ្ញាណទន់ទាប រៀងរាល់សប្តាហ៍ ។
ថ្វាយដង្វាយមួយភាគក្នុងដប់ និងដង្វាយតមអាហាររបស់យើងរៀងរាល់ខែ ។
បន្តសុពលភាពប័ណ្ណចូលព្រះវិហារបរិសុទ្ធ—រៀងរាល់ពីរឆ្នាំ—ហើយជារៀងរាល់ឆ្នាំសម្រាប់យុវវ័យ ។
បម្រើក្នុងកិច្ចការរបស់ព្រះអម្ចាស់ ពេញមួយជីវិតរបស់យើង ។

សូមឲ្យសេចក្ដីពិតដ៏មហិមានៃដំណឹងល្អទប់ចិត្តគំនិតរបស់យើង ហើយសូមឲ្យជីវិតរបស់យើងបានស្អាតពីកំហុសទាំងឡាយ ដែលនឹងរារាំងដំណើរសុវត្ថិភាពរបស់យើង ឆ្លងកាត់សមុទ្រនៃជីវិតនេះឡើយ ។

ជ័យជម្នះតាមរបៀបរបស់ព្រះអម្ចាស់មានតម្លៃមួយ ហើយរបៀបតែមួយដើម្បីសម្រេចបានជ័យជម្នះនេះគឺត្រូវបង់ថ្លៃតម្លៃនោះ ។

ខ្ញុំពិតជាមានអំណរគុណដែលព្រះអង្គសង្គ្រោះរបស់យើងបានកាន់ខ្ជាប់រហូតដល់ទីបញ្ចប់ ដោយបំពេញនូវពលិកម្មធួនដ៏មហិមារបស់ទ្រង់ ។

ទ្រង់បានរងគ្រោះសម្រាប់អំពើបាប ការឈឺចាប់ ការធ្លាក់ទឹកចិត្ត ភាពតានតឹង ភាពឈឺចាប់ និងការភ័យខ្លាចរបស់យើង និងហេតុដូច្នេះហើយ ទ្រង់ជ្រាបអំពីរបៀបជួយយើង ដើម្បីឲ្យយើងអាចកាន់ខ្ជាប់ និង ទទួលបានមកុដ ដែលត្រូវបានរក្សាទុកសម្រាប់អស់អ្នកដែលមិនបានទទួលចុះចាញ់ ។

ជីវិតមានសភាពខុសគ្នាចំពោះយើងម្នាក់ៗ ។ យើងរាល់គ្នាមានគ្រាទុក្ខលំបាកគ្រាមានសុភមង្គល គ្រាធ្វើការសម្រេចចិត្តគ្រាយកឈ្នះឧបសគ្គ និងគ្រាឈោងដៃចាប់យកឱកាសនានា ។

ថ្វីបើស្ថានភាពផ្ទាល់ខ្លួនរបស់យើងមានទំហំប៉ុណ្ណាក៏ដោយ ខ្ញុំសូមថ្លែងទីបន្ទាល់ថា ព្រះវរបិតាសួគ៌កំពុងតែមានបន្ទូលជាញយៗថា « បិតាស្រឡាញ់បុត្រ ។ បិតាគាំទ្របុត្រ ។ បិតាគង់នៅជាមួយបុត្រ ។ សូមកុំចុះចាញ់ ។ ប្រែចិត្ត និងស៊ូទ្រាំនៅក្នុងផ្លូវដែលបិតាបានបង្ហាញដល់បុត្រចុះ។ បិតាសូមបញ្ជាក់ដល់បុត្ររាល់គ្នាថា យើងនឹងជួបគ្នាម្តងទៀត នៅក្នុងព្រះដំណាក់សេឡេស្ទាលរបស់បិតា » ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។