En Nra Athamgil nga mada’ ko Tomur e Rayag e Yafos Ngak

Pi walageg, gube pining e magar ngomed ni nge yag ni ngu weliy boech e pin’en ni gube thamiy ngomed.

Boech e duw kofram, gag nge pbin rog e gun’ew ko ba mu’ulung ko bing nifan ko fare History Museum u Salt Lake City ni kan fal’eg nifen e pi’in nib bitir. Tomren fare mu’ulung, me yibi President Thomas S. Monson ngomow, ma nap’an ni ke rurug pa’mow, me ga’ar, “Athamgil, ma gara gel”—ban’en nib riyul’, arogon, gadad gubin ma rayog ni ngad michegned.

Yesus Kristus e micheg nag ngodad ni “En nra athamgil nge mada’ ko tomur e rayag e yafos ngak.”¹

Ni ngan athamgil e be yip’fan “ni ngan par nib yul’yul’ ko fapi motochiyel ku Got ma dab bin rin’ e togan, fa ban’en nib kireb, fa tin ku mooniyan.”²

Ta’areb rogon ngak e pi cha’ ni kar thamiyed e thothup nib gel fa kar pigpig gad nib alamrin rogon ya raboran ma yad ra muul ni fa’an dab ra athamgil gad nge mada’ ko tomur. Gubin ngiyal’ ma thingar da ted u wun’dad nge gum’ircha’endad ere bugi thin ney “Dariy bi’id ma ra buch e biney rog.”

Nap’an ni ke machib Yesus Kristus u Kapernaum, “bo’or gachalpen ni sul, ma dan kur un’ed ngak.

“Ma aram me ga’ar Jesus ngak fare ragag nge l’agruw i gachalpen, Ma gimed ba’adag ni ngkum paged gag ngam marod?”³

Mich u wan’ug ngay ni daba’, Yesus Kristus ke fith ngodad e tin ba’aray e gidii’ nibe leak Ir, “Ma gimed ba’adag ni ngkum paged gag ngam marod?”

Gube meybil ni gadad gubin, ni ri ngad lemniged ko mang e bay ko fare yafos ni darmamus nifan ngodad, n’en ni ngog e woed e n’en ni yog Simon Peter: “Somol, i mini’ e gamad ra yan ngak? ya gur e bay fapi thin rom ni ir e ma pi’ e yafos ndariy n’umngin nap’an.”⁴

Ngad pired ni mich u wan’dad ko tin ni gadad manang. Fa’an ndarn pired ni woed rogon ni gadad manang, thingarda thil gad. Pi ta denen ni ma rin’ e tin denen, ma darma kalngan’, ma kan nga’ar nga fithik boech e tin m’akalit ban’en, nge mada’ ko ngiyal’ ni ke fed rad Mooniyan, ma be momaw’ ni ngar kalngan’gad, min n’agfan rorad, mab momaw’ ni ngan taw’ath nagrad ko tin ni manemus.

Ke yo’or e n’en ni kug rung’ag ko pi cha’en ni kar tal gad i yib nga Galasia ma kar pagtlined fan ni gadad bay u roy u dakan e re fayleng ney. Gube pining rad ni ngar leam gad miyed sul, ya mich u wun’ug ngay ni dariy be’ ni ra yog ni nge salpey l’ugun nga mit Somoel, Yesus Kristus.

Nap’an ni kad tawfe gad, ma kad fal’egned e m’ag—ni gathi fan ngak be’ ni demtrug machan fare Tathapeg, ni magaran’dad ngay “ni ngad feked nga dakandad fithngan Yesus Kristus, min athamgil ni ngan pigpig ngak nga mada’ ko tomur.”⁵

Yan ko sacrament e reb wo’en fare kiy ni rayog ni ngad guyed ni gadad be pigpig Ngak, gelngin e thothup, nge mich rodad ni be ga’i yan ngak Yesus Kristus.

Ngan k’ay fare sacrament e ir e n’en ni tha’abi ga’fan ko fare rran ko Madnam. Fare Somoel e weliy rogon e biney e m’ag ngak fapi Gachalpen u m’on ni yim’. Ta’areb rogon ni rrin u dakan fare nam nu Mariken. Ke yog ngodad ni fa’an ni gadad ra rin’ ni aray rogon, mab mich ngak e Chitamangdad ni gubin ngiyal’ ma gadad ra lem Nag, make micheg ni, woed rogon, ni gadad ra thapeg fare Thothup rok ni nge par rodad.⁶

Ulan fapi machin rok Alma nib bitir ngak fak Shiblon, kad piri’egned e fanow nge ta’amagaran ni rayog ni nge ayuwegdad ngad pired ni gadad ba yul’yul’ ko fapi m’ag rodad:

“Muguy rogon ni nge siy mu langlang ngalang ko yowlop; arragon, muguy rogon ni nga dab mu ‘uf ko gonop rom, ara mu ‘uf nga gelingim.

“Mu pag nga kanawo, machane dab mu thum’ ngaru’; ma ngam guy rogon ni ngam gonopiy rogon gubin e pi ‘arar rom, ni nge yag ni ngam sug ko murnguy; muguy rogon ngam tilem u orel ko gamead.”⁷

In a duw kafram, u nap’an ni gubay ko vacation, ma rug ba’adag ni ngu wan ko kayak ma iraray e somm’on rog. Ere gu rent nag e kayak, ni karug fal’falan’, mug wan nga maday.

Dani n’uw nap’an, me yib e n’ew nge thray fare kayak. Ni kari mus gelngig, ni gube kol fare mamon nga barba’ i pa’ag me barba’ e fare kayak, fani yag ni ngu sak’iy.

Ma kug gay rogon biyay ngu ‘eg nag fare kayak, mani dani n’uw nap’an biyay, maki thig biyay fare kayak. Ma kug be ul’ul ni gube gay rogon biyay, ma dani fel’ wa’athag, nge mada’ ko ngiyal’ ni be’ ni mnang fan e kayak e yog ngog ni sana bay e mukur ko fare kayak nibe yib e rran ngalngin, arfan nib momaw’ rogon ni ngak mamon nag. Mug girngiy fare kayak nge dap e l’ay mug bing opngen, fin aram, me yib e rran u langin nguwen.

Gube lemnang ni boech e ngiyal’ ma lane yafos radod e bay e denen riy ni darn ninged, ni woed fare mukur ko kayak rog, ni be momaw’ nag ni nge mon’og.

Fa’an ngadad ra ul’ul ko denen rodad, magdad pagtalin fare m’ag ni kad michmich niged ngak Somoel, ndariy fan urngin yay ni gadad ba gay rogon ni bachan fapi denen nibay ulan e yafos rodad.

Ni woed fare mukur ulan fare kayak rog, fapi mukur ulan e yafos rodad ab tu’uf ni ngan fal’eg. Boech e denen ab tu’uf ni ngan sap ngay nib alamrin rogon nga boch.

Thingar fithed dad: Ngongol rodad ab sap ngak e murwel Rok Somoel? Gadad boed Peter ni pi’ keru’ ngak Yesus Kristus? Fa kad mon’og gad ke mada’ ko gin ni ngongol nge athamgil rodad e bay ni woed fare “tawa’ath nib mangil” nike yib rok fare Tathapeg?⁸

Thingar da fol gad ko fapi motochiyel ni gubin magdad sap ko tin ba’aray nib momaw’ rodad ni ngad koled falan. Fare Somoel ab bay u charen dad, nibe ayuweg dad ko tin nib tu’uf nge tin ni gadad mo’owar riy, ma fa’an ni gadad ra dag ni gadad ba gay rogon, Ma ra guy rogon “ni pin’en nib mo’owaer rodaed e ra mang gelingdaed.”⁹

Fol e ra pi’ gelngin dad ma tharbiy e denen. Thingar da nangfaned ni pi mo’owar ulan e yafos rodad ab tu’uf ni ngad fol gad, dan daninged ko mang e ra buch.

Gube pi’ kanawo’en nrayog ni ngad athamgil gad nge mada’ ko tomur:

1. Gubin e rran, meybil mag be’eg fare thin nib thothup.

2. Gubin e wik, mu fek fare sacrament ni m’ingaen’ nge kalngaen’.

3. Pi’ed e maligach nge fast offering ni gubin e pul.

4. Gubin l’agruw e duw—reb e duw e fan e fal’yangren—be’ech nag fare tempel recommend.

5. Ulan e yafos rodad, pigpig gad ko murwel rok fare Somoel.

Nge paer ni fare gaspal nib riyul’ e nge paer ko tafney rodad, ma paer ni yafos rodad e dariy fare mukur riy ni be talagdad ko fare malekag rodad ulan fare daay.

Mon’og ko kanawo’en Somoel ab tolang pilwon, ma ngiyal’ ni rayog ngodad e ngiyal’ ni kad rin’ed ni aray rogon.

Gube og nag e magar ngak fare Tathapeg ni athamgil nge mada’ ko tomur, me mu’ nag e maligach rok nib gaa’.

Ke gafgow ni fan e pi denen rodad, kirban’, a’mith, m’ar, nge mrus, ma Ir e manang rogon ni rayog ni nge ayuweg dad, me pi’ e athamgil nga laniyan’dad, nge rogon ni ra pi’ gelngin dad ni ngayog ni ngad ul’ul’ gad ngayog fare krown ni fan ngak e pi cha’en ni kar gel gad.

Gadad gubin mab thilthil rogon e yafos rodad. Gadad gubin mab thilthil e ngiyal’ ko lumel rodad, ngiyal’ ni ngan fal’falan’, ngiyal’ ni ngan ngongliy bana’en, ngiyal’ ni ngan mon’og, nge nigyal’ nibe yib e tin nib mangil.

Demtrug rogon e tin nibe buch rodad, gube micheg ni Chitamangdad ni bay u Tharmiy e be yoeg bo’or ya’ay, “Gab tu’uf rog, ma gube sustain nigem, ma gubay rom. Dam mu tal. Kalngan’um mag athamgil ni woed rogon ni kug dag ngom. Ma gube micheg ni gadow ra mada’ biyay ulan fare tabinaew u celestial.” U dakan fithngan Yesus Kristus, amen.